Trowstu—Trowstu gi den wan di e pina

NA INI den someni hondro yari di pasa, furu filosofiaman nanga theologiaman meki muiti fu kon sabi fu san ede Gado gi pasi taki sma e pina. Sonwan fu den sma taki dati na fu di Gado abi ala makti, meki en de frantwortu trutru gi a pina di sma e pina. A skrifiman fu The Clementine Homilies, wan buku fu a di fu tu yarihondro di no e kruderi nanga Bijbel, ben taki dati Gado e tiri grontapu nanga ala tu anu fu en. Nanga en „kruktu-anu”, Didibri, a e tyari pina nanga problema kon gi sma, èn nanga en „reti-anu”, Yesus, a e frulusu èn e blesi sma.

Tra sma di no e agri taki Gado gi pasi taki sma e pina no wani bribi taki pina de trutru, awansi a no de so taki Gado srefi e tyari a pina dati kon. „A de so taki sma e bribi nomo taki ogri de, èn nowan buweisi no de fu sori taki a de trutru”, na so Mary Baker Eddy ben skrifi. „Efu sma ben o si sondu, siki, nanga dede leki sani di no de trutru, dan den sani dati no ben o de moro.”—Science and Health With Key to the Scriptures.

Fu den takru sani ede di miti libisma na ini den yari di pasa, spesrutu sensi a fosi yarihondro te kon miti a ten fu wi, meki furu sma kisi a denki taki Gado trutru no man kibri sma so taki pina no e miti den. A Dyu sabiman David Wolf Silverman ben skrifi: „Mi feni taki a Holocaust (a pisi ten di a Nazi tirimakti kiri ipi-ipi Dyu nanga tra sma) meki sma kon lasi a bribi taki Gado abi ala makti.” A sabiman disi ben taki moro fara: „Efu wi man feni wan fasi fu frustan fa Gado de, dan a bunfasi fu en sa musu de fu si tu soleki fa ogridu de fu si, èn dati kan pasa soso te a de wan Gado di no abi ala makti.”

Soleki fa sma taki, dan Gado de frantwortu tu gi den pina di e miti sma, a no man kibri libisma so taki pina no e miti den, èn pina na wan sani di no de trutru. Ma den denki disi no e gi trowstu trutru na den wan di e pina. Èn san de moro prenspari, na taki den sortu denki dati no e kruderi kwetikweti nanga san Bijbel e taki fu Gado, namku taki a de wan Gado di e du retidu, di abi kefalek bigi makti, èn di lobi libisma (Yob 34:10, 12; Yeremia 32:17; 1 Yohanes 4:8). Efu dati de so, dan fu san ede Gado gi pasi taki sma e pina? San Bijbel e taki fu a tori dati?

Fa a du kon taki sma e pina?

Gado no ben meki libisma fu pina. Nôno. Na presi fu dati, a ben meki den fosi tu libisma, namku Adam nanga Efa, nanga wan volmaakti frustan èn nanga wan volmaakti skin. A ben seti sosrefi wan moi dyari gi den so taki den ben kan tan na ini, èn a ben gi den bun wroko fu du di ben o gi den prisiri (Genesis 1:27, 28, 31; 2:8). Ma den ben o tan koloku soso efu den ben agri taki Gado na a reti tiriman èn taki a abi reti fu taki san bun èn san ogri. A bon di ben nen „a bon fu sabi bun nanga ogri” ben prenki a komando fu Gado (Genesis 2:17). Efu Adam nanga Efa ben o gi yesi na a komando fu en fu no nyan fu a bon dati, dan den ben o sori nanga dati taki den ben saka densrefi na Gado ondro. *

A de wan sari sani taki Adam nanga Efa no ben gi yesi na Gado. Wan yeye sma di ben opo ensrefi teige Gado èn di wi kon sabi bakaten leki Satan Didibri, ben overtoigi Efa taki a no ben o kisi wini efu a ben gi yesi na Gado. Fu  taki en leti, a ben wani meki Efa bribi taki Gado ben hori wan tumusi bun sani na baka gi en, namku a reti fu bosroiti gi ensrefi san bun èn san ogri. Satan ben taki dati efu a ben o nyan fu a bon, dan ’en ai ben o kon opo seiker èn seiker a ben o de leki Gado, a ben o sabi bun nanga ogri’ (Genesis 3:1-6; Openbaring 12:9). Efa ben meki Satan kori en nanga a denki dati, èn a nyan a froktu di a no ben mag nyan, èn heri esi Adam du a srefi sani.

A srefi dei dati, Adam nanga Efa bigin ondrofeni a bakapisi fu na opo di den ben opo densrefi teige Gado. Fu di den ben weigri fu gi yesi na a tiri fu Gado, meki den no ben kisi a kibri noso den blesi moro di den ben o kisi efu den ben saka densrefi na Gado ondro. Gado puru den na ini a Paradijs èn a taigi Adam: „A gron kon de frufruktu fu yu ede. Nanga pen yu sa nyan fu a nyanyan di a gron e gi ala den dei fu yu libi. Ini a sweti fu yu fesi yu sa nyan brede, teleki yu drai go baka na a gron, bika na drape Gado ben teki yu puru. Bika doti yu de èn na doti yu sa drai go baka” (Genesis 3:17, 19). Adam nanga Efa ben kisi fu du nanga siki, pen, owrudei, nanga dede. Pina ben kon tron wan sani di ala libisma ben o ondrofeni.—Genesis 5:29.

Wan prenspari tori musu seti

Wan sma ben kan aksi: ’Gado no ben kan tapu en ai gi a sondu fu Adam nanga Efa?’ Nôno, bika dati ben kan meki sma lasi lespeki gi en leki Tiriman. Moro sma ben kan bigin opo densrefi tu teige Gado, èn dati ben o tyari moro pina kon (Preikiman 8:11). Boiti dati, efu Gado no ben du wan sani baka di Adam nanga Efa sondu, dan a ben o de frantwortu tu gi na ogridu fu den. A Bijbel skrifiman Moses e memre wi: „Den wroko fu Gado de volmaakti, bika ala den pasi fu en na retidu. Wan Gado fu getrowfasi, èn na en nowan kruktudu de; regtfardiki èn opregti a de” (Deuteronomium 32:4). Fu man hori ensrefi na en eigi gronprakseri, dan Gado ben musu gi pasi taki Adam nanga Efa ondrofeni den takru bakapisi fu a trangayesi fu den.

Fu san ede Gado no ben pori den fosi tu libisma wantewante? Fu san ede a no pori Satan tu di ben sutu faya gi den fu opo densrefi teige Gado? Gado ben abi a makti fu du dati. Efu A ben du dati, dan Adam nanga Efa no ben o kisi pikin di ben o pina èn dede. Ma efu Gado ben gebroiki a makti fu en na a fasi dati, dan dati no ben o sori taki na en abi a reti fu tiri den mekisani fu en di abi frustan. Boiti dati, efu Adam nanga Efa ben o dede sondro fu kisi pikin, dan a ben o gersi leki Gado no ben man du san a ben abi na prakseri, namku fu furu a grontapu nanga volmaakti bakapikin (Genesis 1:28). Èn „Gado no de leki libisma . . . Awansi san a e pramisi, a e du; a e taki wan sani, èn a sani dati e pasa.”—Numeri 23:19, Today’s English Version.

Fu di Yehovah Gado abi ala koni, meki a bosroiti fu gi pasi taki den trangayesi sma tan na libi fu wan pisi ten. Den sma disi ben o kisi nofo okasi fu ondrofeni fa a de fu libi sondro a tiri fu Gado. Den sani di ben o pasa na ini a libi fu libisma ben o sori krin taki den abi a tiri fu Gado fanowdu, èn taki a tiri fu Gado bun moro a di fu libisma noso a di fu Satan. Na a srefi ten, Gado seti sani fu sorgu taki a fosi prakseri di a ben abi nanga grontapu, ben o kon tru. A meki wan pramisi taki wan „siri”, noso wan „bakapikin”, ben o kon fu ’masi Satan en ede’. Dati wani taki dati a sa tyari wan kaba kon fu ala ten na a trangayesi fu Satan èn sosrefi na den takru bakapisi fu dati.—Genesis 3:15.

Yesus Krestes ben de a Siri dati di Gado ben pramisi. Na ini 1 Yohanes 3:8 wi e leisi taki „a Manpikin fu Gado ben kon, fu broko den wroko fu Didibri”. A ben du disi di a gi en volmaakti libi leki wan srakti-ofrandi, èn di a pai a lusu-paiman fu frulusu den pikin fu Adam di ben kisi sondu nanga dede (Yohanes 1:29; 1 Timoteyus 2:5, 6). Den wan di e poti bribi trutru na ini a  srakti-ofrandi fu Yesus no sa pina noiti moro (Yohanes 3:16; Openbaring 7:17). O ten disi o pasa?

Wan kaba sa kon na a pina di sma e pina

Fu di Adam nanga Efa ben weigri fu saka densrefi na ondro a tiri fu Gado, meki bun furu pina e miti sma. Fu dati ede a fiti taki Gado e gebroiki a makti fu en na wan spesrutu fasi fu tyari wan kaba kon na a pina di libisma e pina, èn sosrefi fu du san a ben abi na prakseri fosi nanga grontapu. Yesus ben taki fu a sani disi di Gado seti di a ben leri den bakaman fu en fu begi: „Wi Tata na hemel, . . . yu kownukondre musu kon. Yu wani musu du na grontapu leki fa a e pasa na hemel.”—Mateyus 6:9, 10.

A ten di Gado gi libisma fu den kan pruberi fu tiri densrefi, e doro wan kaba. Soleki fa Bijbel profeititori ben taki, dan a Kownukondre fu en ben seti na ini hemel na ini 1914, èn Yesus Krestes ben poti leki Kownu fu a Kownukondre disi. * Dyonsro a Kownukondre disi sa puru ala libisma tirimakti krinkrin.—Danièl 2:44.

Na ini a syatu pisi ten di Yesus ben e dini na grontapu, dan a ben sori pikinso kaba sortu blesi libisma sa kisi te Gado sa tiri libisma baka. Na ini den Evangelietori wi kan si taki Yesus ben sori sari-ati gi den pôtiwan nanga den mendriwan na ini a libimakandra. Yesus ben meki sikiwan kon betre, a ben gi nyanyan na den wan di ben de nanga angribere, èn a ben wiki dedesma. Srefi a se nanga a winti ben e gi yesi na en sten (Mateyus 11:5; Markus 4:37-39; Lukas 9:11-16). Prakseri nomo san Yesus sa du te a sa gebroiki a frulusu-ofrandi di e puru sondu, fu blesi ala libisma di e gi yesi na en! Bijbel e pramisi taki nanga yepi fu a tiri fu Krestes, Gado „sa figi puru ala watra na [libisma] ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba”.—Openbaring 21:4.

Trowstu gi den wan di e pina

A e gi wi trowstu trutru fu sabi taki Yehovah, wi lobi-ati Gado di abi ala makti, e broko en ede nanga wi, èn taki dyonsro a sa puru libisma na ini a pina di den e pina! Furu tron, wan sma di siki seryusu de klariklari fu teki a dresi di sa meki a kon betre, awansi a dresi dati sa hati en srefisrefi. Te wi sabi taki a fasi fa Gado e du sani sa tyari têgo blesi kon, dan dati kan gi wi krakti tu fu horidoro, awansi sortu problema e miti wi fu wan syatu pisi ten.

Ricardo, di wi ben kari na ini a fosi artikel, na wan fu den sma di kon si taki a kan kisi trowstu fu den pramisi na ini a Bijbel. A man disi e memre: „Baka di mi wefi dede, dan mi ben abi a tranga firi fu hori misrefi aparti fu trawan èn fu no abi demakandra nanga nowan sma. Ma heri esi mi kon frustan taki disi no ben o tyari mi wefi kon baka. Mi ben frustan tu taki mi ben o firi moro sari te mi ben o du dati.” Na presi fu dati, Ricardo tan go na den Kresten konmakandra soleki fa a ben gwenti, èn a tan prati a Bijbel boskopu nanga trawan. „Mi ben e firi fa Yehovah ben e horibaka gi mi na wan lobi-ati fasi, èn mi ben e si fa a ben e piki den begi fu mi, awansi den ben sori fu de pikinpikin sani. Den sani disi meki taki mi kisi wan moro tranga banti nanga en”, na so Ricardo e taki. „Mi ben sabi taki Gado ben lobi mi, èn dati gi mi a krakti fu man libi sondro mi wefi, wan  sani di ben de a moro bigi tesi di oiti ben miti mi.” A e taki: „Mi e misi mi wefi trutru ete, ma mi abi a tranga bribi now taki nowan fu den sani di Yehovah e gi pasi fu pasa, kan du wi ogri fu ala ten.”

Yu e angri neleki Ricardo nanga milyunmilyun tra sma fu libi na ini wan ten pe a pina di libisma e pina now sa de wan sani di ’sma no sa memre moro, èn di no sa kon na ini na ati tu’? (Yesaya 65:17) Yu kan de seiker taki yu sa man kisi den blesi fu Gado Kownukondre efu yu e teki a rai disi di Bijbel e gi: „Suku Yehovah . . . aladi unu kan feni en. Kari en, aladi a sori taki a de krosibei.”—Yesaya 55:6.

A sani di sa yepi yu fu du disi, na te yu e leisi Gado Wortu èn e studeri en bun doronomo. Kon leri sabi Gado èn sosrefi a sma di a ben seni kon, Yesus Krestes. Meki muiti fu libi akruderi den markitiki fu Gado, èn sori nanga dati taki yu de klariklari fu saka yusrefi na ondro a tiri fu en. Te yu e tyari yusrefi na so wan fasi, dan dati sa meki yu kon de moro koloku now, awansi sortu tesi e miti yu. Èn na ini a ten di e kon, a bakapisi sa de taki yu sa libi na ini wan grontapu pe sma no e pina moro.—Yohanes 17:3.

[Futuwortu]

[Faki na tapu bladzijde 6, 7]

SAN WI KAN DU TE PINA E MITI WI?

„Trowe ala un broko-ede na tapu [Gado]” (1 Petrus 5:7). Te pina e miti wi, noso te wi e si taki wan lobiwan fu wi e pina, dan furu tron wi e bruya, wi e atibron, èn wi e firi leki nowan sma no e broko en ede nanga wi. Toku wi kan de seiker taki Yehovah e frustan fa wi e firi (Exodus 3:7; Yesaya 63:9). Neleki den getrow man fu owruten, wi tu kan fruteri en ala san de tapu wi ati, wi kan taigi en sortu sani e bruya wi èn sortu sani e gi wi broko-ede (Exodus 5:22; Yob 10:1-3; Yeremia 14:19; Habakuk 1:13). Kande a no sa puru den tesi fu wi na wan wondru fasi, ma te wi e begi nanga wi heri ati, dan a kan gi wi a koni nanga a krakti fu kakafutu gi den.—Yakobus 1:5, 6.

„No denki dati a de wan vreemde sani te wan faja tesi sa kom tesi oen, leki wan aparti sani ben miti oen” (1 Petrus 4:12, Da Bijbel na ini Sranantongo). Na ini a tekst disi Petrus e taki fu frufolgu, ma den wortu fu en fiti heri bun tu gi iniwan sortu pina di wan bribiman ben kan ondrofeni. Libisma e pina fu di den no abi den moro prenspari sani di de fanowdu fu man tan na libi; sonwan fu den e pina fu di den e siki, noso fu di den lasi lobiwan fu den na ini dede. Bijbel e taki dati „ten nanga sani di e pasa èn di sma no sabi na fesi”, e miti ala sma (Preikiman 9:11). Nownowde, na den sani disi e pasa nanga libisma. Te wi e frustan disi, dan dati sa yepi wi fu kakafutu te pina nanga problema e miti wi (1 Petrus 5:9). A funamku sani di sa yepi wi fu kisi trowstu, na te wi e memre a dyaranti di wi abi taki „den ai fu Yehovah de na tapu den regtfardiki sma, èn den yesi fu en de na a babari fu den fu kisi yepi”.—Psalm 34:15; Odo 15:3; 1 Petrus 3:12.

„Prisiri ini a howpu” (Romesma 12:12). Na presi taki wi e tan prakseri nomo fu a ten di wi ben de koloku, dan wi kan denki dipi fu a pramisi fu Gado, namku taki a sa tyari wan kaba kon na a pina di sma e pina (Preikiman 7:10). A trutru howpu disi sa kibri wi neleki fa wan helm e kibri wan sma en ede. Te wi abi howpu, dan dati e meki taki den problema na ini a libi no sa naki wi trowe, den no sa meki wi bruya, wi no sa brokosaka tumusi, èn a banti di wi abi nanga Gado no sa pori.—1 Tesalonikasma 5:8.

[Prenki na tapu bladzijde 5]

Adam nanga Efa no ben wani saka densrefi na ondro a tiri fu Gado

[Prenki na tapu bladzijde 7]

Gado e pramisi wi wan grontapu pe sma no sa pina moro