Aksi fu leisiman

Na onvolmaaktifasi fu a nyunwenke Maria ben meki taki Yesus gebore na ini onvolmaaktifasi?

Bijbel e taki fu „a geborte fu Yesus”: „Na a ten di en mama Maria ben pramisi na Yosef taki a ben o trow nanga en, dan a ben kon na krin taki a ben de nanga bere nanga yepi fu santa yeye, bifo den ben didon na makandra” (Mateyus 1:18). Iya, Gado en santa yeye ben de prenspari srefisrefi fu meki taki Maria de nanga bere.

Ma fa a de nanga Maria? O prenspari na eksi fu Maria ben de fu meki taki a ben de nanga bere? Te wi e luku den pramisi di Gado ben gi den fositen tata fu Maria, namku Abraham, Isak, Yakob, Yuda, nanga Kownu David, dan a pikin di ben o gebore, ben sa musu de wan trutru bakapikin fu den mansma disi (Genesis 22:18; 26:24; 28:10-14; 49:10; 2 Samuel 7:16). Fa a pikin di Maria ben o kisi, ben o de trutru a pikin di Gado ben pramisi den fositen tata fu en? Dati ben o pasa soso efu a ben de wan trutru manpikin fu Maria.—Lukas 3:23-34.

Na engel fu Yehovah ben kon na Maria, èn a ben taki: „No frede, Maria, bika Gado feni yu bun; èn, luku! yu sa de nanga bere èn yu sa kisi wan manpikin, èn yu musu kari en Yesus” (Lukas 1:30, 31). Fu wan uma kan hori bere, dan wan eksi fu en musu kon lepi. Soleki fa a sori, dan Yehovah Gado meki wan eksi na ini a bere fu Maria kon lepi, fu di a puru a libi fu en wan-enkri Manpikin na hemel, èn A poti en na grontapu.—Galasiasma 4:4.

Wan pikin ben kan de volmaakti èn sondro sondu te wan onvolmaakti uma ben kon de nanga bere fu en na a fasi disi? Fa a sa de nanga den pikin di gebore fu wan papa di de volmaakti nanga wan mama di de onvolmaakti? Prakseri taki Gado ben gebroiki en santa yeye fu poti a volmaakti libi fu en Manpikin na ini a muru fu Maria, so taki a ben kan de nanga bere. A sani disi meki taki na onvolmaaktifasi fu na eksi fu Maria no ben abi krakti tapu a pikin di ben de na ini en bere. A momenti di Maria kon de nanga bere, dan a pikin na ini a bere fu en ben de volmaakti kaba.

Awansi fa a no fa, wi kan abi a frutrow taki a santa yeye fu Gado trutru ben sorgu taki a prakseri fu Gado kon tru di Maria ben de nanga bere. Na engel Gabrièl ben taigi Maria: „Santa yeye sa kon na yu tapu èn krakti fu a Moro Heiwan sa tapu yu. Fu dati ede, meki san o gebore, den sa kari santa, a Manpikin fu Gado” (Lukas 1:35). Iya, fu taki en leti, Gado en santa yeye kibri a pikin di ben e gro na ini a bere fu Maria fu no kisi onvolmaaktifasi èn a kibri en sosrefi so taki noti no ben tapu en fu gro kon tron wan gosontu libisma.

A de krin fu si taki Yesus no ben kisi en volmaakti libi fu wan libisma, ma taki a ben kisi en fu en hemel Tata, Yehovah. Yehovah „ben sreka wan skin” gi en, èn fu sensi di a ben de na ini en mama bere, Yesus trutru ben de „sondro flaka, aparti fu den sondari”.—Hebrewsma 7:26; 10:5.

[Prenki na tapu bladzijde 19]

„Yu sa de nanga bere èn yu sa kisi wan manpikin”