„Unu kisi fu soso, sobun gi fu soso”

„UNU kisi fu soso, sobun gi fu soso” (Mateyus 10:8). Yesus ben gi den apostel fu en a komando disi di a seni den fu go preiki a bun nyunsu. Den apostel ben gi yesi na a komando disi? Iya, èn den tan du disi, srefi baka di Yesus no ben de na grontapu moro.

Fu eksempre, Simon di ben de wan towfruman fosi, ben si taki den apostel Petrus nanga Yohanes ben abi a makti fu du wondru. Simon ben wani pai den apostel fu meki den gi en a makti dati tu. Ma Petrus ben piri-ai gi Simon èn a ben taki: „Meki yu solfru pori gowe nanga yu, bika yu ben denki fu kisi a fri presenti fu Gado nanga yepi fu moni.”​—Tori fu den Apostel 8:18-20.

Na apostel Paulus ben si sani na a srefi fasi leki fa Petrus ben e si sani. Paulus ben kan meki ensrefi de leki wan hebi gi den Kresten brada nanga sisa fu en na ini Korente, fu di den ben musu sorgu en. Ma Paulus ben e wroko nanga en eigi anu fu man sorgu ensrefi (Tori fu den Apostel 18:1-3). Fu dati ede a ben man taki nanga overtoigi dati a preiki a bun nyunsu gi den sma fu Korente „sondro fu teki wan sani”.​—1 Korentesma 4:12; 9:18.

A de wan sari sani taki furu sma di e taki dati den na bakaman fu Krestes, no e sori taki den wani „gi fu soso”. Fu tru, furu kerki fesiman na ini Krestenhèit e ’gi leri nomo fu kisi pai’ (Mika 3:11). Son kerki fesiman kon gudu srefi fu a moni di den kerkisma e gi. Na ini 1989, wan domri na ini Amerkankondre ben musu koti strafu 45 yari langa. Fu san ede? A ben „bedrigi kerkisma fu kisi milyunmilyun dala fu den èn a ben gebroiki a moni dati tu fu bai oso nanga oto, noso fu go nanga fakansi èn srefi fu bai dagu pen di kan gi den dagu kowru winti te den e waran”.​—People’s Daily Graphic, 7 oktober 1989.

Na ini Gana, wan koranti di nen Ghanaian Times fu 31 maart 1990 ben taki dati wan Lomsu priester ben teki moni di den sma fu a kerki ben gi, èn a ben trowe a moni dati baka gi den sma aladi kerki ben e hori ete. A koranti e taki dati „a ben trowe a moni baka gi den sma fu di a fruwakti taki, leki bigisma, den ben musu gi moro bigi moni”. A no de fu fruwondru taki furu kerki e pruberi srefi fu meki kerkisma kisi gridifasi fu di den e gi den sma deki-ati fu go dòbel èn fu du tra kruka sani so taki den kerki kan kisi moro moni.

Kontrari fu dati, Yehovah Kotoigi e meki muiti fu teki na eksempre fu Yesus nanga den disipel fu en fu a fosi yarihondro. Den sma di e teki fesi na ini a gemeente no e kisi pai fu den sani di den e du. Ibri Kotoigi na wan dinari di kisi a frantwortu fu preiki ’a bun nyunsu fu a kownukondre’ gi tra sma (Mateyus 24:14). Fu dati ede, moro leki siksi milyun Kotoigi na heri grontapu e tyari „a watra fu libi” gi sma fu soso (Openbaring 22:17). Na a fasi disi, srefi den wan „di no abi moni” kan kisi wini fu a boskopu fu Bijbel (Yesaya 55:1). Aladi a wroko fu den e du na heri grontapu nanga yepi fu moni di sma e gi, toku den no e begi moni noiti. Leki tru dinari fu Gado, den no de „seriman fu a wortu fu Gado”,  ma den e taki ’na wan opregti fasi, iya, leki sma di Gado seni’.​—2 Korentesma 2:17.

Ma fu san ede Yehovah Kotoigi de klariklari fu yepi trawan sondro fu aksi moni gi dati? San e meki taki den e du disi? A de so taki a gi di den e gi fu soso wani taki dati den no e kisi nowan pai fu a muiti di den e meki?

Wan piki tapu na aksi fu Satan

Na fosi presi, tru Kresten na ini a ten disi e yepi trawan fu di den wani plisi Yehovah. Den no e du dati fu di den wani kon gudu. Na so wan fasi den man gi piki tapu na aksi di Satan Didibri ben poti hondrohondro yari pasa. Satan ben poti wan aksi gi Yehovah di ben abi fu du nanga a regtfardiki man Yob. A ben taki: „Na fu soso Yob sori taki a e frede Gado?” Satan ben feni taki Yob ben e dini Gado soso fu di Gado ben e kibri Yob. Satan ben taki dati efu Yob no ben o abi den gudu fu en moro, dan a ben o fluku Gado leti na ini en fesi!​—Yob 1:7-11.

Gado ben gi Satan pasi fu tesi Yob fu di dati ben o gi wan piki tapu na aksi fu Satan. Gado taigi Satan: „Ala san a abi de na ini yu anu” (Yob 1:12). San ben de a bakapisi? Yob sori taki Satan na wan leiman. Awansi sortu tesi ben miti Yob, a ben tan getrow. A ben taki: „Teleki mi lasti bro, mi no sa libi mi soifri retifasi!”​—Yob 27:5, 6.

Tru anbegiman na ini a ten disi e tyari densrefi na a srefi fasi leki Yob. Den no e du diniwroko gi Gado fu kon gudu.

Wi kisi a bun-ati fu Gado leki wan presenti

Wan tra sani fu san ede tru Kresten wani „gi fu soso”, na fu di densrefi „kisi fu soso” fu Gado. A libisma famiri de na ini katibo fu sondu nanga dede fu di den kisi sondu fu den fosi papa Adam (Romesma 5:12). Na wan lobi-ati fasi Yehovah seti sani, so taki en Manpikin ben gi en libi leki wan srakti-ofrandi. Disi ben de wan sani di no ben makriki gi Gado kwetikweti. A libisma famiri no frudini disi kwetikweti. Nôno, a de wan presenti fu Gado.​—Romesma 4:4; 5:8; 6:23.

Fu dati ede Paulus ben taigi den salfu Kresten san skrifi na ini Romesma 3:23, 24: „Alamala sondu èn no e doro a glori fu Gado. A de wan presenti di Gado gi den fu soso, taki a sori den bun-ati èn dati a fruklari taki den de regtfardiki nanga yepi fu a lusu-paiman di Yesus Krestes ben pai fu meki den kon fri.” Sosrefi den wan di abi a howpu fu libi fu têgo na grontapu e kisi „wan presenti di Gado gi den fu soso”. A presenti disi wani taki tu dati den kisi a grani fu de regtfardiki ini Yehovah ai leki mati fu En.​—Yakobus 2:23; Openbaring 7:14.

Boiti dati, a frulusu-ofrandi fu Krestes e meki taki ala Kresten man dini leki dinari fu Gado. Na apostel Paulus ben skrifi: „Mi tron wan dinari fu a [santa kibritori] disi, fu di Gado sori mi en bun-ati di a gi mi leki wan fri presenti” (Efeisesma 3:4-7). Tru dinari fu Gado kisi a komando fu du a diniwroko disi nanga yepi fu wan presenti di den no frudini. Fu dati ede den no kan fruwakti fu kisi moni te den e fruteri trawan fu a presenti disi.

 Wan sma e prakseri ensrefi nomo te a e howpu fu kisi têgo libi?

Disi wani taki dati Gado e fruwakti fu Kresten taki den dini en sondro fu abi a howpu fu kisi wan sani? Nôno. Fu dati ede na apostel Paulus ben taigi den brada nanga sisa fu en: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en” (Hebrewsma 6:10). Yehovah no de wan onregtfardiki Gado (Deuteronomium 32:4). Kontrari fu dati, dan Yehovah na „a sma di e pai den wan di e suku en seryusu” (Hebrewsma 11:6). Ma a no de so taki a pramisi fu kisi têgo libi na ini Paradijs e meki sma prakseri densrefi nomo?​—Lukas 23:43.

Kwetikweti. Wan reide, na taki a prakseri fu libi fu têgo na ini a Paradijs na grontapu e kon fu Gado srefi. Na ensrefi ben gi a fosi libisma trowpaar a howpu disi (Genesis 1:28; 2:15-17). Di Adam nanga Efa lasi a howpu disi gi den bakapikin fu den, dan Gado seti sani sosrefi so taki sma ben kan abi a howpu disi baka. Fu dati ede a Wortu fu Gado e pramisi taki „den sani srefi di Gado meki sa kon fri tu fu a katibo fu porifasi èn den sa fri trutru leki pikin fu Gado” (Romesma 8:21). Fu dati ede a fiti taki Kresten na ini a ten disi ’e poti ala den prakseri na a pai di den sa kisi’, neleki fa Moses fu owruten ben du dati (Hebrewsma 11:26). Gado no e gi wi a pai disi leki wan tyuku. A e du disi fu di a lobi den futuboi fu en trutru (2 Tesalonikasma 2:16, 17). Wi fu wi sei „lobi trawan, bika Gado fosi lobi wi”.​—1 Yohanes 4:19.

Dini Gado nanga a yoisti prakseri

Ma toku, Kresten na ini a ten disi musu ondrosuku densrefi ala ten baka fu si fu san ede den e dini Gado. Na ini Yohanes 6:10-13, wi e leisi taki na wan wondru fasi Yesus ben gi nyanyan na wan bigi ipi fu moro leki feifi dusun sma. Leki bakapisi fu dati, son sma ben bigin waka baka Yesus soso fu kisi wini gi densrefi. Yesus ben taigi den: „Unu e suku mi . . . fu di unu ben nyan a brede èn unu ben nyan te un bere furu” (Yohanes 6:26). Sowan 30 yari baka dati, wan tu Kresten di gi densrefi abra ben du diniwroko gi Gado tu, ma ’den no ben du dati nanga wan krin ati’ (Filipisma 1:17). Sonwan fu den sma di ’no ben agri nanga den gosontu wortu fu Yesus Krestes’ ben e suku fasi fa den ben kan kisi wini gi densrefi aladi den ben abi demakandra nanga den Kresten.​—1 Timoteyus 6:3-5.

Sosrefi na ini a ten disi, wan Kresten di e dini Gado soso fu di a wani libi fu têgo na ini a Paradijs, ben kan du dati fu kisi wini gi ensrefi nomo. Te fu kaba, a bakapisi kan de taki a sma disi sa fadon na yeye fasi. Fu di a gersi leki a seti fu Satan e tan moro langa leki san a ben fruwakti, dan a kan „kon weri” fu di a e denki taki a kaba no e kon ete (Galasiasma 6:9). Kande a e hati so wan sma srefi taki a gebroiki en moni noso tra sani na ini a diniwroko gi Gado. Yesus e memre wi: „Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan” (Mateyus 22:37). Iya, te wan sma e dini Gado fu di a lobi en, dan a no e du dati fu wan pisi ten nomo. A sma disi abi a fasti bosroiti fu dini Yehovah fu têgo! (Mika 4:5) A no e sari fu iniwan muiti di a meki noso fu a moni di a gebroiki na ini a diniwroko gi Gado (Hebrewsma 13:15, 16). Lobi gi Gado e meki taki a e poti den sani di abi fu du nanga Gado, tapu a fosi presi na ini en libi.​—Mateyus 6:33.

Tide na dei, moro leki siksi milyun tru anbegiman „de klariklari fu gi densrefi” na ini a diniwroko fu Yehovah (Psalm 110:3). Yu na wan fu den sma disi? Efu dati no de so, dan denki dipi fu den sani di Gado e gi wi, namku: soifri sabi fu waarheid (Yohanes 17:3); a e meki wi kon fri fu den falsi kerki leri di e hori sma na ini katibo (Yohanes 8:32); a e gi wi a howpu fu libi fu têgo (Openbaring 21:3, 4). Yehovah Kotoigi kan yepi yu fu kon sabi fa yu kan kisi ala den sani disi fu Gado, sondro fu pai gi dati.

[Prenspari pisi na tapu bladzijde 22]

Na a fosi presi, tru Kresten na ini a ten disi e yepi trawan fu di den wani plisi Yehovah. Den no e du dati fu di den wani kon gudu.

[Prenki na tapu bladzijde 21]

Gado gi Kresten a fri presenti fu a lusu-paiman èn fu dati ede den e prati a bun nyunsu nanga trawan sondro fu aksi moni gi dati