A ten o kon te ala pramisi sa kon tru

HISTORIA lai nanga pramisi fu sma di no kon tru. Nofo tron kondre fu grontapu no hori densrefi na frubontu, pe densrefi sweri taki den no sa feti nanga tra kondre. Ma a bakapisi de, taki den tyari a pipel fu den go na ini tumusi takru feti. Napoleon ben taki wan leisi: „Tirimakti e du san den pramisi soso te sma e dwengi den fu du dati, noso te den o kisi winimarki fu du dati.”

Ma fa a de nanga den pramisi di sma e meki? A sari trutru te wan sma no e du san a pramisi! Disi de so spesrutu te a de wan sma di yu sabi èn di yu e frutrow. Ma a de krin fu taki, dati sma no abi a makti fu du san den pramisi, noso den no wani du san den pramisi.

Fu tru, wan bigi difrenti de na mindri den sani di libisma e pramisi nanga den sani di Gado e pramisi! Den pramisi fu Gado na sani di wi kan frutrow dorodoro. Ala pramisi di Yehovah Gado meki na wan dyaranti. A no abi misi taki a no sa kon tru. Yesaya 55:11 e taki fu den wortu fu Gado di no e misi. Drape skrifi: „Na so mi wortu di e komoto na mi mofo, sa sori taki a de. A no sa drai kon baka na mi sondro bakapisi, ma seiker a sa du a sani dati di mi abi prisiri na ini, èn fu tru, a sa abi bun bakapisi na ini san mi ben seni en go.”

Sobun, dan fa wi musu si den pramisi fu Gado di skrifi na ini Bijbel? Trutru wi kan frutrow na den tapu. Fu eksempre, na apostel Yohanes ben skrifi: „Luku! A tenti fu Gado de na libisma, èn a sa tan nanga den, èn den sa de en pipel. Èn Gado srefi sa de nanga den. Èn a sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba” (Openbaring 21:3, 4). Yu kan kisi furu blesi efu yu e handri akruderi den wortu fu Yesus: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes.”​—Yohanes 17:3.