Yehovah, a Gado fu waarheid

„Yu frulusu mi, o Yehovah, a Gado fu waarheid.”​—PSALM 31:5.

1. Fa a situwâsi ben de na hemel èn na grontapu di lei no ben de?

WAN ten ben de di nowan lei ben de. Na ini hemel, volmaakti yeye ben e libi di ben e dini a Mekiman fu den, „a Gado fu waarheid” (Psalm 31:5). Nowan lei èn nowan bedrigifasi ben de. Yehovah ben e fruteri den yeye manpikin fu en tru tori. A ben du disi fu di a ben lobi den èn fu di a ben wani trutru taki ala sani waka bun nanga den. A srefi sortu situwâsi ben de na grontapu. Yehovah ben meki a fosi man nanga uma, èn a ben abi en eigi fasi fu taki nanga den. Den sani di a ben e fruteri ben de krin fu frustan, èn den ben de tru tori ala ten. Dati ben musu fu de wan moi sani!

2. Suma na a fosi sma di bigin lei, èn fu san ede a du disi?

² Ma baka wan pisi ten, wan yeye manpikin fu Gado ben abi a drei-ai fu poti ensrefi leki wan gado èn fu tron wan feanti fu Yehovah. A yeye disi, di ben kon kisi a nen Satan Didibri, ben wani taki trawan ben musu anbegi en. Fu man doro a marki disi, dan a bigin lei fu meki trawan kon na ondro en makti. Na so a tron „wan leiman èn a tata fu lei”.​—Yohanes 8:44.

3. San Adam nanga Efa du di den yere den lei fu Satan, èn san ben de a bakapisi?

³ Satan ben gebroiki wan sneki fu taigi a fosi uma, Efa, taki efu a ben o trangayesi a komando fu Gado èn efu a ben o nyan fu a froktu di a no ben mag nyan, dan a no ben o dede. Dati ben de wan lei. Boiti dati, Satan taigi Efa taki a ben o tron leki Gado èn a ben o sabi san bun èn san ogri. Dati ben de wan tra lei. Aladi Efa noiti no ben yere wan lei ete, toku a ben musu fu frustan taki san a yere fu a sneki no ben de san Gado ben taigi en masra, Adam. Toku a bosroiti fu bribi Satan na presi fu Yehovah. A sneki kori Efa krinkrin, èn leki bakapisi fu dati a teki a froktu èn a nyan. Bakaten, Adam nyan fu a froktu tu (Genesis 3:1-6). Neleki Efa, Adam noiti no ben yere wan lei bifo, ma toku a no de so taki Satan bedrigi en (1 Timoteyus 2:14). A fasi fa Adam ben e handri e sori taki a no ben wani gi yesi na en Mekiman. Den bakapisi di ala libisma ondrofeni ben ogri srefisrefi. Fu di Adam ben trangayesi Gado, meki ala bakapikin fu en kisi fu du nanga sondu èn nanga dede, èn krukafasi nanga pina kon lai na grontapu.​—Romesma 5:12.

4. (a) Sortu lei Satan ben taki na ini Eden? (b) San wi musu du efu wi no wani taki Satan kori wi?

⁴ Satan panya den lei fu en na heri grontapu. Wi musu frustan taki den lei di Satan ben taki na ini a dyari fu Eden ben meki Yehovah gersi wan bigi leiman. Satan ben taki dati Gado ben bedrigi a fosi trowpaar, fu di a ben e hori wan bun sani na baka gi den. A no de fu taki dati disi no ben de so. Adam nanga Efa no kisi wini kwetikweti di den trangayesi Gado. Den dede trutru, soleki fa Yehovah ben taki na fesi. Toku Satan tan go doro fu fruteri ogri-ati lei fu Yehovah. Srefi hondrohondro yari baka dati, na apostel Yohanes ben skrifi nanga yepi fu santa yeye taki Satan „e kori ala sma na heri grontapu” (Openbaring 12:9). Efu wi no wani taki Satan kori wi nanga den lei fu en, dan wi musu abi a frutrow dati ala ten Yehovah e taki sani di tru èn dati den tru tori disi de fu feni na ini a Wortu fu en. Fa yu kan kisi frutrow na ini Yehovah èn fa yu kan tranga a frutrow disi? Fa yu kan tranga yusrefi fu kakafutu gi den triki nanga den lei fu a Feanti fu en?

 Yehovah sabi a waarheid

5, 6. (a) Sortu sabi Yehovah abi? (b) San wi kan taki fu a sabi fu libisma te wi e teki dati gersi nanga a sabi fu Yehovah?

⁵ Ibri tron baka, Bijbel e sori wi taki Yehovah na a sma di „meki ala sani” (Efeisesma 3:9). En na „a Sma di meki hemel nanga grontapu nanga se nanga ala den sani di de na ini” (Tori fu den Apostel 4:24). Yehovah sabi fa ala sani de trutru, fu di en na a Mekiman. Fu eksempre: Prakseri wan man di e teken èn e bow en eigi oso. Ensrefi e poti ibri pisi udu nanga ibri spikri na a oso. A o sabi ibri pisi fu na oso dati heri bun èn moro leki iniwan tra sma a o sabi fa na oso dati meki. Libisma sabi fa wan sani meki te densrefi meki a sani dati. Na so a Mekiman sabi ala sani finifini tu fu den sani di a meki.

⁶ Na wan moi fasi a profeiti Yesaya ben fruteri o furu sabi Yehovah abi. Wi e leisi: „Suma marki den watra na ini en mindri-anu nomo èn marki a bigi fu hemel srefi nanga na anu nomo èn poti a doti fu gron na ini wan marki, noso wegi den bergi nanga wan marki, èn den pikin bergi na ini a wegi? Suma marki a yeye fu Yehovah, èn suma kan meki a kon sabi wan sani leki a raiman fu en? Na suma a ben go fu aksi rai so taki den ben sa meki en frustan, noso suma e leri en a pasi fu retidu, noso suma e leri en sabi, noso e meki en kon sabi srefi a pasi fu trutru frustan?” (Yesaya 40:12-14) Fu tru, Yehovah na „a Gado fu sabi” èn a de „volmaakti ini sabi” (1 Samuel 2:3; Yob 36:4; 37:16). A sabi fu wi na noti te yu e teki en gersi nanga a di fu Yehovah! Awinsi o furu sabi libisma abi, toku a sabi di wi abi fu den sani di Yehovah meki, no e doro „den lanki fu den pasi fu [Gado]”. A de neleki yu e teki „wan syusyu” gersi nanga „makti dondru”.​—Yob 26:14.

7. San David ben frustan fu a sabi fu Yehovah, èn san wi musu frustan fu dati ede?

⁷ Fu di Yehovah meki wi, meki a no de fu taki dati a sabi wi heri bun. Kownu David ben sabi disi. A ben skrifi: „O Yehovah, yu ondrosuku mi finifini, èn yu sabi mi. Yusrefi kon sabi te mi e sidon èn te mi e opo. Yu si san mi e prakseri fu farawe kaba. Yu e marki a pasi di mi  e waka èn yu e marki a presi pe mi e didon langalanga, èn yu kon sabi ala den pasi fu mi srefi. Bika nowan wortu de na tapu mi tongo, èn luku! O Yehovah, yu sabi ala sani kaba” (Psalm 139:1-4). A de krin fu si taki David ben frustan taki Gado gi libisma wan fri wani. Disi wani taki dati wi kan teki a bosroiti fu gi yesi na Gado, noso fu trangayesi Gado (Deuteronomium 30:19, 20; Yosua 24:15). Ma toku a de so taki Yehovah sabi wi moro bun leki wi sabi wisrefi. A wani taki ala sani e go bun nanga wi, èn a man sori wi soifri sortu pasi wi musu waka (Yeremia 10:23). Iya, nowan leriman, nowan koniman, èn nowan raiman moro bun fu leri wi a waarheid, so taki wi kan kisi koni èn kan de koloku.

Yehovah no e lei

8. Fa wi du sabi taki Yehovah no e lei?

⁸ Na wán sani fu sabi san de tru, ma na wan heri tra sani fu taki san de tru. Didibri, fu eksempre, bosroiti fu no „tan na ini a waarheid” (Yohanes 8:44). Tra fasi leki dati, Yehovah abi „waarheid pasa marki” (Exodus 34:6). Ibri tron baka den Buku fu Bijbel e sori taki Yehovah no e lei. Na apostel Paulus ben taki dati „Gado no man lei” (Hebrewsma 6:18; Titus 1:2). Wan prenspari fasi fu Gado na taki a e taki tru tori ala ten. Wi kan frutrow tapu Yehovah bika a no e lei; noiti a no e bedrigi den getrow futuboi fu en.

9. Fa a nen fu Yehovah e sori taki a no e lei?

⁹ A heri nen fu Yehovah e sori kaba taki a no e lei. A nen fu Gado wani taki „A e meki kon tron”. Disi e sori taki Yehovah na a Sma di safrisafri e du ala san a e pramisi. Nowan tra sma man du dati. Fu di Yehovah na a Moro Heiwan, meki noti no kan tapu en fu du san a wani. A no de so nomo taki Yehovah no e lei, ma na en wawan abi a makti nanga a koni tu fu du ala san a pramisi.

10. (a) Fa Yosua ben si taki Yehovah no e lei kwetikweti? (b) Sortuwan fu den pramisi fu Yehovah yu si taki den kon tru?

¹⁰ Yosua ben de wan fu den furu sma di ben si den kefalek bigi wondru di e sori taki Yehovah no e lei kwetikweti. Yosua ben de na ini Egepte di Yehovah taki na fesi dati a ben o tyari tin plaag kon tapu den sma fu a kondre dati, èn a ben du disi trutru. Yosua ben ondrofeni a kontru fu tra sani tu di Yehovah ben pramisi. Na so a ben si fa Yehovah frulusu den Israelsma fu Egepte èn fa a tyari den go na a Pramisi Kondre, aladi A meki den wini den makti legre fu den Kanansma di ben e gens den. Na a kaba fu en libi, Yosua taigi den owruman fu Israel: „Unu sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu. No wán wortu fu den tan sondro fu a kon tru” (Yosua 23:14). A tru taki yu no si den wondru di Yosua ben si, ma a de so taki yu ondrofeni wan sani na ini a ten disi di e sori taki trutru Gado e du san a pramisi?

Yehovah e tyari a waarheid kon na krin

11. San e sori taki Yehovah wani fruteri libisma a waarheid?

¹¹ Prakseri fu wan papa noso mama di abi bun furu sabi, ma wawan leisi nomo a e taki nanga den pikin fu en. Yu no de nanga tangi taki Yehovah no de so wan sma? Na wan lobi-ati fasi Yehovah e taki nanga libisma, èn a e du dati furu tron. Bijbel e kari en a „Gran Leriman” (Yesaya 30:20). Fu di a abi lobi bun-ati gi sma, meki a e suku fu taki srefi nanga den sma di no wani arki en. Fu eksempre, aladi Yehovah ben sabi taki son sma no ben o arki, toku a ben seni Esekièl fu go preiki gi den sma dati. Yehovah taigi en: „Manpikin fu libisma, go na mindri na oso fu Israel, èn yu musu taki nanga den, nanga den wortu fu mi.” Baka dati, a warskow Esekièl: „Den no sa wani arki yu, bika den no wani fu arki mi; bika ala den sma fu na oso fu Israel tranga-ede èn den ati tranga tu.” Esekièl ben kisi wan muilek wroko fu du, ma toku a du en na wan getrow fasi, èn na so a ben e sori a sari-ati fu Yehovah. Efu yu de na wan  presi pe a muilek fu preiki èn efu yu e frutrow tapu Gado, dan yu kan abi a dyaranti taki a sa gi yu krakti fu du a wroko disi neleki fa a ben du nanga en profeiti Esekièl.​—Esekièl 3:4, 7-9.

12, 13. Na sortu fasi Gado taki nanga libisma?

¹² Yehovah wani taki „ala sortu sma . . . kisi frulusu èn kon kisi wan soifri sabi fu waarheid” (1 Timoteyus 2:4). A gebroiki profeiti, engel, èn srefi en lobi Manpikin, Yesus Krestes, fu taki nanga libisma (Hebrewsma 1:1, 2; 2:2). Yesus ben taigi Pilatus: „Na fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid. Ibriwan sma di de na a sei fu a waarheid, e arki mi sten.” Pilatus ben abi wan tumusi moi okasi fu yere fu a mofo fu a Manpikin fu Gado srefi, fa Yehovah ben seti sani so taki libisma kan kisi frulusu. Ma Pilatus no ben de na a sei fu a waarheid, èn a no ben wani teki leri fu Yesus. Na presi fu dati, Pilatus ben spotu Yesus di a taki: „San na waarheid?” (Yohanes 18:37, 38) Dati ben de wan sari sani! Ma toku, furu sma ben arki san Yesus ben taki. A ben taigi den disipel fu en: „Koloku fu den ai fu unu bika den e si, èn den yesi fu unu bika den e yere.”​—Mateyus 13:16.

¹³ Yehovah poti a waarheid na ini Bijbel, èn a sorgu taki sma na ala sei kan leisi en. Bijbel e sori krin fa sani de trutru. A e sori fa Gado de, san a abi na prakseri fu du, san na den komando fu en, èn a e sori sosrefi fa a situwâsi fu libisma de trutru. Yesus ben taigi Yehovah na ini begi: „Yu wortu na waarheid” (Yohanes 17:17). Fu dati ede, Bijbel na wan tumusi aparti buku. Bijbel na a wan-enkri buku di sma skrifi nanga yepi fu a santa yeye fu a Gado di sabi ala sani (2 Timoteyus 3:16). A de wan tumusi warti kado di libisma kisi, èn den futuboi fu Gado e warderi en trutru. A de wan koni sani fu leisi en ibri dei.

Hori faste na a waarheid

14. San na wan tu sani di Yehovah taki dati a sa du, èn fu san ede wi kan bribi en?

¹⁴ Wi musu si den sani di Yehovah e taigi wi na ini en Wortu, leki seryusu sani. Yehovah de trutru suma a e taki dati a de èn a sa du trutru san a e taki dati a o du. Wi abi nofo buweisi fu frutrow Gado. Wi kan bribi Yehovah te a e taki dati a sa „puru atibron tapu den wan di no sabi Gado èn den wan di no e gi yesi na a bun nyunsu fu wi Masra Yesus” (2 Tesalonikasma 1:8). Wi kan bribi Yehovah tu te a e taki dati a lobi den wan di e suku regtfardikifasi, te a e taki dati a sa gi têgo libi na den wan di e sori bribi, èn te a e taki dati a sa puru pen, babari, nanga dede srefi. Yehovah gi wi a dyaranti taki a lasti pramisi disi sa kon tru, fu di a gi na apostel Yohanes a komando disi: „Skrifi, bika den wortu disi de getrow èn tru.”​—Openbaring 21:4, 5; Odo 15:9; Yohanes 3:36.

15. San na wan tu lei di Satan e fruteri?

¹⁵ Satan de heri tra fasi leki Yehovah. Na  presi taki a e meki sma frustan sani moro bun, dan a e bedrigi den. Satan e fruteri wan lo lei, fu kan meki libisma drai baka gi a soifri anbegi. Fu eksempre, Satan wani taki wi bribi dati Gado no wani abi wan krosibei banti nanga wi, èn dati Gado no e broko en ede nanga a pina di libisma e pina na grontapu. Ma Bijbel e sori taki Yehovah e broko en ede trutru nanga den sma di a meki èn a e sari fu si fa ogri nanga pina e miti den (Tori fu den Apostel 17:24-30). Satan wani taki sma e bribi tu dati yeye afersi na soso sani. Kontrari fu dati, den Buku fu Bijbel e sori wi taki „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en”. Boiti dati, Bijbel e sori krin tu taki „a e tron a sma di e pai den wan di e suku en seryusu”.​—Hebrewsma 6:10; 11:6.

16. Fu san ede Kresten musu luku bun ala ten èn tan hori faste na a waarheid?

¹⁶ Disi na san na apostel Paulus skrifi fu Satan: „A gado fu a seti fu sani disi breni a frustan fu sma di no e bribi, so taki a krin leti fu a glori bun nyunsu fu Krestes, di de a prenki fu Gado, no ben sa skèin kon doro” (2 Korentesma 4:4). Neleki fa a ben du nanga Efa, na so Satan bedrigi son sma krinkrin. Trawan e du leki Adam. A no de so taki Satan e bedrigi den, ma densrefi e teki a bosroiti neleki Adam fu trangayesi Gado (Yudas 5, 11). Sobun, Kresten musu luku bun ala ten èn den musu tan hori faste na a waarheid.

Yehovah wani taki wi abi „bribi di de sondro hoigrifasi”

17. San wi musu du efu wi wani taki Yehovah feni wi bun?

¹⁷ Fu di Yehovah noiti no e lei, meki a e fruwakti fu den sma di e anbegi en taki den no e lei tu, èn taki den e taki tru tori ala ten. A psalm skrifiman skrifi: „O Yehovah, suma sa de wan fisitiman na ini yu tenti? Suma sa tan na tapu yu santa bergi? A sma di e waka sondro fowtu èn e du retidu èn di e taki waarheid na ini en ati” (Psalm 15:1, 2). A santa bergi fu Yehovah fu san den Dyu ben e singi na ini a singi disi, ben kan meki den prakseri fu a Sionbergi. Na a bergi dati, Kownu David ben poti na ark fu a frubontu na ini wan tenti di den ben meki drape (2 Samuel 6:12, 17). A bergi nanga a tenti ben e memre den taki disi ben de a presi pe Yehovah ben e tan na wan agersi fasi. Drape a pipel ben kan kon na fesi Gado, so taki den ben kan begi en fu feni den bun.

18. (a) San wi musu du efu wi wani de wan mati fu Gado? (b) Fu san wi sa taki na ini na artikel di e kon?

¹⁸ Iniwan sma di wani de wan mati fu Yehovah musu taki waarheid „na ini en ati”, a no musu taki en nanga en mofo wawan. Trutru mati fu Gado musu abi wan ati di no e bedrigi sma èn den musu sori taki den abi „bribi di de  sondro hoigrifasi”, bika wan sma di e taki tru tori e taki komoto fu en ati (1 Timoteyus 1:5; Mateyus 12:34, 35). Wan mati fu Gado no e kori sma èn a no e bedrigi sma, bika „Yehovah e tegu gi wan man di e . . . bedrigi trawan” (Psalm 5:6). Yehovah Kotoigi na heri grontapu e meki furu muiti fu de sma di no e lei, soleki fa a Gado fu den no e lei. Na artikel di e kon sa taki moro fini fu a tori disi.

San yu ben sa piki?

• Fu san ede Yehovah sabi fa ala sani de trutru?

• San e sori taki Yehovah no e lei?

• Fa Yehovah tyari a waarheid kon na krin?

• San Gado di no e lei e fruwakti fu wi sosrefi?

[Aksi fu a tori disi]

[Prenki na tapu bladzijde 10]

A Gado fu waarheid sabi ala sani finifini fu den sani di a meki

[Prenki na tapu bladzijde 12, 13]

Yehovah sa du san a pramisi