San wi kan leri fu a fowru disi?

„JA, DA ooievaar na ini hemel sabi da tem disi ben seti kaba gi hem . . . Ma Mi pipel no sabi da kroetoe foe MASRA [Yehovah, NW] (Yeremia 8:7, Da Bijbel na ini Sranantongo). Nanga den wortu disi Yeremia ben meki a krutu fu Yehovah bekènti teige a pipel fu Yuda di ben fadon komoto na bribi, di ben gowe libi Yehovah, a Gado fu den, èn di ben go anbegi gado fu dorosei kondre (Yeremia 7:18, 31). Fu san ede Yeremia ben gebroiki wan fowru di gersi nengrekopu, leki wan eksempre gi den Dyu di no ben de getrow?

Den Israelsma ben sabi a fowru disi, spesrutu a weti wan, èn den ben sabi taki a ben e frei go na den kondre di kari ini Bijbel. A bigi fowru disi nanga den langa futu fu en e libi krosibei fu watra èn e nyan fisi. A nen fu a fowru disi na ini Hebrewtongo na wan wortu di wani taki „getrow wan; wan sma di abi lobi bun-ati”. A nen disi fiti srefisrefi, fu di den weti man-fowru nanga uma-fowru disi e tan makandra den heri libi langa, èn dati na wan sani di furu tra fowru no e du. Na ini a moro kowru pisiten fu a yari, winter sobun, den fowru disi e tan na ini moro waran kontren. Ma ibri yari baka na a kaba fu den winter mun, dan den e drai go baka na den eigi presi, èn furu tron den e go baka na a srefi nesi di den ben gebroiki fosi.

Den sani di den fowru disi e du sondro fu prakseri, e sori na wan tumusi aparti fasi taki den de getrow. Man-fowru nanga uma-fowru, den alatu e kroku den eksi èn e tyari nyanyan gi den yongu fowru. A buku di nen Our Magnificent Wildlife e taki: „Den papa-fowru nanga mama-fowru disi e sori na wan tumusi aparti fasi taki den de getrow. Di wan man-wan fu a fowru disi na ini Doisrikondre ben tuka nanga wan stroomkabel aladi a ben e frei, dan stroom ben naki en kiri. Na uma fu en ben tan kroku den eksi en wawan dri dei langa, èn a ben gowe libi a nesi fu en wán syatu pisi ten nomo fu go suku nyanyan. . . . Ini wan tra kefal, di den ben sutu wan uma-wan fu a fowru disi kiri, dan a papa-fowru ben sorgu den pikin fowru.”

Iya, fu di a fowru disi e tan getrow na en patna en heri libi langa èn e sorgu na wan lobi fasi gi den yongu fowru fu en, dati meki en nen di wani taki „a getrow wan”, fiti en srefisrefi. Na so den fowru disi ben de wan heri bun eksempre gi den tranga-ede Israelsma di no ben de getrow.

Nownowde furu sma e feni en wan fositen sani taki sma de getrow; na eigifasi dati moi, ma a no e fiti na ini a ten disi. Sani soleki brokotrow, a gowe di sma e gowe libi den patna noso den pikin fu den, a fufuru di den e fufuru moni fu trawan, èn tra bedrigifasi e kon moro furu dei fu dei. Den sani disi e sori krin taki sma no si en leki wan prenspari sani moro fu de getrow. Na a tra sei, Bijbel e sori o prenspari a de taki wi de getrow fu di wi lobi trawan èn fu di wi abi switifasi gi den. A buku disi e gi Kresten deki-ati fu „weri a nyun fasi fa wan sma musu de, di ben meki akruderi a wani fu Gado na ini trutru regtfardikifasi nanga loyaalfasi” (Efeisesma 4:24). Iya, a nyun fasi fa wi musu de, e yepi wi fu de getrow, ma wi kan leri wan sani tu fu a fasi fa a fowru disi de getrow.