Suma sa pasa a dei fu Yehovah?
Suma sa pasa a dei fu Yehovah?
„A dei e kon di e bron neleki na onfu.”—MALEAKI 4:1.
1. San Maleaki e taki fu a kaba fu na ogri grontapu disi?
GADO ben meki Maleaki skrifi profeititori di e fruteri sortu wondrusani sa pasa heri esi. Den sani disi sa abi krakti tapu ibri sma na grontapu. Maleaki kapitel 4:1 e taki na fesi: „’Luku! a dei e kon di e bron neleki na onfu, èn ala den heimemre wan èn ala den wan di e du ogri musu tron leki drei grasi. Èn a dei di e kon trutru sa swari den’, na so Yehovah fu den legre taki, ’so taki a no sa libi rutu noso taki gi den’.” O bigi a pori fu na ogri seti fu sani disi sa de? A sa de neleki den rutu fu wan bon di kisi pori dorodoro, so taki a bon no man gro noiti moro.
2. San wan tu tekst e taki fu a dei fu Yehovah?
2 Kande yu e aksi yusrefi: ’Fu sortu „dei” a profeiti Maleaki e taki?’ A de a srefi dei di Yesaya 13:9 e taki fu en. Drape skrifi: „Luku! A dei fu Yehovah e kon, na wan ogri-ati fasi nanga atibron èn nanga faya atibron, fu meki a kondre tron wan sani fu skreki, èn fu a kan wai den sondari fu a kondre puru.” Sefania 1:15 e taki fu a dei disi: „A dei dati na wan dei fu atibron, wan dei fu banawtu nanga bigi frede, wan dei fu bigi winti nanga pori, wan dei fu dungru nanga blaka dungru, wan dei fu wolku nanga bigi dungru.”
„A bigi banawtu”
3. San na „a dei fu Yehovah”?
3 Ini a bigi kontru fu a profeititori fu Maleaki, a „dei fu Yehovah” ben o de wan pisi ten fu „bigi banawtu”. Yesus ben taki na fesi: „Na a ten dati wan bigi banawtu sa de, soleki fa no ben pasa ete fu sensi a bigin fu grontapu te now, nôno, èn no sa pasa moro tu” (Mateyus 24:21). Prakseri omeni banawtu pasa kaba na grontapu, spesrutu sensi 1914 (Mateyus 24:7-12). Iya, moro leki 50 milyun sma lasi den libi na ini a di fu Tu Grontapufeti wawan! Toku „a bigi banawtu” sa tyari moro bigi rampu kon. A bigi banawtu dati di wi sabi sosrefi leki a dei fu Yehovah, e kon na wan kaba na ini Armagedon, èn a sa tyari wan kaba kon na den lasti dei fu na ogri seti fu sani disi.—2 Timoteyus 3:1-5, 13; Openbaring 7:14; 16:14, 16.
4. San o pasa na a kaba fu a dei fu Yehovah?
4 Na a kaba fu a dei dati fu Yehovah, dan a grontapu fu Satan nanga den bakaman fu en sa kisi pori. Den fosi sani di sa kisi pori na ala falsi bribi. Baka dati, Yehovah sa krutu den ekonomia sistema nanga den politiek sistema fu Satan (Openbaring 17:12-14; 19:17, 18). Esekièl e taki na fesi: „Na tapu den strati srefi den sa trowe a solfru fu den, èn den eigi gowtu sa tron wan tegu sani. A no a solfru, a no a gowtu fu den sa man fu frulusu den tapu a dei fu na atibron fu Yehovah” (Esekièl 7:19). Sefania 1:14 e taki fu a dei dati: „A bigi dei fu Yehovah de krosibei. A de krosibei, èn a e hasti ensrefi fu tru.” Fu di wi sabi san Bijbel e taki fu a dei fu Yehovah, meki wi musu abi a fasti bosroiti fu handri akruderi den bun markitiki fu Gado.
5. San den sma di e frede a nen fu Yehovah e ondrofeni?
5 Baka di Maleaki taki na fesi san a dei fu Yehovah sa du nanga a grontapu fu Satan, dan a e meki wi kon sabi na ini Maleaki 4:2 san Yehovah e taki: „Gi unu di e frede mi nen, a son fu regtfardikifasi seiker sa skèin, nanga dresi na ini den frei fu en; èn unu seiker sa go èn drai a gron neleki yongu kaw di meki kon fatu.” „A son fu regtfardikifasi” na Yesus Krestes. En na „a leti fu grontapu” na yeye fasi (Yohanes 8:12). Na ini a ten disi, Yesus e skèin en leti fu di a e dresi sma na yeye fasi, èn na ini a nyun grontapu a sa dresi ala sortu siki. Soleki fa Yehovah e taki, dan den sma di kon betre sa „go èn drai a gron neleki yongu kaw di meki kon fatu”, fu di den e prisiri èn fu di den breiti taki den no de na strafu moro.
6. Sortu fesa den futuboi fu Yehovah sa hori, baka di a wini a strei?
6 Fa a de nanga den sma di no e hori densrefi na den markitiki fu Yehovah? Maleaki 4:3 e taki: „’Unu [dati na den futuboi fu Gado] trutru sa masi den ogriwan, bika den sa tron leki puiri na ondro un futu na a dei di mi sa handri’, na so Yehovah fu den legre taki.” Libisma di de anbegiman fu Gado, no sa yepi fu pori a grontapu fu Satan. Na presi fu dati, den e „masi den ogriwan” na wan agersi fasi, fu di den sa teki prati na a bigi fektori fesa di sa hori baka a dei fu Yehovah. Wan fesa ben hori baka di den legre fu Farao ben kisi pori na ini a Redi Se (Exodus 15:1-21). Wan fektori fesa sa hori tu baka di Satan nanga en grontapu sa kisi pori na a bigi banawtu. Getrow sma di pasa a dei fu Yehovah, sa bari nanga tranga sten: „Meki wi prisiri èn breiti nanga a frulusu di e kon fu en” (Yesaya 25:9). A trutru sa de wan bigi prisiri fu si taki Yehovah na a sma di abi a reti fu tiri, èn taki grontapu kon krin so taki sma kan libi na en tapu na ini vrede!
Krestenhèit e handri neleki Israel
7, 8. Fa a ben de nanga a yeyefasi fu Israel na ini a ten fu Maleaki?
7 Den sma di Yehovah sa feni bun, na sma di e dini en. Ma a no sa abi a srefi denki fu den wan di no e dini en. Na so a ben de tu na a ten di Maleaki ben skrifi a buku fu en. Na ini 537 b.G.T., wan fikapisi fu Israel ben drai go baka na den eigi kondre, baka di den ben de na ini katibo na ini Babilon 70 yari langa. Ma pikinmoro wán hondro yari baka dati, Israel bigin nanga falsi anbegi èn sosrefi nanga ogridu. Furu fu den sma no ben lespeki a nen fu Yehovah, den no ben e gi yesi na den bun wet fu en, èn den ben doti a tempel fu en fu di den ben e tyari breni, malengri, nanga siki meti leki srakti-ofrandi. Boiti dati, den ben e broko trow nanga a wefi fu den yongu yari fu den.
8 Fu dati ede Yehovah taigi den: „Mi wani kon na unu fu a krutu ede, èn mi wani tron wan esi-esi kotoigi teige den towfruman, èn teige den sutaman, èn teige den sma di e sweri falsi, èn teige den sma di e handri na wan bedrigi fasi nanga a moni fu wan wrokoman, nanga a weduwe èn nanga a boi di no abi papa, èn den sma di e seni den doroseisma gowe di e libi na den mindri, aladi den no abi frede gi mi, . . . bika mi na Yehovah; mi no kenki” (Maleaki 3:5, 6). Toku Yehovah ben gi iniwan sma di ben kenki a takru pasi fu den, a kari: „Drai kon baka na mi, èn mi sa drai kon baka na unu.”—Maleaki 3:7.
9. San ben pasa na ini a fosi kontru fu den profeititori fu Maleaki?
9 Den wortu dati ben abi wan kontru sosrefi na ini a fosi yarihondro G.T. Wan fikapisi fu den Dyu ben dini Yehovah èn den ben tron wan pisi fu a nyun „nâsi” fu Kresten di salfu nanga santa yeye. Baka wan pisi ten, sma di no ben de Dyu ben tron memre fu a grupu disi tu. Ma a moro bigi pisi fu a nâsi Israel no ben wani teki Yesus. Fu dati ede Yesus ben taigi a nâsi dati: „Luku! Den e libi un oso leigi na baka” (Mateyus 23:38; 1 Korentesma 16:22). Soleki fa Maleaki 4:1 ben taki na fesi, dan na ini 70 G.T., wan „dei . . . di e bron neleki na onfu” ben kon tapu a nâsi Israel. Yerusalem nanga en tempel ben kisi pori, èn soleki fa buku e sori, dan moro leki wán milyun sma dede fu angri, sosrefi fu di den ben feti fu kisi makti, èn fu di den legre fu Rome ben kon feti nanga den. Ma den sma di ben dini Yehovah ben pasa a banawtu dati.—Markus 13:14-20.
10. Fa furu sma èn sosrefi den kerki tiriman e handri neleki Israel fu a fosi yarihondro?
10 Furu libisma, spesrutu Krestenhèit, handri neleki a nâsi Israel fu a fosi yarihondro. Den fesiman nanga den tra sma na ini Krestenhèit tan hori densrefi na den eigi kerkileri, na presi taki den hori densrefi na den tru tori fu Gado di Yesus ben leri sma. Spesrutu den kerki tiriman abi fowtu ini a tori disi. Den e weigri fu gebroiki a nen fu Yehovah, èn den puru a nen disi srefi na ini den Bijbel fu den. Den e gi Yehovah syen fu di den e leri sma sani di no e kruderi nanga Bijbel. Den sani dati na heiden leri di e meki sma bribi taki den sa kisi skin-ati fu têgo na ini wan faya hel, taki Gado na wan Dri-wánfasi, taki a sili no man dede, èn taki den sani na hemel nanga grontapu no abi wan mekiman. Na so fasi den e meki taki Yehovah no e kisi a prèise di a musu kisi, neleki fa den priester na ini a ten fu Maleaki ben du dati tu.
11. Fa den kerki fu grontapu e sori suma den e dini trutru?
11 Na ini 1914, di den lasti dei bigin, dan a ben de krin fu si suma den kerki fu a grontapu disi ben e dini trutru. Dati ben de so spesrutu nanga den wan di ben kari densrefi Kresten kerki. Na ini ala den tu grontapufeti, den kerki disi ben gi den memre fu den deki-ati fu go feti gi a kondre fu den, awinsi den ben sa musu kiri sma fu den eigi kerki. Gado Wortu e sori krin suma na den sma di e gi yesi na Yehovah èn suma na den wan di no e du dati: „Den pikin fu Gado nanga den pikin fu Didibri de krin fu si na a sani disi: Ibriwan sma di no e du san regtfardiki, no e komoto na Gado, neleki a sma di no lobi en brada. Bika disi na a boskopu di unu yere sensi a bigin, taki wi musu abi lobi gi makandra; no leki Kain, di komoto na a ogriwan èn ben kiri en brada.”—1 Yohanes 3:10-12.
A profeititori e kon tru
12, 13. Sortu profeititori kon tru na ini a ten disi nanga yepi fu den futuboi fu Gado?
12 Na a kaba fu a Fosi Grontapufeti na ini 1918, den futuboi fu Yehovah ben man si taki Gado ben krutu Krestenhèit èn sosrefi ala tra falsi bribi. Sensi a ten dati, reti-ati sma kisi a kari: „Komoto na en, mi pipel, efu unu no wani abi wan prati nanga en na ini den sondu fu en, èn efu unu no wani kisi wan pisi fu den plaag fu en. Bika den sondu fu en kon tron leki wan ipi di hei te na hemel, èn Gado tyari den kruktudu fu en kon na prakseri” (Openbaring 18:4, 5). Den sma di trutru ben wani dini Yehovah, ben bigin fu kon krin fu ala den sani di abi fu du nanga falsi bribi. Boiti dati, den ben bigin preiki a bun nyunsu fu a kownukondre na heri grontapu, èn a wroko disi musu klari bifo na ogri seti fu sani disi e kon na wan kaba.—Mateyus 24:14.
13 A sani disi ben pasa leki wan kontru fu a profeititori na Maleaki 4:5. Drape Yehovah ben taki: „Luku! Mi e seni a profeiti Elia kon gi unu, fosi Yehovah en bigi dei di e gi frede, e kon.” A wroko fu Yohanes a Dopuman ben de a fosi kontru fu a profeititori dati, èn Elia ben prenki a dopuman disi. Yohanes ben du a srefi sortu wroko leki Elia di a ben e dopu den Dyu di ben abi berow fu den sondu di den ben du teige a Wetfrubontu. A moro prenspari sani, na taki Yohanes ben bigin nanga a wroko di a Mesias ben o du bakaten. Ma a wroko fu Yohanes ben de soso a fosi kontru fu a profeititori fu Maleaki. Fu di Yesus ben taki dati Yohanes ben de wan tra Elia, dan dati ben wani taki dati wan wroko neleki a di fu Elia ben sa musu du ete na ini a ten di ben de na en fesi.—Mateyus 17:11, 12.
14. Sortu prenspari wroko musu du bifo a seti fu sani disi e kon na wan kaba?
14 A profeititori fu Maleaki ben sori taki a bigi Elia-wroko disi ben o du bifo „Yehovah en bigi dei di e gi frede”. A dei dati e kon na wan kaba nanga a feti fu a bigi dei fu Gado na Almaktiwan, na Armagedon. A feti disi sa feti heri esi. Disi wani taki dati wan srefi sortu wroko neleki a di fu Elia ben o du bifo a kaba fu na ogri seti fu sani disi. A wroko disi ben o du sosrefi bifo a Dusun Yari Tiri fu Gado en hemel Kownukondre di abi Yesus Krestes leki kownu. Soleki fa a profeititori taki, dan bifo Yehovah e pori na ogri seti fu sani disi, na Elia grupu fu now, makandra nanga milyunmilyun Kresten di abi a howpu fu libi na grontapu, e go doro fayafaya fu seti a soifri anbegi baka, fu prèise a nen fu Yehovah, èn fu leri reti-ati sma waarheid fu Bijbel.
Yehovah e blesi den futuboi fu en
15. Fa Yehovah e memre den futuboi fu en?
15 Yehovah e blesi den sma di e dini en. Maleaki 3:16 e taki: „Na a ten dati den sma di ben frede Yehovah ben taki nanga makandra, ibriwan fu den nanga en kompe, èn Yehovah tan poti prakseri na den èn a tan arki den. Èn den bigin skrifi wan buku na en fesi fu memre den wan di ben frede Yehovah èn gi den wan di ben e prakseri en nen.” Na wan agersi fasi, Gado abi wan buku pe a e skrifi den nen fu den sma di a sa gi têgo libi, èn a nen fu Abel na a fosiwan di a skrifi na ini a buku disi. Yehovah e taigi den sma disi: „Tyari ala den di fu tin pisi kon na ini a maksin, so taki nyanyan kan kon na ini mi oso; èn grantangi, tesi mi nanga dati . . . efu mi no sa opo den sroisi fu hemel gi unu èn trutru kanti wan blesi kon na unu tapu teleki nowan sani e mankeri moro.”—Maleaki 3:10.
16, 17. Fa Yehovah blesi a pipel fu en èn sosrefi a wroko di den e du?
16 Yehovah trutru blesi den sma di e dini en. Fa a blesi den? Wan fasi fa a du dati, na taki a meki den kon frustan den prakseri fu en moro krin (Odo 4:18; Danièl 12:10). Wan tra fasi, na taki a meki a preikiwroko fu den abi kefalek bun bakapisi. Furu reti-ati sma e teki prati makandra nanga den na a tru anbegi. Den alamala makandra na „wan bigi ipi, . . . di komoto na ala nâsi nanga lo nanga pipel nanga tongo, . . . èn den e tan bari nanga wan tranga sten, aladi den e taki: ’Tangi fu wi Gado, di e sidon na tapu a kownusturu, èn fu a Pikin Skapu, meki wi kisi frulusu’” (Openbaring 7:9, 10). A bigi ipi disi sori ensrefi na wan tumusi moi fasi. Now moro leki siksi milyun sma e dini Yehovah fayafaya, èn den de na ini moro leki 93.000 gemeente na heri grontapu!
17 Te wi e prakseri taki den Bijbel publikâsi fu Yehovah Kotoigi panya na heri grontapu moro leki iniwan tra sortu Bijbel publikâsi di prati oiti, dan wi e si taki Yehovah blesi dati tu. Now, sowan 90 milyun Waktitoren nanga Ontwaakt! e meki ibri mun; A Waktitoren e meki na ini 144 tongo èn Ontwaakt! na ini 87 tongo. A buku De waarheid die tot eeuwig leven leidt, na wan bijbelstudie buku di kon na doro na ini 1968, èn moro leki 107 milyun eksemplaar fu a buku disi prati na ini 117 tongo. A buku Joe kan libi foe têgo na ini wan paradijs na grontapoe kon na doro na ini 1982, èn moro leki 81 milyun eksemplaar fu a buku dati prati na ini 131 tongo. Te nanga now, moro leki 85 milyun eksemplaar prati fu a buku Sabi di e tjari joe go na têgo libi, di kon na doro na ini 1995, èn a prati na ini 154 tongo. Na ini 1996, a brochure San Gado e aksi foe wi? kon na doro, èn te nanga now, 150 milyun eksemplaar fu a buku dati prati kaba na ini 244 tongo.
18. Fu san ede sani e waka bun gi wi na yeye fasi, aladi sma e gens wi?
18 A wroko disi tan go na fesi, aladi a grontapu fu Satan tan pruberi fu gens en na wan trutru ogri-ati fasi. Disi e sori taki den wortu na Yesaya 54:17 tru: „’Nowan fetisani di den sa meki teige yu no sa abi bun bakapisi, èn iniwan tongo di sa opo teige yu na ini a krutu, yu sa krutu. Disi na a famirigudu fu den futuboi fu Yehovah, èn a regtfardikifasi fu den e kon fu mi’, na so den wortu fu Yehovah de.” A de wan trowstu trutru gi den futuboi fu Yehovah fu sabi taki den na a bigi kontru fu Maleaki 3:17: „’Seiker den sa kon de fu mi’, Yehovah fu den legre taki, ’na a dei di mi e meki wan spesrutu gudu’.”
Wi e dini Yehovah nanga prisiri
19. Fa den sma di e dini Yehovah e difrenti fu den sma di no e du dati?
19 Dei fu dei, a difrenti de moro krin fu si na mindri getrow futuboi fu Yehovah nanga den sma na ini a grontapu fu Satan. Maleaki 3:18 ben taki na fesi: „Unu sa si seiker a difrenti baka na mindri wan regtfardiki sma nanga wan ogri sma, na mindri wan sma di e dini Gado nanga wan sma di no e dini en.” Furu difrenti de, ma wan fu den na taki den sma di e dini Yehovah, e prisiri srefisrefi fu du dati. Wan sani di e gi den a prisiri disi, na a kefalek moi howpu di den abi. Den e frutrow dorodoro tapu Yehovah te a e taki: „Mi e meki nyun hemel nanga wan nyun grontapu; èn sma no sa memre den sani fu fositen moro, èn den no sa kon na ini na ati tu. Ma unu breiti pasa marki èn de nanga prisiri fu têgo fu den sani di mi e meki.”—Yesaya 65:17, 18; Psalm 37:10, 11, 29; Openbaring 21:4, 5.
20. Fu san ede wi de wan koloku pipel?
20 Wi e frutrow tapu a pramisi fu Yehovah, taki a getrow pipel fu en sa pasa a bigi dei fu en fu go na ini a nyun grontapu (Sefania 2:3; Openbaring 7:13, 14). Aladi owrudei, siki, noso mankeri kan meki taki son sma kan dede bifo a nyun grontapu kon, toku Yehovah e pramisi wi taki a sa memre den èn a sa gi den wan opobaka fu kan libi fu têgo (Yohanes 5:28, 29; Titus 1:2). Sobun, aladi wi e kon moro krosibei fu a dei fu Yehovah, èn aladi wi alamala abi wi eigi problema nanga tyalensi, toku wi kan de a moro koloku pipel na grontapu.
San yu e piki?
• San na „a dei fu Yehovah”?
• Fa den kerki fu grontapu e handri neleki Israel fu owruten?
• Sortu profeititori e kon tru na ini den futuboi fu Yehovah?
• Fa Yehovah blesi a pipel fu en?
[Aksi fu a tori disi]
[Prenki na tapu bladzijde 21]
Yerusalem fu a fosi yarihondro ’ben bron neleki na onfu’
[Prenki na tapu bladzijde 23]
Yehovah e sorgu gi den sma di e dini en
[Prenki na tapu bladzijde 24]
Den futuboi fu Yehovah e prisiri trutru, fu di den abi wan kefalek moi howpu