A kan taki wi e bribi na ini wan Gado di wi no sabi

TE YU e si dri sma na ini Doisrikondre, dan tu fu den sma disi, e bribi na ini Gado. Ma di den aksi moro leki wan dusun sma fa a Gado fu den tan, dan pikinmoro ibriwan fu den ben piki wan tra sani. „Den sma fu Doisrikondre abi den eigi prakseri fu a fasi fa Gado tan; den prakseri de so difrenti neleki den sma srefi”, na so a nyunsu tijdschrift FOCUS e taki. A de fu prèise taki son sma e bribi na ini Gado. Ma a no de wan sari sani taki den e bribi na ini Gado, sondro fu sabi fa a de?

A sani disi, taki sma no sabi a fasi fa Gado de noso suma Gado de, no de fu si na ini Doisrikondre wawan, ma a de so tu na ini tra kondre fu Europa. Wan ondrosuku di ben du na ini Oostenrijk, Ingrisikondre, nanga Bakrakondre sori taki furu sma e agri taki Gado na „wan moro hei krakti noso wan kibritori di nowan sma man sabi”. Spesrutu gi yonguwan, Gado na wan sani di nowan sma man frustan. Srefi den yonguwan di e bribi na ini Gado abi a srefi prakseri.

Yu sabi Gado trutru?

Fu sabi wan sma frafra èn fu sabi wan sma trutru, na tu difrenti sani. Fu sabi wan sma frafra wani taki dati yu ben yere taki so wan sma de. Fu eksempre, kande yu sabi wan tiriman fu wan farawe kondre, wan barinen sportman, noso wan sma di e prei na ini felem, fu di yu ben yere fu den. Ma fu sabi wan sma trutru, wani taki moro. A wani taki dati yu sabi den fasi fa a sma de, yu sabi fa a e tyari ensrefi, fa a e firi, san a lobi noso san a no lobi, èn san a abi na prakseri fu du na ini a ten di e kon. Te yu sabi wan sma trutru, dan dati kan meki taki yu e kisi wan krosibei banti nanga a sma dati.

Dusundusun sma kon si taki a no sari fu sabi Gado frafra nomo, noso a no sari fu sabi nomo taki wan Gado de. Fu dati ede den du wan sani fu kon leri sabi Gado trutru. Den ben kisi wini fu dati? Wan man di nen Paul, e libi na a noordsei fu Doisrikondre. Fosi a no ben sabi furu fu Gado, ma bakaten a teki a bosroiti fu kon leri sabi Gado moro bun. Paul e fruteri: „A e teki ten nanga muiti fu kon leri sabi Gado, ma a bakapisi e tyari furu wini kon. A krosibei banti di mi abi nanga a Mekiman e meki na aladei libi kon moro bun.”

Fu kon leri sabi Gado de so prenspari, taki yu musu teki ten nanga muiti fu du disi? Grantangi leisi a tra artikel.

[Prenspari pisi na tapu bladzijde 3]

Fu sabi wan sma frafra èn fu sabi wan sma trutru, na tu difrenti sani