A tru taki Didibri wini?

NA INI ala den yarihondro di pasa, skrifiman nanga filosofiaman ben taki ala sortu sani fu a strei di de na mindri Gado nanga Didibri. Ma wan buku de di e fruteri wi soifri fu a feti na mindri Gado nanga Didibri. A buku dati na Bijbel. A e meki wi kon sabi fu san ede a feti disi e feti, èn a e sori sosrefi fa wi kan kon sabi suma wini trutru.

Syatu baka di a fosi mansma nanga umasma ben meki, dan wan yeye mekisani di wi no man si, namku Satan Didibri, tyalensi a tiri fu Gado. Fa a du dati? A taki na wan triki fasi dati Gado no ben wani meki den mekisani fu en kon sabi bun sani, èn taki sani ben o waka moro bun nanga den te den ben o libi sondro a tiri fu En.—Genesis 3:1-5; Openbaring 12:9.

Bakaten, na ini den dei fu a famiri-edeman Yob, dan Satan tyari wan tra tori kon na fesi. Fu di Satan ben wani Yob drai baka gi Gado, meki a taki: „Skin fu skin, èn ala san wan libisma abi, a sa gi fu en sili ede” (Yob 2:4). A sani dati ben de wan tyalensi trutru! Fu di Satan ben gebroiki den wortu „wan libisma” na presi fu a nen Yob, dan nanga dati a sori taki a ben e tweifri efu ibriwan sma ben o tan dini Gado. Fu taki en leti, a ben taki: ’Wan sma sa du iniwan sani di de fanowdu fu kibri en libi. Gi mi na okasi, èn mi kan meki ibriwan sma drai baka gi Gado.’

Wi kan kon sabi efu na Gado noso Satan wini a strei te wi e piki den tu aksi disi: Libisma man tiri densrefi nanga bun bakapisi? Didibri ben man meki ibriwan sma drai baka gi a tru Gado?

Libisma man tiri densrefi nanga bun bakapisi?

Dusundusun yari langa, libisma pruberi difrenti sortu fasi fu tiri. Na ini den yarihondro di pasa, den pruberi fu tiri densrefi nanga yepi fu kownu tiri, aristokrasia tiri (a tiri fu wan spesrutu grupu fu sma), demokrasia tiri, fascisme (a tiri fu wan diktator), nanga a communisme. Fu di a de so taki libisma e tan pruberi tra sortu fasi fu tiri, dan dati no e sori taki den difrenti sortu tirimakti disi no bun nofo?

A historia skrifiman H. G. Wells ben skrifi a buku A History of the World di tyari kon na doro na ini 1922, èn na ini a buku dati a e taki: „Sondro taki a pipel fu Rome ben fruwakti dati, dan wantronso den ben musu tiri wan bigi kontren.” A skrifiman disi e taki moro fara: „A tiri disi ben e kenki doronomo, èn noiti ben e tan langa. Te yu e luku en bun, dan a tiri disi no ben abi bun bakapisi. Fu taki en leti, libisma no feni a yoisti tiri ete, èn na ini a ten disi, Europa nanga Amerkankondre e du muiti ete fu lusu den someni problema di den tirimakti na heri grontapu abi, soleki fa den Romesma ben musu du dati fosi.”

Na ini a di fu 20 yarihondro, libisma go doro fu pruberi tra sortu fasi fu tiri. Na a kaba fu a yarihondro dati a demokrasia tiri ben de a tiri di moro nanga moro kondre leki oiti bifo ben kon feni bun. Soleki fa sma e taki, dan wan demokrasia tiri e gi iniwan sma na okasi fu abi wan sten na ini a fasi fa a kondre musu tiri. Ma a demokrasia tiri sori taki libisma kan tiri densrefi nanga bun bakapisi sondro Gado? Jawaharlal Nehru, wan man di fosi ben de minister fu India, ben taki dati wan demokrasia tiri bun, ma a ben taki moro fara sosrefi: „Mi e taki disi fu di den tra tiri moro ogri.” Valéry Giscard d’Estaing di ben de presidenti fosi fu Fransikondre ben taki: „Wi e si taki den demokrasia tiriman de na ini wan muilek situwâsi.”

Srefi na ini a di fu feifi yarihondro b.G.T., a Griki filosofiaman Plato ben kon si taki wan sani no ben bun na a demokrasia tiri. Soleki fa a buku A History of Political Theory e taki, dan  Plato ben taki dati „den politiekman no sabi noti èn den no abi koni, èn a sani disi funamku e meki taki den demokrasia tiri no abi bun bakapisi”. Furu fu den politiekman na ini a ten disi e kragi taki a muilek fu feni sma di abi nofo koni fu tron tiriman. Libisma „e atibron nanga tiriman di no man du noti na a ten te bigi problema e miti den”, na so a koranti The Wall Street Journal e taki. A koranti disi e taki moro fara: „Den e mandi taki den tiriman disi no man teki den yoisti bosroiti èn taki den abi kruka fasi, na presi taki den e tiri a pipel na wan yoisti fasi.”

Now, luku a tirimakti fu Kownu Salomo fu owruten Israel. Yehovah Gado ben gi Salomo bun furu koni (1 Kownu 4:29-34). Fa a ben waka nanga a pipel fu Israel na ini den 40 yari di Salomo ben de kownu? Bijbel e piki: „Yuda nanga Israel ben abi furu sma, so furu leki den ai-santi di de na sekanti, aladi den ben e nyan èn ben e dringi èn ben e meki prisiri.” A tori e taki sosrefi: „Yuda nanga Israel ben tan libi na ini seikerfasi, ibriwan fu den na ondro en eigi droifibon èn na ondro en eigi figabon, fu Dan te go miti Berseiba, ala den dei fu Salomo” (1 Kownu 4:20, 25). Fu di wan koni kownu ben e tiri a pipel leki wan sma di ben teki a presi fu Yehovah Gado, a Moro Hei Tiriman, meki ala sani ben e waka bun nanga den, èn den ben de koloku.

Dati na trutru wan bigi difrenti na mindri a tiri fu libisma nanga a di fu Gado! Wan sma kan taki trutru taki Satan ben abi leti di a taki dati libisma kan tiri densrefi sondro Gado? Nôno, bika a profeiti Yeremia ben taki krin: „Mi sabi heri bun, o Yehovah, taki a no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi.”—Yeremia 10:23.

Satan kan meki ibriwan sma drai baka gi Gado?

Satan ben man meki ibriwan sma drai baka gi Gado, soleki fa a ben taki? Na ini kapitel 11 fu a Bijbel buku fu den Hebrewsma, na apostel Paulus e kari wan tu getrow mansma nanga umasma fu a ten bifo Krestes. Baka dati a e taki: „Ten no de nofo fu taki fu Gideon, Barak, Samson, Yefta, David èn sosrefi Samuel nanga den tra profeiti” (Hebrewsma 11:32). Paulus e kari den getrow futuboi disi fu Gado wan ’bigi wolku fu kotoigi’ (Hebrewsma 12:1). A Griki wortu di gebroiki dyaso gi „wolku” no wani taki dati a wolku disi de aparti fu den trawan, èn a no e sori tu o bigi a wolku de, noso fa a de. Na presi fu dati, a wortu wani taki dati wan bigi grupu fu wolku ben de makandra. A sani disi e fiti fu di den fositen getrow futuboi fu Gado de so furu, taki den gersi wan heri ipi wolku di de makandra. Iya, na ini ala den yarihondro di pasa, bigi ipi fu sma teki a bosroiti fu de getrow na Yehovah Gado.—Yosua 24:15.

Fa a de na ini a ten fu wi? A nomru fu Yehovah Kotoigi na heri grontapu gro kon tron  moro leki siksi milyun, aladi den kisi bun hebi frufolgu nanga gens na ini a di fu 20 yarihondro. Sowan neigi milyun tra sma abi demakandra nanga den, èn furu fu den sma disi e du san de fanowdu fu kisi wan bun banti nanga Gado.

Gado en eigi manpikin, Yesus Krestes, ben gi a lasti piki di musu yepi wi fu kon sabi efu Satan kan meki libisma drai baka gi Yehovah. Srefi bigi skin-ati na wan pina-udu no ben tapu en fu tan getrow na Gado. Di Yesus ben hari en lasti bro, dan a bari kari: „Tata, na ini yu anu mi e poti mi yeye.”—Lukas 23:46.

Satan e du ala san a man fu tan hori libisma na ini en makti. A e meki tesi miti den, èn a e meki srefi taki sma frufolgu den krinkrin. A e gebroiki „a lostu fu a skin nanga a lostu fu den ai nanga a prodo di wan sma e prodo nanga den gudu di a abi” fu tesi sma, èn a e suku fu hari den puru fu Yehovah, noso a e sorgu taki den e drai baka gi en (1 Yohanes 2:16). Satan ’breni sosrefi a frustan fu sma di no e bribi, so taki a krin leti fu a glori bun nyunsu fu Krestes, no ben sa skèin kon doro’ (2 Korentesma 4:4). Èn Satan no fisti fu tapu skreki gi sma, èn te den e frede, dan a e gebroiki dati fu du san a abi na prakseri.—Tori fu den Apostel 5:40.

Ma Didibri no sa wini den wan di de na Gado sei. Den sma disi kon sabi Yehovah Gado, èn den kon ’lobi en nanga den heri ati èn nanga den heri sili èn nanga den heri frustan’ (Mateyus 22:37). Iya, fu di Yesus Krestes nanga bun furu tra sma e tan getrow na Yehovah, meki dati e sori moro nanga moro taki Satan Didibri na wan bigi lasiman.

San wi kan fruwakti na ini a ten di e kon?

Libisma sa tan pruberi ala sortu nyun fasi fu tiri? A profeiti Danièl ben taki na fesi: „Èn na ini den dei fu den kownu dati, a Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi na pisipisi en tyari wan kaba kon na den, èn ensrefi sa tan te ten di no skotu” (Danièl 2:44). A Kownukondre di a Gado fu hemel seti na wan hemel tirimakti di abi Yesus Krestes leki tiriman. A de a srefi Kownukondre di Yesus ben leri den bakaman fu en fu begi gi (Mateyus 6:9, 10). A Kownukondre dati sa pori ala libisma tirimakti na „a feti fu a bigi dei fu Gado na Almaktiwan” èn a sa tyari kenki kon na heri grontapu.—Openbaring 16:14, 16.

San o miti Satan? Bijbel e taki fu a sani disi di o pasa na ini a ten di e kon: „[Wan engel fu Yehovah] grabu a draak hori, a fosi sneki, di de Didibri nanga Satan, èn tai en wán dusun yari. Èn a fringi en go na ini a dipi peti èn tapu en èn a sroto en bun na en tapu, so taki a no ben sa kori den nâsi moro teleki den dusun yari ben kon na wan kaba” (Openbaring 20:1-3). Soso te na engel fringi Satan go na ini a dipi peti pe a no sa man du noti moro, dan fosi a Dusun Yari Tiri fu Yesus Krestes sa bigin.

Na a ten dati, a grontapu disi sa tron wan switi presi trutru! Ogridu no sa de moro, sosrefi den sma di e du ogridu no sa de moro. Bijbel e pramisi: „Ogri sma srefi sa koti puru . . . Ma den safri-ati sma srefi sa abi grontapu leki a gudu fu den, èn den trutru sa feni switi prisiri na ini vrede di sa de pasa marki” (Psalm 37:9-11). Noti no sa suku fu pori a vrede fu den, nowan libisma èn nowan meti no sa du dati (Yesaya 11:6-9). Srefi den milyunmilyun sma di ben teki a sei fu Didibri na ini den yarihondro di pasa, soso fu di den no ben sabi moro bun, noso fu di den no ben kisi na okasi fu kon sabi Yehovah, sa kisi libi baka, èn den sa kisi leri fu Gado.—Tori fu den Apostel 24:15.

Na a kaba fu a Dusun Yari Tiri, grontapu sa kon tron wan paradijs, èn den libisma na tapu sa kon tron volmaakti sma. Na a ten dati Gado sa lusu Satan gi „wan syatu pisi ten”, soso fu a kan kisi pori fu têgo makandra nanga ala den gensman fu Gado.—Openbaring 20:3, 7-10.

Suma sei yu sa teki?

A di fu 20 yarihondro ben de wan ten di Satan tyari bigi pori kon na grontapu. A sani dati  no wani taki dati a wini, ma na presi fu dati, a situwâsi na grontapu e sori taki wi e libi na ini den lasti dei fu na ogri grontapu disi (Mateyus 24:3-14; Openbaring 6:1-8). Awansi bun furu ogri de na grontapu, èn awansi bun furu sma abi a srefi denki fu a tori, toku dati no e sori suma na a winiman. Wi sa kon sabi suma na a winiman, te wi e luku suma abi a moro bun fasi fu tiri, èn efu iniwan sma dini Gado fu di a sma dati lobi en. Te wi luku ala den tu afersi disi, dan a e sori taki Yehovah na a winiman.

Efu a ten di Gado gi Satan fu tan na libi sori kaba taki Satan no abi leti, dan fu san ede Gado e gi pasi taki ogridu de ete? Yehovah e sori pasensi „fu di a no wani taki nowan sma e kisi pori, ma a wani taki ala sma musu abi berow” (2 Petrus 3:9). Gado wani „taki ala sortu sma musu kisi frulusu èn kon kisi wan soifri sabi fu waarheid” (1 Timoteyus 2:4). Meki a de so taki yu e gebroiki a ten di tan abra fu studeri Bijbel èn fu ’teki sabi na ini yu fu a wan-enkri tru Gado èn fu a wan di a seni kon, Yesus Krestes’ (Yohanes 17:3). Yehovah Kotoigi sa prisiri fu yepi yu fu kisi a sabi dati so taki yu tu kan tron wan fu den milyunmilyun sma di e tanapu kánkan na a sei fu a winiman.

[Prenki na tapu bladzijde 5]

Fu di Yehovah Kotoigi tan getrow, meki den sori tu taki Satan na a lasiman

[Prenki na tapu bladzijde 7]

Yehovah abi furu sma na en sei di de getrow