Yu e ’sori taki yu e tan wakti’?

„Un musu tyari unsrefi na wan santa fasi èn sori taki unu e dini Gado na wan getrow fasi; un musu fruwakti a denoya fu a dei fu Yehovah èn hori a dei dati bun na prakseri.”​—2 PETRUS 3:11, 12.

1, 2. Fa wi kan agersi ’a wakti di wi e wakti’ a dei fu Yehovah?

PRAKSERI wan osofamiri di e fruwakti wan tu fisitiman di o kon nyan nanga den. A ten di den ben meki mofo e doro esi-esi. A wefi e du wan tu lasti sani ete fu sreka a nyanyan. A masra fu en nanga den pikin fu den e sorgu taki ala tra sani seti bun. Den alamala e prisiri. Iya, a gersi leki na osofamiri no man wakti srefi fu den tra sma kon. Den e prakseri fu a switi nyanyan di den o nyan èn sosrefi fu a prisiri demakandra di den sa abi nanga den trawan.

² Leki Kresten, wi alamala e wakti wan moro prenspari sani. San na dati? We, wi alamala e wakti „a dei fu Yehovah”! Solanga a dei dati no doro ete, dan wi musu de leki a profeiti Mika di taki: „Mi sa tan fruwakti Yehovah. Mi sa sori taki mi e tan wakti a Gado fu mi frulusu” (Mika 7:7). Ma dati wani taki dati wi musu sidon wakti en nomo? Nôno. Furu wroko de fu du.

3. Sortu fasi fu denki Kresten musu abi soleki fa 2 Petrus 3:11, 12 e taki?

³ Na apostel Petrus e yepi wi fu abi a yoisti fasi fu denki aladi wi e wakti. A e taki: „Un musu tyari unsrefi na wan santa fasi èn sori taki unu e dini Gado na wan getrow fasi; un musu fruwakti a denoya fu a dei fu Yehovah èn hori a dei dati bun na prakseri” (2 Petrus 3:11, 12). Luku taki, di Petrus ben taki a sani disi, dan a no ben e tweifri sortu sma wi musu de. Na ini den tu brifi di Petrus ben skrifi nanga yepi fu santa yeye, a ben fruteri sortu sma Kresten musu de. A ben gi den deki-ati sosrefi fu tan ’tyari densrefi na wan santa fasi èn fu sori taki den e dini Gado na wan getrow fasi’. Aladi sowan 30 yari ben pasa sensi Yesus ben taki fu a marki „fu a kaba fu a grontapu sistema disi”, toku den Kresten ben musu tan na ai (Mateyus 24:3). Den ben musu „fruwakti a denoya fu a dei fu Yehovah èn hori a dei dati bun na prakseri”.

4. San a wani taki fu ’hori a dei fu Yehovah bun na prakseri’?

⁴ Fu taki en leti, a Griki wortu di vertaal dyaso nanga ’hori bun na prakseri’ wani taki „moro esi”. A no de fu taki dati wi no man meki a dei fu Yehovah kon ’moro esi’. A de so tu taki wi no „sabi a dei nanga a yuru” te Yesus Krestes sa kon fu krutu den feanti fu en Tata (Mateyus 24:36; 25:13). Wan wortubuku e sori taki a rutu fu a wortu „moro esi” wani taki dyaso „’fu meki esi’ èn furu tron dati wani taki ’fu de fayafaya, noso fu broko-ede nanga wan sani’”. Sobun, Petrus ben gi tra bribiman a deki-ati fu  fruwakti a dei fu Yehovah fayafaya. Den ben o man du disi te den ben o tan hori a dei disi bun na prakseri (2 Petrus 3:12). Wi musu abi a srefi fasi fu denki, fu di „a bigi èn frede dei fu Yehovah” de krosibei now.​—Yoèl 2:31.

Wakti aladi unu e „tyari unsrefi na wan santa fasi”

5. Fa wi kan sori taki wi e angri fu si „a dei fu Yehovah”?

⁵ Efu wi e angri fu pasa a dei fu Yehovah, dan disi sa de fu si te wi e meki muiti ’fu tyari wisrefi na wan santa fasi èn fu sori taki wi e dini Gado na wan getrow fasi’. Den wortu „tyari unsrefi na wan santa fasi” kan memre wi na a rai fu Petrus: „Neleki pikin di e gi yesi, na so unu no musu du den lostu moro di unu ben abi fosi di unu no ben sabi moro betre. Ma neleki fa a Sma di kari unu de santa, na so unu srefi musu kon santa tu ini a heri fasi fa unu e tyari unsrefi, bika buku taki: ’Un musu de santa, bika mi santa.’”​—1 Petrus 1:14-16.

6. San wi musu du efu wi wani de santa?

⁶ Efu wi wani de santa, dan wi musu hori wi skin nanga wi frustan krin. Boiti dati, wi musu de krin tu na ini a fasi fa wi e tyari wisrefi èn sosrefi na ini na anbegi fu wi. Wi e sreka wisrefi gi „a dei fu Yehovah” fu di wi e tan santa leki sma di e tyari a nen fu Yehovah? A no makriki fu tan santa na ini a grontapu disi, fu di moro nanga moro sma e tyari densrefi na wan fasi di no fiti srefisrefi (1 Korentesma 7:31; 2 Timoteyus 3:13). Wi e si wan bigi difrenti na mindri a fasi fa wi e tyari wisrefi èn a fasi fa sma na grontapu e tyari densrefi? Efu wi no e si disi, dan wi musu broko wi ede nanga dati trutru. A no de fu taki dati den bun gwenti nanga gronprakseri di wi abi, hei moro den di fu grontapu. Ma a de so taki safrisafri den bun gwenti nanga gronprakseri disi e lasi gowe? Efu disi de so, dan wi musu du wan sani nownow fu tyari kenki kon so taki wi kan plisi Gado.

7, 8. (a) San kan meki wi frigiti taki a de tumusi prenspari fu ’tyari wisrefi na wan santa fasi’? (b) Sortu kenki wi sa abi fu tyari kon?

⁷ Na ini a ten disi, furu doti seks tori de fu feni tapu Internet èn sma kan luku den sani disi sondro taki trawan sabi dati. Dati meki son sma di noiti no ben kisi okasi fu luku den sani disi, kan go tapu Internet now fu luku „ala sortu seks tori di de fu feni pasa marki”, na so wan datra e taki. Efu wi ben o suku den sortu doti seks tori disi tapu Internet, dan a no de fu taki dati wi no ben o gi yesi na a komando fu Bijbel fu „no fasi nowan sani di no krin” (Yesaya 52:11). Wi ben o „hori a denoya fu a dei fu Yehovah bun na prakseri” trutru na so wan fasi? Noso a de so taki wi e pori wi frustan nanga doti seks tori now fu di wi e denki taki a dei dati no o kon ete èn taki wi abi nofo ten ete fu krin wisrefi? Efu wi si taki wi abi wan problema nanga den sani disi, dan a de tumusi prenspari taki wi e aksi Yehovah fu ’tapu wi ai, so taki den no e si sani di no warti èn fu hori wi na libi na tapu en eigi pasi’!​—Psalm 119:37.

⁸ A moro bigi pisi fu den Kotoigi fu Yehovah, yonguwan nanga owruwan, e tan hori densrefi na den hei markitiki fu Gado èn den e wai pasi gi den sani fu grontapu di e kori sma fu du sani di no fiti. Den e tan ’tyari densrefi na wan santa fasi’, fu di den sabi o prenspari a ten fu wi de. Den sabi tu o prenspari a warskow fu Petrus de, taki „a dei fu Yehovah sa kon leki wan fufuruman” (2 Petrus 3:10). Den sani di den e du, e sori taki den e ’fruwakti a denoya fu a dei fu Yehovah èn taki den e hori a dei dati bun na prakseri’. *

 Wakti aladi unu e „sori taki unu e dini Gado na wan getrow fasi”

9. San a lobi nanga lespeki di wi abi gi Gado musu meki wi du?

⁹ Fu man hori a dei fu Yehovah bun na prakseri, dan a de prenspari tu fu ’sori taki wi e dini Gado na wan getrow fasi’. Te ’wi e dini Gado na wan getrow fasi’, dan na so fasi wi e sori taki wi abi bigi lespeki gi Gado. Fu di wi abi lespeki gi en, meki wi wani du san e plisi en. A moro prenspari sani fu san ede wi e du sani na wan getrow fasi gi Yehovah, na fu di wi de loyaal na En. A de a wani fu Yehovah taki „ala sortu sma musu kisi frulusu èn kon kisi wan soifri sabi fu waarheid” (1 Timoteyus 2:4). Gado „no wani taki wan sma e kisi pori, ma a wani taki ala sma musu abi berow” (2 Petrus 3:9). Sobun, a lobi nanga lespeki di wi abi gi Gado musu meki wi du moro muiti fu yepi sma kon leri sabi Yehovah èn fu kon de leki en, a no so?​—Efeisesma 5:1.

10. Fu san ede wi musu luku bun nanga „a bedrigi fasi fu gudu”?

¹⁰ Wi sa du furu sani na ini wi libi di e sori taki wi e dini Gado na wan getrow fasi, efu wi e suku a Kownukondre fu Gado fosi (Mateyus 6:33). Disi wani taki dati wi musu si gudu na wan yoisti fasi. Yesus ben warskow: „Luku bun èn kibri unsrefi gi ibri sortu bigi-ai, bika srefi te wan sma abi sani pasa marki, a libi fu en no e kon fu den sani di a abi” (Lukas 12:15). Aladi a kan taki wi no e si wisrefi leki wan sma di e feti fu kisi moni, toku a bun fu hori na prakseri taki „den broko-ede fu a grontapu disi nanga a bedrigi fasi fu gudu” kan „kiri a wortu” fu Gado (Mateyus 13:22). Kande son sma no man feni wan wroko di e pai nofo moni. Dati meki na ini son kondre fu grontapu, furu sma e prakseri taki efu den wani abi wan moro bun libi, dan den abi fu go na wan moro gudu kondre, aladi den e libi na osofamiri fu den na baka, kande wan tu yari langa srefi. Srefi sonwan fu a pipel fu Gado ben abi a denki disi tu. Kande den kan bai nyunmodo sani gi na osofamiri fu den efu den e go wroko na wan tra kondre. Ma san kan pasa nanga a yeyefasi fu den lobiwan fu den di den libi na baka? Efu na edeman fu na osofamiri no de fu tiri den na wan yoisti fasi, dan yu denki taki a yeyefasi fu na osofamiri sa tranga nofo fu man pasa a dei fu Yehovah?

11. Fa wan man di ben go wroko na wan tra kondre ben sori taki a de moro prenspari fu du sani di e sori taki wi e dini Gado na wan getrow fasi leki fu suku gudu nomo?

¹¹ Wan man fu den Filipijnen ben go wroko na Yapan èn drape a leri Bijbel waarheid fu Yehovah Kotoigi. Di a leri na ini Bijbel sortu frantwortu na edeman fu na osofamiri abi, dan a kon frustan taki a ben musu yepi en osofamiri fu kon tron anbegiman fu Yehovah (1 Korentesma 11:3). A wefi fu en di ben de na den Filipijnen, no ben lobi a nyun bribi fu en srefisrefi èn a ben wani taki a man ben musu tan wroko na Yapan so taki a ben kan seni moni gi den. A wefi no ben wani taki a man drai kon na oso fu leri en osofamiri den sani di a kon sabi fu Bijbel. Ma fu di a man disi ben kon frustan taki wi e libi na ini wan tumusi prenspari ten èn fu di a ben e broko en ede nanga den lobiwan fu en, meki a drai go baka na oso. Fu di a ben abi pasensi èn fu di a ben e handri na wan lobi-ati fasi nanga en osofamiri, meki a kisi bun bakapisi. Baka wan pisi ten, en heri osofamiri teki a tru anbegi, èn a wefi fu en go na ini a furuten diniwroko.

12. Fu san ede wi musu poti yeye afersi na a fosi presi na ini wi libi?

 ¹² Yu kan agersi a situwâsi fu wi nanga sma di de na ini wan oso di e bron. Yu denki taki a ben o de wan koni sani fu lonlon na ini na oso fu teki wan tu sani ete, aladi na oso e bron èn aladi a de fu broko kon na gron? Na presi fu dati a de moro prenspari fu kibri yu eigi libi, yu osofamiri, nanga den tra sma di de na ini na oso, a no so? We, na ogri sistema disi sa broko kon na gron heri esi, èn furu sma kan lasi den libi. Fu di wi e frustan disi, dan a no de fu taki dati wi musu poti yeye afersi na a fosi presi na ini wi libi. Boiti dati, wi musu poti ala wi prakseri tu fu du a Kownukondre preikiwroko fayafaya, fu di dati sa kibri a libi fu sma.​—1 Timoteyus 4:16.

Wi musu de „sondro flaka”

13. Sortu sma wi musu de te a dei fu Yehovah doro?

¹³ Petrus ben sori taki a de tumusi prenspari fu sori taki wi e tan wakti. A ben taki: ’Un lobiwan, fu di unu e fruwakti den sani disi, dan un musu du ala muiti, so taki te fu kaba a sa feni unu sondro flaka èn sondro fowtu èn na ini vrede’ (2 Petrus 3:14). Na ini a tekst disi, Petrus e gi wi deki-ati fu tyari wisrefi na wan santa fasi èn fu du sani di e sori taki wi e dini Gado na wan getrow fasi. Ma boiti dati, a e sori wi tu taki a de tumusi prenspari taki te fu kaba Yehovah e feni wi bun leki sma di kon krin nanga yepi fu a tumusi warti brudu fu Yesus (Openbaring 7:9, 14). Disi wani taki dati wan sma musu sori taki a e bribi na ini a srakti-ofrandi fu Yesus èn a musu tron wan futuboi fu Yehovah di gi ensrefi abra na En èn di teki dopu.

14. San a wani taki fu de „sondro flaka”?

¹⁴ Petrus e gi wi a deki-ati fu du ala muiti so taki Gado feni wi „sondro flaka”. Wi kan agersi a fasi fa wi e tyari wisrefi èn a fasi fa wi de, nanga wan krosi di wi leki Kresten e weri. Wi e sorgu taki den agersi Kresten krosi fu wi e tan sondro flaka? Wi e luku bun taki grontapu no e doti den? Te wi e si wan flaka tapu wi krosi, dan wantewante wi e meki muiti fu puru a flaka disi. Efu wan krosi di wi lobi kisi flaka, dan wi o pruberi fu krin en nanga koni so taki noti no pasa nanga a krosi dati. Wi e meki a srefi muiti tu te den agersi Kresten krosi fu wi e kisi flaka, kande fu di wi abi wan takru maniri noso fu di wi e tyari wisrefi na wan fasi di no fiti?

15. (a) Fu san ede den Israelsma ben musu meki franya na a lanki fu den krosi fu den? (b) Fu san ede den disiten futuboi fu Yehovah de heri tra fasi leki sma fu grontapu?

¹⁵ Den Israelsma ben musu meki ’franya na a lanki fu den krosi fu den’ èn den ben musu ’poti wan blaw titei na tapusei fu den franya fu den krosi fu den’. Fu san ede? We, so taki den ben o memre den komando fu Yehovah, so taki den ben o gi yesi na den komando, èn so taki den ben o „sori taki den santa” na fesi a Gado fu den (Numeri 15:38-40). Leki disiten futuboi fu Yehovah, wi de heri tra fasi leki den sma fu grontapu fu di wi e hori wisrefi na den wet nanga gronprakseri fu Gado. Fu eksempre, wi e tyari wisrefi na wan fasi di fiti, wi e lespeki a santafasi fu brudu, èn wi e wai pasi gi iniwan sortu afkodrei (Tori fu den Apostel 15:28, 29). Furu sma e lespeki wi fu a fasti bosroiti di wi teki fu hori wisrefi sondro flaka.​—Yakobus 1:27.

Wi musu de „sondro fowtu”

16. San a wani taki fu tan „sondro fowtu”?

¹⁶ Petrus e taki tu dati Yehovah musu feni wi „sondro fowtu”. Fa dati kan? Nofo tron yu kan figi noso wasi wan flaka puru, ma yu no kan du  disi nanga wan fowtu. Te wan sani abi wan fowtu, dan dati e sori taki wan sani na inisei no bun. Na apostel Paulus ben gi den Kresten na ini Filipi a rai disi: „Tan du ala sani sondro fu krutukrutu èn sondro fu haritaki, so taki unu kan de sma di de sondro fowtu èn di no e du ogri, leki pikin fu Gado di krin na mindri den takru nanga kruktu sma fu a ten disi. Na den mindri unu de leki sma di e skèin leti na ini grontapu” (Filipisma 2:14, 15). Efu wi e teki a rai disi, dan wi no sa krutukrutu noso haritaki, ma wi sa dini Gado nanga a yoisti denki. Lobi gi Yehovah èn gi tra sma sa meki taki wi e preiki „a bun nyunsu disi fu a kownukondre” (Mateyus 22:35-40; 24:14). Boiti dati, wi sa tan meki a bun nyunsu bekènti awinsi furu sma no man frustan fu san ede wi wani gebroiki wi fri ten fu pruberi fu yepi tra sma fu leri sabi Gado nanga en Wortu, Bijbel.

17. San musu de a marki fu wi te wi e suku fu kisi grani na ini a Kresten gemeente?

¹⁷ Fu di wi wani taki Gado feni wi sondro fowtu, meki a de wan bun sani fu go ondrosuku fu san ede wi e du son sani. Wi no e denki leki sma na grontapu moro di e du sani soso fu kisi wini gi densrefi nomo. Sobun, wi no e feti fu kisi furu gudu noso makti. Efu wi e suku fu kisi grani na ini a Kresten gemeente, dan meki wi tan du disi nanga a yoisti denki èn meki wi du dati ala ten fu di wi lobi Yehovah nanga trawan. A de wan moi sani fu si fa mansma di tranga na yeye fasi „e suku fu kisi wan wroko leki opziener”. Den e du disi nanga prisiri èn nanga sakafasi, fu di den abi a winsi fu dini Yehovah nanga den Kresten brada nanga sisa fu den (1 Timoteyus 3:1; 2 Korentesma 1:24). Iya, den wan di man dini leki owruman e ’luku den skapu fu Gado . . . nanga prisiri; no fu di den lobi fu kisi moni na wan kruka fasi, ma nanga den heri ati; den no musu prei basi gi den wan di Gado gi den leki wan gudu, ma den musu tron eksempre gi den wan di de leki skapu’.​—1 Petrus 5:1-4.

Wi musu de „na ini vrede”

18. Fa sma sabi Yehovah Kotoigi?

¹⁸ Te fu kaba, Petrus e taigi wi taki Gado musu feni wi „na ini vrede”. Fu man du disi, dan wi musu de na ini vrede nanga Yehovah èn nanga tra sma. Petrus e sori taki a de tumusi prenspari fu abi „tranga lobi gi makandra” èn fu tan na ini vrede nanga den Kresten brada nanga sisa fu wi (1 Petrus 2:17; 3:10, 11; 4:8; 2 Petrus 1:5-7). Fu man tan na ini vrede, dan wi musu lobi makandra (Yohanes 13:34, 35; Efeisesma 4:1, 2). A lobi nanga a vrede di wi abi, de krin fu si na den internationaal kongres di wi e hori. Na wan kongres di ben hori na Kosta Rika na ini 1999, den Kotoigi fu Kosta Rika ben go na a presi pe opolani e saka, fu gi den Kotoigi di ben kon fu tra kondre wan switikon. Sondro fu  sabi, den ben e tanapu leti na fesi wan man di ben e seri sani. A man disi ben e atibron, bika a ben feni taki sma no ben man si taki a e seri sani fu di den Kotoigi ben e tanapu na fesi a presi pe a ben e seri sani. Ma a di fu tu dei, a man disi ben si a lobi, a vrede, nanga a prisiri fu den Kotoigi fu Kosta Rika di den ben gi den Kotoigi fu tra kondre wan switikon, aladi den no ben sabi den tra Kotoigi srefi. Na a lasti dei, a man disi srefi gi den Kotoigi fu den tra kondre wan switikon èn a aksi efu den ben wani studeri Bijbel nanga en.

19. Fu san ede a de prenspari fu suku vrede nanga tra bribiman?

¹⁹ A muiti di wi e meki fu abi vrede nanga den Kresten brada nanga sisa fu wi, kan sori efu trutru wi e fruwakti a dei fu Yehovah nanga a nyun grontapu di a pramisi wi (Psalm 37:11; 2 Petrus 3:13). Kon meki wi taki dati wi e feni en muilek fu tan na ini vrede nanga wan tra bribiman. Wi kan si wisrefi makandra nanga en na ini vrede na ini Paradijs? Efu wan brada abi wan sani teige wi, dan wantewante wi musu go ’meki vrede nanga en’ (Mateyus 5:23, 24). A de tumusi prenspari fu du disi efu wi wani de na ini vrede nanga Yehovah.​—Psalm 35:27; 1 Yohanes 4:20.

20. Na sortu fasi wi musu ’sori taki wi e tan wakti’?

²⁰ A de so trutru taki wi ’e fruwakti a denoya fu a dei fu Yehovah èn e hori a dei dati bun na prakseri’? Te wi e tan santa na ini a pori grontapu disi, dan na so fasi wi e sori taki wi e angri fu si a kaba fu ogridu. Boiti dati, te wi e du sani di e sori taki wi de getrow na Gado dorodoro, dan wi e sori taki wi wani dati a dei fu Yehovah kon èn taki wi wani libi na ondro a tiri fu a Kownukondre fu en. Èn efu wi e suku fu de na ini vrede nanga den tra anbegiman nownow kaba, dan wi e sori taki wi wani libi na ini wan nyun grontapu pe vrede sa de. Na so wan fasi wi ’e sori taki wi e tan wakti’ èn taki wi ’e hori a denoya fu a dei fu Yehovah bun na prakseri’.

[Futuwortu]

Yu e memre disi ete?

• San a wani taki fu hori ’a dei fu Yehovah bun na prakseri’?

• Fa a musu de fu si na a fasi fa wi e tyari wisrefi taki wi „e tan wakti”?

• Fu san ede a de prenspari fu ’sori taki wi e dini Gado na wan getrow fasi’?

• San wi musu du efu wi wani taki Yehovah feni wi ’sondro flaka èn sondro fowtu èn na ini vrede’?

[Aksi fu a tori disi]

[Prenki na tapu bladzijde 11]

Te wi e tyari wisrefi na wan santa fasi, dan wi ’e sori taki wi e tan wakti’

[Prenki na tapu bladzijde 12]

A Kownukondre preikiwroko e kibri a libi fu sma

[Prenki na tapu bladzijde 14]

Meki wi suku fu de na ini vrede nanga trawan aladi wi e wakti a dei fu Yehovah