San yu ben sa wani aksi Gado?

NA HERI grontapu sma de di abi wan lo aksi fu na aladei libi di e dangra den. Yusrefi abi den sortu aksi dati tu? Furu sma go na kerki fesiman fu kisi piki tapu den aksi fu den, ma den no ben kisi piki trutru tapu den aksi fu den. Tra sma suku fu feni den eigi piki tapu den aksi disi. Yu abi sma sosrefi di begi Gado fu yepi den fu kon feni den piki. Ma a de so trutru taki Gado kan yepi wi fu kisi piki tapu aksi di e dangra wi? Den aksi di e kon now na wan tu eksempre nomo fu den someni sani di sma ben sa wani aksi Gado.

Gado, suma na yu trutru?

A kulturu fu wan sma, a fasi fu anbegi fu a papa nanga mama fu wan sma, noso kande a fasi fu anbegi di a sma srefi ben teki, kan abi krakti tapu a fasi fa a e prakseri fu Gado. Son sma e kari a gado fu den na en nen, aladi trawan e kari en Gado. Yu denki taki a de fanowdu fu broko wi ede nanga dati? A de so taki na wan Gado nomo de di e sori wi suma na en èn san na a nen fu en?

Fu san ede so furu pina de na ini grontapu?

Te wan sma libi wan yayo libi pe a pori en gosontu, noso te a libi na so wan fasi taki a kon tron wan pôti sma, dan so wan sma kan kragi taki a libi fu en no e waka bun. Ma a sa sabi heri bun tu fu san ede a e pina so.

Ma furu tra sma de tu di e pina srefisrefi, aladi densrefi no man yepi. Son wan fu den abi wan siki di no man dresi. Trawan e wroko tranga dei nanga neti, soso fu feni wan bun tanpresi nanga nofo nyanyan gi den osofamiri, aladi a gersi leki den no man doro a marki dati noiti. Milyunmilyun sma e pina leki bakapisi fu ogridu, orloku, a kiri di sma e kiri trawan lawlaw, rampu, noso a pina di sma di abi makti pina den.

Fu dati ede a no e fruwondru wi taki furu sma e aksi: ’Fu san ede meki den sortu sani disi e pasa so furu? Fu san ede meki Gado e gi pasi srefi taki den sortu sani disi e pasa?’

 Fu san ede mi de na grontapu? San na a marki fu a libi?

Furu tron sma e poti den sortu aksi disi fu di den e bruya te den e si taki den sani di den e du na ini na aladei libi no e gi den trutru prisiri. Iya, te yu luku en bun, dan furu sma abi a problema disi. Milyunmilyun tra sma de sosrefi di e bribi taki, na a wan noso tra fasi, Gado poti na fesi kaba fa a libi fu ibriwan sma musu waka. Ma dati de so trutru? We, efu a de so trutru taki Gado abi wan spesrutu sani na prakseri gi yu, dan a no de fu taki dati yu sa wani sabi san na a sani dati.

Fu ala den buku di de na grontapu, dan wán buku de di e sori krin taki den sani di skrifi na ini, komoto fu Gado. Fu di a boskopu di de na ini a buku disi na trutru wan boskopu di Gado e gi na a heri libisma famiri, meki a no e fruwondru wi taki a de fu feni na ini moro tongo leki iniwan tra buku di oiti skrifi. A buku disi na a Santa Bijbel. Na ini a buku disi, a Mekiman fu hemel nanga grontapu, sobun Gado srefi, e tyari kon na krin, suma a de trutru èn san na a nen fu en. Yu sabi a nen fu Gado? Yu sabi san Bijbel e taki fu a sortu Sma di Gado de? Yu sabi sosrefi san Bijbel e taki fu a fasi fa Gado wani taki wi musu tyari wisrefi?

 [Sma di abi a reti fu a prenki na tapu a kafti]

COVER: Chad Ehlers/Index Stock Photography

[Sma di abi a reti fu a prenki na tapu bladzijde 3]

Mountain: Chad Ehlers/Index Stock Photography