Den e gi Gado glori na tapu den bergi fu den Filippijnen

Efu yu e si den Filippijnen leki wan kondre nanga wan heri ipi èilanti, dan yu abi leti. Ma a de wan kondre tu di abi kefalek bigi bergi. Yehovah Kotoigi ben man preiki nanga bun bakapisi na ini den foto èn na den lagipresi fu a kondre. Ma fu preiki na tapu den bergi? Dati na wan tra tori.

DEN tumusi moi bergi fu a kondre de heri tra fasi leki den sesyoro di lai nanga santi, den moi karkiston di de fu si na ini a se na den sesyoro, den fisiman dorpu, nanga den pikin foto na ini den bigi opo presi fu den èilanti. Den bergi disi de wan bigi tyalensi tu te sma musu preiki a „bun nyunsu” fu a Kownukondre fu Gado.—Mateyus 24:14.

Den Filippijnen de na wan kontren fu èilanti pe krakti na inisei fu grontapu e meki taki nyun bergi e pusu kon na loktu. Dati e meki taki den bigi èilanti fu a kondre abi bergi di hei srefisrefi. Den moro leki 7100 èilanti fu den Filippijnen, de na a westsei pisi fu a kontren di sma e kari a Linga fu Faya fu na Stille Zuidzee. Fu dati ede den èilanti disi lai nanga furu bergi di e spiti faya tokotoko. Disi na wan fu den sani tu di meki taki a kontren disi di lai nanga bergi, kon de leki fa a de now. Fu di a kontren disi no makriki fu pasa, meki den sma di e libi na tapu den bergi disi no man miti nanga tra sma so makriki. A no makriki fu doro na den presi dati, fu di wan tu pasi nomo de pe wagi noso tra sani kan pasa.

Aladi a de wan bigi tyalensi fu doro den presi dati, toku Yehovah Kotoigi e frustan taki a de fanowdu fu preiki gi „ala sortu sma” (1 Timoteyus 2:4). Fu dati ede den Kotoigi na den Filippijnen tan tyari densrefi akruderi a prakseri di e kon na fesi na ini Yesaya 42:11, 12, pe a skrifi: „Meki den sma di e libi na a klepston, bari fu prisiri. Meki a pipel na tapu den ede fu den bergi bari nanga tranga sten. Meki den gi Yehovah grani, èn meki den sma na tapu den èilanti, taki fu a glori fu en.”

Sowan 50 yari pasa den ben bigin meki spesrutu muiti fu preiki gi den sma di e libi na tapu den bergi. Baka a di fu Tu Grontapufeti, wan tu zendeling ben go yepi drape fu meki a wroko go na fesi. Furu sma fu a kontren dati teki a waarheid fu Bijbel, èn now densrefi e yepi fu panya a waarheid disi na ini den dorpu di de te na loktusei fu den bergi. Disi ben abi tumusi moi bakapisi. Teki den Cordillera Central bergi na a noordsei fu Luzon leki eksempre. Drape yu abi sowan 6000 preikiman fu a bun nyunsu. Moro furu fu den na sma fu a presi drape srefi. Na ini a grupu dati yu abi den Ibaloisma, den Ifugaosma, den Igorotsma, nanga den Kalingasma.

Ma toku wan tu presi de ete na tapu den bergi, pe sma no man doro so  makriki. Ma den no frigiti den sma di e libi drape. Fa a bun nyunsu doro na son wan fu den sma dati, èn san den sma disi du di den yere a boskopu?

Trutru bribi e puru owru gwenti

Na tapu na èilanti Luzon di de na noordsei, yu abi den bergi kontren fu a distrikt Abra, pe den sma e libi di den e kari Tinggiansma. A kan taki a nen disi komoto fu na owru Malay wortu tinggi, san wani taki „bergi”. A nen dati e fiti trutru! A pipel dati e kari densrefi Itnegsma tu, èn den e kari a tongo fu den Itnegtongo. Den e bribi na ini wan gado di nen Kabunian, èn na aladei libi fu den lai nanga kruktubribi. Leki eksempre, efu wan sma e meki etsyei aladi a e sreka ensrefi fu go na wan presi, dan dati na wan takru marki. Dan a musu wakti wan tu yuru fu meki a takru bakapisi di o kon fu dati, pasa gowe.

Na ini 1572, den Spanyorosma tyari a Lomsu bribi nanga den di den go drape, ma den no ben man leri den Tinggiansma a tru Kresten bribi. Toku den wan di ben tron Lomsu, ben tan poti bribi na ini Kabunian èn den ben tan hori densrefi na den owru gwenti fu den. A soifri sabi fu Bijbel ben doro den sma disi fu a fosi leisi na ini den yari baka 1930. Na a ten dati Yehovah Kotoigi bigin panya a Kownukondre boskopu na tapu den bergi dati. Fu sensi a ten dati furu opregti Tinggiansma bigin gi glori na Yehovah komoto „na den ede fu den bergi”.

Prakseri na eksempre disi. Fosi Lingbaoan ben de wan Edeman fu wan lo na ini a kontren pe a ben e libi èn ala sma ben e lespeki en. A ben go dipi na ini a kulturu fu den Tinggiansma. A e taki: „Mi ben hori misrefi finifini na den gwenti fu den Tinggiansma. Efu den ben kiri wan sma, dan wi ben e dansi wan dansi baka a beri, èn wi ben e naki na tapu wan sortu plata lontu dron. Wi ben e srakti meti leki ofrandi tu. Wi ben e bribi na ini Kabunian, èn wi no ben sabi a Gado fu Bijbel.” A ben e du den sani disi aladi a ben e kari ensrefi wan Lomsu.

Di Yehovah Kotoigi ben kon fu preiki na ini a kontren dati, dan den ben miti nanga Lingbaoan. Ne den gi en deki-ati fu leisi Bijbel. Lingbaoan e memre: Di mi leisi a Bijbel, dan dati ben yepi mi fu si krinkrin taki Yehovah na a tru Gado.” Baka dati wan Kotoigi  brada studeri Bijbel nanga en, èn Lingbaoan teki a bosroiti fu dini a tru Gado. A tapu nanga den sani di a ben gwenti du, sosrefi a ben libi a posisi di a ben abi leki edeman fu a lo fu en. A sani dati ben meki a priester fu a kontren dati, èn sosrefi den mati di Lingbaoan ben abi fosi, kisi bigi atibron. Ma Lingbaoan ben teki a fasti bosroiti fu libi akruderi den tru tori di a ben kon feni na ini Bijbel. Now a e dini leki wan gemeente owruman.

Seibi dei nanga siksi neti

Aladi den sma di e libi na difrenti pisi fu a kontren fu Abra e yere a bun nyunsu moro furu now, toku son kontren de ete pe den Kotoigi e go wanwan leisi nomo fu preiki, fu di den presi dati de bun fara. No tumusi langa pasa, den Kotoigi ben pruberi fu doro den kontren dati. Wan grupu fu 35 sma ben teki waka fu go preiki na Tineg, wan presi di de na ini a kontren fu Abra. Tutenti na seibi yari langa sma no ben go drape fu preiki.

A grupu sma di ben go fu preiki drape, ben abi fu waka nanga futu, sowan seibi dei langa. Meki wi taki dati yu ben de drape. Yu e abra broki di meki nanga tetei, yu e koti den liba abra pe a watra dipi srefisrefi, èn yu e waka omeni yuru langa na tapu bergi, aladi yu e syow nanga yu lai. Ala den sani disi yu e du, soso fu go preiki a bun nyunsu gi den wan di kande noiti no ben e yere en ete! Fo fu den siksi neti di den ben teki waka go na tapu den bergi, den no ben abi wan presi fu sribi na neti, fu dati ede den ben sribi na dorosei.

Aladi den Kotoigi disi di ben teki a waka ben tyari sani fu nyan, toku a nyanyan dati no ben nofo gi a heri waka fu den. Ma disi no ben de wan problema, fu di den sma drape ben de klariklari fu gi den brada nyanyan, na presi fu den Bijbel publikâsi di den ben kisi. Den Kotoigi ben kisi bun furu nyanyan sani di den sma ben prani, den ben kisi fisi nanga dia meti sosrefi. Aladi a no ben makriki alaten, toku a grupu sma disi ben taki: „A bigi prisiri di wi ben abi ben warti moro den problema di wi ben ondrofeni, fu di wi no ben abi ala sani di wi ben abi fanowdu.”

Na ini den seibi dei dati, den dinari disi preiki na ini tin dorpu, pe den prati 60 buku, 186 tijdschrift, 50 brochure, nanga furu traktaat. Den ben man sori 74 grupu fu sma fa wi e studeri Bijbel nanga trawan. Na ini a foto Tineg, den brada ben hori wan gemeente konmakandra fu di den fesiman nanga den heihei-sma fu a presi ben aksi den fu du dati. Tapu a konmakandra dati yu ben abi sowan 78 sma. Moro furu fu den sma di ben de drape, ben de sma di e leri pikin na skoro èn sma di de skowtu. Wi howpu taki moro Tinggiansma sa kon makandra nanga den wan di e „bari” komoto fu na ede fu den bergi fu prèise Yehovah.

Wan sani di bun moro gowtu

Moro fara go na a zuidsei fu den Filippijnen yu abi wan tu èilanti pe den Spanyorosma ben feni gowtu. Dati ben meki taki den bigin kari den èilanti dati Mindoro, san na wan syatu fasi fu taki mina de oro, èn dati na Spanyoro wortu di wani taki „presi pe sma e diki gowtu”. Ma now wan sani di warti moro leki gowtu de fu feni na tapu den èilanti dati. Dati na sma di wani dini a tru Gado, Yehovah.

Sowan 125.000 sma e libi bun fara na ini a busi fu Mindoro. Den e kari den sma dati Mangyansma. Den no abi so furu sani, den no e moksi furu nanga tra sma di no de fu a lo fu den, èn den abi den eigi tongo. Furu fu den sma dati e bribi taki ala sani di de na grontapu abi wan sili, den e anbegi furu gado èn den e bribi sosrefi taki difrenti yeye de na ini den sani di de na grontapu.

Wanwan leisi a e pasa taki wan fu den Mangyansma e go suku wroko na den pisi kontren na a syoro fu na èilanti, so taki a kan feni nyanyan nanga tra  sani di a abi fanowdu. Disi na san ben pasa nanga Pailing, di na wan sma fu wan tra grupu na mindri den Mangyansma, di den e kari den Batangansma. A ben kweki na mindri den sma fu den busi na tapu den bergi, èn a ben e hori ensrefi na den gwenti nanga a bribi fu den Batangansma. Den sma dati ben abi a gwenti fu weri wan kamisa nomo. Fu meki taki den sani di den prani gro bun, dan a gwenti fu den Batangansma de taki den anbegiman musu kiri wan fowru, èn taki den musu meki a brudu fu a meti dropu na ini watra, aladi den e begi.

Pailing no e hori ensrefi na den gwenti dati moro. Fu san ede? Di a ben go na den lagipresi fu na èilanti, dan a ben feni wroko na wan tu osofamiri di na Yehovah Kotoigi. Wan fu den osofamiri dati ben teki na okasi fu fruteri Pailing den tru tori fu Bijbel. A ben prisiri srefisrefi nanga a bun nyunsu disi, èn a ben breiti fu leri fu den sani di Yehovah abi na prakseri gi libisma èn gi grontapu. Den ben seti sani gi en so taki a ben kan go na lagi skoro, èn den ben seti sani tu fu a ben kan studeri Bijbel. Pailing ben teki dopu leki wan Yehovah Kotoigi di a ben abi 24 yari. Di a ben abi 30 yari a ben de tu yari kaba na hei skoro, èn a ben si skoro leki a kontren di a ben kisi fu preiki. Now sma e kari en Rolando (wan nen di sma e gebroiki na den lagipresi fu na èilanti).

Efu yu miti Rolando now, dan yu sa si wan dinari fu Gado di e weri moi krosi èn di ala ten de nanga wan lafu fesi. A e dini leki wan furuten preikiman èn sosrefi leki wan dinari ini a diniwroko na ini wan fu den gemeente na Mindoro. No tumusi langa pasa Rolando go baka na a bergi kontren, ma a no ben du dati fu bigin baka nanga den owru gwenti fu den Batangansma. Na presi fu dati, a ben go fu prati den tru tori fu Bijbel nanga den, fu di den kan gi sma libi te fu kaba.

Den e angri fu wan Kownukondre konmakandra-presi

A distrikt Bukidnon, na wan distrikt di de na tapu wan èilanti na a zuidsei di nen Mindanao. Na ini Sebuwanotongo, a wortu Bukidnon wani taki „Sma fu den bergi”. Disi na wan kontren di abi furu hei bergi nanga dipi èn smara olo na den mindri. Sosrefi a kontren dati abi lagipresi pe liba e lon pasa, nanga bergi di abi plata pisi. A fatu gron di de na den presi dati e meki taki sma kan prani sani leki nanasi, karu, kofi, aleisi, nanga bakba. Den lo di e libi na den hei kontren dati na den Talaandigsma nanga Higaononsma. Den sma di e libi drape musu leri fu Yehovah tu. No so langa pasa, na okasi ben opo na wan tumusi aparti fasi gi dati krosibei fu a foto Talakag.

Aladi den hei kontren pe den Kotoigi ben e go ben kowru, toku den sma drape ben gi den wan switikon na wan waran fasi. Den sma fu a kontren dati ben e taki dati den e bribi na ini na almakti Gado, a Tata, ma den no ben sabi a nen fu en. Fu di den ben e libi moro furu na ini a busi, meki disi ben de a fosi leisi taki den miti nanga Yehovah Kotoigi. Den ben kon yere san na a nen fu Gado, èn sosrefi san a abi na prakseri fu du nanga yepi fu a Kownukondre fu en. Den sma drape ben breiti sote, taki sani ben seti fu go na a dorpu dati moro furu.

Difrenti leisi den Kotoigi go baka na a presi dati. Leki bakapisi fu dati, den sma fu a dorpu gi den wan presi pe den ben kan bow wan „oso” fu Yehovah Kotoigi. Nanga prisiri den Kotoigi ben teki a presenti dati. A pisi gron di den gi den ben de te na tapu a moro heiwan fu den pikin bergi na ini a kontren dati, fu pe yu ben kan si a pasi di sma e teki fu go drape. Den ben meki a konmakandra-presi nanga udu, bambu, nanga wiwiri fu palmbon. Den ben kaba a wroko na ini dri mun nanga tin dei. Tapu na konmakandra-presi den ben skrifi na tapu wan bord „Kownukondre konmakandra-presi fu Yehovah Kotoigi”, wan sani di ben moi fu si. Prakseri fu dati pikinso, wan Kownukondre konmakandra-presi di meki, fosi wan gemeente ben opo drape srefi!

Fu sensi a ten dati, wan gemeente owruman nanga wan dinari ini a diniwroko froisi go tan drape. Den ben e wroko makandra nanga tra Kotoigi fu a kontren dati, fu man seti wan gemeente. Te fu kaba, den ben doro a marki disi na ini augustus fu a yari 1998. Nownow wan pikin gemeente de drape di e gebroiki a Kownukondre konmakandra-presi disi bun fu yepi den sma fu den bergi, fu leri den tru tori fu Bijbel.

Fu tru, na wan makti fasi Yehovah gebroiki den futuboi fu en na ini den Filippijnen. Den de klariklari fu panya Kownukondre waarheid, srefi na tapu den bergi kontren pe sma no man doro so makriki. Disi e memre wi na san skrifi na Yesaya 52:7, di e taki: „O switi na tapu den bergi den futu fu a sma de di e tyari bun nyunsu kon.”

[Karta na tapu bladzijde 11]

(Efu yu wani si pe den sani disi skrifi, luku a tijdschrift)

ABRA

MINDORO

BUKIDNON

[Sma di abi a reti fu a karta]

Globe: Mountain High Maps® Copyright © 1997 Digital Wisdom, Inc.

[Prenki na tapu bladzijde 10]

Fu preiki na tapu den bergi wani taki dati wan sma musu kren go someni yuru langa na den kontren di no makriki fu pasa

[Prenki na tapu bladzijde 10]

Sma e teki dopu na ini wan pikin liba na tapu wan bergi