Den sani di wi kan leri fu a ten di Yesus gebore

MILYUNMILYUN sma lobi den sani di pasa na a ten di Yesus gebore. Wi kan si dati te wi e luku den someni sani di sma e du fu prenki a fasi fa Yesus gebore, èn sosrefi den Kresneti komediprei di e hori na heri grontapu na a ten dati. Aladi sma lobi den tori di abi fu du nanga a ten di Yesus gebore, toku den sani disi no ben skrifi na ini Bijbel fu gi sma wan prisiri ten. Na presi fu dati, den tori dati na wan pisi fu den Buku fu Bijbel di skrifi nanga yepi fu Gado en santa yeye èn di bun sosrefi fu gi leri èn fu poti sani kon reti.—2 Timoteyus 3:16.

Efu Gado ben wani taki Kresten ben musu memre a dei di Yesus gebore, dan Bijbel ben o sori krin tapu sortu dei fu a yari Yesus ben gebore. Bijbel e sori wi a dei dati? A Bijbel sabiman fu a di fu 19 yarihondro, Albert Barnes, ben taki dati Yesus ben gebore na a ten di skapuman ben de na ini den gron te neti fu luku den skapu fu den. A ben taki moro fara: „A sani disi e sori krin taki wi Frulusuman ben gebore bifo 25 december . . . Na a ten dati a kowru, èn dati de so spesrutu na ini a kontren krosibei fu Betlehem di lai nanga bergi. Gado no meki sma kon sabi o ten [Yesus] gebore. . . . Boiti dati, a no ben de fanowdu sosrefi taki sma musu kon sabi o ten a gebore; efu a ben de fanowdu taki den sabi dati, dan Gado ben o meki sma skrifi dati na ini Bijbel.”

Kontrari fu dati, den skrifiman fu den Evangelietori e meki wi kon sabi krinkrin tapu sortu dei Yesus dede. Dati ben pasa tapu a dei fu a Paskafesa, di ben hori tapu a di fu 14 dei fu a Dyu mun Nisan, na a pisi ten baka a moro kowru ten fu a yari. Boiti dati, Yesus ben komanderi  den bakaman fu en krin fu hori a dei dati na prakseri fu memre en (Lukas 22:19). Bijbel no e taki dati den bakaman fu Krestes ben kisi sosrefi wan komando fu memre a dei di Yesus gebore, iya, den no musu memre a geborte dei fu nowan enkri tra sma tu. A sari fu taki dati na fu di sma abi difrenti denki fu a dei di Yesus gebore, meki den no e poti prakseri na den moro prenspari sani di pasa na a ten dati.

Wan papa nanga wan mama di Gado ben feni bun

Fu ala den dusundusun osofamiri di ben de na ini Israel, sortu papa nanga mama Gado ben feni bun fu kweki en Manpikin? A ben feni en prenspari taki den sma disi ben abi biginen èn taki den ben de gudu sma? Nôno. Na presi fu dati, Yehovah luku efu den sma disi ben de sma di ben lobi en. Luku a prèisesingi fu Maria, soleki fa a skrifi na Lukas 1:46-55, èn di a ben singi baka di a kon yere taki a ben kisi a grani fu tron a mama fu a Mesias. Wan fu den sani di a ben taki ben de: „Mi e prèise Yehovah . . . bika a si a mofina fasi fu en umasrafu.” A ben abi nofo sakafasi fu si ensrefi leki wan „mofina” sma, leki wan umasrafu fu Yehovah. San de moro prenspari, na taki den moi wortu na ini a prèisesingi fu Maria e tyari kon na krin taki a ben de wan sma di ben lobi yeye afersi èn taki a ben sabi den Buku fu Bijbel bun. Aladi a ben de wan sondu bakapikin fu Adam, toku a ben de a yoisti sma na grontapu di ben kan tron a mama fu a Manpikin fu Gado.

Fa a de nanga a masra fu Maria, di bakaten ben teki Yesus leki en eigi pikin? Yosef ben de wan man di ben sabi a temrewroko heri bun. Fu di a ben de klariklari fu wroko tranga, meki a ben man sorgu gi wan osofamiri di te fu kaba ben abi feifi manpikin èn no moro mendri leki tu umapikin (Mateyus 13:55, 56). Yosef no ben de wan gudu sma. Di a ten ben doro gi Maria fu tyari en fosi gebore manpikin go na a tempel fu Gado, dan Yosef ben musu fu firi fruferi taki a no ben kan gi wan skapu leki srakti-ofrandi, soleki fa a Wet ben taki. Na presi fu dati, den ben musu gi wan ofrandi di ben fiti gi pôtisma. Disi na san a wet fu Gado ben taki fu a mama fu wan nyungebore manpikin: „Efu a no abi nofo moni fu pai gi wan skapu, dan a musu teki tu stondoifi noso tu yongu osodoifi, wán gi wan bron-ofrandi èn wán gi wan sondu-ofrandi, èn a priester musu aksi Gado pardon gi en, èn a musu de krin.”—Lefitikus 12:8; Lukas 2:22-24.

Bijbel e taki dati Yosef „ben de wan regtfardiki sma” (Mateyus 1:19). Fu gi wan eksempre, teleki Yesus ben gebore, Yosef no ben abi seks nanga a wefi fu en di ben de wan nyunwenke. A sani disi ben meki sma sabi soifri suma ben de a trutru Papa fu Yesus. A no ben sa de wan makriki sani gi wan trowpaar di no ben trow so langa ete, fu no abi seks aladi den ben e libi na ini a srefi oso. Ma a sani disi ben sori taki den ala tu ben abi warderi gi a grani di den ben kisi fu kweki a Manpikin fu Gado.—Mateyus 1:24, 25.

Neleki Maria, Yosef ben de wan sma tu di ben lobi yeye afersi. Ibri yari, a ben tapu nanga a wroko fu en gi wan pisi ten, èn a ben e tyari en osofamiri komoto fu Nasaret go na Yerusalem fu de na a alayari Paskafesa, wan waka di ben e teki dri dei (Lukas 2:41). A ben musu de so tu taki Yosef ben leri Yesus fu teki prati ibri wiki na a anbegi na ini a snoga fu a foto fu den, pe sma ben e leisi èn ben e fruklari Gado Wortu (Lukas 2:51; 4:16). Sobun, wi no abi fu tweifri taki Gado ben teki a yoisti uma fu de a mama fu en Manpikin na grontapu. A ben teki a yoisti papa sosrefi fu kweki Yesus leki en eigi Manpikin.

Wan bigi blesi gi den skapuman di ben abi sakafasi

Aladi a no ben makriki gi a wefi fu Yosef di ben de nanga bere neigi mun kaba, toku Yosef go na a  foto fu den fosi tata fu en, soleki fa Ceasar ben komanderi a pipel, fu meki sma skrifi a nen fu den na ini lantibuku. Di a trowpaar doro na ini Betlehem, dan den no ben man feni wan tanpresi fu di a foto ben lai nanga sma. Fu dati ede den ben musu tan na ini wan pen pe Yesus gebore, èn baka dati den poti en na ini wan nyanyanbaki. Fu krakti a bribi fu a papa nanga mama disi di ben abi sakafasi, meki Yehovah gi den na overtoigi taki a geborte fu a pikin disi trutru ben de a wani fu En. A ben seni wan grupu fu prenspari owruman fu Betlehem go na a trowpaar fu gi den a dyaranti dati? Nôno. Na presi fu dati, Yehovah Gado tyari a tori disi kon na krin gi skapuman di ben e wroko tranga èn di ben de na dorosei ini den gron te neti fu luku den skapu fu den.

Na engel fu Gado kon na den, èn a taigi den fu go na Betlehem pe den ben o feni a nyungebore Mesias di „ben e didon na ini wan nyanyanbaki”. Fa den man disi ben feni a sani dati? Den man disi di ben abi sakafasi ben skreki noso den ben syen fu yere taki a nyungebore Mesias ben de na ini wan pen? Kwetikweti! Sondro fu draidrai, den libi den skapu fu den, èn den teki pasi fu go na Betlehem. Di den feni Yesus, dan den fruteri Yosef nanga Maria san na engel fu Gado ben taki. A no de fu taki dati a sani disi gi a trowpaar wan moro krakti bribi, taki ala sani ben e waka na a fasi fa Gado ben wani. „Den skapuman”, fu den sei, „drai go baka, èn den gi Gado glori èn den prèise en gi ala den sani di den yere èn si” (Lukas 2:8-20). Iya, Yehovah ben du wan bun sani di a ben meki den skapuman di ben abi frede gi en kon sabi fu a sani disi di ben pasa.

Fu den sani di skrifi na tapusei wi e leri sortu sma wi musu de efu wi wani taki Gado feni wi bun. Wi no musu suku fu kisi biginen, noso fu tron gudu sma. Na presi fu dati, neleki Yosef, Maria, nanga den skapuman, wi musu gi yesi na Gado èn wi musu sori taki wi lobi en fu di wi e poti moro prakseri na yeye afersi na presi taki wi e suku fu kon gudu. Iya, wi kan leri furu bun sani te wi e denki dipi fu a tori di e taki fu den sani di pasa na a ten di Yesus gebore.

[Prenki na tapu bladzijde 7]

San wi e leri te wi e luku taki Maria ben gi tu osodoifi leki ofrandi?

[Prenki na tapu bladzijde 7]

Gado ben bosroiti fu meki wan tu skapuman di ben abi sakafasi kon sabi taki Yesus ben gebore