San wi kan leri fu den fowru?

„LUKU den fowru bun di e frei na loktu, bika den no e sai siri, den no e koti nyanyan èn den no e kibri nyanyan na ini maksin; toku un Tata na hemel e gi den nyanyan. Unu no warti moro den?” (Mateyus 6:26) Yesus Krestes ben taki den wortu disi na wan barinen takimakandra di a ben hori na sei fu wan bergi krosibei fu a Se fu Galilea. A no soso den bakaman fu en ben e arki a takimakandra disi. Wan bigi ipi fu sma di ben kan tron disipel fu en, ben de drape tu. Den sma disi ben komoto na ala sei fu a kondre. Furu fu den ben de pôtisma di ben tyari den sikiwan kon na Yesus, so taki a ben kan dresi den.​—Mateyus 4:23–5:2; Lukas 6:17-20.

Baka di Yesus ben dresi ala den sikiwan, dan a ben poti prakseri na den moro prenspari sani di den ben abi fanowdu na yeye fasi. Wan fu den sani di a ben e leri den sma, na a tori di skrifi na tapusei.

Den fowru fu hemel de fu wan langa pisi ten kaba. Sonwan fu den fowru e nyan insekt, trawan e nyan froktu nanga siri. Efu Gado man sorgu taki den fowru abi nofo nyanyan, dan seiker a sa man yepi den futuboi fu en na grontapu fu kisi a dei brede fu den. A man yepi den fu feni wan wroko, so taki den kan wroko moni fu bai nyanyan. Noso a kan yepi den fu prani den eigi nyanyan. Na ini muilek ten, dan Gado kan meki birtisma nanga mati di abi switifasi prati awinsi sortu nyanyan den abi, nanga den wan di de na nowtu.

Wi kan leri moro furu sani te wi e luku a libi fu den fowru finifini. Gado meki fowru na so wan wondru fasi taki den abi a koni fu meki nesi pe den kan sorgu gi den pikin fu den. Luku tu difrenti sortu nesi. Na a kruktu-anusei yu kan si wan fowtow nanga wan nesi fu wan sortu zwaluw di de na ini Afrika. A fowru disi e meki en nesi na wan ston, noso na a skotu fu wan oso. A tapusei pisi fu den sortu nesi disi na wan ston di e anga abra, noso soleki fa a de fu si tapu a prenki, dan a kan de a lanki fu a daki fu wan oso. Den fowru e meki na ondrosei pisi fu a nesi nanga pikin pisi tokotoko di den e seti na so wan fasi taki a gersi wan kan. A man-fowru nanga na uma-fowru e wroko tranga fu suku den pikin pisi tokotoko disi. A kan teki sowan mun fu kaba nanga a nesi fu den. Baka dati, den e poti grasi nanga fowru wiwiri na tapu a tokotoko di de na inisei fu a nesi. A man-fowru nanga na uma-fowru e sorgu gi a nyanyan fu den pikin. Na ondrosei yu kan si wan nesi fu wan man-fowru di de wan sortu Sabana-twatwa. A fowru disi di e wroko tranga fu bow en nesi, de fu feni na ini Afrika. A e gebroiki fini sortu grasi noso a e teki pisi fu den wiwiri fu bon, fu meki en nesi. A kan meki wan nesi na ini wán dei èn a kan meki moro leki 30 nesi na ini a pisi ten te a e go fu a wan presi na a trawan, noso te a e suku wan patna!

Sortu les wi kan leri? Efu Gado e gi den fowru so wan koni fu meki den nesi èn efu a e gi den ala den sani di den abi fanowdu fu meki den nesi, dan seiker A sa yepi den futuboi fu en na grontapu fu feni wan tanpresi te den abi dati fanowdu. Ma Yesus ben sori taki wi musu du wan tra sani efu wi wani taki Yehovah Gado yepi wi fu kisi den sani di wi abi fanowdu fu man tan na libi. „Fu dati ede, tan suku a kownukondre nanga En regtfardikifasi fosi èn unu sa kisi ala den tra sani tu”, na so Yesus ben pramisi (Mateyus 6:33). Kande yu e aksi yusrefi: ’San a wani taki fu suku a Kownukondre fu Gado fosi?’ Yehovah Kotoigi, di tyari a tijdschrift disi kon na doro, sa prisiri fu piki na aksi dati gi yu.