’Unu musu lobi makandra’

„Na a fasi disi ala sma o sabi taki unu na mi disipel, te unu lobi makandra.”​—YOHANES 13:35.

1. Sortu eigifasi Yesus ben poti krakti na tapu syatu bifo a dede?

„MI PIKIN” (Yohanes 13:33). Yesus ben gebroiki den switi wortu dati fu taki nanga den apostel fu en a neti bifo a dede. Den Evangelietori no e sori taki Yesus ben gebroiki den lobi wortu disi oiti bifo fu taki nanga den. Ma na a spesrutu neti dati, a gebroiki den switi wortu disi fu sori taki a ben lobi den bakaman fu en trutru. Fu taki en leti, Yesus ben taki fu lobi sowan 30 leisi a neti dati. Fu san ede a ben poti so furu krakti tapu na eigifasi disi?

2. Fu san ede a de so prenspari taki Kresten lobi makandra?

² Yesus ben fruklari fu san ede lobi de so prenspari. A ben taki: „Na a fasi disi ala sma o sabi taki unu na mi disipel, te unu lobi makandra” (Yohanes 13:35; 15:12, 17). Wan bakaman fu Krestes musu sori den brada nanga sisa fu en taki a lobi den. Sma no e kon sabi taki wi na tru Kresten fu di wi e weri spesrutu krosi noso fu di wi abi gwenti di e difrenti fu den di fu tra sma. Den e kon sabi dati fu di wi e sori taki wi lobi makandra trutru. A di fu tu fu den dri markitiki di wan disipel fu Kresten musu doro, soleki fa a ben skrifi na a bigin fu a fosi artikel, na taki a musu lobi trawan na a tumusi moi fasi disi. San sa yepi wi fu tan lobi den brada nanga sisa fu wi?

„Lobi den moro”

3. Sortu rai di abi fu du nanga lobi, Paulus ben gi Kresten?

³ Neleki fa den bakaman fu Krestes na ini a fosi yarihondro ben lobi makandra, na so wi kan si tu taki tru disipel fu Krestes na ini a ten disi lobi makandra na wan tumusi moi fasi. Na apostel Paulus ben skrifi den fosi Kresten: „Wi no abi fu skrifi unu fu a lobi di brada musu abi gi makandra, bika unu srefi kisi leri fu Gado fa fu  lobi makandra; fu taki en leti, unu lobi ala den brada.” Toku Paulus ben taki: „Tan lobi den moro” (1 Tesalonikasma 3:12; 4:9, 10). Wi tu musu teki a rai fu Paulus, èn wi musu du muiti fu sori ’moro lobi’ gi makandra.

4. Na sortu sma wi musu poti spesrutu prakseri, soleki fa Paulus nanga Yesus e sori dati?

⁴ Na ini a srefi brifi di ben skrifi nanga yepi fu santa yeye, Paulus ben gi den brada nanga sisa fu en deki-ati fu „trowstu den sma di lasi-ati” èn fu „yepi den swakiwan” (1 Tesalonikasma 5:14). Na wan tra okasi, a ben memre Kresten taki den wan „di tranga, musu tyari den swakifasi fu den wan di no tranga” (Romesma 15:1). Yesus sosrefi ben gi rai fa fu yepi den swakiwan. Baka di Yesus ben taki na fesi taki Petrus ben o gowe libi en a neti di sma ben o grabu en hori, dan a taigi Petrus: „So esi leki yu drai kon baka, tranga den brada fu yu.” Fu san ede Yesus ben taigi en dati? Fu di den ben o gowe libi Yesus tu, èn fu dati ede den ben o abi yepi fanowdu (Lukas 22:32; Yohanes 21:15-17). Sobun, Gado Wortu e leri wi fu lobi den swakiwan na yeye fasi èn sosrefi den wan di kande no abi demakandra moro nanga a Kresten gemeente (Hebrewsma 12:12). Fu san ede wi musu du dati? Yesus gi wi tu moi agersitori di e gi wi a piki tapu na aksi disi.

Wan lasi skapu nanga wan lasi sensi

5, 6. (a) Sortu tu syatu agersitori Yesus ben fruteri? (b) San den agersitori disi e leri wi fu Yehovah?

⁵ Fu di Yesus ben wani leri den arkiman fu en fa Yehovah e si den wan di lasi pasi, meki a fruteri den tu syatu agersitori. Wan fu den agersitori ben abi fu du nanga wan skapuman. Yesus ben taki: „Suma fu unu di abi wán hondro skapu èn di lasi wán fu den, no sa libi den tra neigitenti na neigi skapu na sabana fu go suku a lasi skapu teleki a feni en? Dan te a feni a skapu, dan a e poti en na tapu en skowru èn a e prisiri. Te a kon na oso, dan a e kari den mati fu en nanga den birtisma kon, èn a e taigi den: ’Un prisiri nanga mi bika mi feni a skapu fu mi di ben lasi.’ Mi e taigi unu taki moro prisiri o de na hemel efu srefi wán sondari abi berow, leki fu neigitenti na neigi regtfardiki sma di no abi berow fanowdu.”​—Lukas 15:4-7.

⁶ A di fu tu agersitori ben abi fu du nanga wan uma. Yesus ben taki: „Sortu uma di abi tin solfru sensi, ma di e lasi wán fu den, no sa leti wan lampu èn sibi en oso fu suku finifini, teleki a feni en? Dan te a feni en, a e kari den tra umasma di de en mati nanga en birtisma kon èn a e taki: ’Un prisiri nanga mi, fu di mi feni a solfru sensi di mi ben lasi.’ Fu dati ede mi e taigi unu, taki den engel fu Gado e prisiri srefi efu wán sondari abi berow.”​—Lukas 15:8-10.

7. Sortu tu sani den agersitori fu a lasi skapu nanga a lasi sensi e leri wi?

⁷ San wi kan leri fu den tu syatu agersitori disi? Den e sori wi (1) fa wi musu si den wan di kon swaki èn (2) san wi musu du fu yepi den. Meki wi luku den tori disi.

A lasi ma a warti

8. (a) Fa a skapuman nanga na uma ben feni en taki den ben lasi wan sani di den ben abi? (b) Fa den tu sma disi ben si a sani di den ben lasi?

⁸ Na ini ala tu agersitori wan sani ben lasi, ma luku san den sma di ben abi den sani dati ben feni fu a tori dati. A skapuman no ben taki: ’San na wán skapu te mi abi ete 99? Mi no abi a skapu dati fanowdu.’ Na uma no ben taki: ’Fu san ede mi musu broko mi ede nanga wán sensi? Mi breiti nanga den neigi di mi abi ete.’ Na presi fu dati, a skapuman suku a lasi skapu fu en, neleki a skapu dati ben de a wan-enkri wan di a ben abi. Èn na uma ben sari fu di a lasi wan fu den sensi fu en, neleki a no ben abi moro sensi. Ala tu sma ben si a sani di den ben lasi leki wan warti sani. San disi e leri wi?

9. San wi e leri fu a fasi fa a skapuman nanga na uma ben broko den ede?

⁹ Luku san Yesus ben taki na a kaba fu ala tu agersitori: „Mi e taigi unu taki moro prisiri o de na hemel efu srefi wán sondari abi berow” èn „fu dati ede, mi e taigi unu, taki den engel fu Gado e prisiri srefi efu wán sondari abi berow.” A fasi fa a skapuman nanga na uma ben firi e sori pikinso fa Yehovah nanga den engel fu en na hemel e firi. Neleki fa den sani di ben lasi ben warti gi a skapuman nanga na uma, na so den wan di lasi pasi èn di no abi demakandra moro nanga a pipel fu Gado e tan warti gi Yehovah  (Yeremia 31:3). Kande den sortu sma disi swaki na yeye fasi, ma toku a no abi fu de so taki den e opo densrefi teige Gado. Aladi den kon swaki, toku a kan de so taki den e hori densrefi pikinso ete na den markitiki fu Yehovah (Psalm 119:176; Tori fu den Apostel 15:29). Fu dati ede, Yehovah no de gaw fu „puru den komoto na en fesi”.​—2 Kownu 13:23.

10, 11. (a) Fa wi musu si den wan di no abi demakandra moro nanga a gemeente? (b) Soleki fa den tu agersitori fu Yesus e sori, dan fa wi kan sori den sma disi taki wi e broko wi ede nanga den?

¹⁰ Neleki Yehovah nanga Yesus, wi sosrefi e broko wi ede trutru nanga den swakiwan èn nanga den wan di no abi demakandra moro nanga a Kresten gemeente (Esekièl 34:16; Lukas 19:10). Wi no e si wan sma di swaki na yeye fasi leki lasi ten, ma wi e si en leki wan lasi skapu. Wi no abi a denki disi: ’Fu san ede mi musu broko mi ede nanga wan sma di swaki? A gemeente no abi a sma dati fanowdu.’ Na presi fu dati, te sma di lasi pasi wani drai kon baka, dan wi e si den sortu sma dati na a fasi fa Yehovah e si den. Wi e si den leki warti sma.

¹¹ Ma fa wi kan sori den sma disi taki wi e broko wi ede nanga den? Den tu agersitori fu Yesus e leri wi taki wi kan (1) du muiti fu sori den sma disi taki wi wani yepi den, (2) wi kan du dati na wan lobi-ati fasi, èn (3) na wan opregti fasi sosrefi. Meki wi luku den penti disi wan-fru-wan.

Du muiti fu yepi den

12. San den wortu „go suku a lasi skapu” e fruteri wi fu a skapuman?

¹² Na ini a fosiwan fu den tu agersitori, Yesus e taki dati a skapuman sa „go suku a lasi skapu”. A skapuman e du muiti èn a abi a fasti bosroiti fu du ala san a man fu feni a lasi skapu. Problema noso kefar no e tapu en fu go suku a skapu, èn a no abi trobi o fara a musu go fu feni en. Na presi fu dati, a skapuman e tan suku a skapu, „teleki a feni en”.​—Lukas 15:4.

13. San getrow man fu owruten ben du fu yepi den swakiwan, èn fa wi kan teki na eksempre fu den sma dati di Bijbel e sori?

¹³ Fu man yepi wan sma di lasi-ati, dan furu tron a de fanowdu sosrefi taki a sma di de moro tranga e du muiti fu gi a sma deki-ati. Getrow man fu owruten ben sabi dati. Fu gi wan eksempre, di Yonatan, a manpikin fu Kownu Saul, ben kon si taki en bun mati David ben abi deki-ati fanowdu, dan Yonatan „opo go wantewante na David na Koresa, so taki a ben kan tranga en anu na ini Gado” (1 Samuel 23:15, 16). Hondrohondro yari baka dati, di Tiriman Nehemia ben si taki wan tu fu den Dyu brada fu en ben lasi-ati, dan a „opo wantewante” tu, èn a gi den deki-ati ’fu hori Yehovah na prakseri’ (Nehemia 4:14). Wi na ini a ten disi musu ’opo’ tu, iya, wi musu du muiti fu tranga den wan di swaki. Ma suma na ini a gemeente musu du dati?

14. Suma na ini a Kresten gemeente musu du muiti fu yepi den wan di swaki?

¹⁴ Spesrutu Kresten owruman abi a frantwortu fu „tranga den swaki anu . . . èn [fu] meki den kindi di e beifi, tanapu steifi”, èn fu „taigi den wan di frede na ini den ati: ’Kon tranga. No frede’” (Yesaya 35:3, 4; 1 Petrus 5:1, 2). Ma luku taki a rai di Paulus ben gi fu „trowstu den sma di lasi-ati” èn fu „yepi den swakiwan” no ben de gi owruman wawan. Na presi fu dati, den wortu fu Paulus ben de gi a heri „gemeente fu den Tesalonikasma” (1 Tesalonikasma 1:1; 5:14). Fu dati ede, ala Kresten abi a frantwortu fu yepi den wan  di swaki. Neleki a skapuman na ini na agersitori, ibri Kresten musu de klariklari fu „go suku a lasi skapu”. A no de fu taki, dati den sa man du dati moro bun te den e wroko makandra nanga den owruman. Yu kan du wan sani fu yepi wan swakiwan na ini a gemeente?

Yepi trawan na wan lobi-ati fasi

15. San ben kan meki taki a skapuman poti a skapu tapu en skowru?

¹⁵ San a skapuman e du te a feni a lasi skapu te fu kaba? „A e poti en na tapu en skowru” (Lukas 15:5). A pisi tori disi e naki wi ati trutru, èn a e leri wi furu sosrefi! Kande a skapu waka someni dei nanga neti na ini wan kontren di a no ben sabi, èn kande lew ben suku srefi fu kiri en (Yob 38: 39, 40). A no de fu taki, dati a skapu kon swaki fu di angri e kiri en. A skapu disi swaki tumusi fu kibri ensrefi gi den sani di sa miti en te a e suku fu go baka na a skapukoi. Fu dati ede, a skapuman e bukundun, a e opo a skapu na wan lobi-ati fasi, èn a e tyari en pasa ala den sani dati go baka na den tra skapu. Fa wi kan yepi trawan na a srefi lobi-ati fasi leki fa a skapuman disi yepi a skapu?

16. Fu san ede wi musu sori a srefi lobi-ati fasi di a skapuman ben sori di a ben yepi a skapu di ben lasi?

¹⁶ Wan sma di no abi demakandra moro nanga a gemeente ben kan weri na yeye fasi. Neleki a skapu di no de makandra nanga a skapuman moro, a kan de so tu taki a sma dati waka lontu fu soso na ini na ogri grontapu disi. Fu di a no e kisi kibri fu a skapukoi, namku a Kresten gemeente, meki moro leki noiti bifo a e ondrofeni ogri na a anu fu Didibri, di „e waka lontu leki wan krasi lew, di e suku fu nyan wan sma” (1 Petrus 5:8). Boiti dati, a kon swaki fu di a no e kisi nofo yeye nyanyan. Sobun, fu di a de aparti fu den tra brada nanga sisa fu en, meki a swaki tumusi kande fu wai pasi gi den problema di sa miti en te a wani drai go baka na a gemeente. Fu dati ede, wi musu bukundun, fu taki en so, wi musu opo a swaki sma disi na wan lobi-ati fasi, èn wi musu tyari en kon baka na ini a skapukoi (Galasiasma 6:2). Fa wi kan du dati?

17. Fa wi kan du neleki na apostel Paulus te wi e go luku wan sma di swaki?

¹⁷ Na apostel Paulus ben taki: „Soema de swaki, èn mi no de swaki toe?” (2 Korentesma 11:29, Da Bijbel na ini Sranantongo, 1 Korentesma 9:22) Paulus ben firi gi sma, èn a ben firi tu gi den swakiwan. Wi wani sori den swakiwan tu taki wi e firi gi den. Te yu e go luku wan Kresten di swaki na yeye fasi, dan yu musu gi en a dyaranti taki a warti gi Yehovah èn taki den Kotoigi brada nanga sisa fu en e firi en mankeri trutru (1 Tesalonikasma 2:17). Meki a kon sabi taki den de klariklari fu yepi en, èn taki den wani de gi en leki „wan brada di en mama meki fu te banawtu de” (Odo 17:17; Psalm 34:18). Te wi e gebroiki opregti wortu na wan lobi-ati fasi fu gi a sma disi deki-ati, èn te wi e du dati na wan lobi-ati fasi, dan dati kan gi en krakti baka so taki a man drai kon baka na den tra skapu. San wi musu du baka dati? Na agersitori fu na uma di ben lasi wan sensi e sori wi dati.

 Yepi den na wan opregti fasi

18. (a) Fu san ede na uma na ini na agersitori no ben lasi-ati? (b) Sortu opregti muiti na uma du, èn san ben de a bakapisi?

¹⁸ Na uma di lasi a sensi sabi taki a no sa de wan makriki sani fu feni en baka, ma a no e lasi-ati. Efu a ben lasi a sensi na ini wan bigi kontren nanga busibusi, noso na ini wan bigi watra di lai nanga tokotoko èn di dipi sosrefi, dan kande a no ben o suku en moro. Ma fu di a ben sabi taki a sensi ben musu de na wan presi na ini en oso pe a ben kan feni en, meki a bigin suku finifini na ala presi na ini en oso (Lukas 15:8). A fosi sani di a du, na taki a leti wan lampu fu man si bun na ini a dungru oso fu en. Baka dati, a figi a gron nanga a sibi fu en, aladi a ben howpu taki a ben o yere te a ben sibi a sensi. Te fu kaba, a suku na ini ala uku fu na oso, teleki a leti fu a lampu skèin na tapu a solfru sensi. Fu di na uma ben du opregti muiti fu feni a sensi, meki a ben abi bun bakapisi!

19. Fa wi kan yepi den swakiwan, te wi e luku den sani di na uma na ini na agersitori du di a lasi wan sensi?

¹⁹ Soleki fa a pisi tori disi fu na agersitori e memre wi, dan Bijbel e sori wi taki wi alamala abi a frantwortu fu yepi wan swaki Kresten. Ma wi sabi tu taki wi sa musu meki muiti. Iya, na apostel Paulus ben taigi den owruman fu Efeise: „Unu musu wroko na so wan fasi fu yepi den wan di swaki” (Tori fu den Apostel 20:35a). Prakseri taki na uma no feni a sensi fu di a luku lontu na ini en oso wanwan leisi. Nôno, a ben abi bun bakapisi fu di a suku finifini „teleki a feni en”. Sosrefi, te wi e pruberi fu gi krakti baka na wan sma di swaki na yeye fasi, dan wi musu du dati na wan opregti fasi èn nanga wan fasti bosroiti. San wi kan du?

20. San wi kan du fu yepi den swakiwan?

²⁰ Fa wi kan yepi wan swakiwan fu kisi bribi nanga warderi baka? Kande a sani di sa yepi a sma dati, na wan bijbelstudie nanga yepi fu a yoisti Kresten publikâsi. Iya, te wi e studeri Bijbel nanga wan sma di swaki, dan dati e gi wi okasi fu yepi a sma dati doronomo na wan fasi di sa tyari bun bakapisi kon. Kande a ben o moro bun te a dienstopziener ben o bosroiti suma ben kan yepi a sma dati. Kande a sa gi wi rai san fu studeri nanga a sma, èn sortu publikâsi ben o moro bun. Neleki fa na uma na ini na agersitori abi bun bakapisi fu di a e gebroiki den yoisti yepisani, na so wi na ini a ten disi abi den yoisti yepisani tu. Den e yepi wi fu abi bun bakapisi te wi e teki a frantwortu na wi tapu di Gado gi wi fu yepi den wan di swaki. Tu fu den nyun yepisani, noso publikâsi fu wi, sa de wan yepi spesrutu te wi e pruberi fu yepi den swakiwan. Den publikâsi disi na den buku Aanbid de enige ware God (Anbegi a wan-enkri tru Gado) èn Nader dicht tot Jehovah (Kon krosibei na Yehovah). *

21. Fa wi alamala e kisi blesi te wi e yepi den swakiwan?

²¹ Wi alamala e kisi blesi te wi e yepi den wan  di swaki. A sma di e kisi yepi sa de koloku fu di dati e gi en okasi fu de makandra baka nanga tru mati. Wi e ondrofeni a trutru prisiri di wan sma kan kisi soso te a e gi trawan sani (Lukas 15:6, 9; Tori fu den Apostel 20:35b). A heri gemeente kon lobi makandra moro te ibri memre e meki ten gi trawan na wan lobi-ati fasi. Èn san de moro prenspari, na taki den lobi-ati Skapuman fu wi, Yehovah nanga Yesus, e kisi grani fu di den futuboi fu den na grontapu e yepi den swakiwan soleki fa den wani dati (Psalm 72:12-14; Mateyus 11:28-30; 1 Korentesma 11:1; Efeisesma 5:1). Furu sani de di e gi wi deki-ati trutru fu tan ’lobi makandra’!

[Futuwortu]

Yu kan tyari disi kon na krin?

• Fu san ede ibriwan fu wi musu sori trawan taki wi lobi den?

• Fu san ede wi musu lobi den wan di swaki?

• San wi e leri fu den agersitori fu a lasi skapu nanga a lasi sensi?

• Sortu bun sani wi kan du fu yepi wan sma di swaki?

[Aksi fu a tori disi]

[Prenki na tapu bladzijde 16, 17]

Wi musu du muiti fu yepi den swakiwan na wan lobi-ati fasi, èn na wan opregti fasi sosrefi

[Prenki na tapu bladzijde 16, 17]

Te wi e yepi den swakiwan dan wi alamala e kisi blesi