„Kon krosibei na Gado, èn a sa kon krosibei na unu”

Fosi nanga now​—A feni a krakti di ben yepi en fu kenki en libi

SANDRA, na wan uma na ini Meksikow. A e taki dati a famiri fu en ben e si en leki wan sma di no warti noti, fu di a no ben du san den ben fruwakti fu en. Den yongu yari fu en no ben switi srefisrefi fu di en famiri ben handri na wan ogri-ati fasi nanga en, èn den no ben sori lobi gi en. A e taki: „Di mi ben e gro kon bigi, dan ala ten mi ben abi a firi taki mi ben e misi wan sani, mi ben aksi misrefi fu san ede mi ben de na libi, èn mi ben broko mi ede nanga a libi.”

Di Sandra ben de na middelbaar skoro, dan a bigin dringi win di en papa ben abi na oso. Baka wan pisi ten, a bigin bai en eigi sopi èn a bigin teki en leki wan gwenti fu dringi tumusi furu sopi. „Mi no ben wani tan na libi moro”, na so a e taki. Fu di Sandra ben lasi-ati trutru meki a bigin gebroiki drugs. Sandra e taki: „A wan-enkri sani di ben yepi mi fu frigiti den problema fu mi, na den sani di mi ben abi na ini mi tas, namku wan batra nanga sopi, drugs, nanga pikinso marwana.”

Baka di Sandra klari datra-skoro, a bigin dringi tumusi furu sopi. A ben wani kiri ensrefi. Ma a no dede.

Sandra go na difrenti kerki fu feni yepi nanga trowstu, ma nowan fu den kerki ben yepi en. Fu di a ben lasi-ati, meki a ben bari kari Gado ibri tron baka, èn a ben taki: „Pe yu de? Fu san ede yu no e yepi mi?” Di a ben kon firi brokosaka srefisrefi, dan wan Kotoigi fu Yehovah taki nanga en. Disi meki taki a bigin studeri Bijbel. Di Sandra kon leri taki „Yehovah de krosibei fu den wan di den ati broko”, dan a sani dati naki en ati trutru.​—Psalm 34:18.

A sma di ben e studeri Bijbel nanga Sandra, yepi en fu kon frustan taki Yehovah Gado sabi taki wi swaki fu di wi kisi sondu fu Adam. Sandra kon si taki Gado sabi taki wi no man doro den regtfardiki markitiki fu en ala ten (Psalm 51:5; Romesma 3:23; 5:12, 18). A ben prisiri di a kon sabi taki Yehovah no e tan poti prakseri na den swakifasi fu wi, èn taki a no e aksi moro fu wi leki san wi man du. A psalm skrifiman ben aksi: „Efu na fowtu yu ben musu luku, o Yah, o Yehovah, dan suma ben kan tan tanapu?”​—Psalm 130:3.

Wan prenspari tru tori fu Bijbel di ben meki Sandra firi bun trutru, na a frulusu-ofrandi fu Yesus Krestes. Nanga yepi fu a frulusu-ofrandi disi, Yehovah e gi libisma di e gi yesi na en na okasi fu kon bun baka nanga en, aladi den no de volmaakti (1 Yohanes 2:2; 4:9, 10). Iya, wi kan ’kisi pardon fu den sondu fu wi’ èn disi sa yepi wi fu no abi a firi taki wi no warti noti.​—Efeisesma 1:7.

Sandra leri wan tu prenspari sani fu na eksempre di na apostel Paulus ben gi. Paulus ben warderi en trutru taki Gado ben sori switifasi gi en fu di a ben gi en pardon fu den fowtu di a ben meki èn fu di A ben e yepi en fu tan feti teige den swakifasi fu en (Romesma 7:15-25; 1 Korentesma 15:9, 10). Paulus ben tyari kenki kon na ini a fasi fa a ben e libi, fu di a ben ’fon en skin èn a tyari en leki wan srafu’, so taki a ben man tan na tapu a pasi di Gado feni bun  (1 Korentesma 9:27). A no ben tron wan srafu fu den sondu firi fu en.

Aladi a ben muilek gi Sandra, toku a ben tan feti teige den swakifasi fu en. A begi Yehovah fayafaya fu yepi en fu wini den swakifasi disi, èn fu sori sari-ati gi en (Psalm 55:22; Yakobus 4:8). Fu di Sandra ben firi taki Gado ben poti prakseri na en, meki a ben man kenki a fasi fa a ben libi. A e taki: „Mi e prisiri fu leri trawan den sani fu Bijbel na ini a furuten diniwroko.” Sandra ben kisi prisiri fu a grani di a ben abi fu yepi en pikin sisa nanga en bigi sisa fu kon sabi Yehovah. Aladi a e „du bun”, èn a de klariklari sosrefi fu gi trawan datra yepi na den kongres fu Yehovah Kotoigi.​—Galasiasma 6:10.

Fa a de nanga den sani di Sandra ben gwenti fu gebroiki? A e taki nanga overtoigi: „Mi kan denki krin baka. Mi no e dringi sopi moro, mi no e smoko moro, èn mi no e gebroiki drugs moro. Mi no abi den sani disi fanowdu. Mi feni san mi ben suku.”

[Prenspari pisi na tapu bladzijde 9]

„Mi feni san mi ben suku”

[Faki na tapu bladzijde 9]

Bijbel gronprakseri di e yepi sma

Disi na wan tu Bijbel gronprakseri di yepi furu sma fu tapu nanga takru gwenti:

„Meki wi krin wisrefi fu ibri doti fu a skin èn fu a yeye, èn meki wi suku fu kon santa dorodoro, fu di wi abi frede gi Gado” (2 Korentesma 7:1). Gado e blesi den wan di krin densrefi fu ibri doti sani, èn di no e du sani di no krin.

„A frede gi Yehovah wani taki fu no lobi ogri kwetikweti” (Odo 8:13). Te wan sma abi lespeki gi Gado, dan dati e yepi en fu tapu nanga takru gwenti, èn a e yepi en tu fu no gebroiki drugs moro. Boiti taki a sma di kenki en libi e du san Yehovah wani fu en, a sma dati no sa kisi takru siki.

„Den musu saka densrefi na ondro gran lanti èn na ondro den sma di abi makti èn taki den musu gi yesi na den tiriman disi” (Titus 3:1). Na furu presi a de so taki wan sma e pasa a wet te a abi drugs, noso te a e gebroiki drugs. Tru Kresten no abi drugs, èn den no e gebroiki drugs di a wet e krutu.