Yu kan bribi taki wan paradijs sa de na grontapu?

FURU sma no e bribi taki wan ten sa kon pe grontapu sa tron wan paradijs. Den e denki taki baka wan pisi ten grontapu no sa de moro srefi. Soleki fa a buku The Sacred Earth fu Brian Leigh Molyneaux e sori, dan a grontapu disi kon de fu di ’wan bun bigi sani sutu panya milyunmilyun yari pasa kaba na ini a sistema pe den stari nanga planeiti de’. Èn son sma e taki dati efu libisma srefi no pori grontapu, dan te fu kaba a grontapu nanga ala tra sani di de na hemel o kon na wan kaba fu di „a o sutu panya baka èn faya o bron en krinkrin”.

Na Ingrisi puwema skrifiman, John Milton, di ben e libi na ini a di fu tinaseibi yarihondro, no ben abi den sortu takru denki dati. Na ini en moi puwema Paradise Lost, John Milton skrifi taki Gado ben meki grontapu fu de wan paradijs tanpresi gi libisma. A fosi Paradijs dati lasi gowe. Ma Milton ben e bribi taki grontapu ben o tron wan paradijs baka, èn taki wan frulusuman, Yesus Krestes, ben o kon wan dei fu „pai den getrow sma fu en, èn fu meki den kon koloku srefisrefi . . . na ini Hemel noso na Grontapu”. Nanga overtoigi Milton ben taki: „Bika dan, a heri Grontapu sa de wan Paradijs.”

Wan paradijs na ini hemel noso na grontapu?

Furu kerkisma e bribi a srefi sani leki Milton, taki te fu kaba den sa kisi wan sortu pai fu ala den ogri nanga pina di miti den dyaso na grontapu. Ma pe den sa kisi a pai dati? A sa de „na ini Hemel noso na Grontapu”? Son sma no e prakseri srefisrefi taki a paradijs sa de na grontapu. Den e taki dati libisma sa kon de „koloku srefisrefi” soso te den gowe libi grontapu fu go na wan yeye tanpresi na ini hemel.

A buku Heaven—A History, di C. McDannell nanga B. Lang skrifi, e sori taki a theologiaman Irenaeus di ben e libi na ini a di fu tu yari hondro, ben e bribi taki a libi na ini wan nyun paradijs „no sa de na ini wan farawe tanpresi na hemel, ma a sa de na grontapu”. A buku e sori sosrefi taki aladi kerki fesiman soleki Johannes Calvijn nanga Martin Luther ben abi a howpu fu go na hemel, toku den ben e bribi tu taki „Gado ben o meki grontapu kon nyun baka”. Sma fu tra kerki ben e bribi a srefi sani tu. McDannell nanga Lang e taki tu dati son Dyu ben e bribi taki Gado ben poti wan spesrutu ten pe a sa „figi puru” ala problema fu libisma „èn den sa libi wan koloku libi na grontapu”. Den Persiasma fu owruten ben e bribi taki „grontapu sa tron baka leki fa a ben de fosi èn libisma sa libi na ini vrede baka”, na so a buku Encyclopaedia of Middle Eastern Mythology and Religion e taki.

San kon pasa nanga a howpu fu wan paradijs grontapu? A de so taki a libi fu wi na grontapu na soso wan pisi ten na ini wi libi nomo? A Dyu filosofia man Filo di ben e libi na ini a fosi yarihondro, ben e bribi taki a libi fu wi dyaso na grontapu, na soso „wan syatu, sari pisi ten” na ini wi libi, aladi wi de na pasi fu go na wan yeye tanpresi. Ma disi de so trutru? Noso a de so taki Gado ben abi wan tra sani na prakseri di a ben meki grontapu èn di a poti libisma na ini wan paradijs? A de so trutru taki libisma kan kisi wan trutru koloku libi leti dyaso na grontapu? We, fu san ede yu no e luku san Bijbel abi fu taki fu a tori disi. Kande yu sa kon si, neleki milyunmilyun tra sma, taki a howpu fu wan nyun paradijs na grontapu na wan sani di yu kan bribi trutru.

[Prenki na tapu bladzijde 3]

A puwema skrifiman John Milton ben e bribi taki grontapu ben o tron wan paradijs baka

 [Sma di abi a reti fu a prenki na tapu a kafti]

KAFTI: Grontapu: U.S. Fish & Wildlife Service, Washington, D.C./NASA

[Sma di abi a reti fu a prenki na tapu bladzijde 3]

Grontapu: U.S. Fish & Wildlife Service, Washington, D.C./NASA; John Milton: Leslie’s