Yu e memre disi ete?

Yu ben prisiri fu leisi den Waktitoren di kon na doro no solanga pasa? We, luku efu yu kan gi wan piki tapu den aksi di e kon now:

• Na sortu fasi Rut gi wan tumusi moi eksempre?

A gi wan tumusi moi eksempre na ini a lobi di a ben abi gi Yehovah èn a tranga lobi di a ben abi gi Naomi. A de wan moi eksempre tu fu wan sma di e wroko tranga èn di abi sakafasi. Fu dati ede, sma ben e si en leki „wan tumusi bun uma” (Rut 3:11).​—15/4, bladzijde 23-26.

• Fa wi du sabi taki Yehovah e broko en ede nanga sma di no e si densrefi so prenspari?

Den sma fu Egepte ben e handri na wan ogri-ati fasi nanga den Israelsma. Gado taigi den Israelsma taki den no musu du ogri nanga mofina sma (Exodus 22:21-24). Yesus, di e waka baka na eksempre fu en Tata, ben poti prakseri trutru na mofina sma, èn den man di a ben teki leki apostel ben de man di ’no ben kisi furu skoro, ma den ben de neleki ala tra sma’ (Tori fu den Apostel 4:13; Mateyus 9:36). Wi kan waka baka na eksempre fu Gado te wi e broko wi ede nanga trawan, soleki yonguwan.​—15/4, bladzijde 28-31.

• Fu san ede wi kan de seiker taki Yehovah e si san wi e du?

Tori na ini Bijbel e sori taki Yehovah e poti prakseri na den sani di libisma e du. A ben poti prakseri na a srakti-ofrandi di Abel ben tyari, èn A e poti prakseri na wi tu te wi e tyari a ’srakti-ofrandi fu prèise, a froktu fu wi mofobuba’ (Hebrewsma 13:15). Yehovah ben sabi taki Heinok ben meki muiti fu plisi en fu di a ben e libi wan krin libi. Gado ben poti prakseri na wan weduwe na ini a foto Sarfat; na uma disi no ben de wan Israelsma. Na uma disi ben abi pikinso nyanyan, ma toku a ben prati san a ben abi nanga a profeiti Elia. Yehovah e poti prakseri sosrefi na den wroko fu wi di abi fu du nanga bribi.​—1/5, bladzijde 28-31.

• Fu san ede den Dyu ben musu gi densrefi abra na Gado di den ben tron Kresten, baka a Pinksterfesa fu 33 G.T.?

Na ini 1513 b.G.T. den Israelsma fu owruten ben kon abi wan banti nanga Yehovah fu di den ben gi densrefi abra na en (Exodus 19:3-8). Sensi a ten dati, den Dyu ben gebore na ini wan nâsi di ben gi ensrefi abra na Gado èn di ben hori ensrefi na a Wetfrubontu. Ma nanga yepi fu a dede fu Krestes na ini 33 G.T., Yehovah puru a Wetfrubontu (Kolosesma 2:14). Baka dati, den Dyu di ben wani dini Gado na wan fasi di a feni bun, ben musu gi densrefi abra na En èn den ben musu teki dopu na ini a nen fu Yesus Krestes.​—15/5, bladzijde 30-31.

• A de fanowdu taki tru anbegiman e bron switismeri na ini a ten disi?

Fu bron switismeri ben de wan pisi fu a tru anbegi na ini Israel fu owruten (Exodus 30:37, 38; Lefitikus 16:12, 13). A Wetfrubontu èn sosrefi a bron di den ben e bron switismeri, ben kon na wan kaba di Krestes ben dede. Kresten kan teki a bosroiti gi densrefi efu den wani bron switismeri gi sani di no abi fu du nanga kerki tori, ma a sani disi no de wan pisi fu a tru anbegi na ini a ten disi. Hori den firi fu trawan sosrefi na prakseri so taki den no fadon komoto na bribi.​—1/6, bladzijde 28-30.

• Sortu nyunsu ben kon na doro no solanga pasa, di e meki taki furu sma e bribi dati Yesus na wan sma di ben de trutru?

Nyunsu ben poti furu prakseri na wan kisi fu karki ston di sma ben feni na ini Israel. A kisi disi de fu a fosi yarihondro èn den wortu di skrifi na tapu na: „Yakobus, manpikin fu Yosef, brada fu Yesus.” Son sma e prakseri taki disi na „a moro owru buweisi, boiti den sani di skrifi na ini Bijbel”, di e sori taki Yesus ben libi trutru.​—15/6, bladzijde 3-4.

• Fa wan libisma e leri fu lobi trawan?

Na a fosi presi, libisma e leri fu lobi trawan te den e teki na eksempre nanga a leri fu den papa nanga mama. Te masra nanga wefi e sori lobi èn lespeki gi makandra, dan den pikin kan leri fa fu lobi trawan (Efeisesma 5:28; Titus 2:4). Srefi efu wan sma gro kon bigi na ini wan osofamiri pe den no ben sori lobi gi makandra, toku a man leri fu lobi trawan te a e teki a tiri fu Yehovah di e tiri wi neleki fa wan papa e tiri en pikin, te a e kisi yepi fu a santa yeye, èn te a e teki a yepi fu Kresten brada nanga sisa di e horibaka gi en na wan lobi-ati fasi.​—1/7, bladzijde 4-7.

• Suma ben de Eusebius, èn san wi kan leri fu a fasi fa a ben e libi?

Eusebius ben de wan fositen historia skrifiman di ben skrifi a buku History of the Christian Church (A historia fu a Kresten kerki). A buku disi abi tin pisi èn a tyari kon na doro na ini 324 G.T. Aladi Eusebius ben e bribi taki a Tata ben de bifo a Manpikin, toku a ben taki wan heri tra sani na a Kerki konmakandra na ini Nicea. Soleki fa a sori, dan a no ben poti prakseri na san Yesus ben taigi den bakaman fu En taki den no musu de „wan pisi fu grontapu” (Yohanes 17:16).​—15/7, bladzijde 29-31.

• Yehovah kenki a fasi fa a e denki fu a trow di wan sma e trow nanga moro leki wán patna?

Nôno, Yehovah no kenki a fasi fa a e denki fu a trow di wan sma e trow nanga moro leki wán patna (Maleaki 3:6). Gado ben seti sani so taki a fosi man ben musu „tai hori na en wefi” èn taki a ben musu tron wán skin nanga en (Genesis 2:24). Yesus ben taki dati wan sma kan broko trow soso te wan fu den patna du hurudu. Te wan sma e broko trow fu wan tra reide ede èn te a e trow baka, dan a sma dati du sutadu (Mateyus 19:4-6, 9). Di a Kresten gemeente ben seti, dan Yehovah no ben gi pasi moro taki den futuboi fu en ben abi moro leki wán trowpatna.​—1/8, bladzijde 28.