Yepi e kon gi den wan di de nanga angri!

KANDE yu ben sa aksi yusrefi: ’Sortu angri e kiri den sma dati?’ Den de nanga angri gi yeye nyanyan! Wan owruten profeiti di ben de wan Hebrewsma, ben taki na fesi taki sma ben o de nanga angri gi yeye nyanyan: „’Luku! Dei e kon’, na so a Soeverein Masra Yehovah taki, ’èn mi sa seni wan angriten kon na ini a kondre, ma a no wan angriten fu brede, sosrefi wan dreiwatra, ma a no gi watra, ma fu yere a wortu fu Yehovah’” (Amos 8:11). Fu man yepi sma di de nanga angri gi yeye nyanyan, dan den 48 memre fu a di fu 112 klas fu a Waktitoren Bijbelskoro Gilead di de na ini Patterson, na New York, e go na 19 difrenti kondre. Den kondre disi de na feifi pisi fu grontapu, èn boiti den kondre disi, den zendeling e go sosrefi na èilanti di de na se.

Den wan di kaba a skoro de srekasreka fu go na a toewijzing fu den. Den no e go nanga trutru meti noso karu, ma den e go nanga sabi, nanga ondrofeni, èn nanga a leri di den kisi. Feifi mun langa den studeri Bijbel fayafaya fu man tranga a bribi fu den, so taki den sa man du zendelingwroko na doroseikondre. Tapu 9 maart 2002, den 5554 sma di ben de na a programa di ben hori na a kaba fu a skoro, ben arki nanga prisiri.

Stephen Lett, di e dini leki wan memre fu a Tiri Skin fu Yehovah Kotoigi, ben bigin a programa na wan fasi di ben sori taki a ben e prisiri trutru. Den sma di ben kon fu arki a programa ben komoto fu difrenti pisi fu grontapu, èn a brada disi gi den wan spesrutu switikon. Baka dati a gebroiki den Wortu fu Yesus, namku „Unu na a leti fu grontapu”, fu taki fu a wroko di den nyun zendeling ben o du (Mateyus 5:14). A fruklari: ’Na ini a toewijzing fu unu, unu sa „leti [noso tyari kon na krin]” difrenti sani di abi fu du nanga den wondruwroko fu Yehovah, èn dati sa yepi reti-atisma fu kon si fa Yehovah moi èn fa den prakseri fu en moi sosrefi.’ Brada Lett ben gi den zendeling deki-ati fu gebroiki a leti fu Gado Wortu fu tyari den falsi leri kon na krin di e hori sma na ini a dungru, èn fu yepi sma di wani kon sabi a waarheid.

Wan yoisti denki de tranga fanowdu fu man abi bun bakapisi

Baka di a fesiman fu a programa ben kaba taki, dan Baltasar Perla, wan memre fu a Bijkantoro Komte fu Amerkankondre, hori a fosiwan fu den lezing di ben sreka fu gi den nyun zendeling rai fa fu abi bun bakapisi na ini a toewijzing fu den. A hori wan lezing di ben nen „Abi deki-ati, de tranga, èn du san unu musu du” (1 Kroniki 28:20). Kownu Salomo fu owruten Israel ben kisi wan wroko fu du di noiti bifo a ben du, èn a sani dati ben de wan tyalensi gi en. Salomo ben musu bow wan tempel na ini Yerusalem. Salomo du trutru san a ben musu du, èn a klari a tempel aladi Yehovah horibaka gi en. Brada Perla gebroiki na eksempre fu Salomo leki rai fu gi a klas deki-ati, èn a taki: ’Unu kisi wan nyun toewijzing fu dini leki zendeling, èn unu musu abi deki-ati èn unu musu de tranga.’ A no de fu taki dati a ben de wan trowstu gi den studenti fu sabi taki Yehovah no sa drai baka gi den so langa leki den abi wan tranga banti nanga en. Na a kaba fu a lezing fu en,  brada Perla naki na ati fu den sma di ben de drape, fu di a fruteri den san ensrefi ben ondrofeni: ’Yu kan du furu bun wroko te yu e dini leki zendeling. Na zendeling yepi mi, mi papa nanga mama, èn sosrefi mi sisa fu kon sabi a waarheid!’

Samuel Herd, wan tra memre fu a Tiri Skin, ben hori wan lezing di ben nen „Suku yepi na Yehovah fu kan abi bun bakapisi”. Den studenti e go du zendelingwroko now, èn den sa abi bun bakapisi soso te den abi wan tranga banti nanga Yehovah. Brada Herd gi den a seryusu rai disi: ’Yu kon sabi Bijbel heri bun nanga yepi fu den sani di yu studeri na Gilead. Yu ben prisiri fu kon sabi den sani dati. Ma now, fu man abi trutru bun bakapisi dan yu musu bigin leri trawan den sani di yu leri’ (Tori fu den Apostel 20:35). Den zendeling sa kisi furu okasi fu du disi te de e ’kanti densrefi trowe’ fu a bun fu trawan.—Filipisma 2:17.

Sortu rai den leriman ben o gi den studenti na a kaba fu a programa? Mark Noumair hori wan lezing di ben nen „Tan pî èn wakti, fu si fa sani sa waka”. A nen fu a lezing ben abi fu du nanga Rut 3:18. A brada disi gebroiki na eksempre fu Rut nanga Naomi fu gi den nyun zendeling deki-ati fu frutrow dorodoro tapu den seti fu Gado en organisâsi na grontapu, èn fu lespeki den wan di e teki fesi na ini na organisâsi disi. Brada Noumair naki na ati fu den studenti di a taki: ’A ben kan pasa son leisi taki son bosroiti di teki no switi so gi yu, èn kande yu no e frustan fu san ede den bosroiti  disi teki. Boiti dati, yu ben kan abi a tranga overtoigi sosrefi taki wan sani no e du na a yoisti fasi. San yu sa du? Yu sa opo fu du sani soleki fa yusrefi wani, noso yu sa „tan pî”, aladi yu e frutrow tapu a tiri fu Gado, èn aladi yu e frutrow na tapu sosrefi taki A sa meki sani waka bun te fu kaba’ (Romesma 8:28). Den studenti ben kisi a rai fu ’tan poti ala den prakseri na a wroko di den abi fu horibaka gi Kownukondre afersi, fu tan luku san Yehovah en organisâsi e du, na presi taki den e luku san libisma e du’. A no de fu taki dati den nyun zendeling sa man gebroiki den rai disi heri bun te den de na ini den toewijzing fu den.

Wallace Liverance di ben de wan zendeling fosi, e dini now leki wan Gilead leriman. Brada Liverance hori a lastiwan fu den fosi lezing di ben hori na a bigin fu a programa. A nen fu a lezing fu en ben de „Tan poti ala yu prakseri na sani, tan na ini a diniwroko fu Gado”. A brada disi ben sori taki a fadon fu Babilon di a profeiti Danièl ben si nanga en eigi ai, èn sosrefi a profeititori fu Yeremia, ben meki a profeiti Danièl kon frustan taki a frulusu fu den Israelsma ben de krosibei (Yeremia 25:11; Danièl 9:2). Danièl ben kon sabi o ten Yehovah ben o du san a ben abi na prakseri, èn a sani dati yepi en fu tan poti ala en prakseri na a wani fu Gado di ben o kisi wan kontru. Tra fasi leki a profeiti Danièl, den Israelsma na ini a ten fu a profeiti Hagai ben taki: „A ten no doro [ete]” (Hagai 1:2). Den no ben e poti prakseri na a ten di den ben libi na ini, ma den ben e poti ala den prakseri na den eigi afersi, èn den ben tapu nanga a wroko di den ben musu du baka di Gado ben frulusu den fu Babilon. A ben de so taki den ben musu bow a tempel baka. Na a kaba fu a lezing fu en, dan brada Liverance taki: „Sobun, tan poti ala yu prakseri na den sani di Yehovah sa du.”

A Gilead leriman Lawrence Bowen ben de a fesiman fu wan pisi fu a programa, èn a pisi dati ben nen „Yehovah e blesi den wan di e gebroiki a libilibi Wortu” (Hebrewsma 4:12). A pisi disi ben abi fu du nanga den sani di den studenti ben ondrofeni na ini a preikiwroko, èn a ben tyari kon na krin fa Yehovah e blesi den wan di e gebroiki a Bijbel te den e preiki èn te den e gi sma leri. A fesiman ben sori taki Yesus Krestes de leki wan bun eksempre gi ala futuboi fu Gado. A ben taki: ’Yesus ben kan taki trutru taki a no ben e leri sma en eigi sani, ma a ben taki a Wortu fu Gado’. Reti-ati sma ben kon si taki dati ben de a waarheid, èn den ben teki en (Yohanes 7:16, 17). A srefi sani dati e pasa na ini a ten disi.

A leri di wan sma e kisi na Gilead e sreka en fu du ibri bun wroko

Baka dati, Richard Abrahamson nanga Patrick LaFranca di de na Bethel bun langa kaba, hori wan takimakandra nanga siksi tra zendeling di e du furuten diniwroko now na difrenti sortu fasi. Awansi na sortu fasi den zendeling disi e dini Yehovah now, a de so taki aladi den klari a Gileadskoro someni tenti yari kaba, toku den e gebroiki a leri di den kisi na a Gileadskoro ete fu studeri Bijbel, fu ondrosuku spesrutu tori, èn fu man feni en bun nanga tra sma. Di den nyun zendeling fu a di fu 112 klas yere den sani disi, dan dati trutru naki den ati.

Theodore Jaracz, wan memre fu a Tiri Skin, ben hori a moro prenspari lezing fu a programa. A lezing dati ben nen „Den sani di wi sa man du te wi e kakafutu gi Satan di no lobi wi kwetikweti”. Na ini den feifi mun di pasa, den studenti ben e tan na ini wan bun èn switi presi pe a yeye fu Gado ben e tiri sma. Ma den sani di den ben studeri ben meki den kon frustan taki wi e libi na ini wan grontapu di no lobi wi kwetikweti. Na heri grontapu sma e suku fu du a pipel fu Yehovah ogri (Mateyus 24:9). Brada Jaracz ben gebroiki difrenti Bijbel tori fu tyari kon na krin taki ’wi na den moro prenspari sma di Didibri e suku fu du ogri. Wi musu meki a banti di wi abi nanga Yehovah kon moro tranga, so taki wi sa man kakafutu gi tesi’ (Yob 1:8; Danièl 6:4; Yohanes 15:20; Openbaring 12:12, 17). Na a kaba fu a lezing fu en, brada Jaracz taki dati aladi sma no lobi Gado pipel kwetikweti, toku ’nowan fetisani di sma sa meki teige wi, sa abi bun bakapisi, soleki fa Yesaya 54:17 e taki dati. Te Yehovah wani, dan a sa frulusu wi, èn a sa du dati soleki fa ensrefi feni en bun’.

Den studenti di klari a di fu 112 klas fu Gilead nanga bun bakapisi „sreka dorodoro”, èn a no de fu taki dati den sa wroko tranga fu yepi den wan di de nanga angri gi yeye nyanyan na ini den kondre pe den sa dini (2 Timoteyus 3:16, 17). Wi no man wakti fu yere fa den e tyari a boskopu gi den sma fu den kondre disi, èn a yeye nyanyan dati di den sa kisi trutru sa meki den sma dati firi moro bun.

[[Faki na tapu bladzijde 23]

A STATISTIEK FU A KLAS

Nomru fu kondre pe den komoto: 6

Nomru fu kondre pe den kisi toewijzing fu go: 19

Nomru fu studenti: 48

Gemiddeld yari di den abi: 33,2

Gemiddeld yari di den de na ini a waarheid: 15,7

Gemiddeld yari den e du furuten diniwroko: 12,2

[Prenki na tapu bladzijde 24]

A di fu 112 klas fu a Waktitoren Bijbelskoro Gilead di klari a skoro nanga bun bakapisi

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.