Aksi fu leisiman

Yesus ben sori na ini a Wi Tata Begi taki a wani fu Gado ben e du na ini hemel aladi den ogri engel no ben yagi puru fu hemel ete?

Leki fa a skrifi na ini Mateyus 6:10, dan Yesus ben taki: „Yu wani musu du na grontapu leki fa a e pasa na hemel.” Na aksi disi wi kan frustan na tu fasi. Wán fasi na taki Yesus ben begi Gado fu meki a wani fu En kan pasa na grontapu neleki fa a ben e pasa kaba na ini hemel. A di fu tu fasi na taki Yesus ben aksi Gado taki a wani fu En kan pasa na ini hemel nanga grontapu dorodoro. Den wortu „Yu kownukondre musu kon” di Yesus ben taki na fesi, e sori taki a di fu tu fasi e kruderi nanga den Buku fu Bijbel. A e sori tu fa a situwâsi ben de di Yesus ben de na grontapu èn fa a ben de a heri pisi ten baka dati. Fa so?

A buku Openbaring e sori go na tu spesrutu sani di de a bakapisi fu di a Kownukondre fu Gado na ini hemel seti. A fosi sani abi fu du nanga hemel srefi, èn a di fu tu sani abi fu du nanga grontapu. Na ini Openbaring 12:7-9, 12 skrifi: „Feti ben broko na hemel: Mikael nanga den engel fu en ben feti nanga a draak, èn a draak nanga den engel fu en ben feti, ma a no ben wini, sosrefi nowan presi no ben feni moro gi den na ini hemel. Fu dati ede den ben fringi a bigi draak go na ondro, a fosi sneki, a wan di den e kari Didibri nanga Satan, di e kori ala sma na heri grontapu; den ben fringi en go na grontapu, èn den engel fu en den ben fringi go na ondro makandra nanga en. Fu dati ede, un prisiri, un hemel nanga unu di e libi drape! Helu fu grontapu nanga se, bika Didibri saka kon na unu, èn a abi bigi atibron, fu di a sabi taki a abi wan syatu pisi ten nomo.”

Fu di Satan nanga den ogri yeye ben yagi puru fu hemel baka 1914, dan nowan enkri yeye di ben opo ensrefi teige Gado ben de na hemel moro. A sani disi ben gi den loyaal engel fu Yehovah, di ben de a moro bigi pisi fu den yeye mekisani fu en, furu prisiri (Yob 1:6-12; 2:1-7; Openbaring 12:10). Sobun, a pisi fu na aksi di Yesus ben poti na ini a Wi Tata Begi, di ben abi fu du nanga hemel, ben kon tru. Ala sma di ben tan na ini a hemel tanpresi, ben de loyaal na Yehovah èn den ben saka densrefi na ondro a tiri fu en.

Wi musu taki krinkrin taki di den ogri engel ben abi pasi ete fu go na hemel, dan den no ben de wan pisi moro fu a famiri fu Gado èn den no ben man du furu sani moro. Fu eksempre, Yudas 6 e sori taki na ini a fosi yarihondro G.T. den engel dati ben ’kibri nanga têgo banti na ondro blaka dungru gi a krutu fu a bigi dei’. Na a srefi fasi, 2 Petrus 2:4 e taki: „Gado no ben meki noti tapu en fu strafu den engel di ben sondu, ma fu di a ben trowe den go na ini Tartarus, a ben gi den abra na den peti fu deki dungru fu kibri den gi a krutu.” *

Aladi den ogri engel di Gado no ben feni bun moro, ben e libi na hemel ete, toku den ben abi bigi makti na grontapu. Fu taki en leti, Gado Wortu e kari Satan „a tiriman fu a grontapu” èn  den ogri yeye a e kari „den grontapu tiriman fu a dungru disi” (Yohanes 12:31; Efeisesma 6:11, 12; 1 Yohanes 5:19). Fu di Didibri abi makti, meki a ben man gi Yesus „ala kownukondre fu grontapu nanga a moi fu den” efu Yesus ben du wán sani nomo fu sori taki a e anbegi en (Mateyus 4:8, 9). A de krin fu si, taki te a Kownukondre fu Gado e „kon” na grontapu, dan gi grontapu dati sa tyari bigi kenki kon.

Dyaso na grontapu a ’kon’ fu a Kownukondre fu Gado sa tyari wan heri nyun seti fu sani kon. A Kownukondre sa broko ala libisma tiri èn a sa tron a wan-enkri tirimakti na grontapu. Na a srefi ten, den libisma di saka densrefi na ondro a tiri disi, èn di abi frede gi Gado, sa tron „a nyun grontapu” (2 Petrus 3:13; Danièl 2:44). A Kownukondre sa rutu ala sondu puru fu a getrow libisma famiri, èn te fu kaba a sa meki grontapu kon tron wan paradijs. Na so fasi, a sa puru ibri sani di abi fu du nanga a tiri fu Satan.​—Romesma 8:20, 21; Openbaring 19:17-21.

Na a kaba fu den dusun yari, te a Mesias Kownukondre du a wani fu Gado, dan „a Manpikin srefi sa saka ensrefi tu na ondro a Sma di ben saka ala sani na en ondro, so taki Gado kan de ala sani gi ibriwan sma” (1 Korentesma 15:28). Dan wan lasti tesi sa de, èn baka dati Satan, den ogri yeye fu en, nanga ala den libisma di a kori fu opo densrefi teige a tiri fu Gado, sa kisi pori na ini „a di fu tu dede” (Openbaring 20:7-15). Baka dati, ala mekisani na ini hemel nanga grontapu di abi frustan sa saka densrefi nanga prisiri na ondro a lobi-ati tirimakti fu Yehovah. Na ala fasi disi sa de a heri kontru fu den wortu fu a Wi Tata Begi fu Yesus.​—1 Yohanes 4:8.

[Futuwortu]