Poti ala yu frutrow tapu Yehovah na ini ten fu banawtu

„Gado de wi kibripresi nanga wi krakti, wan yepi di de makriki fu feni na ini ten fu banawtu.”​—PSALM 46:1.

1, 2. (a) Sortu eksempre e sori taki a no sari te wi e taki dati wi e frutrow tapu Gado? (b) Fu san ede wi musu du moro leki fu taki nomo dati wi e frutrow tapu Yehovah?

NA WÁN sani fu taki dati wi e frutrow tapu Gado. Ma a de wan heri tra sani fu sori disi nanga den sani di wi e du. Fu eksempre, langa ten kaba den wortu „Tapu Gado wi e frutrow”, de fu si na tapu a papira moni nanga a pikin-moni fu Amerkankondre. * Na ini 1956, den tiriman fu Amerkankondre ben meki wan wet di e taki dati den sma fu Amerkankondre ben o libi akruderi den wortu disi. Ma a moi fu a tori de, taki furu sma na ini Amerkankondre, èn sma na heri grontapu sosrefi, e frutrow moro tapu moni nanga gudu leki tapu Gado.​—Lukas 12:16-21.

² Leki tru Kresten, wi musu du moro leki fu taki nomo dati wi e frutrow tapu Yehovah. Neleki fa ’bribi sondro wroko na wan dede sani’, na so a no wani taki noti tu, efu wi e taki dati wi e bribi na ini Gado, ma wi no e sori dati nanga den sani di wi e du (Yakobus 2:26). Na ini a fosi artikel wi ben leri taki wi e sori dati wi e frutrow tapu Yehovah te wi e aksi en na ini begi fu yepi wi, te wi e suku rai na ini en Wortu, èn te wi e meki en organisâsi tiri wi. Meki wi luku now fa wi kan du den dri sani disi na ini ten fu banawtu.

 Te wi lasi wroko, noso te wi no e kisi nofo moni

3. Sortu ekonomia problema e miti futuboi fu Yehovah na ini den „muilek ten” disi? Fa wi du sabi taki Gado de klariklari fu yepi wi?

³ Na ini den „muilek ten” disi, wi leki Kresten abi fu du nanga den srefi sortu ekonomia problema di tra sma abi (2 Timoteyus 3:1). Fu dati ede, a kan pasa taki wi e lasi wroko wantronso. Noso kande wi abi fu wroko furu yuru langa soso fu meki wan pikinso moni nomo. Na ini den sortu situwâsi disi, a kan de wan muilek sani fu ’sorgu gi den sma fu wi’ (1 Timoteyus 5:8). A Moro Hei Gado de klariklari fu yepi wi na den sortu ten disi? Seiker! A tru taki Yehovah no sa kibri wi fu ala den problema fu a libi di e miti wi na ini a seti fu sani disi. Ma efu wi e frutrow tapu en, dan wisrefi sa man ondrofeni san skrifi na ini Psalm 46:1: „Gado de wi kibripresi nanga wi krakti, wan yepi di de fu feni makriki na ini ten fu banawtu.” Ma fa wi kan sori taki wi e poti ala wi frutrow tapu Yehovah te wi abi moni problema?

4. Fu sortu sani wi kan begi te wi abi moni problema? Yehovah e arki den sortu begi dati?

⁴ Wan fasi fa wi kan sori taki wi e frutrow tapu Yehovah, na fu taki nanga en na ini begi. Ma fu sortu sani wi kan begi dan? Te wi abi moni problema, dan a kan taki wi abi koni moro tranga fanowdu now fu man sabi san fu du. We, begi fu dati dan! A Wortu fu Yehovah e gi wi a dyaranti: „Efu wan fu unu e mankeri koni, meki a tan aksi Gado, bika a e gi ala sma nanga en heri ati sondro fu suku fowtu na den; Gado sa gi a sma dati koni” (Yakobus 1:5). Iya, aksi Yehovah fu gi yu koni. Te wi abi koni, dan wi man gebroiki sabi nanga frustan na so wan fasi taki wi man si krin san fu du na ini spesrutu situwâsi èn wi sa man teki bun bosroiti tu. Wi lobi-ati Tata e gi wi a dyaranti taki a sa arki den sortu begi dati. A de klariklari fu meki den pasi kon reti fu den sma di e frutrow na en tapu nanga den heri ati.​—Psalm 65:2; Odo 3:5, 6.

5, 6. (a) Fu san ede wi kan suku yepi na ini a Wortu fu Gado te wi e kisi fu du nanga ekonomia problema? (b) San wi kan du fu no abi so furu broko-ede moro te wi lasi wroko?

⁵ Wan tra fasi fa wi kan sori taki wi e frutrow tapu Yehovah na te wi e suku rai na ini a Wortu fu Gado. Den koni rai fu en di de fu feni na ini Bijbel „de fu frutrow krinkrin” (Psalm 93:5). Aladi Bijbel kaba skrifi sowan 1900 yari pasa, toku a buku dati di skrifi ondro a krakti fu santa yeye, abi rai di wi kan frutrow. Boiti dati, den rai disi kan yepi wi fu si san wi kan du fu meki sani waka moro bun te wi abi ekonomia problema. Meki wi luku wan tu koni rai fu Bijbel.

⁶ Langa ten pasa kaba, a koni Kownu Salomo ben kon frustan a sani disi: „A sribi fu a sma di e dini, switi, awansi a e nyan pikinso noso furu; ma den furu sani di a guduwan abi, e meki taki a no e sribi” (Preikiman 5:12). Te wi abi gudu, dan a e teki ten nanga moni fu krin den, fu tan hori den bun, fu kibri den, èn fu meki den te den broko. Sobun, te wi lasi wroko, dan wi kan teki na okasi dati fu luku a fasi fa wi e libi. Te wi e du disi, dan wi musu luku san wi abi fanowdu trutru èn san no de so prenspari. A kan de wan koni sani fu tyari kenki kon, so taki wi no abi tumusi furu broko-ede moro. Fu eksempre, wi kan seti wi libi na so wan fasi taki wi no sa abi so furu frantwortu moro? Kande wi kan froisi go na wan moro pikin oso noso kande wi kan sorgu taki wi no abi so furu sani moro.​—Mateyus 6:22.

7, 8. (a) Fa Yesus ben sori taki a ben sabi dati sondu libisma gwenti fu broko den ede nanga gudu? (Luku a futuwortu sosrefi.) (b) Sortu koni rai di Yesus ben gi sa yepi wi fu no broko wi ede fu soso?

⁷ Na ini en Bergitaki, Yesus ben gi a rai: „No broko un ede moro nanga un libi èn no broko un ede moro nanga san unu o nyan noso san unu o dringi noso san unu o weri na un skin” (Mateyus 6:25). * Yesus ben sabi taki sondu libisma abi a gwenti fu prakseri fa den o kisi den prenspari sani di den abi fanowdu na ini den aladei libi. Ma fa wi kan sorgu taki wi ’no broko wi ede moro’ nanga den sortu sani dati? „Tan suku a kownukondre . . . fosi”, na so Yesus ben taki.  Awinsi sortu problema e miti wi, toku wi musu tan poti na anbegi fu Yehovah na a fosi presi na ini wi libi. Efu wi e du dati, dan ala den sani di wi abi fanowdu na ini wi aladei libi ’wi sa kisi’ fu wi hemel Tata. Na wan noso tra fasi a sa meki taki wi e kisi den sani di wi abi fanowdu.​—Mateyus 6:33.

⁸ Yesus ben gi wi ete wan rai: „Noiti un musu broko un ede nanga tamara, bika tamara sa abi en eigi broko-ede” (Mateyus 6:34). A no de wan koni sani fu broko-ede tumusi nanga san kan pasa tamara. Wan Bijbel sabiman taki: „Furu tron den sani di wi e prakseri o pasa, no de so takru leki fa sani e waka trutru.” Te wi gi yesi na a rai fu Bijbel fu poti prakseri soso na sani di de prenspari trutru èn fu no broko wi ede nanga sani di o pasa tamara, dan disi sa yepi wi fu no broko wi ede fu soso.​—1 Petrus 5:6, 7.

9. Sortu rai wi kan feni na ini den buku fu „a getrow èn koni srafu” di sa yepi wi te wi abi moni problema?

⁹ Wan tra fasi fa wi kan sori taki wi e frutrow tapu Yehovah te wi e kisi moni problema, na te wi e suku yepi na ini den buku fu „a getrow èn koni srafu” (Mateyus 24:45). Ten na ten, a tijdschrift Ontwaakt! abi spesrutu artikel di e gi rai fu san wi kan du te wi abi ekonomia problema. Na artikel „Zonder baan ​— Wat zijn de oplossingen?” (San wan sma kan du te a no abi wroko) na ini na Ontwaakt! fu 8 augustus 1991, ben taki fu aiti sani di yepi sma fu no bruya èn fu gebroiki a moni fu den na wan yoisti fasi na ini a pisi ten di den no ben abi wroko. * A no de fu taki dati te wi e luku den rai disi, dan wi musu abi a yoisti denki fu moni tu èn wi musu frustan o prenspari a de trutru. Na artikel „Iets belangrijkers dan geld” (Wan sani di de moro prenspari leki moni) na ini a srefi tijdschrift ben taki fu a tori disi.​—Preikiman 7:12.

Te siki e moro wi

10. Fa na eksempre fu Kownu David e sori taki wi kan frutrow tapu Yehovah te wi e siki seryusu?

¹⁰ Wi kan frutrow tapu Yehovah te wi e siki seryusu? Seiker! Yehovah e frustan fa den sikiwan na mindri en pipel e firi. Boiti dati, a de klariklari fu gi yepi. Luku fu eksempre, Kownu David. A kan taki a ben e siki seryusu di a ben skrifi fu a fasi fa Gado e handri nanga wan opregti sma di siki. A ben taki: „Yehovah srefi sa yepi en na tapu wan kanape fu siki; yu sa kenki en heri bedi  trutru na ini a ten di a siki” (Psalm 41:1, 3, 7, 8). Nanga en heri ati David ben tan frutrow tapu Gado, èn te fu kaba a kownu disi kon betre baka. Ma fa wi kan sori taki wi e frutrow tapu Gado te siki e moro wi?

11. San wi kan aksi wi hemel Tata te siki e moro wi?

¹¹ Wan fasi fa wi kan sori taki wi e frutrow tapu Yehovah te siki e moro wi, na te wi e aksi en na ini begi efu a kan yepi wi fu horidoro. Wi kan aksi en fu yepi wi fu gebroiki „koni” so taki wi kan suku fasi fu kon firi pikinso moro betre (Odo 3:21). Wi kan aksi en tu fu yepi wi fu abi pasensi èn fu horidoro so taki wi kan libi nanga a siki fu wi. Ma a moro prenspari sani di wi kan aksi Yehovah, na efu a kan gi wi a krakti fu tan getrow èn fu no degedege, awinsi san e pasa (Filipisma 4:13). A de moro prenspari fu tan hori wi soifri retifasi na fesi Gado leki fu feti fu tan na libi na ini a ten disi. Efu wi e tan hori wi soifri retifasi, dan A sa gi wi wan gosontu libi fu têgo.​—Hebrewsma 11:6.

12. Sortu Bijbel gronprakseri kan yepi wi fu teki koni bosroiti te wi e go suku yepi na datra?

¹² Fu di wi e frutrow tapu Yehovah, meki wi e suku rai tu na ini en Wortu, Bijbel. Den gronprakseri di de fu feni na ini Bijbel kan yepi wi fu teki koni bosroiti te wi o go suku yepi na datra. Fu eksempre, fu di wi sabi taki Bijbel e krutu „afkodrei”, meki wi o wai pasi gi iniwan sortu ondrosuku noso fasi fu dresi di abi fu du nanga afkodrei (Galasiasma 5:19-21; Deuteronomium 18:10-12). Luku wan tra eksempre fu a koni rai fu Bijbel: „Ibriwan sma di no abi ondrofeni, e bribi ibri wortu, ma a koniwan e luku pe a e poti en futu” (Odo 14:15). Fu dati ede, te wi e prakseri fu suku yepi na datra, dan a de wan koni sani fu ondrosuku fa sani de trutru, na presi taki wi e „bribi ibri wortu”. Te wi e gebroiki wi „gosontu frustan”, dan disi kan yepi wi fu luku finifini san na den difrenti fasi fu dresi a siki, èn nanga yepi fu den sani di wi kon sabi wi sa man teki wan koni bosroiti.​—Titus 2:12.

13, 14. (a) Sortu artikel di ben fruteri fu difrenti sortu siki, ben kon na ini den tijdschrift A Waktitoren nanga Ontwaakt!? (Luku a faki na tapu bladzijde 17.) (b) Sortu rai na Ontwaakt! fu 22 yanuari 2001 ben gi fu san wan sma kan du te a abi wan siki di no man dresi?

¹³ Wi kan sori tu taki wi e frutrow tapu Yehovah te wi e suku rai na ini den buku fu a getrow srafu. Ten na ten, wan tu artikel e kon na ini den tijdschrift A Waktitoren nanga Ontwaakt! di e taki fu furu difrenti sortu siki. * Son tron, den tijdschrift disi abi spesrutu artikel di e fruteri fu sma di abi difrenti sortu siki èn san den du fu man libi nanga a siki fu den. Boiti dati, son artikel gi wan tu rai fu Bijbel èn den fruteri wi tu san wi kan du fu libi nanga siki di no man dresi.

¹⁴ Fu eksempre, na Ontwaakt! fu 22 yanuari 2001 ben abi leki nen „Troost voor de zieken” (Trowstu gi den sikiwan). Den artikel ben taki fu difrenti gronprakseri di kan de wan yepi. Boiti dati, den ben taki fu sma di sabi furu fu a siki fu den èn fa den libi furu yari langa nanga a siki dati di meki taki den no man du ala sani di  tra sma man du. Na artikel „Ondanks uw ziekte iets van uw leven maken ​— Hoe?” (Fa yu kan abi wan marki na ini a libi aladi yu e siki?) ben gi a rai disi: Suku fu kon sabi someni leki yu man fu a siki fu yu (Odo 24:5). Poti marki di yu man doro, èn suku fu yepi trawan. Ma hori na prakseri tu taki kande yu no man doro den srefi marki di tra sma poti gi densrefi (Tori fu den Apostel 20:35; Galasiasma 6:4). No hori yusrefi aparti fu trawan, ma suku fu abi demakandra nanga tra sma (Odo 18:1). Tyari yusrefi na so wan fasi taki tra sma o prisiri fu kon luku yu (Odo 17:22). Èn san de moro prenspari na fu tan abi wan krosibei banti nanga Yehovah èn nanga a gemeente (Nahum 1:7; Romesma 1:11, 12). Wi no de nanga tangi na ati taki Yehovah e gebroiki en organisâsi fu gi wi rai di wi kan frutrow?

Te wi e feti nanga wan swakifasi

15. Fa na apostel Paulus ben man wini a feti teige den swakifasi fu a sondu skin, èn sortu dyaranti wi kan abi?

¹⁵ „Na ini mi skin, nowan sani no de di bun”, na so na apostel Paulus ben skrifi (Romesma 7:18). Paulus srefi ben ondrofeni taki a kan de wan tumusi muilek sani fu feti teige den lostu nanga swakifasi fu a sondu skin. Ma Paulus ben abi na overtoigi taki a ben kan basi den swakifasi fu en (1 Korentesma 9:26, 27). Fa? Fu di a ben frutrow tapu Yehovah nanga en heri ati. Fu dati ede, Paulus ben man taki: „Mofina sma di mi de! Suma sa frulusu mi fu a skin di e ondrofeni a dede disi? Tangi fu Gado nanga yepi fu Yesus Krestes, wi Masra!” (Romesma 7:24, 25) Fa a de nanga wi? Wi abi fu feti teige den swakifasi fu wi sondu skin tu. Wi kan lasi frutrow makriki te wi e feti teige den swakifasi disi, fu di wi e bribi taki wi noiti no sa man basi den swakifasi fu wi. Ma neleki fa Yehovah ben yepi Paulus, na so a sa yepi wi tu te wi e poti ala wi frutrow tapu en èn no tapu wi eigi krakti nomo.

16. Fu sortu sani wi kan begi te wi e feti nanga wan swakifasi? San wi musu du efu wi brokokindi gi a swakifasi di wi abi?

¹⁶ Te wi e feti nanga wan swakifasi, dan wi kan sori taki wi e frutrow tapu Yehovah te wi e taki nanga en na ini begi. Wi musu aksi en, wi musu begi en tangitangi srefi, efu a kan gi wi en santa yeye fu yepi wi (Lukas 11:9-13). Wan spesrutu sani di wi kan aksi en na fu dwengi wisrefi, èn  dati na wan fu den froktu fu a yeye (Galasiasma 5:22, 23). San wi musu du te wi brokokindi gi wan swakifasi di wi ben man basi wan heri pisi ten kaba? Wi no musu lasi-ati kwetikweti. Noiti wi musu weri fu begi wi Gado di abi sari-ati, èn fu aksi en nanga sakafasi fu gi wi pardon èn fu yepi wi. Noiti Yehovah no o drai baka gi wan sma di abi wan ati di „broko . . . èn di masi” fu di en konsensi e fon en (Psalm 51:17). Efu wi e begi Yehovah opregti nanga wi heri ati taki wi abi berow fu san wi du, dan a sa yepi wi fu kakafutu gi tesi.​—Filipisma 4:6, 7.

17. (a) Fu san ede a de wan yepi te wi e prakseri fu a fasi fa Yehovah e denki fu a spesrutu swakifasi nanga san wi e feti? (b) Sortu bijbeltekst wi kan hori na prakseri te wi e feti fu no atibron esi-esi? te wi e feti fu basi wi tongo? te wi abi a gwenti fu luku noso arki sani di no fiti?

¹⁷ Wi kan sori tu taki wi e frutrow tapu Yehovah te wi e suku yepi na ini en Wortu. Wi kan luku na ini den index di de fu feni na ini A Waktitoren nanga Ontwaakt! ibri kaba fu a yari. Na ini den index disi wi kan suku a piki tapu na aksi: ’Fa Yehovah e denki fu a spesrutu swakifasi nanga san mi e feti?’ Te wi e prakseri fu a fasi fa Yehovah e denki fu a tori disi, dan dati kan gi wi moro deki-ati fu plisi en. Fu dati ede, meki wi du muiti fu firi leki fa en e firi, èn fu tegu fu den sani di en e tegu fu den (Psalm 97:10). Son sma si taki a de wan yepi fu hori bijbeltekst na prakseri di e taki fu a swakifasi nanga san den e feti. Wi e feti fu no atibron esi-esi? We, kande wi kan hori den tekst leki Odo 14:17 nanga Efeisesma 4:31 na prakseri. Wi e feni en wan muilek sani fu basi wi tongo? Kande wi kan hori tekst na ede, soleki Odo 12:18 nanga Efeisesma 4:29. Wi abi a gwenti fu luku noso arki sani di no fiti? Wi kan pruberi fu memre tekst leki Efeisesma 5:3 nanga Kolosesma 3:5.

18. Fu san ede wi no musu syen fu go aksi den owruman yepi fu basi a swakifasi fu wi?

¹⁸ Wan tra fasi fa wi kan sori taki wi e frutrow tapu Yehovah, na te wi e suku yepi na brada di santa yeye poti na wroko leki owruman (Tori fu den Apostel 20:28). Te yu e luku en bun, dan den „presenti ini libisma” disi na wan seti di Yehovah poti nanga yepi fu Krestes fu kibri èn sorgu den skapu fu en (Efeisesma 4:7, 8, 11-14). A tru taki a no de so makriki fu aksi yepi te wi e feti nanga wan swakifasi di wi abi. Kande wi e syen fu di wi e frede taki den owruman no sa denki bun fu wi moro. Ma wi kan de seiker taki den man disi di lepi na yeye fasi, sa lespeki wi fu di wi teki a deki-ati fu aksi yepi. Boiti dati, den owruman e meki muiti fu handri nanga den skapu soleki fa Yehovah e handri nanga den. Kande a trowstu nanga den rai di den e gi komoto fu Gado Wortu na soifri san wi abi fanowdu fu overtoigi  wi taki wi kan basi a swakifasi fu wi.​—Yakobus 5:14-16.

19. (a) Na sortu fasi Satan e suku fu gebroiki den problema fu a libi na ini a sistema disi? (b) San frutrow wani taki, èn sortu fasti bosroiti wi musu abi?

¹⁹ No frigiti noiti taki Satan sabi taki en ten syatu (Openbaring 12:12). A wani gebroiki den problema fu a libi na ini a grontapu disi fu meki wi lasi-ati so te, taki wi no e frutrow tapu Yehovah moro. Meki wi abi frutrow na ini den wortu fu Romesma 8:35-39: „Suma sa prati wi fu a lobi fu Krestes? Pina noso banawtu noso frufolgu noso angri noso soso skin noso kefar noso feti-owru? . . . Kontrari fu dati, na ini ala den sani disi wi e wini a strei krinkrin nanga yepi fu a sma di ben lobi wi. Bika mi abi na overtoigi taki nowan dede noso libi, nowan engel noso tiri, nowan sani di de now noso wan sani di musu kon ete, nowan makti, nowan hei noso dipi, nowan tra mekisani sa man prati wi fu a lobi fu Gado, di de na ini Krestes Yesus, wi Masra.” Den wortu disi e sori wan tranga frutrow na ini Yehovah trutru! Ma a sortu frutrow disi de moro leki wan firi nomo. Na presi fu dati, a frutrow disi wani taki dati wi e ondrosuku sani finifini bifo wi e teki bosroiti na ini wi aladei libi. Fu dati ede, meki wi abi a fasti bosroiti fu poti ala wi frutrow tapu Yehovah na ini ten fu banawtu.

[Futuwortu]

Yu e memre disi ete?

• Na sortu fasi wi kan sori taki wi e frutrow tapu Yehovah te wi e kisi fu du nanga ekonomia problema?

• Fa wi kan sori taki wi e frutrow tapu Gado te siki e moro wi?

• Fa wi kan sori taki wi e poti ala wi frutrow tapu Yehovah te wi e feti nanga wan swakifasi?

[Aksi fu a tori disi]

[Faki na tapu bladzijde 17]

Yu e memre den artikel disi ete?

Te wi e firi brokosaka fu di wi abi problema nanga a gosontu fu wi, dan wi kan kisi deki-ati te wi e leisi fa tra sma du nanga den siki di den abi. Dyaso na wan tu artikel di ben kon na ini den tijdschrift A Waktitoren nanga Ontwaakt!

Na artikel „Het hoofd bieden aan mijn zwakheid” ben fruteri san ben yepi wan sma di ben e firi brokosaka èn di ben e prakseri takru fu ensrefi ala ten.​—De Wachttoren fu 1 mei 1990.

„Yehovah leri wi fa fu horidoro sondro fu gi abra.”​—A Waktitoren fu 1 februari 2002.

Na artikel „Yehovah Gi Mi Krakti Mi Heri Libi Langa” ben fruteri fa wan sma horidoro aladi a lan.​—A Waktitoren fu 1 maart 2001.

Na artikel „Unu No Sabi Fa Un Libi Sa De Tamara” ben fruteri fa wan sma du nanga a siki di den e kari manisch-depressive krankzinnigheid noso bipolaire stoornis.​—A Waktitoren fu 1 december 2000.

Na artikel „Loida’s stilte doorbroken” ben fruteri san wan sma du aladi a abi wan siki di meki taki a no man taki.​—Ontwaakt! fu 8 mei 2000.

„Wan sma di e yepi trawan e frigiti en eigi broko-ede.”​—A Waktitoren fu 1 yuli 2003.

„A libi di mi abi leki wan gwasiman — De nanga prisiri èn kisi blesi na jejefasi.”​—A Waktitoren fu 1 april 1998.

„Ik won mijn gevecht met een postpartumdepressie.”​—Ontwaakt! fu 22 yuli 2002.

[Prenki na tapu bladzijde 15]

Te wi lasi wroko, dan a kan de wan koni sani fu luku a fasi fa wi e libi

[Prenki na tapu bladzijde 16]

A tori fu Loida e sori fa wan sma kan horidoro te a e frutrow tapu Yehovah. (Luku a faki na tapu bladzijde 17)

[Prenki na tapu bladzijde 18]

Wi no musu syen fu aksi yepi fu man basi den swakifasi fu wi