A waarheid na wan warti sani gi yu?
A waarheid na wan warti sani gi yu?
„Unu sa sabi a waarheid, èn a waarheid sa meki unu kon fri.”—YOHANES 8:32.
1. Fa Pilatus ben gebroiki a wortu „waarheid” tra fasi leki Yesus?
„SAN na waarheid?” Di Pilatus ben poti na aksi disi, dan a ben wani sabi nomo san ben tru. Ma leti na fesi, Yesus ben taki: „Na fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid” (Yohanes 18:37, 38). Tra fasi leki Pilatus, Yesus ben taki fu „a waarheid”. A ben taki fu waarheid di e komoto fu Gado.
A fasi fa grontapu e si a waarheid
2. Sortu fruklari fu Yesus e sori taki a waarheid na wan warti sani?
2 Paulus ben taki: „A no ala sma abi bribi” (2 Tesalonikasma 3:2). Wi kan taki a srefi sani tu fu a waarheid. Srefi te sma e kisi na okasi fu kon sabi waarheid fu Bijbel, toku furu fu den e weigri nomonomo fu teki en. Ma a waarheid na wan trutru warti sani! Yesus ben taki: „Unu sa sabi a waarheid, èn a waarheid sa meki unu kon fri.”—Yohanes 8:32.
3. Na sortu warskow wi musu gi yesi te sma wani kori wi nanga den leri fu den?
3 Na apostel Paulus ben taki dati wi no musu suku a waarheid na ini libisma denki noso gwenti (Kolosesma 2:8). Iya, den sani dati e kori sma. Paulus ben warskow den Kresten fu Efeise taki, efu den ben o frutrow tapu libisma denki nanga gwenti, dan den ben o de leki beibi na yeye fasi ’di e slenger go-kon neleki den skwala fu se . . . èn di e bruya nanga ala sortu leri di e kon fu a bedrigifasi fu libisma, noso a triki wroko fu sma di e sidon prakseri ogri’ (Efeisesma 4:14). Na ini a ten disi, sma di e gens a waarheid fu Gado, e sorgu taki a „bedrigifasi fu libisma” e tan abi krakti tapu trawan. Den sortu gensman disi e suku fu abi krakti tapu den sani di sma e bribi, tapu den gwenti fu den, èn sosrefi tapu a fasi fa den e handri. Den e drai tori na wan koni fasi, èn den e meki leitori gersi tru tori. Fu di den sma disi e suku fu abi krakti tapu trawan na so wan triki fasi, meki wi musu ondrosuku den Buku fu Bijbel fayafaya.
Kresten nanga grontapu
4. Suma na den sma di kan kon sabi a waarheid, èn san den sma disi musu du te den kon sabi dati?
4 Yesus Krestes ben begi Yehovah gi den wan di tron disipel fu en: „Santa den nanga yepi fu waarheid; yu wortu na waarheid” (Yohanes 17:17). Den sma disi ben o kon santa, noso den ben o poti aparti, fu dini Yehovah èn fu meki en nen nanga en Kownukondre bekènti (Mateyus 6:9, 10; 24:14). Aladi a no ala sma abi a waarheid fu Yehovah, toku ala sma di e suku en kan kisi en. A no abi trobi sortu kondre den komoto noso fu sortu ras den de. Na apostel Petrus ben taki: „Mi sabi seiker taki Gado no e teki sma partèi, ma na ini ibri nâsi a sma di e frede en èn di e wroko regtfardikifasi, de bun na en.”—Tori fu den Apostel 10:34, 35.
5. Fu san ede sma e frufolgu Kresten so furu?
5 Kresten e prati waarheid fu Bijbel nanga trawan, ma a no ala sma e warderi dati. Yesus ben warskow: „Den sa gi unu abra na banawtu èn den sa kiri unu, èn unu sa de sani di nowan nâsi no wani si na ai fu mi nen ede” (Mateyus 24:9). Na ini 1817, Yohanes R. Cotter, wan kerkiman fu Ierland, ben taki fu a bijbeltekst disi: „Den [Kresten] ben du muiti fu kenki a libi fu sma nanga yepi fu a preikiwroko fu den. Ma den sma no ben warderi a muiti dati. Na presi fu dati, den no ben lobi den disipel kwetikweti, èn den ben e frufolgu den fu di den disipel ben tyari den takrudu fu den kon na krin.” Den frufolguman disi no e „teki a lobi fu a waarheid, so taki den ben sa kan kisi frulusu”. Fu di den no e du dati, meki „Gado e gi pasi meki trawan kori den, so taki den e bribi a lei, so taki den alamala sa kisi krutu fu di den no ben bribi a waarheid ma ben feni onregtfardikifasi bun.”—2 Tesalonikasma 2:10-12.
6. Sortu lostu wan Kresten no musu kweki?
6 Na apostel Yohanes e frumane den Kresten di e libi na ini a grontapu disi di no abi lobi gi sma: „No lobi grontapu noso den sani na ini grontapu. . . . Ala sani na ini grontapu — a lostu fu a skin nanga a lostu fu den ai nanga a prodo di wan sma e prodo nanga den sani di a abi fu tan na libi, no e komoto fu a Tata, ma e komoto fu grontapu” (1 Yohanes 2:15, 16). Di Yohanes ben taki fu „ala sani”, dan dati trutru ben wani taki ’ala sani’. Fu dati ede wi no musu kweki lostu gi nowan enkri sani fu a grontapu disi di kan hari wi puru fu a waarheid. A rai fu Yohanes sa abi krakti tapu a libi fu wi te wi e gi yesi na dati. Fa so?
7. San sabi fu a waarheid e meki reti-ati sma du?
7 Na ini a yari 2001, Yehovah Kotoigi na heri grontapu hori moro leki fo nanga afu milyun oso-bijbelstudie ibri mun. Den leri difrenti sma nanga grupu fu sma san Gado e aksi fu den, so taki den kan kisi libi. Leki bakapisi fu dati, 263.431 sma teki dopu. A leti fu a waarheid kon tron wan warti sani gi den nyun disipel disi. Den tapu fu abi demakandra nanga takru kompe, èn den tapu nanga den someni takru sani fu a grontapu disi di e gi Gado syen. Sensi den teki dopu, den go doro fu libi akruderi den markitiki di Yehovah e poti gi ala Kresten (Efeisesma 5:5). A waarheid warti so gi yu?
Yehovah e sorgu wi
8. Fa Yehovah feni a diniwroko di wi e du gi en? Fu san ede wi e handri nanga koni te wi e ’suku fosi a kownukondre’?
8 Aladi wi abi fowtu, toku Yehovah abi sari-ati nanga wi èn a e warderi a diniwroko di wi e du gi en. Na wan agersi fasi Yehovah e saka ensrefi fu hari wi kon krosibei na en. Nanga dati a e leri wi taki wi musu abi prakseri di e kruderi nanga den hei markitiki fu en (Psalm 113:6-8). Yehovah e gi wi pasi sosrefi fu tron mati fu en, èn a e pramisi wi taki a sa sorgu wi te wi e „tan suku fosi a kownukondre nanga en regtfardikifasi”. Te wi e du disi, èn te wi e wai pasi gi sani di kan pori a yeyefasi fu wi, dan a e pramisi wi: „Ala den tra sani disi unu sa kisi tu”.—Mateyus 6:33.
9. Suma na „a getrow èn koni srafu”? Fa Yehovah e gebroiki a „srafu” disi fu sorgu wi?
9 Yesus Krestes ben teki den 12 apostel fu en, èn nanga dati a ben poti a fondamenti fu a gemeente fu salfu Kresten di kon kisi a nen „na Israel fu Gado” (Galasiasma 6:16; Openbaring 21:9, 14). Bakaten Paulus taki fu en leki „a gemeente fu a libi Gado, wan pilari nanga wan fondamenti fu a waarheid” (1 Timoteyus 3:15). Yesus ben taki dati den memre fu a gemeente dati na „a getrow èn koni srafu” èn sosrefi „a getrow basya, a koniwan”. Yesus ben taki dati a getrow srafu dati ben musu gi den Kresten a „nyanyan fu den di den abi fanowdu na a reti ten” (Mateyus 24:3, 45-47; Lukas 12:42). Te wi no e nyan, dan wi e dede. Sosrefi, te wi no e teki yeye nyanyan, dan wi sa kon swaki tu èn wi sa dede na yeye fasi. Sobun, a seti fu „a getrow èn koni srafu” na wan tra sani di e sori krin taki Yehovah e sorgu wi. Meki wi abi warderi ala ten gi a prenspari yeye nyanyan disi di wi e kisi nanga yepi fu a „srafu” dati.—Mateyus 5:3.
10. Fu san ede a prenspari fu de na den konmakandra ala ten?
10 Fu man teki yeye nyanyan, dan wi musu studeri Bijbel. Wi musu abi demakandra sosrefi nanga tra Kresten èn wi musu go na den gemeente konmakandra. Yu sabi bun ete san yu ben nyan siksi mun noso siksi wiki pasa? Kande yu no sabi moro. Ma awinsi san yu ben nyan, a yepi yu fu tan krakti. Èn kande yu nyan den srefi sortu sani sensi a ten dati. Na so a de tu nanga a yeye nyanyan di wi e kisi na den Kresten konmakandra fu wi. Kande wi no man memre ibri sani di wi yere na den konmakandra. Èn a kan taki wi yere den srefi sortu sani disi furu tron kaba. Ma den sani disi na yeye nyanyan di wi abi tranga fanowdu, so taki sani e waka bun nanga wi na yeye fasi. Wi e kisi bun yeye nyanyan ala ten na den konmakandra fu wi, èn wi e kisi dati na a yoisti ten.
11. Sortu frantwortu wi abi te wi e go na den Kresten konmakandra?
11 Wi abi wan frantwortu tu te wi e go na den konmakandra. Kresten e kisi a frumane fu ’gi makandra deki-ati’. Den musu gi trawan na ini a gemeente deki-ati fu „sori lobi èn fu du bun wroko”. Te wi sreka wisrefi gi ala den Kresten konmakandra, te wi e go na den konmakandra disi, èn te wi e teki prati na den sosrefi, dan a bribi fu wi e kon moro tranga èn trawan e kisi deki-ati (Hebrewsma 10:23-25). Son sma de leki yongu pikin di e nyan soso den sani di den lobi. A kan, taki den sma disi musu kisi deki-ati doronomo fu teki yeye nyanyan (Efeisesma 4:13). Wi e handri na wan lobi-ati fasi te wi e gi den sma disi a deki-ati dati te a de fanowdu, so taki den kan tron lepi Kresten. Na apostel Paulus ben skrifi fu den sma disi: „Tranga nyanyan de gi lepi sma, gi den wan di, fu di den gebroiki a koni fu den fu si sani krin, ben leri fu man si krin san bun èn san ogri.”—Hebrewsma 5:14.
Fa fu sorgu wisrefi na yeye fasi
12. Suma abi a frantwortu te fu kaba fu sorgu taki wi e tan na ini a waarheid? Tyari disi kon na krin.
12 A trowpatna fu wi, noso a papa nanga mama fu wi kan gi wi deki-ati fu tan na tapu a pasi fu a waarheid. Sosrefi, gemeente owruman kan yepi wi nanga rai, fu di wi na memre fu na ipi fu skapu di den musu luku (Tori fu den Apostel 20:28). Ma suma abi a frantwortu te fu kaba, fu sorgu taki wi e tan tyari wi libi akruderi a waarheid? Fu taki en leti, ibriwan fu wi abi a frantwortu dati. Dati de so awansi sani e waka bun, èn awansi problema e miti wi. Luku a tori di e kon now.
13, 14. Fa wi kan kisi yepi na yeye fasi te wi e prakseri na ondrofenitori fu wan yongu skapu?
13 Na ini Skotland, wan tu yongu skapu ben e nyan grasi na ini wan weigron. Wan fu den yongu skapu ben waka go te na a lanki fu wan bergi, èn a fadon go na ondrosei. A no ben kisi mankeri, ma a ben frede èn a no ben man kren kon baka na tapusei. Sobun, a bigin bari. A mama fu en yere dati, èn ensrefi bigin bari teleki a skapuman kon teki a yongu skapu.
14 Poti prakseri na den sani di pasa. A yongu skapu ben bari fu kisi yepi, a mama skapu bigin bari tu, èn a skapuman di ben yere dati, go yepi a yongu skapu wantewante. A yongu meti nanga a mama fu en ben man si sortu ogri ben kan pasa, èn den bari wantewante fu kisi yepi. Efu den skapu ben man du dati, dan fa a de nanga wi? Wi no musu suku yepi tu te wi e fadon na yeye fasi, noso te Satan e tyari problema kon na wi tapu wantronso? (Yakobus 5:14, 15; 1 Petrus 5:8). Wi no musu draidrai fu du dati, spesrutu te wi no abi nofo ondrofeni fu di wi yongu, noso fu di wi no de so langa na ini a waarheid ete.
Wi e tron koloku sma te wi e teki a tiri fu Gado
15. Fa wan uma ben firi di a bigin go na den Kresten konmakandra?
15 Prakseri a warderi di den sma di e dini a Gado fu waarheid abi, fu di den kon frustan Bijbel èn fu di den kisi wan korostu firi na ini den ati leki bakapisi fu dati. Wan uma fu 70 yari, di ben de wan memre fu a Kerki fu Ingrisikondre en heri libi langa, ben wani studeri Bijbel nanga wan Kotoigi fu Yehovah. Heri esi a kon sabi taki a nen fu Gado na Yehovah. A ben taki „Amen” tu na a kaba fu den opregti begi di a ben e yere na ini a Kownukondre zaal. Fu di den sani disi trutru ben naki en ati, meki a taki: „Unu no e taki fu Gado neleki a de tumusi fara fu libisma, ma unu e taki fu en neleki a de wan lobi mati di de leti na wi mindri. Noiti mi ben abi a firi disi.” Wi kan fruwakti taki na uma disi noiti no sa frigiti a krakti di a waarheid ben abi na en tapu na a bigin. Meki wi noiti no frigiti tu o warti a waarheid ben de gi wi na a bigin di wi teki en.
16. (a) San ben kan pasa efu wi e suku nomo fu meki furu moni? (b) Fa wi kan feni trutru koloku?
16 Furu sma e bribi taki den ben o de moro koloku efu den ben abi moro moni. Ma efu wi e suku nomo fu meki furu moni, dan wi kan tyari „furu sari” kon na wi tapu (1 Timoteyus 6:10, Da Bijbel na ini Sranantongo). Prakseri omeni sma e bai lot, omeni fu den e teki a moni fu den go dòbel. Prakseri sosrefi omeni sma no e denki fosi den poti moni na ini ala sortu bisnis, soso fu di den wani meki bun furu moni. Wan tu sma nomo e kon gudu trutru. Ma furu tron den sma disi srefi e si taki a gudu di den kisi wantronso, no e meki den koloku. Wi e feni trutru koloku te wi e du a wani fu Yehovah. Wi musu wroko makandra tu nanga a Kresten gemeente di e kisi tiri fu a santa yeye fu Yehovah èn di e kisi yepi sosrefi fu den engel fu en (Psalm 1:1-3; 84:4, 5; 89:15). Te wi e du disi, dan dati kan tyari blesi kon di wi no ben fruwakti. Yu abi nofo warderi gi a waarheid fu man kisi den blesi disi?
17. Petrus ben tan na ini na oso fu Simon, wan man di ben e meki leer fu metibuba. San disi e sori fu na apostel?
17 Luku wan ondrofenitori fu na apostel Petrus. Na ini a yari 36 G.T., a ben teki pasi go na a opo presi fu Saron fu go du zendelingwroko. A go na ini a foto Lida, èn drape a dresi Eneas, wan malengriman. Baka dati a teki pasi go na a lanpresi fu Yope. Drape a gi Dorkas wan opobaka. Tori fu den Apostel 9:43 e fruteri wi: „A tan wan tu dei na Yope nanga wan man di nen Simon; a man disi ben e meki leer fu metibuba.” A syatu bijbeltekst disi e sori taki Petrus no ben e skotu sma te a ben e preiki na ini a foto dati. Fa wi sabi dati? Frederic W. Farrar, wan Bijbel sabiman, e taki: „Wan sma di ben e hori ensrefi soifri na a Wet fu Moses, noiti no ben o tan na ini na oso fu wan man di ben e meki leer fu metibuba. Ibri dei a man disi ben musu fasi den buba nanga den dedeskin fu ala sortu meti, sosrefi den sani di a ben abi fanowdu fu man du a wroko fu en. Dati meki den sma di ben hori densrefi soifri na wet, ben si a wroko disi leki wan doti wroko èn den no ben lobi en kwetikweti.” Simon ben abi wan „oso krosibei fu a se”, ma Farrar e taki dati awinsi en oso ben de fara fu a wrokopresi fu en, toku Simon ben du ’wan wroko di sma no ben lobi kwetikweti fu di a ben de wan lagi wroko’.—Tori fu den Apostel 10:6.
18, 19. (a) Fu san ede Petrus ben fruwondru di a kisi wan fisyun? (b) Sortu blesi Petrus ben kisi, aladi a no ben fruwakti dati?
18 Fu di Petrus no ben e skotu sma, meki a teki a kari di Simon ben gi en fu tan na en oso. Drape Petrus kisi wan boskopu fu Gado di trutru fruwondru en. A si wan fisyun, èn na ini a fisyun dati a ben kisi a komando fu nyan meti di no krin akruderi a Dyu wet. Petrus ben taki dati noiti a no ben „nyan wan sani di doti noso di no krin”. Ma dri leisi a yere wan sten di taigi en: „Den sani di Gado krin, yu no musu kari den doti sani moro.” A no de fu taki dati „Petrus no ben sabi srefisrefi san a fisyun di a ben si, ben wani taki”.—Tori fu den Apostel 10:5-17; 11:7-10.
19 Petrus no ben sabi taki a dei na fesi, wan Heiden di nen Kornelius, ben kisi wan fisyun tu. Disi ben de na ini Sesarea, sowan 50 kilometer farawe. Na engel fu Yehovah ben taigi Kornelius fu seni den futuboi fu en fu go suku Petrus na a oso fu Simon, a man di ben e meki leer fu metibuba. Kornelius seni den futuboi fu en go na Simon en oso, èn Petrus drai go na Sesarea makandra nanga den. Drape a preiki gi Kornelius èn gi den famiriman nanga den mati fu en. Leki bakapisi fu dati, den sma disi ben de den fosi Heiden di tron bribiman èn di kisi a santa yeye fu go na ini a Kownukondre. Aladi den mansma no ben besnij, toku alamala di ben yere san Petrus ben taki, ben teki dopu. Disi ben opo a pasi gi sma fu den nâsi, di no ben krin ini na ai fu den Dyu, fu tron memre fu a Kresten gemeente (Tori fu den Apostel 10:1-48; 11:18). A sani disi trutru ben de wan bigi grani gi Petrus! Na fu di a ben si a waarheid leki wan trutru warti sani, dati meki a teki a tiri fu Yehovah èn a handri akruderi a bribi fu en.
20. Fa Gado e yepi wi te wi e poti a waarheid na a fosi presi na ini wi libi?
20 Paulus e frumane wi: „Aladi wi e taki waarheid, meki wi gro nanga lobi ini ala sani na ini en di de na edeman, Krestes” (Efeisesma 4:15). Iya, a waarheid sa meki wi koloku pasa marki na ini a ten disi, efu wi e poti en na a fosi presi na ini wi libi, èn efu wi e meki Yehovah sori wi nanga yepi fu en santa yeye fa wi musu waka. Sosrefi, wi no musu frigiti a yepi di den santa engel e gi na ini wi preikiwroko (Openbaring 14:6, 7; 22:6). A de wan grani trutru taki wi e kisi so furu yepi na ini a wroko di Yehovah gi wi fu du! Te wi e tan hori wi soifri retifasi, dan wi sa gi Yehovah, a Gado fu waarheid, grani fu ala ten. San warti moro leki dati?—Yohanes 17:3.
San wi leri?
• Fu san ede furu sma no e teki a waarheid?
• Fa Kresten musu si den sani fu a grontapu fu Satan?
• Fa wi musu si den konmakandra, èn fu san ede?
• San wi musu du fu man sorgu wisrefi bun na yeye fasi?
[Aksi fu a tori disi]
[Prenki/Karta na tapu bladzijde 18]
(Efu yu wani si pe den sani disi skrifi, luku a tijdschrift)
A BIGI SE
Sesarea
NA OPO PRESI FU SARON
Yope
Lida
Yerusalem
[Prenki]
Petrus ben teki a tiri fu Gado èn a kisi blesi di a no ben fruwakti
[Sma di abi a reti fu a karta]
Map: Mountain High Maps® Copyright © 1997 Digital Wisdom, Inc.
[Prenki na tapu bladzijde 13]
Yesus ben gi kotoigi fu a waarheid
[Prenki na tapu bladzijde 15]
Neleki trutru nyanyan, wi abi yeye nyanyan tranga fanowdu so taki sani e waka bun nanga wi na yeye fasi