Yehovah e sori lobi bun-ati pasa marki
Yehovah e sori lobi bun-ati pasa marki
„Yehovah abi . . . lobi bun-ati pasa marki.”—PSALM 145:8.
1. O bigi a lobi fu Gado de?
„GADO na lobi” (1 Yohanes 4:8). Den tumusi moi wortu dati e buweisi taki Yehovah e tiri na wan fasi di e sori lobi. Iya, srefi den libisma di no e gi yesi na en e kisi wini fu a son nanga na alen di a e gi na wan lobi-ati fasi! (Mateyus 5:44, 45) Fu di Gado lobi a heri libisma famiri, meki srefi den feanti fu en e kisi na okasi fu sori berow, fu gi yesi na en, èn fu kisi têgo libi (Yohanes 3:16). Ma heri esi, Yehovah sa pori ala ogrisma di no wani kenki den libi, so taki den libisma di lobi en kan nyan bun fu têgo libi na ini wan regtfardiki nyun grontapu.—Psalm 37:9-11, 29; 2 Petrus 3:13.
2. Na sortu spesrutu fasi Yehovah e sori lobi gi den wan di gi densrefi abra na en?
2 Yehovah e sori lobi gi den anbegiman fu en nanga en heri ati, so taki den sa tan kisi wini fu dati. A Hebrew wortu gi a lobi disi, vertaal nanga den wortu „lobi bun-ati” noso „loyaal lobi”. Kownu David fu owruten Israel ben abi bigi warderi gi a lobi bun-ati fu Gado. David srefi ben ondrofeni a lobi bun-ati dati èn a ben e denki dipi tu fu a fasi fa Gado ben e handri nanga tra sma. Dati meki David ben man singi nanga en heri ati: „Yehovah abi . . . lobi bun-ati [noso „loyaal lobi”] pasa marki.”—Psalm 145:8.
Fa fu sabi suma na den loyaalwan fu Gado
3, 4. (a) Fa Psalm 145 e yepi wi fu sabi suma na den loyaalwan fu Yehovah? (b) Fa den loyaalwan fu Gado e „blesi” en?
3 Hana, a mama fu a profeiti Samuel, ben taki fu Yehovah Gado: „A e kibri den futu fu den loyaalwan fu en” (1 Samuel 2:9). Suma na den „loyaalwan” disi? Kownu David e gi a piki. Baka di a prèise Yehovah fu den tumusi moi fasi fu En, dan a e taki: „Den loyaalwan fu yu sa blesi yu” (Psalm 145:10). Kande yu e aksi yusrefi fa libisma kan blesi Gado. A moro prenspari fasi fa den kan du disi, na fu prèise en, noso fu fruteri trawan o bun a de.
4 Wi kan taki dati den loyaalwan fu Yehovah na den sma di e gebroiki a mofo fu den fu prèise en. Te den abi prisiri makandra èn te den de na Kresten konmakandra, dan fu san den e taki moro furu? We, fu Yehovah Kownukondre! Den loyaalwan fu Gado e firi neleki David di ben singi: „Fu a glori fu yu [Yehovah] kownumakti den sa taki, èn fu yu makti den sa fruteri.”—Psalm 145:11.
5. Fa wi du sabi taki Yehovah e arki te den loyaalwan fu en e taki bun sani fu en?
5 Yehovah e arki te den loyaalwan fu en e prèise en? Iya, a e poti prakseri na san den e taki. Na ini wan profeititori di e taki fu a tru anbegi na ini a ten fu wi, Maleaki ben skrifi: „Na a ten dati den sma di ben frede Yehovah ben taki nanga makandra, ibriwan fu den nanga en kompe, èn Yehovah tan poti prakseri na den èn a tan arki den. Èn den bigin skrifi wan buku na en fesi fu memre den wan di ben frede Yehovah èn gi den wan di ben e prakseri en nen” (Maleaki 3:16). A e plisi Yehovah srefisrefi te den loyaalwan fu en e taki bun sani fu en, èn a e tan memre den.
6. Sortu wroko e sori suma na den loyaalwan fu Gado?
6 Wan tra sani di e sori suma na den loyaal futuboi fu Yehovah, na a deki-ati fu den èn a fasi fa den e gebroiki ibri okasi fu taki nanga sma di no e dini a tru Gado. Iya, den loyaalwan fu Gado e „meki den manpikin fu libisma kon sabi den makti sani di a du, nanga a glori fu a moifasi fu en kownumakti” (Psalm 145:12). Yu e suku okasi fu taki nanga sma fu a kownumakti fu Yehovah èn yu e gebroiki den okasi dati tu? Tra fasi leki libisma tirimakti di sa kon na wan kaba heri esi, a kownumakti fu Yehovah de fu têgo (1 Timoteyus 1:17). A de tumusi prenspari taki sma kon sabi fu a têgo kownumakti fu Yehovah èn taki den teki wan fasti bosroiti fu horibaka gi dati. „Yu kownumakti na wan kownumakti fu ala ten di no skotu”, na so David ben singi, „èn a tiri fu yu de na tapu ala geslakti di e kon a wan baka a trawan.”—Psalm 145:13.
7, 8. San pasa na ini 1914, èn sortu buweisi de taki Gado e tiri now nanga yepi fu a Kownukondre fu en Manpikin?
7 Sensi 1914, ete wan reide de fu taki fu a kownumakti fu Yehovah. Na ini a yari dati, Gado ben seti a Mesias Kownukondre na ini hemel èn a ben poti Yesus Krestes, a Manpikin fu David, leki Kownu. Na so Yehovah ben du san a ben pramisi di a taki dati a kownumakti fu David ben o seti steifi te ten di no skotu.—2 Samuel 7:12, 13; Lukas 1:32, 33.
8 Wi abi a buweisi taki Yehovah e tiri now nanga yepi fu a Kownukondre fu en Manpikin, Yesus Krestes, fu di wi e si fa a marki fu Yesus en denoya e kon tru. A moro moi pisi fu a marki dati, na a wroko di ala den loyaalwan fu Gado ben o du, soleki fa Yesus ben taki na fesi. A ben taki: „A bun nyunsu disi fu a kownukondre o preiki na ala sma na heri grontapu, so taki ala kondre kan yere dati, èn dan a kaba o kon” (Mateyus 24:3-14). Fu di den loyaalwan fu Gado e du a wroko dati fayafaya soleki fa a profeititori taki, meki moro leki siksi milyun mansma, umasma nanga pikin e teki prati now na a bigi wroko disi di noiti no sa du baka. Heri esi wan kaba sa kon gi ala den sma di de teige a Kownukondre fu Yehovah.—Openbaring 11:15, 18.
Wi e kisi wini fu a tirimakti fu Yehovah
9, 10. Sortu bigi difrenti de na mindri Yehovah nanga libisma tiriman?
9 Efu wi na Kresten di gi densrefi abra na a Moro Hei Masra Yehovah, dan wi e kisi furu wini fu a banti di wi abi nanga en (Psalm 71:5; 116:12). Fu eksempre, fu di wi e frede Gado èn fu di wi e du regtfardiki sani, meki Gado e feni wi bun èn wi abi wan krosibei banti nanga en na yeye fasi (Tori fu den Apostel 10:34; Yakobus 4:8). Libisma tiriman de heri tra fasi. Furu tron wi e si taki den abi demakandra nanga prenspari sma, soleki legre edeman, gudu bisnisman, noso pôpi sportman nanga singiman. Na Afrikan koranti Sowetan ben taki wan prenspari lantiman ben taki fu den pôti birti na ini en kondre: „Mi e frustan fu san ede furu fu wi no wani go na den sortu birti dati. Na soso fu di wi wani frigiti taki libisma e libi trutru na ini den sortu situwâsi dati. A e meki wi kisi konsensi fonfon, èn wi e firi fruferi te wi e rei den kefalek diri wagi fu wi.”
10 A tru taki son libisma tiriman e broko den ede trutru nanga a tanbun fu den sma fu a kondre. Ma srefi den moro bun tiriman no sabi ibriwan fu den sma dati dorodoro. Iya, wi kan aksi wisrefi: Wan tiriman de di e broko en ede so te nanga ala den sma fu a kondre, taki a de esi fu yepi ibriwan fu den te den de na nowtu? Iya, so wan tiriman de. David ben skrifi: „Yehovah e yepi ala sma di e fadon. A e yepi ala sma di beni go na gron, fu opo tanapu.”—Psalm 145:14.
11. Sortu tesi e miti den loyaalwan fu Gado, èn sortu yepi den abi?
11 Furu tesi nanga rampu e miti den loyaalwan fu Yehovah Gado fu di densrefi no de volmaakti, èn fu di den e libi na ini wan grontapu di de na ini a makti fu Satan, „na ogriwan” (1 Yohanes 5:19; Psalm 34:19). Kresten e kisi frufolgu. Sonwan e pina fu di den abi wan siki di no man dresi, noso den de nanga dipi sari fu di wan lobiwan fu den dede. Son leisi, den fowtu di den loyaalwan fu Yehovah e meki, kan meki den ’beni go na gron’ fu di den lasi-ati. Ma awinsi sortu tesi den e kisi, toku ala ten Yehovah de klariklari fu trowstu den èn fu gi ibriwan fu den krakti na yeye fasi. Na a srefi lobi-ati fasi, Kownu Yesus Krestes e poti prakseri na den loyaal sma di de na en ondro.—Psalm 72:12-14.
Bun nyanyan na a reti ten
12, 13. O bun Yehovah e sorgu gi „ala libisani”?
12 Fu di Yehovah abi lobi bun-ati pasa marki, meki a e gi den futuboi fu en ala san den abi fanowdu. Disi wani taki dati a e gi den nofo nyanyan di bun gi den. Kownu David ben skrifi: „Ala ai e luku go na yu [Yehovah] fu di den e howpu tapu yu, èn yu e gi den nyanyan na a reti ten. Yu e opo yu anu èn e meki ala libisani kisi san den wani” (Psalm 145:15, 16). Srefi te rampu e pasa, Yehovah kan seti sani na so wan fasi, taki den loyaalwan fu en e kisi „brede fu a dei”.—Lukas 11:3; 12:29, 30.
13 David ben taki dati „ala libisani” e kisi san den abi fanowdu. Dati wani taki den meti sosrefi. Efu grontapu no ben abi so furu nyanyan di e gro na tapu a gron èn na ini a se, dan den meti di e libi na ini watra, den fowru, nanga den meti di e waka tapu gron no ben o man hari bro èn den no ben o abi nowan sani fu nyan (Psalm 104:14). Ma Yehovah e sorgu taki den e kisi ala san den abi fanowdu.
14, 15. Fa wi e kisi yeye nyanyan na ini a ten disi?
14 Tra fasi leki meti, libisma abi sani fanowdu na yeye fasi tu (Mateyus 5:3). Na wan moi fasi, Yehovah e gi den loyaalwan fu en ala san den abi fanowdu na yeye fasi! Bifo Yesus dede, dan a ben pramisi taki „a getrow èn koni srafu” ben o sorgu taki den bakaman fu Yesus kisi yeye „nyanyan na a reti ten” (Mateyus 24:45). Na ini a ten disi, a fikapisi fu den 144.000 salfuwan na a srafu grupu dati. Iya, nanga yepi fu a grupu disi, Yehovah e gi wi bogobogo yeye nyanyan.
15 Fu eksempre, furu sma fu a pipel fu Yehovah e kisi wini now fu wan nyun èn soifri vertaling fu Bijbel na ini den eigi tongo. A Nieuwe-Wereldvertaling van de Heilige Schrift (Nyun Grontapu-vertaling fu den Santa Buku fu Bijbel) na wan blesi fu tru! Boiti dati, milyunmilyun buku e tan kon na doro na ini moro leki 300 tongo, fu man yepi wi fu studeri Bijbel. Ala den yeye nyanyan disi na wan blesi gi tru anbegiman na heri grontapu. Suma musu kisi prèise gi ala den sani disi? Yehovah Gado. Fu di a abi lobi bun-ati pasa marki, meki a sorgu taki a srafu grupu man gi wi „nyanyan na a reti ten”. Na a fasi disi, ’ala libisani e kisi san den wani’ na ini a disiten paradijs na yeye fasi. Èn den futuboi fu Yehovah e prisiri srefisrefi taki den abi a howpu fu si heri esi fa grontapu sa kenki kon tron wan trutru paradijs!—Lukas 23:42, 43.
16, 17. (a) Sortu eksempre de fu yeye nyanyan di ben kon na a reti ten? (b) Fa Psalm 145 e sori fa den loyaalwan fu Gado e denki fu a strei di Satan ben bigin?
16 Luku wan tumusi moi eksempre fu yeye nyanyan di kon na a reti ten. Na ini 1939, a di fu Tu Grontapufeti bigin na ini Europa. Na ini a srefi yari dati, The Wachtower fu 1 november kon na doro di ben abi leki nen „Neutrality” („No teki sei na ini grontapu afersi”). A tijdschrift ben taki sani krin, èn disi ben meki taki Yehovah Kotoigi na heri grontapu kon frustan taki den no musu teki sei na ini den afersi fu den kondre di ben de na feti. A bakapisi ben de, taki na ini den siksi yari di a di fu Tu Grontapufeti ben e feti, den tirimakti fu ala tu sei ben e puru atibron tapu den Kotoigi fu Yehovah. Aladi a preikiwroko ben tapu èn aladi den ben e kisi frufolgu, toku den loyaalwan fu Gado tan preiki a bun nyunsu fu a Kownukondre. Fu 1939 te go miti 1946, den ben kisi blesi fu di a nomru fu den ben kon tron 157 procent moro furu. Boiti dati, den tumusi moi ondrofenitori di e sori fa den ben tan getrow, e yepi sma te now ete fu man si sortu bribi na a tru bribi.—Yesaya 2:2-4.
17 A yeye nyanyan di Yehovah e gi, no e kon na a reti ten wawan, ma a e gi wi furu prisiri tu. Aladi tra sma ben de fayafaya fu feti na ini a di fu Tu Grontapufeti, a pipel fu Yehovah ben kisi yepi fu poti prakseri na wan sani di ben de moro prenspari leki fu kibri den eigi libi. Yehovah ben yepi den fu frustan taki a moro prenspari sani na hemel nanga grontapu, abi fu du nanga a reti di Yehovah abi fu tiri. A de wan prisiri sani trutru fu sabi taki den Kotoigi fu Yehovah tan getrow, bika na a fasi disi ibriwan fu den sori taki Yehovah abi a reti fu tiri ala sani èn taki Didibri na wan leiman! (Odo 27:11) Satan e taki takru fu Yehovah èn fu a fasi fa A e tiri. Ma den loyaalwan fu Yehovah de heri tra fasi fu di den e tan meki bekènti na publiki: „Yehovah regtfardiki na ini ala den pasi fu en.”—Psalm 145:17.
18. Sortu nyun sani kon no so langa pasa, di e sori taki wi e kisi bun yeye nyanyan na a reti ten?
18 Wan tra eksempre fu bun yeye nyanyan di kon na a reti ten, na a buku Nader dicht tot Yehovah (Kon krosibei na Yehovah). A ben kon na doro na hondrohondro fu den „Fayafaya Kownukondre Preikiman” Distrikt Kongres di ben hori na heri grontapu na ini 2002 nanga 2003. A buku disi di „a getrow èn koni srafu” skrifi èn di Yehovah Kotoigi tyari kon na doro, e poti prakseri na den tumusi moi fasi fu Yehovah Gado, sosrefi den fasi fu en di skrifi na ini Psalm 145. A no de fu taki dati a moi buku disi o de wan prenspari sani fu yepi den loyaalwan fu Gado fu kon moro krosibei na en.
Wan ten fu kon moro krosibei na Yehovah
19. Sortu tumusi prenspari ten e kon krosibei, èn san wi musu du fu man pasa a ten dati?
19 Wan tumusi prenspari ten e kon krosibei pe wan kaba o kon na a strei di abi fu du nanga a reti di Yehovah abi fu tiri. Soleki fa Esekièl kapitel 38 taki na fesi, dan heri esi Satan o kaba en wroko leki „Gog fu a kondre Magog”. Disi wani taki dati a o kon feti nanga a pipel fu Yehovah na heri grontapu. Satan o du ala san a man fu meki den loyaalwan fu Gado drai baka gi En. Moro leki iniwan ten bifo, anbegiman fu Yehovah sa abi fu meki tranga muiti fu suku yepi na En, kande den sa abi fu bari kari En srefi fu yepi den. A lespeki, a frede nanga a lobi di den abi gi Gado sa de fu soso? Nôno, bika Psalm 145 e taki: ’Yehovah de krosibei fu ala den wan di e kari en, fu ala den wan di e kari en na wan opregti fasi. A sa gi den wan di e frede en ala san den wani, èn a sa yere te den e bari kari en fu yepi den, èn a sa frulusu den. Yehovah e kibri ala den wan di lobi en, ma ala den ogriwan a sa kiri.’—Psalm 145:18-20.
20. Fa den wortu fu Psalm 145:18-20 sa kon tru na ini a ten di e kon?
20 A sa gi wi bigi prisiri te wisrefi e ondrofeni taki Yehovah de krosibei fu wi èn taki a abi a krakti fu frulusu wi te a o pori ala ogrisma! Na a tumusi prenspari ten dati di de heri krosibei now, Yehovah sa arki soso ’den wan di e kari en na wan opregti fasi’. A no o arki hoigriman srefisrefi. Gado Wortu e sori krin taki te ogrisma ben suku fu kari En nen na a lasti momenti, dan ala ten a ben de fu soso.—Odo 1:28, 29; Mika 3:4; Lukas 13:24, 25.
21. Fa den loyaalwan fu Yehovah e sori taki den e prisiri fu gebroiki a nen fu Gado?
21 Nownow, moro leki iniwan ten bifo, a de prenspari gi den wan di e frede Yehovah fu ’kari en na wan opregti fasi’. Den loyaalwan fu en e prisiri fu gebroiki en nen te den e begi èn te den e gi piki na den konmakandra fu den. Den e gebroiki a nen fu Gado te den e taki nanga trawan. Èn na wan deki-ati fasi den e meki a nen fu Yehovah bekènti na ini a preikiwroko fu den.—Romesma 10:10, 13-15.
22. Fu san ede a de tumusi prenspari taki wi e tan kakafutu gi den fasi nanga lostu fu grontapu?
22 Efu wi wani tan kisi wini fu a krosibei banti di wi abi nanga Yehovah Gado, dan a de tumusi prenspari sosrefi taki wi e tan kakafutu gi sani di kan pori a yeyefasi fu wi, sani soleki fu feti baka gudu, fu abi prisiri na wan fasi di no bun, fu no gi trawan pardon, noso fu no broko wi ede nanga sma di abi yepi fanowdu (1 Yohanes 2:15-17; 3:15-17). Efu wi no e kenki den sortu fasi nanga gwenti disi, dan a bakapisi kan de taki wi o fadon na ini seryusu sondu èn te fu kaba Yehovah no o feni wi bun moro (1 Yohanes 2:1, 2; 3:6). A de wan koni sani fu hori na prakseri taki Yehovah sa tan sori lobi bun-ati, noso loyaal lobi gi wi, soso te wi e tan getrow na en.—2 Samuel 22:26.
23. Sortu tumusi moi ten ala den loyaalwan fu Gado sa abi na ini a ten di e kon?
23 Fu dati ede, meki wi tan poti ala wi prakseri na a tumusi moi ten di den loyaalwan fu Yehovah sa abi na ini a ten di e kon. Te wi e du dati, dan wi sa abi a moi howpu fu de wan fu den sma di sa prisiri fu blesi èn prèise a nen fu Yehovah „heri dei” èn „fu têgo” (Psalm 145:1, 2). Fu dati ede, meki wi ’tan na ini a lobi fu Gado, nanga têgo libi na prakseri’ (Yudas 20, 21). Aladi wi e tan kisi wini fu den moi fasi fu Yehovah, soleki a lobi bun-ati di a e sori gi den wan di lobi en, dan meki wi abi a srefi firi leki David di a taki den lasti wortu fu Psalm 145: „Mi mofo sa prèise Yehovah; èn meki ala skin blesi en santa nen te ten di no skotu, iya, fu têgo.”
San yu ben sa piki?
• Fa Psalm 145 e yepi wi fu si suma na den loyaalwan fu Gado?
• Fa Yehovah e ’gi ala libisani san den wani’?
• Fu san ede wi musu kon moro krosibei na Yehovah?
[Aksi fu a tori disi]
[Prenki na tapu bladzijde 16]
Den loyaalwan fu Gado e prisiri fu taki fu den bigi sani di a du
[Prenki na tapu bladzijde 17]
Na wan deki-ati fasi den futuboi fu Yehovah e yepi tra sma fu kon sabi fu a glori fu en kownumakti
[Prenki na tapu bladzijde 18]
Yehovah e gi „ala libisani” nyanyan
[Sma di abi a reti fu a prenki]
Animals: Parque de la Naturaleza de Cabárceno
[Prenki na tapu bladzijde 19]
Yehovah e gi krakti nanga rai na den loyaalwan fu en di e begi en fu kisi yepi