„A sa kon krosibei na unu”

„[Gado] no de fara fu ibriwan fu wi.”​—TORI FU DEN APOSTEL 17:27.

1, 2. (a) Te wi e luku den stari na hemel, dan san wi kan aksi wisrefi fu a Mekiman? (b) Fa Bijbel e gi wi a dyaranti taki Gado e broko en ede trutru nanga wi?

OITI yu luku go na hemel tapu wan krin neti? A no ben fruwondru yu fu si ala den stari? A bun bigi hemel nanga den someni stari e fruwondru wi trutru. Grontapu na wan pikin pisi nomo fu a bun bigi universum. A sani disi wani taki dati a Mekiman, „a Moro Heiwan fu heri grontapu”, hei tumusi fu broko en ede nanga libisma? A wani taki sosrefi dati a de tumusi fara fu wi, noso taki a dangra tumusi gi wi fu wi kan kon sabi en?—Psalm 83:18.

² Bijbel e gi wi a dyaranti taki Yehovah e broko en ede trutru nanga wi. Fu taki en leti, Gado Wortu e gi wi deki-ati fu suku en, fu di a e taki: „A no de fara fu ibriwan fu wi” (Tori fu den Apostel 17:27; 1 Kroniki 28:9). Iya, efu wi e du muiti fu kon krosibei na Gado, dan a sa blesi a muiti di wi e du. Na sortu fasi a sa du dati? Den wortu fu wi yaritekst fu 2003 e gi wi wan piki di e naki wi ati: „A sa kon krosibei na unu” (Yakobus 4:8). Meki wi taki fu wan tu fu den tumusi moi blesi di Yehovah e gi den wan di de krosibei fu en.

Wan presenti di Yehovah srefi e gi wi

3. Sortu presenti Yehovah e gi den wan di e kon krosibei na en?

³ Na a fosi presi, Yehovah poti wan warti presenti na wan sei gi den futuboi fu en. Ala makti, gudu, nanga leri di a seti fu sani disi abi fu gi, no kan gi libisma a presenti disi. Yehovah srefi e gi sma a presenti disi, èn a e gi dati soso na den wan di de krosibei fu en. San na a presenti dati? Gado Wortu e piki: „Efu . . . yu e bari kari fu a frustan srefi èn e opo yu sten srefi fu kisi a koni  fu man si sani krin, efu yu e tan suku en leki solfru, èn efu yu e tan suku en leki gudu di kibri, dan fosi yu sa frustan a frede gi Yehovah, èn yu sa feni a sabi fu Gado srefi. Bika Yehovah srefi e gi koni” (Odo 2:3-6). Prakseri taki onvolmaakti libisma sa man feni „a sabi fu Gado srefi”! Wi kan gersi a presenti dati, namku a sabi di de fu feni na ini Gado Wortu, nanga „gudu di kibri”. Fu san ede dati de so?

4, 5. Fu san ede wi kan agersi „a sabi fu Gado srefi” nanga „gudu di kibri”? Gi wan eksempre fu dati.

⁴ Wan sani di wi musu sabi, na taki a sabi fu Gado abi bigi waarde. Wan fu den moro warti blesi, na taki libisma kan fruwakti fu kisi têgo libi (Yohanes 17:3). Ma a sabi dati kan gi wi prisiri na ini a libi nownowde kaba. Fu gi wan eksempre, fu di wi studeri a Wortu fu Gado bun, meki wi kon sabi den piki tapu prenspari aksi soleki: Fa Gado nen? (Psalm 83:18) San e pasa nanga den dedewan? (Preikiman 9:5, 10) San Gado abi na prakseri gi grontapu èn gi libisma? (Yesaya 45:18) Wi kon sabi sosrefi taki a moro bun fasi fu libi na fu libi akruderi den koni rai fu Bijbel (Yesaya 30:20, 21; 48:17, 18). Sobun, wi abi bun rai di e yepi wi fu kakafutu gi den broko-ede fu a libi, èn di e yepi wi sosrefi fu libi na wan fasi di e meki taki wi de koloku trutru. San de moro prenspari, na taki fu di wi studeri Gado Wortu, meki wi kon sabi den tumusi moi fasi fu Yehovah, èn wi kon krosibei na en sosrefi. San kan abi moro waarde leki wan bun banti nanga Gado di wi kisi nanga yepi fu „a sabi fu Yehovah srefi”?

⁵ Wan tra sani de di e meki taki wi kan gersi a sabi fu Gado nanga „gudu di kibri”. Furu gudu di de na ini a grontapu disi, no de fu feni bogobogo. Na so a de tu nanga a sabi fu Gado. Fu den siksi milyard sma di e libi na grontapu, sowan siksi milyun anbegiman fu Yehovah, noso pikinmoro wán sma na ini 1000 sma, feni „a sabi fu Gado srefi”. Fu kon sabi sortu aparti grani wi abi fu sabi a waarheid fu Gado Wortu, dan poti prakseri na wán aksi nomo di abi fu du nanga Bijbel: San e pasa nanga libisma te den dede? Bijbel sori wi taki a sili e dede èn taki den dedewan no sabi noti (Esekièl 18:4). Toku bun furu kerki fu grontapu e leri sma taki wan sani na ini wan sma e tan na libi baka te a sma dati dede. Disi na wan prenspari leri fu den kerki fu Krestenhèit. A leri disi de fu feni sosrefi ini a Buda bribi, a Hindu bribi, na Islam, a Jaina bribi, a Dyu bribi, a Shinto bribi, a Sikh bribi, èn sosrefi a Tao bribi. Prakseri taki a wan falsi leri disi nomo e kori milyardmilyard sma!

6, 7. (a) Suma wawan kan feni „a sabi fu Yehovah srefi”? (b) Sortu eksempre e sori taki Yehovah meki wi frustan sani krin, aladi furu „koniwan nanga den sma di abi frustan” no man frustan den sani dati?

⁶ Fu san ede a de so taki furu sma no feni „a sabi fu Gado srefi”? Fu di wi no kan frustan Gado Wortu dorodoro sondro taki wi e kisi yepi fu en. Hori na prakseri taki a sabi disi na wan presenti. Yehovah e gi a presenti disi soso na den wan di de klariklari fu ondrosuku a Wortu fu en na wan opregti fasi èn nanga sakafasi. Kande den sortu sma dati a no „koniman na skin fasi” (1 Korentesma 1:26). Grontapu ben kan si furu fu den sma disi srefi leki sma di „no sabi leisi noso skrifi” (Tori fu den Apostel 4:13). Ma a sani dati no abi trobi. Yehovah e blesi wi nanga „a sabi fu Gado srefi”, te a e si taki wi na sma di abi wan bun ati.

⁷ Poti prakseri na a eksempre disi. Furu sabiman na ini Krestenhèit skrifi bun furu buku di abi fu du nanga Bijbel. Den sortu buku dati kande e fruklari fa sani ben de na ini Bijbel ten, den kan fruteri wi san den Hebrew nanga Griki wortu wani taki, èn moro sani sosrefi. Den sabiman dati kon sabi furu sani fu Bijbel, ma wi kan taki dati den feni „a sabi fu Gado srefi”? Den e frustan krin san na a moro prenspari sani di Bijbel e leri wi, namku taki Yehovah abi a reti fu tiri hemel nanga grontapu, nanga yepi fu en hemel Kownukondre? Den sabi taki Yehovah no de wan pisi fu a Dri-wánfasi? Ma tra fasi leki den sabiman dati, wi abi soifri sabi fu den afersi dati. Fu san ede dati de so? Yehovah meki wi frustan den tru tori fu Bijbel di furu fu den „koniwan nanga den sma di abi frustan” no man frustan (Mateyus 11:25). Fu tru, Yehovah e blesi den wan di de krosibei fu en!

 „Yehovah e kibri ala den wan di lobi en”

8, 9. (a) San David ben taki fu wan tra blesi di de gi den wan di de krosibei fu Yehovah? (b) Fu san ede a de fanowdu taki Gado e kibri tru Kresten?

⁸ Den sma di de krosibei fu Yehovah e nyan bun fu wan tra blesi. Den sma disi e kisi kibri fu Yehovah. A psalm skrifiman David, di ben abi furu problema, ben skrifi: „Yehovah de krosibei fu ala den wan di e kari en, fu ala den wan di e kari en na ini trufasi. A sa gi den wan di e frede en ala san den wani, a sa yere a babari di den e meki fu kisi yepi, èn a sa frulusu den. Yehovah e kibri ala den wan di lobi en” (Psalm 145:18-20). Iya, Yehovah de krosibei fu den wan di lobi en, èn fu dati ede a kan yepi den wantewante te den e suku yepi na en.

⁹ Fu san ede a de fanowdu taki Gado kibri wi? Boiti taki tru Kresten e ondrofeni san a wani taki fu libi na ini den ’lasti dei disi di tranga fu pasa’, den de sosrefi den moro prenspari sma di Satan Didibri, a moro bigi Gensman fu Gado, e suku fu du ogri (2 Timoteyus 3:1). A feanti dati di abi trikifasi e suku fu „nyan” wi (1 Petrus 5:8). Satan e frufolgu wi, a e kwinsi wi, èn e a tesi wi. A e luku sosrefi efu wi abi denki nanga fasi di a kan gebroiki. A e suku fu du wán sani nomo: fu swaki a bribi fu wi èn fu pori a yeyefasi fu wi (Openbaring 12:12, 17). Fu di a de so taki wi musu feti nanga sowan tranga feanti, dan a no e gi wi deki-ati fu sabi taki „Yehovah e kibri ala den wan di lobi en”?

10. (a) Fa Yehovah e kibri a pipel fu en? (b) Sortu fasi na a moro prenspari fasi fu kisi kibri, èn fu san ede dati de so?

¹⁰ Ma fa Yehovah e kibri a pipel fu en? Aladi Yehovah pramisi wi taki a sa kibri wi, toku dati no wani taki dati wi libi sa de sondro problema na ini a seti fu sani disi. A no wani taki sosrefi taki a de fruplekti fu du wondru fu a bun fu wi. Ma Yehovah e kibri en pipel leki wan grupu so taki ogri no e miti den. Iya, Yehovah noiti sa gi pasi taki Didibri figi tru anbegiman puru fu grontapu! (2 Petrus 2:9) San de moro prenspari, na taki Yehovah e kibri wi na yeye fasi. A e gi wi san wi abi fanowdu fu man kakafutu gi tesi èn fu man sorgu taki wi e tan abi wan bun banti nanga en. Te fu kaba a de moro prenspari taki wi e kisi kibri na yeye fasi. Fu san ede dati de so? So langa leki wi abi wan banti nanga Yehovah, dan noti, srefi dede, no kan du wi ogri fu têgo.—Mateyus 10:28.

11. Sortu sani Yehovah seti fu kibri a pipel fu en na yeye fasi?

¹¹ Yehovah seti bun furu sani so taki den wan di abi wan bun banti nanga en kan kisi kibri na yeye fasi. Nanga yepi fu en Wortu, Bijbel, a e sori wi fa fu kakafutu gi difrenti sortu tesi (Yakobus 1:2-5). Te wi e gebroiki den bun rai di de fu feni na ini den Buku fu Bijbel, dan dati na wan fasi kaba fa wi e kisi kibri. Boiti dati, Yehovah e gi „santa yeye na den wan di e aksi en fu dati” (Lukas 11:13). A yeye dati na a moro krakti yeye na hemel nanga grontapu, èn fu dati ede a kan yepi wi trutru fu kakafutu gi iniwan tesi di e miti wi. Nanga yepi fu Krestes, Yehovah e gi wi „presenti ini libisma” (Efeisesma 4:8). Den mansma disi di lepi na yeye fasi e du muiti fu sori a srefi sari-ati di Yehovah abi te den e yepi den Kresten brada nanga sisa fu den.—Yakobus 5:14, 15.

12, 13. (a) Na sortu fasi Yehovah e gi wi yeye nyanyan na a yoisti ten? (b) Fa yu feni den sani di Yehovah seti fu kan meki sani waka bun nanga wi na yeye fasi?

 ¹² Yehovah sorgu gi wan tra sani di musu kibri wi, èn dati na yeye nyanyan na a yoisti ten (Mateyus 24:45). Nanga yepi fu den publikâsi di tyari kon na doro, sosrefi den tijdschrift A Waktitoren nanga Ontwaakt!, èn nanga yepi fu konmakandra, bigi konmakandra, nanga kongres, Yehovah e gi wi san wi abi fanowdu, na a ten di wi abi dati fanowdu. Yu kan memre wan okasi di yu yere wan sani na wan Kresten konmakandra, wan bigi konmakandra, noso na wan kongres di naki yu ati èn di tranga yu, noso di gi yu trowstu? Oiti yu leisi wan artikel na ini wan fu den tijdschrift di kari na tapusei èn yu firi taki a sani dati ben skrifi spesrutu gi yu?

¹³ Wan fasi fa Satan e tesi furu sma, na fu di a e meki den lasi-ati. A sani dati kan pasa nanga wi alamala. Satan sabi heri bun taki te wi e firi brokosaka tumusi langa, dan dati kan meki wi lasi krakti, èn wi kan kon swaki sosrefi (Odo 24:10). Fu di Satan e pruberi fu gebroiki den takru denki fu wi, meki wi abi yepi fanowdu. Den Waktitoren nanga Ontwaakt! son leisi abi artikel di e yepi wi fu no lasi-ati. Wan Kresten sisa ben skrifi fu so wan artikel: „Mi e leisi na artikel pikinmoro ibri dei, èn mi e krei ibri leisi. Mi poti a tijdschrift na sei mi bedi so taki mi kan abi en na mi te mi e firi brokosaka. Nanga yepi fu den sortu artikel disi, mi kan firi fa Yehovah e poti en anu na mi lontu fu kibri mi.” * Wi no de nanga tangi na ati taki Yehovah e gi wi yeye nyanyan na a yoisti ten? Hori na prakseri taki den sani di a seti so taki sani e waka bun nanga wi na yeye fasi, e sori taki a de krosibei fu wi èn taki a e sorgu taki noti no pasa nanga wi.

Wi kan taki nanga a „Yereman fu begi”

14, 15. (a) Fa Yehovah srefi e blesi den wan di de krosibei na en? (b) Fu san ede a de wan bigi grani taki wi man begi Yehovah ala ten?

¹⁴ Yu no si taki te libisma e kisi makti, dan furu tron den no abi ten moro gi den wan di lagi moro den. Ma fa a de nanga Yehovah? A de tumusi fara fu libisma fu man poti prakseri na den sani di den e taigi en? Kwetikweti! A grani di wi abi fu begi na ete wan blesi di Yehovah e gi den wan di de krosibei fu en. A trutru de wan bigi grani di wi abi fu man taki ala ten nanga a „Yereman fu begi” (Psalm 65:2). Fu san ede dati de so?

¹⁵ Luku na eksempre disi: A fesiman fu wan bigi bisnis abi furu frantwortu. A e bosroiti sortu afersi ensrefi sa luku èn sortuwan a sa gi trawan fu luku. A Tiriman fu hemel nanga grontapu kan bosroiti tu sortu afersi ensrefi sa luku èn sortuwan a sa gi en Manpikin fu luku. Prakseri ala den afersi di Yehovah gi en lobi Manpikin, Yesus, fu luku. A Manpikin kisi „makti fu krutu sma” (Yohanes 5:27). Den engel „poti na en ondro” (1 Petrus 3:22). Yehovah gi Yesus en makti santa yeye di e yepi en fu tiri den disipel fu en na grontapu (Yohanes  15:26; 16:7). Fu dati ede Yesus ben kan taki: „Mi kisi ala makti na ini hemel èn na grontapu” (Mateyus 28:18). Ma te a abi fu du nanga den begi fu wi, dan Yehovah e bosroiti fu arki den ensrefi. Fu dati ede Bijbel e taigi wi taki wi musu begi Yehovah wawan, èn wi musu du dati na ini a nen fu Yesus.—Psalm 69:13; Yohanes 14:6, 13.

16. Fu san ede wi kan abi na overtoigi taki Yehovah e arki den begi fu wi trutru?

¹⁶ Yehovah e arki den begi fu wi trutru? Efu A no ben e broko en ede nanga wi, dan a noiti ben o gi wi a rai fu „horidoro na ini begi”, noso fu trowe wi hebi nanga broko-ede na en tapu (Romesma 12:12; Psalm 55:22; 1 Petrus 5:7). Getrow futuboi na ini Bijbel ten ben abi a fasti overtoigi taki Yehovah e arki den begi fu sma (1 Yohanes 5:14). Fu dati ede, a psalm skrifiman David ben taki: „[Yehovah] e yere mi sten” (Psalm 55:17). Wi tu kan abi na overtoigi, taki Yehovah de krosibei fu wi, èn taki a de klariklari ala ten fu arki wi ibri leisi te wi wani taki nanga en fu den broko-ede fu wi.

Yehovah e blesi den futuboi fu en

17, 18. (a) Fa Yehovah feni a getrow diniwroko di libisma nanga frustan e du gi en? (b) Fruklari fa Odo 19:17 e sori taki Yehovah e si den sani di wi e du fu yepi trawan di de na nowtu.

¹⁷ Yehovah na Tiriman fu hemel nanga grontapu, èn noti san libisma e du noso e weigri fu du, sa man kenki dati. Toku Yehovah na wan Gado di de klariklari fu sori taki a e warderi libisma. A e warderi a getrow diniwroko di libisma e du gi en, fu taki en leti, a lobi dati (Psalm 147:11). Soleki fa wi e si, dan disi na wan tra blesi di den wan di de krosibei fu Yehovah e kisi: Yehovah e blesi den futuboi fu en.—Hebrewsma 11:6.

¹⁸ Bijbel e sori krin taki Yehovah e warderi den sani di den anbegiman fu en e du. Fu gi wan eksempre, wi e leisi: „En di e yepi den mofinawan e leni Yehovah, èn A sa pai en gi san a du” (Odo 19:17). A Wet fu Moses e sori taki Yehovah abi sari-ati nanga den mofinawan (Lefitikus 14:21; 19:15). Fa Yehovah e firi te wi e sori sari-ati gi  den mofinawan soleki fa En e du dati? Te wi e gi a mofinawan, aladi wi no e fruwakti noti fu en, dan Yehovah e si disi leki wan paiman di a e meki na wi. Yehovah e pramisi fu pai a paiman dati nanga yepi fu a bun-ati fu en, èn nanga yepi fu blesi di a sa gi wi (Odo 10:22; Mateyus 6:3, 4; Lukas 14:12-14). Iya, te wi e sori sari-ati gi wan Kresten brada noso sisa fu wi di de na nowtu, dan dati e naki Yehovah en ati. Wi de nanga tangi na ati trutru fu di wi sabi taki wi hemel Tata e si den sani di wi e du fu yepi trawan di de na nowtu!—Mateyus 5:7.

19. (a) Fu san ede wi kan abi a dyaranti taki Yehovah e warderi san wi e du na ini a preikiwroko èn na ini a wroko di e du fu meki disipel? (b) Fa Yehovah e blesi wi gi den sani di wi e du fu a bun fu en Kownukondre?

¹⁹ Yehovah e warderi spesrutu den sani di wi e du fu a bun fu en Kownukondre. Te wi e kon krosibei fu Yehovah, dan a no de fu taki dati wi sa wani gebroiki wi ten, wi krakti, nanga den sani di wi abi fu teki prati so furu leki wi man na a Kownukondre preikiwroko, èn na a wroko di e du fu meki disipel (Mateyus 28:19, 20). Son leisi wi ben kan feni taki wi no e du nofo. Na onvolmaakti ati fu wi ben kan meki wi tweifri sosrefi efu Yehovah e prisiri nanga a muiti di wi e du (1 Yohanes 3:19, 20). Ma Yehovah e warderi ibri presenti, awansi o pikin, te wi e gi en dati nanga wi heri ati fu di wi lobi en (Markus 12:41-44). Bijbel e gi wi a dyaranti: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en” (Hebrewsma 6:10). Iya, Yehovah e memre èn a e blesi wi gi srefi den moro pikin sani di wi e du fu a bun fu a Kownukondre fu en. Boiti taki wi kan kisi blesi na yeye fasi now, wi kan fruwakti fu kisi wan tumusi bun libi na ini a nyun grontapu di de na wi fesi pe Yehovah sa opo en anu nanga ala prisiri, èn a sa gi ala den regtfardiki sma di de krosibei fu en san den abi fanowdu!—Psalm 145:16; 2 Petrus 3:13.

20. Fa wi kan hori den wortu fu wi yaritekst na prakseri na ini a yari 2003, èn san sa de a bakapisi fu dati?

²⁰ Meki wi tan aksi wisrefi na ini a yari 2003 efu wi e tan du muiti fu kon krosibei fu wi hemel Tata. Efu dati de so, dan wi kan abi a dyaranti taki a sa du san a pramisi. Iya, „Gado . . . no man lei” (Titus 1:2). Efu yu e kon krosibei na en, dan a sa kon krosibei na yu (Yakobus 4:8). San sa de a bakapisi fu dati? Wi sa kisi bigi blesi now, èn wi sa man kon moro krosibei na Yehovah te wi e libi fu têgo na ini a ten di e kon!

[Futuwortu]

Yu e memre disi ete?

• Sortu presenti Yehovah e gi den wan di e kon krosibei na en?

• Sortu sani Yehovah seti so taki a pipel fu en kan kisi kibri na yeye fasi?

• Fu san ede wi musu si en leki wan tumusi moi grani taki wi kan taki nanga Yehovah ala ten?

• Fa Bijbel e sori taki Yehovah e warderi a getrow diniwroko di libisma e du gi en?

[Aksi fu a tori disi]

[Prenki na tapu bladzijde 15]

Yehovah meki wi frustan den tru tori fu Bijbel

[Prenki na tapu bladzijde 16, 17

Yehovah e sorgu taki wi e kisi kibri na yeye fasi

[Prenki na tapu bladzijde 18]

Yehovah de krosibei fu wi, èn a de klariklari fu arki ibriwan fu den begi fu wi