Omeni muiti yu e du fu abi wan krin konsensi?

„GRANLANTI kisi a komando fu teki 20.000 Brasyon real (Brasyon moni) baka.” Na aparti sani disi ben skrifi na ini Correio do Povo, wan koranti fu Brasyonkondre. A pisi tori di skrifi drape, e taki fu Luiz Alvo de Araújo, wan man di abi a wroko fu tyari brifi go na sma oso. A man disi ben seri wan pisi gron gi granlanti. Baka di Luiz ben seti den papira fu lanti ben kan kisi a pisi gron, dan a ben fruwondru srefisrefi fu si taki lanti ben pai en 20.000 Brasyon real (dati na sowan 8000 Amerkan dala) moro leki a moni di den ben kruderi!

Ma a no ben makriki fu meki lanti teki a moni dati baka. Baka di Luiz ben go na difrenti lantikantoro sondro bun bakapisi, dan a ben kisi a rai fu teki wan afkati èn fu go seti a tori na fesi krutu. „A de krin taki wan sma ben meki wan fowtu. Ma fu di a fasi fa sani e waka na den lantikantoro frekti srefisrefi èn sani no orga bun, meki nowan sma no ben sabi fa fu lusu a problema.” Dati na san a krutuman ben taki. A krutuman ben gi lanti a komando fu teki a moni baka èn fu pai a moni di ben de fanowdu fu tyari a tori disi go na fesi krutu. A krutuman ben taki tu: „Disi na a fosi tron di mi abi fu krutu so wan afersi.”

Luiz, di na wan Kotoigi fu Yehovah, e taki moro fara: „Mi konsensi di e pusu mi fu handri akruderi Bijbel gronprakseri, no ben o gi mi pasi fu hori wan sani di no de fu mi. Mi ben musu pruberi fu gi lanti a moni baka.”

Kande furu sma no man frustan fa a man disi ben kan denki na so wan fasi. Ma a Wortu fu Gado e sori taki tru Kresten musu tan hori wan krin konsensi na ini afersi di abi fu du nanga grontapu tirimakti (Romesma 13:5). Yehovah Kotoigi abi a fasti bosroiti fu tan hori ’wan krin konsensi, fu di den wani tyari densrefi na wan opregti fasi na ini ala sani’.—Hebrewsma 13:18.