„Luku! Disi na wi Gado”
„Luku! Disi na wi Gado”
Ala den tori na ini den tu studie-artikel disi, teki puru fu a buku Nader dicht tot Jehovah (Kon krosibei na Yehovah). A buku disi tyari kon na doro na den distrikt kongres di hori na ala sei fu grontapu, na ini a pisi ten fu 2002 èn na a bigin fu 2003.—Luku na artikel „A gi mi soifri san mi ben e misi” na ini a tijdschrift disi na tapu bladzijde 20.
„Luku! Disi na wi Gado. Wi howpu na en tapu, èn a sa frulusu wi. Disi na Yehovah.”—YESAYA 25:9.
1, 2. (a) Fa Yehovah ben e kari na famiri-edeman Abraham? San dati kan meki wi aksi wisrefi? (b) Fa Bijbel e gi wi a dyaranti taki wi alamala kan kisi wan bun banti nanga Gado?
„MI MATI.” Na so Yehovah, a Mekiman fu hemel nanga grontapu, ben kari a famiri-edeman Abraham (Yesaya 41:8). Prakseri a tori disi pikinso. Wan libisma di de wan mati fu a Moro Hei Masra fu hemel nanga grontapu! Ma kande yu e aksi yusrefi: ’Mi kan kisi so wan bun banti nanga Gado trutru?’
2 Bijbel e gi wi a dyaranti taki wi kan kisi wan bun banti nanga Gado. Abraham ben kisi na okasi fu kisi wan bun banti nanga Gado, fu di a „ben abi bribi na ini Yehovah” (Yakobus 2:23). Na ini a ten disi sosrefi, Yehovah „abi wan bun banti nanga den opregtiwan” (Odo 3:32). Na ini Yakobus 4:8, Bijbel e taigi wi: „Kon krosibei na Gado, èn a sa kon krosibei na unu.” A de krin taki efu wi e du muiti fu kon krosibei na Yehovah, dan en fu en sei o du wan sani tu. Iya, dan ensrefi sa kon krosibei fu wi. Ma den wortu disi di skrifi nanga yepi fu santa yeye, wani taki dati wi leki sondu libisma na den fosiwan di du muiti fu kon krosibei na Yehovah? Kwetikweti. Te yu luku en bun, dan wi e kisi na okasi fu abi wan banti nanga Yehovah, soso fu di en, leki wi lobi-ati Gado, du tu prenspari sani.—Psalm 25:14.
3. San na tu sani di Yehovah du fu opo a pasi gi wi fu de mati fu en?
3 Na a fosi presi, Yehovah ben seti sani na so wan fasi, taki Yesus ben kan „gi en libi leki wan lusu-paiman gi furu sma” (Mateyus 20:28). A frulusu-ofrandi dati e meki taki wi kan kon krosibei na Gado. Bijbel e taki: „Ma wi lobi trawan, bika Gado fosi lobi wi” (Yohanes 4:19). Iya, fu di Gado ’fosi lobi wi’, meki a opo a pasi gi wi fu tron mati fu en. Wan tra sani di Yehovah du, na taki a meki wi kon sabi en. Te wi e tron mati fu wan sma, dan dati e kon fu di wi kon sabi a sma dati bun, fu di wi e lespeki en, èn fu di wi lobi a fasi fa a de. Prakseri dan san disi wani taki. Efu Yehovah ben de wan Gado di e kibri ensrefi gi libisma, èn efu a ben de wan Gado di sma no man kon sabi, dan wi no ben o man kon krosibei na en noiti. Ma na presi fu kibri ensrefi gi wi, dan Yehovah wani taki wi kon sabi en (Yesaya 45:19). Na ini en Wortu, Bijbel, Yehovah e meki wi kon sabi en na wan fasi di wi kan frustan makriki. Dati no e sori wawan taki a lobi wi, ma a e sori tu dati a wani taki wi kon sabi en èn taki wi kon lobi en leki wi hemel Tata.
4. Fa wi o prakseri fu Yehovah te wi e kon sabi den fasi fu en moro bun?
4 Oiti yu si wan pikin-nengre e sori den mati fu en suma na en papa, aladi a e taki nanga prisiri èn na wan prodo fasi: „Dati na mi papa”? Anbegiman fu Gado abi a reti fu firi so tu te den e taki fu Yehovah. Bijbel e taki dati wan ten o kon pe getrow sma sa bari nanga tranga sten: „Luku! Disi na wi Gado” (Yesaya 25:8, 9). O moro wi e kon frustan den fasi fu Yehovah, o moro wi sa firi taki en na a moro bun Tata nanga a moro bun Mati di wi kan abi. Iya, te wi e kon frustan den fasi fu Yehovah, dan wi e kon si someni sani di e sori wi fu san ede a bun fu kon krosibei na en. Sobun, meki wi luku san Bijbel e fruteri wi fu den moro prenspari fasi fu Yehovah, namku makti, retidu, koni, nanga lobi. Na ini na artikel disi wi sa taki fu soso dri fu den fasi disi.
’A abi makti moro iniwan tra sma’
5. Fu san ede meki Yehovah na a wán-enkri sma di wi kan kari „na Almaktiwan”? Fa a e gebroiki a kefalek bigi makti fu en?
5 Yehovah abi „makti moro iniwan tra sma” (Yob 37:23). Yeremia 10:6 e taki: „Nowan sma no de, di de leki yu, o Yehovah. Yu bigi èn yu nen abi bun furu krakti.” Yehovah no de leki den sani di a meki, bika a krakti fu en no abi nowan skotu. Dati meki en na a wán-enkri sma di wi kan kari ’na Almaktiwan’ (Openbaring 15:3). Yehovah e gebroiki a kefalek bigi makti fu en fu meki sani, fu pori sani, fu kibri sma, èn fu meki sani kon bun baka. Meki wi go luku tu eksempre, namku a makti di a abi fu meki sani, èn a makti di a abi fu kibri sma.
6, 7. O furu krakti a son abi? Sortu prenspari tru tori disi e tyari kon na krin?
6 Te yu e tanapu na dorosei na wan moi mamanten, dan yu e firi a waran fu a son na tapu yu skin, a no so? Ma te yu luku en bun, dan a sani di yu e firi, na a bakapisi fu wan sani di Yehovah meki. Omeni krakti a son abi? A pisi te na ini na ati fu a son, faya sowan 15 milyun graden Celsius. Efu yu ben man teki wan pikin noti pisi puru na a ati fu a son, wan pisi di no bigi moro leki na ede fu wan pina, èn efu yu ben sa poti en dyaso na grontapu, dan iniwan sma di ben sa tanapu moro krosibei leki 150 kilometer fu a pikin pisi faya disi, ben o bron! A krakti di e komoto fu a son ibri sekonde, na a srefi leki a krakti fu milyunmilyun atoombom di e sutu panya na a srefi ten. Toku grontapu no de tumusi krosibei noso tumusi fara fu a son disi, di de leki wan kefalek bigi faya onfu. Efu grontapu ben de tumusi krosibei fu a son, dan a son ben o drei ala watra na grontapu; efu a ben de tumusi fara fu a son, dan ala sani na grontapu ben o tron ijs. Ibriwan fu den tu fasi disi ben o meki taki libi no ben o de na grontapu.
7 Aladi libisma abi a son tranga fanowdu fu tan na libi, toku furu fu den no e poti prakseri kwetikweti na a wroko di a son e du gi den. Dati meki den no man si san a son kan leri wi. Psalm 74:16 e taki fu Yehovah: „Yusrefi ben sreka a leti na hemel, iya na yu meki a son.” Iya, a son e gi Yehovah glori leki „a Mekiman fu hemel nanga grontapu” (Psalm 146:6). Ma toku a son na soso wan fu den someni sani di Yehovah meki èn di e leri wi fu a kefalek bigi makti fu en. O moro wi e leri fu a makti di Yehovah abi fu meki sani, o moro lespeki nanga warderi wi e kisi gi en.
8, 9. (a) Sortu moi agersitori e sori wi fa Yehovah de klariklari fu kibri den anbegiman fu en èn fu sorgu gi den? (b) Fa skapuman ben e sorgu den skapu fu den na ini Bijbel ten? San disi e leri wi fu a Gran Skapuman fu wi?
8 Yehovah e gebroiki a kefalek bigi makti fu en sosrefi fu kibri den futuboi fu en, èn fu sorgu gi den. Bijbel e gebroiki wan tu kefalek moi agersitori fu sori fa Yehovah pramisi fu kibri wi. Luku leki eksempre san skrifi na Yesaya 40:11. Drape Yehovah e agersi ensrefi nanga wan skapuman, èn a pipel fu en nanga skapu. A tekst e taki: „Leki wan skapuman a sa tiri en eigi ipi. Nanga en anu a sa tyari den pikin skapu kon na wan, èn na en borsu a sa tyari den. Den wan di de na bobi, a sa tiri nanga koni.” Yu man si na yu fesi kaba fa a skapuman e du den sani di skrifi na ini a tekst disi?
9 Skapu na meti di abi moro furu yepi fanowdu leki iniwan tra meti. Na ini Bijbel ten, wan skapuman ben musu abi deki-ati fu man kibri den skapu fu en gi wolfu, beer, nanga lew (1 Samuel 17:34-36; Yohanes 10:10-13). Ma son leisi a ben musu sori safu-ati tu te a ben musu kibri èn sorgu den skapu fu en. Leki eksempre, san yu denki taki a skapuman ben o du efu wan fu den skapu ben kisi pikin farawe fu na ipi? San a skapuman ben o du fu kibri a nyun-nyun pikin skapu, so taki ogri no miti en? We, a skapuman ben o tyari a pikin skapu na en „borsu”, dati wani taki na ini den ploi fu en tapusei krosi. Kande a ben o du dati furu dei langa. Ma fa wan pikin skapu ben o doro te na a „borsu” fu a skapuman? A pikin skapu ben sa kan waka go na a skapuman, èn a ben sa kan buku a skapuman na en futu. Ma na a skapuman ben o abi fu boigi, langa en anu teki a pikin skapu, fu opo a skapu poti na en borsu fu man kibri en. Fu tru, disi na wan moi agersitori fu sori wi taki a Gran Skapuman fu wi de klariklari ala ten fu kibri wi leki futuboi fu en!
10. Fa Yehovah e kibri wi na ini a ten disi? Fu san ede a de prenspari taki wi kisi kibri na so wan fasi?
10 Ma Yehovah du moro leki fu pramisi wi nomo taki a sa kibri wi. Na ini Bijbel ten a ben sori nanga wondru, taki a abi a makti ’fu puru sma na ini tesi te den e dini En na wan getrow fasi’ (2 Petrus 2:9). Fa a de na ini a ten disi? Wi sabi taki a no e gebroiki a makti fu en fu kibri wi gi ala rampu di kan miti wi na ini a ten disi. Ma toku, a e du wan sani gi wi di moro prenspari srefi. A e kibri wi na yeye fasi. A lobi-ati Gado fu wi e kibri wi gi sani di kan meki wi kon swaki na yeye fasi. A e gi wi ala san wi abi fanowdu fu horidoro te wi kisi tesi, èn fu tan abi wan bun banti nanga en. Prakseri Lukas 11:13 pe skrifi: „Efu unu leki ogri sma, sabi fa fu gi bun presenti na den pikin fu unu, o moro dan a Tata na hemel, sa gi santa yeye na den wan di e aksi en fu dati!” A bigi krakti dati kan yepi wi fu pasa iniwan tesi noso problema di sa miti wi (2 Korentesma 4:7). Na so fasi Yehovah e du san de fanowdu fu hori wi na libi, a no fu wan tu yari nomo, ma fu têgo. Nanga a pisi tori disi na prakseri, wi musu si iniwan fasi fa wi e pina na ini a seti fu sani disi leki wan sani di „de gi wan syatu pisi ten nomo èn [di] lekti” (2 Korentesma 4:17). Yu no e prisiri fu dini wan Gado di e gebroiki a makti fu en na wan lobi-ati fasi, so taki wi kan kisi wini fu dati? We, a no de fu taki!
„Yehovah na wan sma di lobi retidu”
11, 12. (a) Fu san ede a retidu fu Yehovah e meki taki wi e kon lobi en moro srefi? (b) San David ben kon frustan fu a retidu fu Yehovah? Fa den wortu disi di skrifi nanga yepi fu santa yeye kan de wan trowstu gi wi?
11 Yehovah e du san bun èn san reti; a e tan du dati sondro fu teki sma sei. A retidu fu Yehovah no de wan takru sani di e tapu skreki gi wi, ma a de wan fasi di e meki taki wi e kon lobi en moro srefi. Bijbel e fruteri krin o moi èn o switi a fasi disi de. We, meki wi go luku dri fasi fa Yehovah e sori a retidu fu en.
12 Na a fosi presi, a retidu fu Yehovah e meki taki a de getrow na den futuboi fu en, èn a e meki tu taki a e tan horibaka gi den. A psalm skrifiman David ben ondrofeni a retidu fu Yehovah na a fasi disi tu. San na ondrofeni dati ben leri David èn san a ben kon frustan di ensrefi ondrosuku den fasi fu Gado? We, a ben taki: „Yehovah na wan sma di lobi retidu, èn a no sa gowe libi den wan di e tan horibaka gi en. Fu tru, den sa kisi kibri te ten di no skotu” (Psalm 37:28). A dyaranti disi e gi wi trowstu trutru! Noiti a Gado fu wi sa drai en baka gi den wan di e tan horibaka gi en. Fu dati ede wi kan abi a frutrow taki a sa tan wi mati, èn taki a sa sorgu wi na wan lobi-ati fasi. A retidu fu en e gi wi a dyaranti taki a sa du dati trutru!—Odo 2:7, 8.
13. Fa a Wet di Yehovah ben gi Israel e sori taki a e broko en ede nanga den wan di no abi sma fu yepi den?
13 A di fu tu sani, na taki a retidu fu Gado e meki taki a e frustan heri bun san na a nowtu fu sma di e pina. A Wet di Yehovah ben gi Israel, na wan buweisi taki a e broko en ede nanga den wan di de na nowtu. Fu eksempre, na ini a Wet, sani ben seti fu sorgu taki pikin di no ben abi papa nanga mama èn sosrefi den weduwe, ben kan kisi san den ben abi fanowdu (Deuteronomium 24:17-21). Fu di Yehovah ben sabi o tranga a libi ben kan de gi den sortu famiri disi, meki ensrefi ben tron a Tata fu den, wan Tata di ben de leki a Krutuman nanga a Kibriman fu den (Deuteronomium 10:17, 18). A ben warskow den Israelsma taki efu den ben o pina umasma nanga den pikin di no ben abi yepiman, dan a ben o yere a babari fu den sma dati. „Fu tru, mi sa kisi bigi atibron”, na so a ben taki, soleki fa skrifi na Exodus 22:22-24. Atibron a no wan fu den moro prenspari fasi fu Gado. Ma Yehovah e kisi atibron nanga reti te sma e du kruktudu fu espresi, spesrutu te den e pina trawan di no abi sma fu yepi den.—Psalm 103:6.
14. San na wan fu den krin buweisi taki Yehovah no e teki sma sei?
14 Leki di fu dri sani, Bijbel e gi wi a dyaranti na ini Deuteronomium 10:17 taki Yehovah ’no e teki partèi gi nowan sma èn taki a no e teki tyuku’. Tra fasi leki san furu sma e du te den abi makti, dan sma no man korikori Yehovah nanga gudu, èn den no man kibri sani gi en tu. Yehovah no e desko sma, èn a no feni taki a wan sma bun moro leki wan trawan. Wan krin buweisi di e sori taki a no e teki sma sei, na disi: A no de so taki wan spesrutu grupu sma nomo abi na okasi fu tron tru anbegiman fu Yehovah, èn fu abi a howpu fu libi fu têgo. Na presi fu dati, Tori fu den Apostel 10:34, 35 e taki: „Gado no e teki sma sei, ma na mindri ala pipel a sma di e frede en èn di e du san de regtfardiki, bun na en ai.” Ala sma kan kisi a libi disi, awinsi den gudu noso pôti, awinsi sortu kloru den skin de, èn awinsi na ini sortu kondre den e libi. Disi na a moro bun fasi fa wan sma kan sori tru retidu, a no so? Iya, te wi e kon frustan a retidu fu Yehovah moro bun, dan dati e meki taki wi e kon lobi en moro srefi!
„O, fa Gado abi bun furu . . . koni!”
15. San na koni? Fa Yehovah e sori a fasi disi?
15 Na apostel Paulus ben taki san skrifi na Romesma 11:33, namku: „O, fa Gado abi bun furu . . . koni, nanga sabi!” Iya, te wi e prakseri fu den difrenti fasi fa Yehovah e sori a kefalek bigi koni fu en, dan dati e meki wi kisi bigi lespeki gi en trutru. Ma san na koni? Koni e moksi dri sani kon na wan, namku sabi, a koni fu man si sani krin, nanga frustan. Wan sma di abi koni man gebroiki ala den dri fasi disi fu doro wán spesrutu marki. Fu di Yehovah abi bun furu koni èn fu di a man si a fini fu wan tori, meki a man teki den moro bun bosroiti èn a man fu handri akruderi den bosroiti dati. Te a e handri, dan a e du dati na so wan fasi taki a musu abi bun bakapisi.
16, 17. Fa den sani di Yehovah meki e sori taki a abi furu koni? Gi wan eksempre.
16 San na wan tu krin buweisi di e sori taki Yehovah abi bun furu koni? Psalm 104:24 e taki: „Den wroko fu yu furu srefisrefi, o Yehovah! Yu meki den alamala na wan koni fasi. Grontapu furu nanga den sani di yu meki.” Iya, o moro wi e kon sabi fu den sani di Yehovah meki, o moro wi e fruwondru fu a koni di a abi. Te yu luku en bun, dan sabiman kon sabi bun furu di den go ondrosuku den sani di Yehovah meki! Now son sabiman e du biomimetiek srefi. Dati wani taki dati den e ondrosuku finifini fa den sani na grontapu e wroko èn fa den sani dati meki, so taki den kan pruberi fu meki sani di e wroko na wan srefi sortu fasi.
17 Fu eksempre, kande yu ben fruwondru fu a moi fasi fa wan anansi seti den titei fu en. Fu tru, dati na wan kefalek moi sani. Sonwan fu den fini titei dati kan tranga moro leki isri srefi, te yu poti den makandra. Den kan tranga moro leki den finifini titei na ini wan dyakti di sma e weri fu no meki kugru kisi den. Te yu luku en bun, dan san dati wani taki? Kon meki wi taki dati wan anansi-titei ben o de so bigi leki den net di sma e gebroiki na tapu wan fisiboto. So wan net fu anansi-titei ben o de so tranga, taki a ben o man hori wan bigi opolani di e sutu pasa na loktu! Iya, Yehovah meki ala den sani disi ’na wan koni fasi’.
18. Fa a koni fu Yehovah de krin fu si na a fasi fa a gebroiki libisma fu skrifi en Wortu, Bijbel?
18 A moro prenspari sani di e sori a koni fu Yehovah de fu feni na ini en Wortu, Bijbel. A koni rai di de fu feni na ini Bijbel, e sori wi trutru san na a moro bun fasi fu libi (Yesaya 48:17). Ma wi kan si a kefalek bigi koni fu Yehovah sosrefi na a fasi fa Bijbel skrifi. Fa so? A koni fu Yehovah meki taki a gebroiki libisma fu skrifi a Wortu fu en. Yu denki taki Bijbel ben o abi a srefi krakti tapu libisma efu Gado ben gebroiki engel fu skrifi en? A tru taki engel di hei moro wi ben o man fruteri wi sani fu Yehovah soleki fa den e si Yehovah. Den ben o man fruteri wi fa den e gi densrefi dorodoro fu du a wani fu en. Ma yu denki taki den sani di den volmaakti engel disi ben o fruteri wi ben sa naki wi ati trutru? Den engel na sma di abi moro sabi, moro ondrofeni, nanga moro krakti leki wi. Sobun, yu denki taki wi ben o man si noso frustan sani soleki fa den e si èn e frustan sani?—Hebrewsma 2:6, 7.
19. Fu di Gado gebroiki libisma fu skrifi Bijbel, meki den tori fu Bijbel e naki sma ati, èn e hari sma prakseri. Sortu eksempre na ini Bijbel e sori dati?
19 Fu di Gado gebroiki libisma fu skrifi Bijbel, meki Bijbel e naki sma ati trutru, èn a e hari sma fu leisi en. Den skrifiman fu Bijbel ben de man di ben abi den srefi firi leki wi. Fu di den no ben de volmaakti, meki den kisi fu du nanga den srefi sortu tesi nanga problema di wi e kisi. Son leisi den skrifi fu den eigi firi èn fu den problema di densrefi miti (2 Korentesma 12:7-10). Sobun, den skrifi fu sani di nowan engel ben o man skrifi fu dati. Prakseri den wortu fu David di skrifi na ini Psalm 51. Soleki fa a pisi di skrifi na loktusei fu a Psalm disi e taki, dan David ben skrifi a psalm disi baka di a ben du seryusu sondu. A ben fruteri Gado ala san ben de tapu en ati; a ben e sari trutru, èn a begi Gado fu gi en pardon. Vers 2 nanga 3 e taki: „Wasi den fowtu fu mi puru krinkrin, èn krin mi fu mi sondu srefi. Bika mi sabi den fowtu fu mi, èn mi sondu de na mi fesi doronomo.” Poti prakseri tu na vers 5: „Luku! Nanga sondu mi mama ben meki mi nanga furu pen, èn na ini sondu mi mama kon de nanga bere fu mi.” Vers 17 e taki moro fara: „Den srakti-ofrandi gi Gado na wan yeye di broko; wan ati di broko èn di masi, o Gado, yu no sa wisiwasi.” Yu kan firi a pen nanga a sari fu a skrifiman? Wan onvolmaakti libisma wawan kan taki fu den sortu dipi firi disi, a no so?
20, 21. (a) Fu san ede wi kan taki dati a koni di de fu feni na ini Bijbel komoto fu Yehovah, aladi na libisma anu skrifi Bijbel? (b) Fu sortu tori wi sa taki na ini na artikel di e kon?
20 Fu di Yehovah skrifi Bijbel nanga yepi fu libisma di no de volmaakti, meki a gi wi soifri san wi abi fanowdu, namku wan buku di ’Gado srefi ben meki sma skrifi’, ma di skrifi na wan fasi di wi libisma man frustan bun (2 Timoteyus 3:16). Iya, a santa yeye ben e tiri den skrifiman dati. Na a fasi dati den no ben skrifi sani di abi fu du nanga den eigi koni, ma sani di abi fu du nanga a koni fu Yehovah. Wi kan frutrow dorodoro tapu a koni fu Yehovah. A koni fu Gado bigi omeni tron moro di fu wi. Dati meki a e gi wi a lobi-ati rai: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti” (Odo 3:5, 6). Te wi gi yesi na a koni rai dati, dan dati sa meki wi kisi wan moro tranga banti nanga a Gado fu wi di abi ala koni.
21 A moro moi fasi fu Yehovah di e hari wi kon krosibei na en, na lobi. Na ini na artikel di e kon wi sa si fa Yehovah sori a lobi fu en.
Yu kan memre disi ete?
• San Yehovah du fu meki taki wi kan kon kisi wan bun banti nanga en?
• San na wan tu fasi fa Yehovah e sori a makti di a abi fu meki sani, èn a makti di a abi fu kibri sma?
• Na sortu fasi Yehovah e sori a retidu fu en?
• Na sortu fasi a koni fu Yehovah de fu si na ini den sani di a meki èn na ini Bijbel?
[Aksi fu a tori disi]
[Prenki na tapu bladzijde 10]
Neleki fa wan skapuman e tyari wan pikin skapu na en borsu, na so Yehovah e sorgu gi den skapu fu en na wan safri-ati fasi
[Prenki na tapu bladzijde 13]
A fasi fa Bijbel skrifi e sori wi fa Yehovah koni