„Kon krosibei na Gado, èn a sa kon krosibei na unu”

Fosi nanga now​—Bijbel gronprakseri yepi en fu kenki

LEKI wan yonguman, Adrian ben abi hebi atibron èn a ben abi bita-ati. Fu di a ben e atibron esi meki a ben du wan lo ogri-ati sani. A ben e dringi sopi, a ben e smoko, èn a ben e libi wan yayo libi. Sma ben sabi Adrian leki wan punkman, dati na wan memre fu wan grupu fu yonguwan di no e hori densrefi na nowan wet. A ben poti wan tatoeage na en skin fu sori taki a ben e horibaka gi a fasi dati fu libi. A e fruteri fa a ben de na ini den yari dati: „Mi ben e koti mi wiwiri leki fa den punkman ben e du dati, mi ben e poti wan tranga lijm tapu mi wiwiri èn son leisi mi ben e poti wan redi kloru noso wan tra sortu kloru gi mi wiwiri.” Adrian ben poti yesilinga na en noso sosrefi.

Adrian go libi na ini wan owru brokobroko oso makandra nanga wan tu tra tranga-ede yonguwan. Drape den ben e dringi sopi èn den ben e gebroiki drugs. Adrian e memre: „Mi ben e gebroiki speed, wan sortu drugs di ben e meki taki mi man du furu èn a ben e meki taki mi firi prisiri. Na a srefi ten mi ben e spoiti misrefi nanga valium, wan drugs di datra e gebroiki fu kowru a senwe fu siki sma. Mi ben e gebroiki iniwan sortu sani di mi ben kan feni makriki, so taki mi ben kan firi hei. Te mi no ben man feni drugs noso lijm di mi ben e snoifi, dan mi ben e puru gasoline na sma oto èn mi ben e snoifi dati fu kon hei.” Adrian ben e waka du wan lo ogri sani na strati èn a ben lobi fu feti. Sma no ben wani abi noti fu du nanga en. Na a srefi ten, a ben kon kisi ogri mati fu di a ben e tyari ensrefi na so wan fasi.

Safrisafri, Adrian kon si taki den sokari mati fu en ben abi demakandra nanga en soso fu kisi wini gi densrefi nomo. Boiti dati, a ben kon si taki ’na atibron fu en èn na ogri di a ben du, no ben abi nowan wini’. A ben firi taki a libi fu en no abi nowan marki èn a ben bruya. Fu dati ede a gowe libi den mati fu en. Di a feni wan Waktitoren na wan presi pe sma ben e bow, dan a boskopu di komoto na ini Bijbel, ben hari en. Disi ben meki taki a bigin studeri Bijbel nanga Yehovah Kotoigi. Fayafaya, Adrian teki a kari: „Kon krosibei na Gado, èn a sa kon krosibei na unu” (Yakobus 4:8). Leki bakapisi fu dati, Adrian kon si heri esi taki a de fanowdu fu bigin tyari ensrefi akruderi den gronprakseri di de fu feni na ini den Santa Buku fu Bijbel.

Adrian kon kisi moro nanga moro sabi fu Bijbel èn disi ben abi bun krakti tapu en konsensi, èn a ben meki taki a drai en libi. A ben kisi yepi fu no atibron so esi moro èn na so a leri fu hori ensrefi. Nanga yepi fu a krakti di Gado Wortu abi, Adrian kenki den fasi fu en krinkrin.​—Hebrewsma 4:12.

Ma fa a du kan taki Bijbel abi so wan krakti tapu sma? Sabi fu Bijbel e yepi wi fu „weri a nyun fasi fa wan sma musu de” (Efeisesma 4:24). Iya, wi e kenki a fasi fa wi de, te wi e libi akruderi a soifri sabi di de fu feni na ini Bijbel. Ma fa a sabi disi e kenki sma?

Na a fosi presi, Bijbel e sori sortu fasi wi no musu abi (Odo 6:16-19). Na a di fu tu presi, Bijbel e gi wi deki-ati fu sori den moi fasi fu Gado en santa yeye. Den fasi disi na „lobi, prisiri, vrede, langa pasensi, switifasi, bun-ati, bribi, safri-ati fasi, a dwengi di wan sma e dwengi ensrefi”.​—Galasiasma 5:22, 23.

 Di Adrian kon frustan den markitiki fu Gado moro bun, dan disi yepi en fu ondrosuku ensrefi, èn na so a ben man si sortu fasi a musu kon kisi èn sortu fasi a no musu abi moro (Yakobus 1:22-25). Ma dati ben de a bigin wawan. Boiti taki a ben musu kisi sabi, dan a ben de fanowdu taki a ben sabi fu san ede a wani kenki.

Adrian kon leri taki wan sma e kisi a moi nyun fasi disi te a e libi „akruderi a prenki fu a Sma di ben meki en” (Kolosesma 3:10). A kon frustan taki den fasi fu wan Kresten musu de wan prenki fu den fasi fu Gado srefi (Efeisesma 5:1). Nanga yepi fu wan studie fu Bijbel, Adrian kon leri sabi fa Yehovah ben handri nanga libisma èn a si den bun fasi fu Gado, soleki lobi, switifasi, bunfasi, safri-ati fasi, nanga regtfardikifasi. Fu di Adrian kon sabi den sani disi, meki a kisi deki-ati fu lobi Gado èn fu meki muiti fu de wan sma di Yehovah e feni bun.​—Mateyus 22:37.

Baka wan pisi ten, Adrian ben man hori ensrefi te a ben e atibron èn a ben man du dati nanga yepi fu Gado en santa yeye. Now, en nanga en wefi e du furu fu yepi trawan fu tyari wan kenki kon na ini den libi nanga yepi fu a sabi fu Bijbel. „Furu fu den mati di mi ben abi fosi, dede now. Ma tra fasi leki den, mi de na libi èn mi abi wan koloku osofamiri libi”, na so Adrian e taki. A de wan libilibi buweisi taki Bijbel abi a krakti fu kenki sma na wan bun fasi.

[Prenspari pisi na tapu bladzijde 25]

’Na atibron fu en èn na ogri di a ben du, no ben abi nowan wini’

[Faki na tapu bladzijde 25]

Bijbel gronprakseri di e yepi sma

Wan tu Bijbel gronprakseri e kon now di yepi furu sma di ben lobi fu kisi atibron èn di ben lobi fu du ogri, fu kon tron sma di lobi vrede:

„Abi vrede nanga ala sma. No teki refensi gi unsrefi, un lobiwan, ma gi pasi na atibron” (Romesma 12:18, 19). Meki Gado bosroiti o ten èn tapu suma a sa teki refensi. A man du dati fu di a sabi ala sani finifini èn iniwan sortu strafu di a sa gi sa sori a volmaakti krutu fu en.

„Kisi atibron èn toku no sondu; no meki son dongo aladi unu e atibron ete, no gi Didibri pasi tu” (Efeisesma 4:26, 27). Wan sma kan abi a reti fu atibron na ini son situwâsi. Efu disi e pasa, dan a sma no musu tan nanga „atibron”. Fu san ede? Fu di dati kan meki a sma du wan ogri sani. Na so fasi a e gi „Didibri pasi” èn a bakapisi sa de taki a no sa kisi a bun ati fu Yehovah Gado.

„Libi atibron na wan sei èn gowe libi hebi atibron; no sori taki yu ati e kon faya soso fu du ogri” (Psalm 37:8). Te wan sma no man hori ensrefi, dan dati kan abi leki bakapisi taki a o du sani sondro fu prakseri. Efu wan sma e gi ensrefi pasi fu kisi hebi atibron, dan a kan taki sani, noso du sani di sa hati ala sma di abi fu du nanga dati.