„Kon krosibei na Gado”
„Kon krosibei na Gado”
„Kon krosibei na Gado, èn a sa kon krosibei na unu.”—YAKOBUS 4:8.
1, 2. (a) San libisma gwenti fu taki? (b) Sortu rai Yakobus ben gi den salfu Kresten, èn fu san ede a rai dati ben bun gi den?
„GADO de nanga wi.” Den wortu dati de fu si tapu fraga fu kondre noso tapu tra sani di e prenki kondre, èn sosrefi tapu srudatikrosi. Den wortu „Tapu Gado wi e frutrow” de fu si tapu bun furu pikin moni nanga papira moni fu a ten disi. Libisma gwenti fu taki dati den abi wan bun banti nanga Gado. Son sma lobi fu taki dati den abi wan bun banti nanga Gado, noso den e skrifi dati poti tapu sani, meki ala sma si taki dati de so. Ma fu taki en leti, dati no wani taki ete dati wan sma abi wan bun banti nanga Gado. A no so?
2 Bijbel e sori taki wi kan abi wan banti nanga Gado. Ma wi musu du muiti fu man abi sowan banti nanga en. Srefi wan tu salfu Kresten fu a fosi yarihondro ben musu tranga a banti di den ben abi nanga Yehovah Gado. A Kresten opziener Yakobus ben musu warskow wan tu Kresten fu di den ben gi densrefi abra na den lostu fu a skin, èn fu di den no ben de krin moro na yeye fasi. Boiti dati, a ben gi den a krakti rai sosrefi fu: „Kon krosibei na Gado, èn a sa kon krosibei na unu” (Yakobus 4:1-12). San Yakobus ben wani taki di a taigi den Kresten fu „kon krosibei” na Gado?
3, 4. (a) Fu san den wortu „kon krosibei na Gado” kande ben memre den leisiman fu Yakobus na ini a fosi yarihondro? (b) Fu san ede wi kan abi a dyaranti taki wi kan kon krosibei na Gado?
3 Yakobus ben gebroiki wortu di furu fu den salfu Kresten fu a ten dati ben o man frustan. A Wet fu Moses ben gi den priester krinkrin rai fa fu „kon krosibei na” Yehovah fu a bun fu en pipel (Exodus 19:22). A kan taki Yakobus ben memre den leisiman fu en na a fasi disi taki den ben musu kon krosibei na Yehovah, èn taki den no ben musu si a sani dati leki wan lawlaw sani. Yehovah na a moro hei Sma fu hemel nanga grontapu.
4 Na a tra sei, soleki fa wan Bijbel sabiman e taki, dan „a rai disi [di skrifi na Yakobus 4:8] e tyari wan sani kon na krin di e gi wi wan krakti howpu”. Yakobus ben sabi taki Yehovah e tan gi sondu libisma a kari fu kon krosibei na en (2 Kroniki 15:2). A srakti-ofrandi fu Yesus opo a pasi gi sma fu kon krosibei na Yehovah na wan fasi di sa tyari moro wini kon gi den (Efeisesma 3:11, 12). Na ini a ten disi, milyunmilyun sma e kisi okasi fu kon krosibei na Gado! Ma fa wi kan kisi wini fu a tumusi moi okasi disi? Wi sa poti prakseri syatu na dri sani di sa yepi wi fu kon krosibei na Yehovah Gado.
Tan ’teki sabi na ini yu’ fu Gado
5, 6. Fa na eksempre fu a yongu Samuel e sori san a wani taki fu „teki sabi na ini yu” fu Gado?
5 Soleki fa Yohanes 17:3 e sori, dan Yesus ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes.” Furu Bijbel vertaal a tekst disi tra fasi leki fa a Nieuwe-Wereldvertaling e du dati. Na presi taki den Bijbel e taki ’teki sabi na ini yu’ fu Gado, den e vertaal a prakseri dati nomo leki „sabi” Gado. Ma wan tu sabiman e taki dati a Griki wortu di sma ben gebroiki fosi gi a prakseri disi wani taki moro leki dati. A wortu dati ben wani taki dati wan sma musu tan teki sabi na ini en fu wan trawan, so taki a kan kon tron wan heri bun mati fu a sma dati.
6 Den sma na ini a ten fu Yesus no ben de den fosi sma di ben abi na okasi fu kon sabi Gado bun. Fu gi wan eksempre, na ini den Hebrew Buku fu Bijbel, wi e leisi taki di Samuel ben de wan boi, dan a „no ben kon leri sabi Yehovah ete” (1 Samuel 3:7). A sani disi ben wani taki dati Samuel no ben sabi en Gado bun? Nôno. Samuel en papa nanga en mama, èn sosrefi den priester seiker ben leri en bun furu fu Yehovah. Ma soleki fa wan sabiman e taki, dan sma kan gebroiki a Hebrew wortu ini a vers dati „fu taki fu wan tumusi tranga banti di tu sma abi nanga makandra”. Samuel no ben kon leri sabi Yehovah ete soleki fa a ben kon sabi en bakaten di a ben e dini leki a takiman fu Yehovah. Na a ten di Samuel ben e gro kon bigi, dan a kon sabi Yehovah trutru, èn a kisi wan heri bun banti nanga en.—1 Samuel 3:19, 20.
7, 8. (a) Fu san ede wi no musu gi pasi taki den moro dipi leri fu Bijbel e meki wi lasi-ati? (b) San na wan tu fu den dipi sani fu a waarheid fu Gado Wortu di wi musu studeri?
7 Yu e teki sabi fu Yehovah na ini yu fu man kisi wan bun banti nanga en? Fu man du dati, dan yu musu „kweki wan angri” gi a yeye nyanyan di Gado e gi wi (1 Petrus 2:2). Yu no musu feni taki yu sabi nofo kaba te yu sabi soso den prenspari sani fu Bijbel. Du muiti fu kon frustan wan tu fu den moro dipi sani fu Bijbel (Hebrewsma 5:12-14). Yu e lasi-ati fu di yu feni taki den leri dati muilek tumusi? Efu dati de so, dan hori na prakseri taki Yehovah na a „Gran Leriman” (Yesaya 30:20). A sabi fa fu meki sondu libisma kon frustan den dipi sani fu a waarheid fu Bijbel. Boiti dati, a kan blesi na opregti muiti di yu du fu kon frustan san a e leri yu.—Psalm 25:4.
8 Fu san ede yusrefi no e ondrosuku wan tu fu den „dipi sani fu Gado”, fu kon sabi moro fu den? (1 Korentesma 2:10) Den sani disi a no soi tori soleki den wan di kerki leriman nanga kerki fesiman kande gwenti fu taki fu den. Den sani disi na leri di wi kan gebroiki bun na ini wi libi èn den e meki wi kon frustan moro bun fa wi lobi-ati Tata e denki èn e firi. Fu gi wan eksempre, poti prakseri na a leri fu a lusu-paiman, a „santa kibritori”, èn den difrenti frubontu di Yehovah gebroiki fu a bun fu en pipel, so taki a ben man du san a abi na prakseri. Ala den tori disi èn furu trawan sosrefi na moi tori di wi musu ondrosuku èn studeri.—1 Korentesma 2:7.
9, 10. (a) Fu san ede a no bun kwetikweti taki wan sma abi bigifasi, èn san sa yepi wi fu no abi a fasi dati? (b) Fu san ede wi musu de nanga sakafasi te a abi fu du nanga a sabi fu Yehovah?
9 Aladi yu e kon sabi moro fu den dipi sani fu a waarheid fu Bijbel, dan yu musu luku bun taki yu no kisi bigifasi fu di yu leri sabi furu sani (1 Korentesma 8:1). A no bun kwetikweti te wan sma abi bigifasi, fu di a sma dati sa drai baka gi Gado (Odo 16:5; Yakobus 4:6). Hori na prakseri taki nowan sma no musu meki bigi fu di a abi furu sabi. Fu gi wan eksempre, poti prakseri na den bigin wortu fu wan buku di e taki fu den nyun sani di sabiman meki, noso kon sabi. Disi na den wortu: „O moro wi e kon sabi, o moro wi e kon si taki bun furu sani de ete di wi no sabi. . . . Te wi e luku ala den sani di wi musu kon sabi ete, dan fu taki en leti, wi no sabi noti.” A e gi prisiri fu si taki sma de ete di abi sowan sakafasi. We, te a abi fu du nanga a sabi di no abi kaba, namku a sabi fu Yehovah Gado, dan dati musu meki wi abi moro sakafasi. Fu san ede dati de so?
10 Poti prakseri na wan tu sani di Bijbel e taki fu Yehovah. „Den prakseri fu yu dipi srefisrefi” (Psalm 92:5). „A frustan fu [Yehovah] no skotu” (Psalm 147:5). „Sma no kan kon sabi a frustan fu [Yehovah] finifini” (Yesaya 40:28). „Gado abi bun furu gudu, nanga koni, nanga sabi trutru!” (Romesma 11:33) A de krin taki wi noiti no sa kon sabi ala sani fu Yehovah (Preikiman 3:11). A leri wi furu moi sani, ma ala ten bun furu sani sa de di wi musu kon sabi ete. A sani dati a no wan tumusi moi sani di e gi wi sakafasi? Te wi e kon sabi moro sani fu Yehovah, dan meki wi gebroiki a sabi dati ala ten fu kon krosibei na Yehovah, èn meki wi gebroiki en sosrefi fu yepi trawan fu du a srefi. Noiti wi musu gebroiki a sabi disi fu meki trawan firi taki wi hei moro den.—Mateyus 23:12; Lukas 9:48.
Sori Yehovah taki yu lobi en
11, 12. (a) Sortu krakti den sani di wi e kon sabi fu Yehovah musu abi na wi tapu? (b) San e sori taki wan sma lobi Gado trutru?
11 Na apostel Paulus e sori wi san sabi abi fu du nanga lobi, èn a e du dati na a yoisti fasi. A ben skrifi: „Disi na san mi e tan begi, taki unu kan sori lobi moro nanga moro, nanga soifri sabi èn nanga ala koni fu man si sani krin” (Filipisma 1:9). Ibri warti tru tori di wi e kon sabi fu Yehovah èn fu den sani di a abi na prakseri, musu meki wi kisi moro lobi gi wi hemel Tata. A sabi di wi kon sabi den sani disi, no musu meki wi kisi bigifasi.
12 A no de fu taki, dati furu sma di e taki dati den lobi Gado, fu taki en leti, no lobi en. Kande a de so trutru taki den abi wan waran firi gi Gado na ini den ati. Den sortu firi dati bun, èn den de fu prèise sosrefi te den e kruderi nanga soifri sabi. Ma te wan sma abi den firi dati, dan dati no wani taki dati a sma dati lobi Gado trutru. Fu san ede dati de so? Luku fa Gado Wortu e sori san lobi gi Gado wani taki trutru: „Disi na san a lobi fu Gado wani taki, dati wi e du san den komando fu en e taki” (1 Yohanes 5:3). Wan sma lobi Yehovah trutru soso te a sma dati e du san Yehovah e fruwakti fu en.
13. Fa a frede di wi abi gi Yehovah sa yepi wi fu sori taki wi lobi en?
13 Te wi abi frede gi Yehovah, dan dati sa yepi wi fu gi yesi na en. Wi e kisi a dipi lespeki disi gi Yehovah, fu di wi e kon sabi moro fu en, fu a santafasi fu en di no abi skotu, fu en glori, en makti, en retidu, en koni, nanga en lobi. Fu man kon krosibei na Yehovah, dan a de prenspari srefisrefi taki wi abi so wan frede gi en. Fu taki en leti, luku san Psalm 25:14 e taki: „Yehovah abi wan tranga banti nanga den wan di e frede en.” Sobun, te wi e du ala san wi man fu no meki wi hemel Tata firi sari, dan wi kan kon krosibei na en. A frede di wi abi gi Gado sa yepi wi fu gi yesi na a bun rai di skrifi na Odo 3:6: „Poti prakseri na en na ini ala yu pasi, èn ensrefi sa meki yu pasi kon reti.” San dati wani taki?
14, 15. (a) San na wan tu fu den bosroiti di wi musu teki na ini wi aladei libi? (b) Fa wi kan teki bosroiti na wan fasi di e sori taki wi abi frede gi Gado?
14 Yu musu teki bosroiti ibri dei, awansi na bigi bosroiti noso pikinwan. Fu gi wan eksempre, fu sortu sani yu sa taki nanga den sma na yu wrokope, nanga yu skoromati, èn nanga den birtisma fu yu? (Lukas 6:45) Yu sa wroko tranga fu du a wroko di yu musu du, noso yu sa suku fasi fu no du tumusi furu fu a wroko dati? (Kolosesma 3:23) Yu sa tron mati fu sma di no e sori taki den lobi Yehovah, noso yu sa suku fu kisi wan moro bun banti nanga sma di lobi En? (Odo 13:20) San yu sa du, awansi na pikinso nomo, fu horibaka gi a Kownukondre fu Gado? (Mateyus 6:33) Efu yu abi a gwenti fu teki bosroiti akruderi den Bijbel gronprakseri di kari dyaso, dan a no de fu taki, dati yu e poti prakseri na Yehovah „ini ala den pasi fu yu”.
15 Iya, ibri leisi te wi e teki wan bosroiti, dan wi musu aksi wisrefi: ’San Yehovah ben o wani taki mi du? San a ben o feni moro bun?’ (Odo 27:11) Te wi e du dati, dan wi e sori Yehovah na wan tumusi moi fasi taki wi lobi en. Te wi abi frede gi Gado, dan dati sa meki tu taki wi e tan krin na yeye fasi, wi sa tan tyari wisrefi na wan fasi di fiti, èn wi sa tan hori wi skin krin. Hori na prakseri taki, na ini a srefi tekst pe Yakobus e gi Kresten deki-ati fu „kon krosibei na Gado”, a e gi wi a deki-ati disi sosrefi: „Krin un anu, un sondari, èn meki un ati kon soifri, unu di no man teki bosroiti.”—Yakobus 4:8.
16. San wi noiti sa man du te wi e gi Yehovah fu den sani di wi abi, ma san wi sa man du ala ten?
16 A no de fu taki, dati wi no musu wai pasi nomo gi san ogri fu sori taki wi lobi Yehovah. Te wi lobi Gado, dan wi sa du sosrefi san bun. Fu gi wan eksempre, fa wi feni en taki Yehovah e gi wi so furu sani? Yakobus ben skrifi: „Ibri bun presenti nanga ibri volmaakti kado e kon fu tapusei, bika a e saka kon fu a Tata fu den hemel leti” (Yakobus 1:17). A tru taki, te wi e gi Yehovah fu den sani di wi abi, dan dati no e meki a kon gudu. Ala sani nanga ala gudu na fu en kaba (Psalm 50:12). Èn te wi e gi Yehovah fu a ten èn fu a krakti fu wi, dan dati no wani taki dati a abi wi yepi fanowdu. Srefi te wi ben o weigri fu preiki a bun nyunsu fu Gado Kownukondre, dan a ben kan meki den ston bari a nyunsu dati! We dan, fu san ede wi musu gi Yehovah fu den gudu fu wi, fu wi ten, èn fu wi krakti? A moro prenspari sani di e meki taki wi musu du dati, na fu di wi kan sori nanga dati taki wi lobi en nanga wi heri ati, nanga wi heri sili, èn nanga ala wi krakti.—Markus 12:29, 30.
17. San kan meki taki wi e gi Yehovah sani nanga prisiri?
17 Te wi e gi Yehovah fu den sani di wi abi, dan wi musu du dati nanga wi heri ati, „bika Gado lobi wan sma di e gi nanga prisiri” (2 Korentesma 9:7). A gronprakseri di skrifi na Deuteronomium 16:17 kan yepi wi fu gi nanga prisiri: „A presenti di na anu fu iniwan sma e gi, musu kruderi nanga den blesi fu Yehovah yu Gado di a ben gi yu.” Te wi e prakseri den someni sani di Yehovah gi wi, dan wi wani gi en sani nanga prisiri, èn bogobogo sosrefi. Te wi e gi na so wan fasi, dan dati e gi wi ati prisiri, neleki fa wan papa noso mama e prisiri te a pikin fu en e gi en wan pikin presenti. Te wi e sori Yehovah na sowan fasi taki wi lobi en, dan dati sa yepi wi fu kon krosibei na en.
Tron wan bun mati fu Gado nanga yepi fu begi
18. Fu san ede a bun fu luku fa wi kan begi Gado na wan moro bun fasi?
18 Te wi e begi Gado, dan wi abi wan tumusi moi okasi fu taigi wi hemel Tata san de na tapu wi ati, sondro taki trawan e kon sabi fu dati (Filipisma 4:6). Te wi e begi Gado, dan dati na wan tumusi prenspari fasi fa wi kan kon krosibei na en. Fu dati ede a bun fu poti prakseri na den begi fu wi. A no de so spesrutu taki wi musu taki na wan kefalek moi fasi te wi e begi Gado, ma wi musu gebroiki wortu di e komoto fu wi ati. Fa wi kan begi Gado na wan moro bun fasi?
19, 20. Fu san ede wi musu denki dipi bifo wi begi, èn fu sortu bun sani wi kan denki dipi?
19 Wi ben kan pruberi fu denki dipi bifo wi e begi Gado. Te wi e denki dipi bifo wi e begi, dan wi sa taki soifri san wi abi na prakseri, èn wi sa taki fu prenspari sani sosrefi. Na so wan fasi wi no sa taki densrefi sani ibri leisi, soso fu di den sani dati e kon na ini wi prakseri (Odo 15:28, 29). Te wi e poti prakseri na wan tu fu den sani di Yesus ben taki na ini a Wi Tata Begi fu en, èn te wi e luku fa wi kan fiti den tori disi na wi eigi situwâsi, dan dati kan de wan yepi gi wi (Mateyus 6:9-13). Fu gi wan eksempre, wi ben kan aksi wisrefi na sortu fasi wi kan yepi fu du a wani fu Yehovah dyaso na grontapu. Kande wi kan taigi Yehovah taki wi trutru wani taki a gebroiki wi na iniwan fasi di a wani, èn kande wi kan aksi en sosrefi fu yepi wi fu du iniwan wroko di a e gi wi fu du. Wi e broko wi ede nanga den sani di wi abi fanowdu na ini wi aladei libi? Gi sortu sondu wi musu aksi Gado pardon, èn nanga suma wi musu abi moro sari-ati? Sortu tesi e miti wi? Wi e frustan o prenspari a de fu aksi Yehovah wantewante fu kibri wi gi den tesi dati?
20 Wi ben kan poti prakseri sosrefi na sma di wi sabi èn di abi a yepi fu Yehovah tranga fanowdu (2 Korentesma 1:11). Ma wi no musu frigiti fu taigi Yehovah tangi sosrefi. Te wi e teki ten fu poti prakseri na a tori disi, dan wi kan feni trutru taki furu sani de di wi musu taigi Yehovah tangi gi den èn taki wi musu prèise en ibri dei sosrefi gi den furu bun sani di a e du gi wi (Deuteronomium 8:10; Lukas 10:21). Den sani disi sa de wan yepi tu gi wi, fu di wi sa abi wan moro bun denki fu a libi, èn wi sa abi moro warderi gi a libi sosrefi.
21. Sortu eksempre na ini Bijbel wi musu studeri fu man begi Gado na wan moro bun fasi?
21 Te wi e studeri, dan dati kan yepi wi tu fu begi na wan moro bun fasi. Gado Wortu abi tumusi moi begi fu getrow mansma nanga umasma. Fu gi wan eksempre, kande wi abi wan problema di e gi wi broko-ede èn di e meki wi frede taki wan ogri o pasa nanga wi, noso nanga den lobiwan fu wi. Te dati de so, dan wi kan leisi den wortu di Yakob ben gebroiki na ini a begi fu en, di a ben musu miti en brada Esau di ben atibron na en tapu èn di ben suku fu du en ogri (Genesis 32:9-12). Wi kan studeri sosrefi den wortu di Kownu Asa ben gebroiki na ini a begi fu en, di wan makti grupu fu pikinmoro wán milyun Etiopiasma ben e suku fu du Gado pipel ogri (2 Kroniki 14:11, 12). Efu wi abi wan problema di kan tyari syen kon tapu a bun nen fu Yehovah, dan a bun fu poti prakseri na den wortu di Elia ben gebroiki di a ben begi na fesi den Bâal anbegiman na tapu a Karmelbergi. Wi kan poti prakseri sosrefi na den wortu di Nehemia ben gebroiki di a ben begi Gado gi Yerusalem di ben tron wan brokopresi (1 Kownu 18:36, 37; Nehemia 1:4-11). Te wi e leisi den sortu begi disi èn te wi e denki dipi fu den, dan dati kan tranga a bribi fu wi, èn wi kan kon sabi san na a moro bun fasi fu taki nanga Gado fu den broko-ede di de leki wan hebi gi wi.
22. San na a yaritekst fu 2003, èn san wi kan aksi wisrefi ten na ten na ini a yari dati?
22 A de krin fu si taki wan moro bigi grani, noso wan moro bun marki no de, leki fu gi yesi na a warskow di Yakobus e gi wi fu „kon krosibei na Gado” (Yakobus 4:8). Meki wi du dati fu di wi e du muiti fu kon sabi moro fu Gado, fu di wi e tan du muiti fu sori en taki wi lobi en, èn fu di wi e kweki wan bun banti nanga en nanga yepi fu den begi fu wi. Aladi wi e hori Yakobus 4:8 na prakseri leki a yaritekst fu a yari 2003, dan meki wi tan ondrosuku wisrefi fu kon sabi efu wi e kon krosibei na Yehovah trutru. Ma fa a de nanga a tra pisi fu a tekst dati? Na sortu fasi Yehovah sa „kon krosibei na yu”, èn fa yu sa kisi wini fu dati? Na artikel di e kon sa taki fu a tori dati.
Yu e memre disi ete?
• Fu san ede wi musu si en leki wan seryusu sani fu kon krosibei na Gado?
• San na wan tu sani di wi ben kan pruberi fu du fu man kon sabi Yehovah moro bun?
• Fa wi kan sori Yehovah taki wi lobi en trutru?
• Na sortu fasi den begi fu wi kan yepi wi fu kisi wan moro tranga banti nanga Yehovah?
[Aksi fu a tori disi]
[Prenspari pisi na tapu bladzijde 12]
A yaritekst fu 2003 sa de: „Kon krosibei na Gado, èn a sa kon krosibei na unu.”—Yakobus 4:8.
[Prenki na tapu bladzijde 8, 9]
Di Samuel ben gro kon bigi, dan a kon sabi Yehovah moro bun
[Prenki na tapu bladzijde 12]
Den wortu di Elia ben gebroiki na ini a begi fu en na tapu a Karmelbergi, e sori wi fa fu begi Gado na wan yoisti fasi