„Kon na mi, . . . èn mi sa gi unu krakti baka”

„Wei na ipi fu Gado”

„Yu de drape doronomo fu arki èn fu gi wi deki-ati nanga rai di komopo fu Bijbel.”—Pamela.

„Grantangi gi ala den sani di yu e du gi wi. A e du wi bun srefisrefi.”—Robert.

NA ATI fu Pamela nanga Robert ben naki den fu skrifi den wortu disi fu taki den Kresten owruman na ini a gemeente fu den grantangi. Tra futuboi fu Gado na heri grontapu de nanga tangi na ati tu fu di den e kisi yepi nanga sorgu doronomo fu den wan di e „wei na ipi fu Gado” (1 Petrus 5:2). Iya, a pipel fu Yehovah abi warderi gi ala den sani di den owruman e du gi den, èn den abi warderi tu gi a fasi fa den e du en.

„Abi ala ten furu fu du”

Den Kresten owruman kisi furu frantwortu (Lukas 12:48). Den e sreka densrefi fu hori lezing ini den gemeente èn den e teki prati na a wroko fu preiki a bun nyunsu fu Gado en Kownukondre. Den abi a wroko tu fu go luku tra Kresten brada nanga sisa fu den so taki den kan gi den deki-ati. Den owruman e gebroiki ten fu yepi sma di abi spesrutu yepi fanowdu, soleki den owrusma nanga tra sma di abi yepi fanowdu. Den owruman e yepi den sma disi sondro fu frigiti taki den musu sorgu gi a yeyefasi fu den eigi osofamiri èn taki den musu sorgu gi den na materia sei tu (Yob 29:12-15; 1 Timoteyus 3:4, 5; 5:8). Son owruman e yepi fu bow Kownukondre zaal. Trawan e dini leki wan memre fu na Ati-oso Kontakti Komte noso leki memre fu a grupu fu sma di e fisiti siki Kotoigi na ati-oso. Furu fu den de klariklari fu yepi na den konmakandra nanga kongres. Iya, den owruman abi „ala ten furu fu du na ini a wroko fu Masra” (1 Korentesma 15:58). A no de fu fruwondru taki den wan di e kisi yepi fu den owruman disi di e wroko tranga, e warderi den sortu owruman disi srefisrefi.—1 Tesalonikasma 5:12, 13.

Owruman di e go luku den tra Kresten brada nanga sisa doronomo na den oso noso na tra presi fu tranga den na yeye fasi, e gi den deki-ati trutru. Thomas, wan man di no kweki nanga wan papa, ben taki: „Efu mi no ben kisi a lobi-ati yepi nanga a deki-ati fu den owruman, mi no denki taki mi ben o dini Yehovah leki wan furuten dinari nownow.” Furu yonguwan di gro ini wan osofamiri pe soso wan mama noso wan papa ben de, e erken taki a yepi di den kisi fu den owruman ben yepi den fu kisi wan banti nanga Gado.

Den owruwan ini a gemeente e warderi en srefisrefi te den skapuman e go luku den. Baka di wan zendeling trowpaar, di ben abi sowan 85 yari, ben kisi wan fisiti fu tu owruman, dan den skrifi: „Wi e warderi en èn wi breiti trutru fu di yu kon luku wi. Baka di yu gowe, wi leisi ala den bijbeltekst baka di yu ben luku nanga  wi. Noiti wi sa frigiti a deki-ati di yu ben gi wi.” Wan weduwe di abi 70 yari ben skrifi den owruman: „Mi ben e begi Yehovah fu yepi mi, èn a seni unu tu brada kon na mi oso. A ben de wan blesi fu Yehovah taki unu kon na mi oso!” Yu kisi winimarki no so langa pasa fu di den owruman fu yu gemeente kon luku yu? Wi alamala e warderi a muiti di den e du fu luku den skapu di den abi fu sorgu!

Skapuman di e waka baka Gado nanga Krestes

Yehovah na wan lobi-ati skapuman (Psalm 23:1-4; Yeremia 31:10; 1 Petrus 2:25). Yesus Krestes na wan tumusi bun Skapuman sosrefi di e sorgu gi wi na yeye fasi. Fu taki en leti, Bijbel e kari en „a bun skapuman”, „a bigi skapuman”, nanga „a gran skapuman” (Yohanes 10:11; Hebrewsma 13:20; 1 Petrus 5:4). Fa Yesus du nanga den sma di ben winsi fu tron wan disipel fu en? A kari den na wan switi fasi: „Kon na mi, un alamala di e wroko tranga èn di abi hebi lai, èn mi sa gi unu krakti baka.”—Mateyus 11:28.

Ini a ten disi owruman e pruberi sosrefi fu gi na ipi deki-ati èn fu gi kibri den. Den man disi e „buweisi fu de leki wan kibripresi gi a winti èn wan kibripresi gi a sibibusi, leki watra di e lon na ini wan kondre sondro watra, leki a kowrupe fu wan bigi klepston di tanapu leti-opo na ini wan kondre di drei”(Yesaya 32:2). Den man disi di abi switifasi èn di e kibri na ipi, e gi deki-ati èn fu dati ede, na ipi e lespeki den èn Gado e feni den bun tu.—Filipisma 2:29; 1 Timoteyus 5:17.

Den e warderi a yepi srefisrefi di den e kisi fu den wefi fu den

A pipel fu Gado e warderi den Kresten owruman nanga a lobi-ati yepi di den man disi e kisi fu den wefi fu den. Ma furu tron a de so taki, te den uma disi e yepi den masra, dan den musu tyari furu ofrandi. Son leisi, den de na oso aladi den masra e sorgu gi gemeente afersi noso e go luku den skapu. Son leisi den wefi musu poti sani na wan sei di den seti finifini kaba leki osofamiri, bika wan tumusi prenspari problema de na ini a gemeente. Ma toku Michelle taki: „Te mi e si taki mi masra abi furu fu du, soleki te a e sreka ensrefi gi den konmakandra, noso te a e go luku den skapu, dan mi e hori na prakseri taki a e du a wroko fu Yehovah. Iya, mi e pruberi fu du san mi man fu yepi en.”

Cheryl, wan sisa di trow nanga wan owruman tu, taki: „Mi sabi taki den brada nanga den sisa ini a gemeente abi owruman fanowdu fu man taki nanga den, èn mi wani gi den a firi taki den abi na okasi fu man taki nanga mi masra ala ten.” Uma leki Michelle nanga Cheryl de klariklari fu tyari ofrandi so taki den masra kan sorgu den skapu fu Gado. Den wefi fu owruman de fu prèise fu di den e yepi den masra na so wan fasi.

Ma wan owruman di abi furu wroko fu du no musu frigiti taki a musu sorgu taki en wefi nanga en pikin abi sani fanowdu tu na yeye fasi. Wan owruman di trow musu de „wan sma di trawan no man feni wan sani na en tapu, a musu de wan masra di abi wán wefi nomo, den pikin fu en musu de na bribi èn sma no musu taki fu den taki den e libi wan doti libi noso taki den tranga-yesi”(Titus 1:6). A musu sorgu gi en osofamiri akruderi den markitiki di Bijbel poti gi Kresten owruman.—1 Timoteyus 3:1-7.

Gi wan owruman di abi furu fu du, wan uma di e yepi en warti trutru! Na so owruman di trow e denki fu den wefi. A de so leki fa Bijbel e taki: „Wan sma feni wan bun wefi? A sma dati feni wan bun sani” (Odo 18:22). Den owruman disi e sori o furu den e warderi den wefi fu den, ini a fasi fa den e taki èn ini a fasi fa den e du sani. Den e begi na wan opregti fasi, noso den e studeri na wan prisiri fasi nanga den wefi. Ma boiti dati, den Kresten trowpaar disi e teki ten fu abi prisiri nanga makandra fu di den e go koiri son leisi. Iya, owruman e feni en wan prisiri sani fu sorgu den wefi na wan lobi-ati fasi.—1 Petrus 3:7.

Owruman di e wei na ipi fu Gado sondro fu denki densrefi nomo, e gi a pipel fu Yehovah deki-ati na yeye fasi. Den na trutru „presenti ini libisma”, den na wan blesi gi a gemeente!—Efeisesma 4:8, 11-13.