Aksi fu leisiman

Satan Didibri abi a koni fu sabi san libisma e prakseri?

Aladi wi no man taki dati seiker, toku a sori leki Satan nanga den ogri yeye fu en no abi a koni fu sabi san wi e prakseri.

Luku den nen fu Satan di e sori fa a de. A abi a nen Satan (Gensman), Didibri (Ogri-ati leiman), Sneki (di de a srefi leki Bedrigiman), Tesiman, nanga Leiman (Yob 1:6; Mateyus 4:3; Yohanes 8:44; 2 Korentesma 11:3; Openbaring 12:9). Nowan fu den nen disi e sori taki Satan abi a koni fu sabi san libisma e prakseri.

Ma kontrari fu dati, Yehovah Gado na a sma di e „ondrosuku den ati” (Odo 17:3; 1 Samuel 16:7; 1 Kroniki 29:17). „Nowan sani de di Gado meki di a no man si”, na so Hebrewsma 4:13 e taki, „ma nowan sani kibri gi den ai fu a sma di wi musu gi frantwortu èn den ai fu en man si ala sani krin.” A no de fu fruwondru taki Yehovah gi en Manpikin, Yesus, a koni fu man ondrosuku na ati fu sma. Yesus, di ben kisi wan opobaka, ben taki: „Mi na a sma di e ondrosuku den niri nanga den ati, èn mi sa gi ibriwan fu unu akruderi den sani di unu e du.”​—Openbaring 2:23.

Bijbel no e taki dati Satan man ondrosuku na ati nanga a prakseri fu libisma. Disi na wan prenspari sani fu hori na prakseri, fu di na apostel Paulus e gi wi a dyaranti taki Kresten „sabi san Satan abi na prakseri” (2 Korentesma 2:11). Sobun, wi no abi fu frede taki Satan abi wan spesrutu sortu koni fu san wi no sabi noti.

Ma toku, disi no wani taki dati a Feanti fu wi no abi a koni fu sabi san na den swakifasi fu wi. Wan langa pisi ten kaba, Satan e ondrosuku a fasi fa libisma e tyari densrefi. A no de fanowdu taki Satan musu abi a koni fu sabi san libisma e prakseri. A sabi san wi e prakseri fu di a e luku a fasi fa wi e tyari wisrefi. A e luku sosrefi sortu sani wi lobi fu du na ini wi prisiriten, noso a e arki fu sortu sani wi e taki, èn go so moro fara. A fasi fa wi e poti wi fesi èn a fasi fa wi e du sani, kan sori tu san wi e denki noso fa wi e firi.

Ma furu tron, Satan e gebroiki den srefi sortu sani di a ben gebroiki fu kori sma na ini a dyari fu Eden; a e lei, a e bedrigi sma, èn a no e taki sani leki fa den de (Genesis 3:1-5). Aladi Kresten no abi fu frede taki Satan abi a koni fu sabi san den e prakseri, toku den musu luku bun nanga sani di Satan kan meki den prakseri. Satan wani taki Kresten musu tron sma „di pori na ini den frustan èn di lasi waarheid” (1 Timoteyus 6:5). A no de fu fruwondru taki a grontapu fu Satan panya kefalek furu tori, felem, nanga tra sani di e pori a prakseri fu sma. Efu Kresten wani kakafutu gi den sortu takru sani disi, dan den musu kibri den prakseri fu di den e weri „a fetimusu fu frulusu” (Efeisesma 6:17). Kresten e du disi te den e poti prakseri na a waarheid fu Bijbel doronomo èn te den e meki muiti fu wai pasi gi den takru sani fu a grontapu fu Satan di kan pori a prakseri fu den.

Satan na wan bigi feanti fu wi. Ma wi no musu abi wan bigi frede gi en, noso gi den ogri yeye fu en. Yakobus 4:7 e gi wi a dyaranti: „Kakafutu gi Didibri èn a sa lon gowe libi unu.” Efu wi e gi yesi na a rai disi, dan neleki Yesus wi sa man taki dati Satan no abi krakti na wi tapu kwetikweti.​—Yohanes 14:30.