Dyonsro libisma no sa abi problema moro!

„SMA no sa man tapu a nowtu fu tra sma dorodoro te den no abi wan bun plan fu puru a rutu fu den problema èn te den tiriman fu a kondre no e horibaka gi dati. Ala ten baka, den sani di libisma ondrofeni e sori wi taki a yepi wawan di sma e gi trawan, no man tyari wan kaba kon na den problema di den abi efu den problema disi abi fu du spesrutu nanga politiek afersi.”—The State of the World’s Refugees 2000.

Aladi sma e du furu muiti fu yepi den wan di de na nowtu, toku furu problema e tan miti libisma. Wi kan howpu taki den tiriman di e tiri den kondre fu grontapu kan lusu den problema disi fu ala ten? Fu taki en leti, den no sa man du dati. Ma sortu tra fasi de fu lusu den problema disi? Na ini wan prenspari pisi na a bigin fu a brifi di Paulus ben skrifi gi den Kresten na ini Efeise, dan Paulus ben tyari kon na krin fa Gado sa tyari wan kaba kon na ala den problema fu libisma. Paulus ben fruteri sosrefi san Gado sa gebroiki fu du disi. A sani di Gado sa gebroiki sa puru a rutu fu ala den problema di e kon na wi tapu na ini a ten disi. Meki wi luku san Paulus e taki fu disi na ini Efeisesma 1:3-10.

„Fu tyari ala sani kon makandra baka na ondro a tiri fu Krestes”

Soleki fa na apostel e taki, dan Gado abi na prakseri fu „seti wan sistema [noso wan sani di e tiri ala afersi] na a kaba fu a reti ten”. San disi wani taki? Disi wani taki dati Gado seti wan spesrutu ten fu du sani nanga a marki „fu tyari ala sani kon makandra baka na ondro a tiri fu Krestes, dati wani taki den sani na ini hemel nanga den sani na grontapu” (Efeisesma 1:10). Iya, Gado seti sani fu tyari ala den sani na ini hemel nanga ala den sani na grontapu kon makandra baka, na ondro a tiri fu en. A moi fu si san a Bijbel sabiman J. H. Thayer e taki fu a wortu di vertaal nanga ’fu tyari kon makandra baka’: „Tyari kon makandra baka gi ensrefi . . . ala sani nanga ala libisani (di ben prati na ini a bigin fu sondu ede) fu kon de na ini wánfasi nanga Krestes.”

Disi e meki wi frustan fu san ede a de fanowdu taki Gado e tyari sani kon makandra baka, te wi e luku fa sani kon prati na a bigin. Na ini a bigin  fu libisma historia, a fosi papa nanga mama fu wi, Adam nanga Efa, ben teki na eksempre fu Satan Didibri fu di den opo densrefi teige Gado. Den no ben wani a tiri fu Gado moro, ma den ben wani abi a reti fu bosroiti gi densrefi san bun èn san ogri (Genesis 3:1-5). Gado ben handri akruderi en eigi retidu, di a ben puru den komoto fu a famiri fu en, èn den ben lasi a banti di den ben abi nanga en. Den ben tyari sondu kon tapu libisma, èn fu dati ede wi e ondrofeni ala den takru bakapisi na ini a ten disi.—Romesma 5:12.

Gado gi pasi taki ogri de fu wan pisi ten

’Fu san ede Gado meki den du dati?’, sma ben sa kan aksi. ’Fu san ede a no ben gebroiki a bigi makti fu en fu dwengi den fu du san a wani? Efu a ben du dati, dan wi no ben o sari èn wi no ben o pina so furu nownowde.’ Leki libisma wi ben kan kisi a denki dati makriki. Ma san ben o pasa efu a ben gebroiki a kefalek bigi makti fu en na a fasi dati? Yu e lespeki wan sma di e strafu trawan wantewante te a e si taki den no e agri nanga en, soso fu di a abi a makti fu strafu den? Kwetikweti.

Te yu luku en bun, dan a no de so taki den sma di ben opo densrefi teige Gado no ben erken taki na Gado abi ala makti. Nôno. Ma den sma dati ben feni taki Gado no abi a reti fu tiri, èn taki a no e tiri na wan bun fasi. Fu man seti den prenspari afersi disi kon bun baka fu ala ten, dan Yehovah ben gi den mekisani fu en pasi fu tiri densrefi wan pisi ten sondro a yepi fu en (Preikiman 3:1; Lukas 21:24). Te a ten dati pasa, dan Gado sa opo fu du wan sani fu go tiri heri grontapu baka. Na a ten dati, a sa de krin fu si taki a fasi fa Gado e tiri, na a wan-enkri fasi di trutru kan gi ala sma na grontapu têgo vrede, koloku, nanga ala san den abi fanowdu fu abi wan switi libi. Na a ten dati, ala den sma di e du trawan ogri na grontapu, sa figi puru fu têgo.—Psalm 72:12-14; Danièl 2:44.

„Bifo a bigin meki grontapu”

Yehovah ben abi na prakseri fu du ala den sani disi langa ten kaba. Paulus e taki „bifo a bigin meki grontapu” (Efeisesma 1:4). Dati no ben de bifo Gado ben meki grontapu, noso bifo a ben meki Adam nanga Efa. A grontapu dati ben de „heri bun”, èn sma no ben opo densrefi teige Gado na a ten dati (Genesis 1:31). Fu sortu „grontapu” na apostel Paulus ben taki dan? A ben taki fu a grontapu fu den pikin fu Adam nanga Efa, dati wani taki den sondu libisma di abi na okasi fu kisi frulusu. Bifo Adam nanga Efa ben kisi pikin, dan Yehovah ben sabi kaba fa a ben o frulusu den bakapikin fu Adam di warti fu kisi dati.—Romesma 8:20.

A de krin, taki disi no wani taki dati a Moro Heiwan fu hemel nanga grontapu musu seti afersi soleki fa libisma e seti den afersi fu den. Te libisma e si taki wan rampu de fu pasa, dan den e sreka difrenti sani na fesi fu si fa den man kakafutu gi a problema. Ma dati no de so nanga na almakti Gado. Gado e taki nomo san a abi na prakseri, dan a e du san a taki. Toku Paulus e tyari kon na krin fa Yehovah bosroiti fu tyari wan kaba kon na den problema di e miti libisma. Fa a sa du dati?

Suma sa tyari wan kaba kon na problema?

Paulus e tyari kon na krin taki den disipel fu Krestes di salfu nanga santa yeye, abi a grani fu tyari wan kaba kon na a ogri di Adam tyari kon tapu libisma fu di a ben sondu. Yehovah „ben kari wi fu de wán nanga [Krestes]”, na so Paulus e taki, fu tiri makandra nanga Yesus na ini en hemel Kownukondre. Paulus e fruklari a sani disi moro fara. A e taki dati Yehovah „ben bosroiti na fesi fu teki wi leki en manpikin nanga yepi fu Yesus Krestes” (Efeisesma 1:4, 5). A de krin, taki a no de so dati Yehovah ben taki suma na den sma di a ben o teki. Ma a de so, taki a ben abi na prakseri fu teki wan grupu fu getrow sma di ben o wroko makandra nanga Krestes fu tyari wan kaba kon na a ogri di Satan Didibri, èn sosrefi Adam nanga Efa, ben tyari kon tapu ala libisma.—Lukas 12:32; Hebrewsma 2:14-18.

A trutru de wan kefalek moi sani di Gado seti! Di Satan ben krutu na a bigin taki Gado no abi a reti fu tiri, dan Satan ben wani taki nanga dati, taki Gado ben meki wan fowtu di A meki libisma. Fu taki en leti, Satan ben taki dati efu den ben o kisi gens noso tra problema, dan den  alamala ben o opo densrefi teige a tiri fu Gado (Yob 1:7-12; 2:2-5). Yehovah Gado ben sori „en glori bun-ati” na wan tumusi moi fasi gi den libisma di a meki. Baka wan pisi ten, a ben sori taki a ben poti en frutrow na ini den, fu di a teki wan tu fu den sondu bakapikin fu Adam fu meki den tron en pikin na yeye fasi. Gado ben o teki den wan fu a pikin grupu disi fu go dini na ini hemel. San den ben o du drape?—Efeisesma 1:3-6; Yohanes 14:2, 3; 1 Tesalonikasma 4:15-17; 1 Petrus 1:3, 4.

Na apostel Paulus e taki dati den sma disi di Gado teki leki en manpikin, e tron „kompe erfgenaam nanga Krestes” na ini en hemel Kownukondre (Romesma 8:14-17). Leki kownu nanga priester, den sa yepi fu tyari wan kaba kon na a pina nanga sari di libisma e ondrofeni nownowde (Openbaring 5:10). Iya, „te nanga now ala den sani di Gado meki e tan geme makandra èn den abi pen makandra”. Ma dyonsro den sma disi di Gado teki spesrutu leki en manpikin, sa wroko makandra nanga Yesus Krestes, èn ala libisma di e gi yesi ’sa kon fri fu a katibo fu porifasi èn den sa abi a glori fri fu den pikin fu Gado’ baka.—Romesma 8:18-22.

’Wi kon fri nanga yepi fu wan lusu-paiman’

Libisma kan kisi a frulusu dati nanga yepi fu a moro moi èn lobi-ati sani di Gado ben du fu sori en bun-ati gi den libisma di warti fu kisi frulusu, namku a frulusu-ofrandi fu Yesus Krestes. Paulus e skrifi: „Na [Yesus Krestes] ben meki wi kon fri nanga wan lusu-paiman nanga yepi fu a brudu fu en; iya, wi kisi pardon fu wi sondu akruderi a gudu fu a bun-ati fu Gado.”—Efeisesma 1:7.

Yesus Krestes na a moro prenspari sma di e yepi fu meki den sani di Gado abi na prakseri, kon tru (Hebrewsma 2:10). Nanga yepi fu a frulusu-ofrandi fu Yesus, Yehovah abi a reti fu teki wan tu fu den bakapikin fu Adam fu go na hemel èn fu libi drape na ini Yehovah en hemel famiri. Boiti dati, Yehovah kan frulusu libisma fu den bakapisi di a sondu fu Adam ben tyari kon, sondro taki A e broko en eigi wet noso gronprakseri (Mateyus 20:28; 1 Timoteyus 2:6). Yehovah du sani na wan fasi di e kruderi nanga en eigi retidu, èn den bosroiti fu en de regtfardiki dorodoro.—Romesma 3:22-26.

A „santa kibritori” fu Gado

Dusundusun yari langa, Gado no fruteri finifini fa a ben o du den sani di a ben abi na prakseri gi grontapu. Na ini a fosi yarihondro G.T., „a ben meki a santa kibritori fu en wani bekènti gi [Kresten]” (Efeisesma 1:9). Paulus nanga den tra salfu Kresten ben frustan krin sortu tumusi prenspari wroko Yesus Krestes kisi fu man meki den sani di Gado abi na prakseri, kon tru. Den ben kon frustan sosrefi sortu frantwortu densrefi ben abi leki erfgenaam makandra nanga Krestes na ini en hemel Kownukondre (Efeisesma 3:5, 6, 8-11). Iya, Gado sa gebroiki a Kownukondre di abi Yesus Krestes leki kownu èn sosrefi den sma di sa tiri makandra nanga en, fu tyari têgo vrede kon. A vrede disi no sa de na ini hemel wawan, ma sosrefi na grontapu (Mateyus 6:9, 10). Nanga yepi fu a Kownukondre dati, Yehovah sa meki a grontapu disi kon de soleki fa a ben abi na prakseri na ini a bigin.—Yesaya 45:18; 65:21-23; Tori fu den Apostel 3:21.

A ten di Gado poti fu puru ala ogri nanga krukafasi fu grontapu de heri krosibei. Ma fu taki en leti, Yehovah ben bigin fu seti sani bun kaba na a Pinksterfesa fu 33 G.T. Fa a ben du dati? Na a ten dati, a ben bigin fu tyari „den sani na hemel” kon makandra, namku den sma di sa tiri makandra  nanga Krestes na ini hemel. Den Kresten fu Efeise ben de na ini a grupu sma disi tu (Efeisesma 2:4-7). Na ini a ten fu wi, Yehovah e tyari „den sani na grontapu” kon makandra (Efeisesma 1:10). Na heri grontapu a e meki sma du wan bigi preikiwroko fu fruteri ala sma a bun nyunsu fu en Kownukondre di abi Yesus Krestes leki Kownu. Den sma di e gi yesi na a bun nyunsu, e kon makandra nownow kaba na ini wan presi pe den e kisi kibri nanga dresi na yeye fasi (Yohanes 10:16). Dyonsro den sa man libi na tapu wan krin paradijs grontapu, pe krukafasi no sa de moro èn pe nowan sma sa pina moro.—2 Petrus 3:13; Openbaring 11:18.

„Libisma ben go na fesi na ini a fasi” fa den e yepi libisma di e pina (The State of the World’s Children 2000). Ma a moro bun yepi di libisma sa kisi heri esi, na a yepi di Krestes Yesus sa gi, makandra nanga den sma di sa tiri nanga en. Den sa lusu ala den problema nanga takru sani di e gi libisma furu broko-ede. Den sa tyari wan kaba kon na ala den problema fu libisma.—Openbaring 21:1-4.

[Prenki na tapu bladzijde 4]

A muiti di sma e du fu yepi trawan di de na nowtu no lusu den problema fu libisma

[Prenki na tapu bladzijde 6]

A frulusu-ofrandi fu Krestes ben opo a pasi gi libisma fu kon fri fu a sondu di Adam tyari kon na den tapu

[Prenki na tapu bladzijde 7]

Wi kan feni kibri nanga dresi na yeye fasi na ini a ten disi

[Prenki na tapu bladzijde 7]

Dyonsro, a Kownukondre fu a Mesias sa tyari wan kaba kon na ala problema