Fa wi musu si sma, aladi a dei fu Yehovah e kon krosibei?

„Yehovah no e draidrai nanga a pramisi fu en, . . . ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow.”​—2 PETRUS 3:9.

1, 2. (a) Fa Yehovah e si sma na ini a ten disi? (b) Sortu aksi wi kan poti gi wisrefi?

DEN futuboi fu Yehovah abi leki wroko fu „go na ala kondre èn meki sma tron disipel” (Mateyus 28:19). Aladi wi e du a wroko disi èn e wakti „a bigi dei fu Yehovah”, dan wi musu si sma soleki fa en e si sma (Sefanya 1:14). Fa Yehovah e si sma? Na apostel Petrus taki: „Yehovah no e draidrai nanga a pramisi fu en, soleki fa son sma e denki taki a e draidrai, ma a abi pasensi nanga unu fu di a no wani taki wan sma e kisi pori, ma a wani taki ala sma musu abi berow” (2 Petrus 3:9). Gado e si ibri libisma leki wan sma di kan abi berow. A „wani taki ala sortu sma musu kisi frulusu èn kon kisi wan soifri sabi fu waarheid” (1 Timoteyus 2:4). Iya, Yehovah e prisiri te „wan ogri sma e gowe libi a pasi fu en èn e tan na libi trutru”!​—Esekièl 33:11.

² Wi e si sma soleki fa Yehovah e si den? Wi abi a srefi fasi fu denki neleki Yehovah di e si ibri  sma fu ibri ras nanga kondre leki sma di kan tron „skapu fu en weigron”? (Psalm 100:3; Tori fu den Apostel 10:34, 35) Meki wi luku tu eksempre di e sori o prenspari a de fu abi a srefi fasi fu denki neleki Gado. Na ini ala tu eksempre, Yehovah ben o tyari wan pori kon èn A ben meki den futuboi fu en sabi disi na fesi. Den eksempre disi de tumusi prenspari, aladi wi e wakti a bigi dei fu Yehovah.

Abraham ben e si sma soleki fa Yehovah ben e si den

3. Fa Yehovah ben e si den sma fu Sodom nanga Gomora?

³ A fosi eksempre abi fu du nanga a getrow famiri edeman Abraham nanga den ogri foto Sodom nanga Gomora. Di Yehovah yere „a kragi krei fu Sodom nanga Gomora”, dan a no pori den foto dati nanga den sma wantewante. A ben ondrosuku sani fosi (Genesis 18:20, 21). A seni tu engel go na Sodom, pe den ben tan na a oso fu a regtfardiki man Lot. Na a neti di den engel doro, „den man fu a foto . . . lontu na oso, yongu boi te go miti owru man, a heri pipel ini wán grupu makandra” fu di den ben wani abi seks demakandra nanga den engel. A ben de krin fu si taki a lagi fasi fa den sma fu a foto dati ben e tyari densrefi, ben sori taki den ben frudini fu kisi pori. Ma toku, den engel taigi Lot: „Yu abi ete wan sma dyaso? A masra fu yu umapikin, nanga yu manpikin, nanga yu umapikin, nanga ala sma fu yu di de na ini a foto, tyari den komoto fu a presi disi!” Yehovah ben gi sonwan fu den sma na ini a foto na okasi fu kisi kibri, ma te fu kaba, soso Lot nanga den tu umapikin fu en ben tan na libi.​—Genesis 19:4, 5, 12, 16, 23-26.

4, 5. Fu san ede Abraham ben opo taki gi den sma fu Sodom? Abraham ben e si sma soleki fa Yehovah e si den?

⁴ Meki wi go baka now na a ten di Yehovah ben taki dati a ben o ondrosuku den foto Sodom nanga Gomora. Na a ten dati Abraham opo taki: „Kon meki wi taki dati feifitenti regtfardiki sma de na ini a mindri fu a foto. Dan yu sa wai den puru èn no sa gi a presi pardon fu den feifitenti regtfardiki sma ede di de na en ini? Mi no denki taki yu o handri na a fasi disi, fu kiri a regtfardiki man nanga na ogriwan, so taki a srefi sani musu pasa nanga a regtfardiki man neleki fa a e pasa nanga na ogriwan! Mi no denki taki yu o du so wan sani. A Krutuman fu heri grontapu no sa du san reti?” Tu leisi Abraham gebroiki den wortu ’mi no denki taki yu’. Fu den sani di a ben ondrofeni, Abraham ben sabi taki noiti Yehovah ben o pori regtfardiki sma makandra nanga ogri sma. Di Yehovah taki dati a no ben o pori  Sodom efu „feifitenti regtfardikiwan de na ini a mindri fu a foto”, dan Abraham ben e saka a nomru fu feifitenti sma teleki a ben kon de tin sma nomo.​—Genesis 18:22-33.

⁵ Efu Abraham ben aksi Yehovah wan sani di no ben de akruderi a fasi fa En e si sani, dan yu denki taki Yehovah ben o arki en? A no de fu taki dati Yehovah no ben o arki en kwetikweti. Ma leki „Yehovah mati”, Abraham ben sabi fa Yehovah ben e si sani èn Abraham ben abi a srefi fasi fu denki leki en (Yakobus 2:23). Di Yehovah ben poti prakseri na Sodom nanga Gomora, dan a ben de klariklari fu arki san Abraham ben abi fu taki. Fu san ede? Fu di wi hemel Tata „no wani taki wan sma e kisi pori, ma a wani taki ala sma musu kisi berow”.

Yona ben e si sma na wan heri tra fasi

6. San den sma fu Ninifei du di den yere a boskopu fu Yona?

⁶ Luku a di fu tu eksempre, a di fu Yona. A foto di ben o kisi pori disi leisi ben de Ninifei. Yehovah ben taigi a profeiti Yona taki a ben musu meki bekènti taki na ogridu fu a foto dati ben ’opo kon na fesi Yehovah’ (Yona 1:2). Ninifei, makandra nanga den presi lontu en, ben de so wan bigi foto taki yu ben abi fu „waka dri dei fu doro na a tra sei fu a foto”. Di Yona gi yesi na Yehovah te fu kaba, a go na a foto èn a ben tan meki bekènti: „Ete fotenti dei, èn Ninifei sa drai tapu.” Baka dati, „den man fu Ninifei ben bigin poti bribi na ini Gado, èn den ben meki bekènti fu hori wan faste èn den ben weri saka leki krosi”. Srefi a kownu fu Ninifei ben sori berow.​—Yona 3:1-6.

7. Fa Yehovah ben e si den sma fu Ninifei di ben sori berow?

⁷ Den sma fu Ninifei ben de heri tra fasi leki den sma fu Sodom! Fa Yehovah ben e si den sma fu Ninifei di ben abi berow? Yona 3:10 e taki: „A tru Gado ben firi sari fu a rampu di a ben taki dati a ben o tyari kon na den tapu; èn a no ben tyari a rampu kon.” Yehovah „ben firi sari” na a fasi disi taki a ben kenki prakseri fu san a ben o du nanga den sma fu Ninifei, fu di den sma disi ben kenki den fasi fu den. Yehovah no ben kenki den markitiki fu en, ma a ben kenki a bosroiti fu en di a si taki den sma fu Ninifei ben sori berow.​—Maleaki 3:6.

8. Fu san ede Yona ben atibron?

⁸ Di Yona kon frustan taki Ninifei no ben o kisi pori, dan a ben e si sani soleki fa Yehovah ben e si sani? Nôno, bika wi e leisi: „Ma disi no ben plisi Yona srefisrefi, èn a ben kisi bigi atibron.” San Yona ben du moro fara? A tori e taki: „A ben begi Yehovah èn a taki: ’Ke Yehovah, a no disi mi ben wani, di mi ben de na tapu mi eigi gron ete? Dati meki mi ben gowe èn lowe go na Tarsis; bika mi ben sabi taki yu na wan Gado di abi bunfasi èn sari-ati fasi, di no e atibron esi-esi èn di abi lobi bun-ati fasi pasa marki, èn di e firi sari fu a rampu’” (Yona 4:1, 2). Yona ben sabi fa Yehovah de. Ma na a momenti dati, a profeiti ben atibron èn a no ben abi a srefi fasi fu denki leki Yehovah di ben e si a berow fu den sma fu Ninifei.

9, 10. (a) San Yehovah ben leri Yona? (b) Fu san ede wi kan taki dati te fu kaba Yona ben kon si den sma fu Ninifei soleki fa Yehovah ben e si den?

 ⁹ Yona komoto na Ninifei, a meki wan pikin kampu, èn a go sidon teki pikin kowru na ini „teleki a ben o si san ben pasa nanga a foto”. Yehovah meki wan batra-krabasibon gro, so taki Yona ben kan kisi pikin kowru na en ondro. Ma a tra dei a bon kon flaw. Di Yona atibron fu a sani disi, dan Yehovah taigi en: „Yu, fu yu sei, ben firi sari gi a batra-krabasibon . . . Èn, fu mi sei, mi no ben musu firi sari gi Ninifei, a bigi foto, pe moro leki wan hondro tutenti dusun sma de di no sabi kwetikweti a difrenti na mindri a reti-anu nanga a kruktu-anu fu den, èn srefi gi den furu osometi di de drape?” (Yona 4:5-11). Fu tru, Yona ben leri wan moi sani fu a fasi fa Yehovah e si libisma!

¹⁰ Bijbel no e taki san Yona piki di Gado taigi en taki a e firi sari gi den sma fu Ninifei. Ma toku, a de krin fu si taki a profeiti kenki a fasi fa a ben e si den sma fu Ninifei di ben abi berow. Wi de seiker fu disi, bika Yehovah gebroiki Yona fu skrifi a pisi tori disi na ini Bijbel.

Fa yu e si sma?

11. Fa Abraham ben o si den sma di e libi na ini a ten disi?

¹¹ Na ini a ten disi, wan tra pori de fu kon, namku a di fu a disiten ogri sistema di sa kisi pori na a bigi dei fu Yehovah (Lukas 17:26-30; Galasiasma 1:4; 2 Petrus 3:10). Fa Abraham ben o si den sma di e libi na ini a grontapu disi di o kisi pori heri esi? A no de fu taki dati a ben o broko en ede nanga den sma di no yere a „bun nyunsu fu a kownukondre” ete (Mateyus 24:14). Ibri tron baka Abraham ben begi Gado gi den regtfardikisma di ben sa kan de na ini Sodom. Efu son sma ben sa kisi na okasi fu sori berow èn fu dini Gado, dan den ben sa drai baka gi a fasi fu libi fu a grontapu disi di de na ondro a makti fu Satan. Wi e broko wi ede trutru nanga den sortu sma disi?​—1 Yohanes 5:19; Openbaring 18:2-4.

12. Fu san ede a makriki fu kisi a srefi denki leki Yona te wi e miti sma na ini a preikiwroko? San wi kan du fu no meki disi pasa?

¹² A de wan bun sani fu winsi taki wan kaba sa kon na ogridu (Habakuk 1:2, 3). Ma a makriki fu kisi a srefi denki leki Yona, fu di wi no e broko wi ede nanga a libi fu sma di ben sa kan sori berow. A sani disi kan pasa spesrutu te wi e miti sma di no wani arki wi, noso sma di e atibron na wi tapu. Son sma wani du wi ogri srefi te wi e tyari a Kownukondre boskopu gi den. A sani disi kan meki taki wi no o broko wi ede moro nanga den wan di Yehovah wani puru ete na ini na ogri  sistema disi (Romesma 2:4). Efu wi ondrosuku wisrefi èn wi kon si taki wi e denki pikinso nomo leki fa Yona ben denki fosi fu den sma fu Ninifei, dan wi kan aksi Yehovah na ini begi fu yepi wi fu si sani neleki En.

13. Fu san ede wi kan taki dati Yehovah e broko en ede nanga sma na ini a ten disi?

¹³ Yehovah e broko en ede nanga den wan di no e dini en ete, èn a e arki den begi fu en pipel di gi densrefi abra na en (Mateyus 10:11). Fu eksempre, „a sa meki den kisi reti” fu di a arki den begi fu den (Lukas 18:7, 8). Boiti dati, Yehovah sa meki ala den pramisi nanga prakseri fu en kon tru na a ten di a poti (Habakuk 2:3). Sobun, disi wani taki dati a sa puru ala ogri na grontapu, neleki fa a ben pori Ninifei bakaten di den sma fu a foto dati bigin du ogri baka.​—Nahum 3:5-7.

14. San wi musu du, aladi wi e wakti a bigi dei fu Yehovah?

¹⁴ Wi sa tan wakti nanga pasensi èn tan du a wani fu Yehovah fayafaya teleki na ogri sistema disi kisi pori na a bigi dei fu Yehovah? Wi no sabi finifini o furu a preikiwroko musu du ete fosi a dei fu Yehovah doro, ma wan sani di wi sabi na taki fosi a kaba kon, a bun nyunsu fu a Kownukondre sa preiki gi sma na heri grontapu teleki Gado srefi taki dati a sari. Èn a no de fu taki dati wi musu broko wi ede nanga den „warti sani” di musu tyari kon na ini na oso fu Yehovah ete, aladi a e tan furu en oso nanga glori.​—Hagai 2:7.

A fasi fa wi e si sma de fu si na den sani di wi e du

15. San kan meki wi kisi moro warderi gi a preikiwroko?

¹⁵ Kande wi e libi na wan kontren pe wan tu sma nomo e arki te wi e preiki èn wi no abi na okasi fu froisi go na wan tra presi pe den abi moro Kownukondre preikiman fanowdu. Kon meki wi taki dati na a presi pe wi e tan, tin sma de fu feni ete fosi a kaba kon. Wi feni taki den tin sma disi warti nofo fu go suku den? Yesus ben „firi sari” gi den sma „bika den ben kisi kwinsi èn den ben e waka bruyabruya leki skapu sondro skapuman” (Mateyus 9:36). Wi kan frustan den problema fu a grontapu disi moro bun te wi e studeri Bijbel èn te wi e leisi den artikel na ini A Waktitoren nanga Ontwaakt! finifini. Disi sa meki taki wi o kon frustan moro bun o prenspari a de fu preiki a bun nyunsu. Boiti dati, te wi e gebroiki den Bijbel publikâsi di wi e kisi fu „a getrow èn koni srafu”, dan disi kan yepi wi fu taki nanga moro overtoigi te wi de na ini birti pe wi e preiki furu tron.​—Mateyus 24:45-47; 2 Timoteyus 3:14-17.

16. Fa wi kan kisi moro bun bakapisi na ini a preikiwroko fu wi?

¹⁶ Fu di wi e broko wi ede nanga sma di ben kan gi yesi ete na a Bijbel boskopu di e gi libi, meki wi e du muiti fu go na den ososma na difrenti ten èn wi e suku difrenti fasi tu fu preiki gi den. Wi e si taki furu sma no de na oso te wi e go na den? Efu disi de so, dan wi kan pruberi fu preiki na difrenti ten èn na difrenti presi, so taki wi kan abi moro bun bakapisi na ini a preikiwroko fu wi. Fisiman e go fisi te den man kisi fisi. Wi kan du a srefi tu nanga wi fisiwroko na yeye fasi? (Markus 1:16-18) Fu san ede yu no e pruberi fu preiki na mofoneti noso nanga telefon, efu lanti e gi primisi fu du disi? Son sma kon si taki den presi pe taksi noso bus e wakti, den presi pe sma e lai oli, èn wenkri sosrefi, na bun ’fisi olo’. Wan tra fasi fa wi kan sori taki wi e si sma soleki fa Abraham ben e si den, na te wi e suku fu preiki gi den na ibri okasi.

17. Na sortu fasi wi kan gi deki-ati na zendeling nanga trawan di e dini na ini tra kondre?

¹⁷ Milyunmilyun sma no yere a Kownukondre boskopu ete. Boiti taki wi e preiki gi sma, dan na sortu tra fasi wi kan sori taki wi e broko wi ede nanga sma, srefi te wi de na oso? We, wi sabi wan tu zendeling noso furuten dinari di e dini na ini wan tra kondre? Efu disi de so, dan a de wan moi sani efu wi kan skrifi brifi gi den fu sori taki wi e warderi a wroko di den e du. Fa dati e sori taki wi e broko wi ede nanga sma? Te wi e skrifi brifi gi den zendeling fu gi den deki-ati èn fu prèise den, dan disi sa gi den a krakti fu tan du a wroko fu den, èn na so wan fasi wi sa yepi fu  meki moro sma kon sabi waarheid (Krutuman 11:40). Wi kan begi gi den zendeling èn sosrefi gi sma na tra kondre di e angri fu kon sabi waarheid (Efeisesma 6:18-20). Wan tra fasi fa wi kan sori taki wi e broko wi ede nanga tra sma na fu gi moni fu horibaka gi a wroko di Yehovah Kotoigi e du na heri grontapu.​—2 Korentesma 8:13, 14; 9:6, 7.

Yu ben sa man froisi?

18. San son Kresten du fu man prati a Kownukondre boskopu moro bun na ini a kondre pe den e tan?

¹⁸ Den wan di froisi fu go yepi na presi pe moro Kownukondre preikiman ben de fanowdu, ben kisi blesi fu a muiti di den du. Tra Kotoigi tan na ini a kondre fu den, ma den leri wan tra tongo so taki den ben kan yepi den sma drape di e taki wan tra tongo. Den kisi wini trutru fu di den du disi. Fu eksempre, seibi Kotoigi di ben e yepi wan tu Sneisi na ini a foto Texas na Amerkankondre, ben man gi 114 sma wan switikon na a Memrefesa na ini 2001. Den wan di e yepi den sortu grupu disi kon si taki a kotiwroko bigi srefisrefi.​—Mateyus 9:37, 38.

19. San na wan bun sani fu du te yu e denki fu froisi go na wan tra kondre fu yepi nanga a Kownukondre preikiwroko drape?

¹⁹ Kande yu nanga yu osofamiri si taki unu man froisi go na wan presi pe moro Kownukondre preikiman de fanowdu. A no de fu taki dati a bun fu „go sidon fosi fu teri den kostu” (Lukas 14:28). Disi de fanowdu spesrutu te wan sma e prakseri fu froisi go na wan tra kondre. Iniwan sma di e denki fu du disi, kan aksi ensrefi: ’Mi o man sorgu na osofamiri fu mi? Lanti o gi mi primisi fu tan na ini a kondre dati? Mi e taki a tongo fu a kondre dati kaba, noso mi de klariklari fu leri a tongo dati? Mi o man teki a kowru noso a waran fu a kondre? Mi o man nanga a kulturu fu den sma? A de so taki trutru mi o de wan „bigi yepi” gi den tra bribiman drape, noso mi o de leki wan hebi gi den? (Kolosesma 4:10, 11). Te yu wani sabi efu sma de fanowdu na ini a kondre pe yu e denki fu go, dan ala ten a fiti fu skrifi wan brifi go na a bijkantoro fu Yehovah Kotoigi di e luku a preikiwroko na a kontren dati. *

20. Fa wan yongu Kresten ben seti sani so taki a ben kan de wan yepi gi tra bribiman nanga tra sma na ini wan tra kondre?

²⁰ Wan Kresten di ben yepi fu bow Kownukondre zaal na ini Yapan, ben yere taki wrokoman di abi ondrofeni ben de fanowdu na ini Paragwei pe den ben e bow wan presi fu anbegi. A no ben trow, a ben yongu èn a ben tranga, sobun a bosroiti fu go yepi na Paragwei. Aiti mun langa a ben de a wan-enkri furuten wrokoman di ben e yepi fu bow a zaal drape. Na ini a pisi ten di a ben e tan drape, a leri Spanyorotongo èn a ben e studeri Bijbel nanga sma. A ben si taki Kownukondre preikiman ben de fanowdu na ini Paragwei. A brada disi go baka na Yapan, ma syatu baka dati a drai go baka na Paragwei èn a yepi sma fu kon na a srefi Kownukondre zaal di a ben yepi fu bow.

21. San musu de a moro prenspari sani gi wi èn fa wi musu si sma, aladi wi e wakti a bigi dei fu Yehovah?

²¹ Gado sa sorgu taki a preikiwroko e du dorodoro, soleki fa a wani. Na ini a ten disi, a e meki a lasti yeye kotiwroko go moro esi (Yesaya 60:22). Fu dati ede, meki wi teki prati fayafaya na a kotiwroko disi èn meki wi si sma soleki fa wi lobi-ati Gado e si den, aladi wi e wakti a dei fu Yehovah.

[Futuwortu]

Yu e memre disi ete?

• Fa wi musu si sma, aladi wi e wakti a dei fu Yehovah?

• Fa Abraham ben e si den regtfardikisma di ben sa kan libi na ini Sodom?

• Fa Yona ben e si den sma fu Ninifei di ben sori berow?

• Fa wi kan sori taki wi abi a srefi denki di Yehovah abi fu sma di no yere a bun nyunsu ete?

[Aksi fu a tori disi]

[Prenki na tapu bladzijde 16]

Abraham ben e si sma soleki fa Yehovah e si den

[Prenki na tapu bladzijde 17]

Yona ben kon abi a srefi fasi fu denki leki Yehovah di ben e si a berow fu den sma fu Ninifei

[Prenki na tapu bladzijde 18]

Fu di wi e broko wi ede nanga sma, meki wi e du muiti fu preiki a bun nyunsu na difrenti ten èn na difrenti fasi