Luku bun nanga bedrigifasi

„Luku bun! Kande wan sma de, di sa kisi unu fu tyari unu gowe nanga yepi fu . . . soso bedrigifasi.”—KOLOSESMA 2:8.

1-3. (a) Sortu eksempre e sori taki pikinmoro na ini ala pisi fu a libimakandra bedrigifasi de? (b) Fu san ede a no musu fruwondru wi taki someni bedrigifasi de na grontapu?

„OMENI fu unu abi na ondrofeni taki noiti wan sma di ben teki unu na wroko, lei gi unu?” Wan tu yari pasa, wan sabiman di abi fu du nanga krutu afersi, ben du wan ondrosuku pe a ben e poti na aksi disi gi sma. San den ben piki? A e taki: „Di mi poti na aksi disi gi dusun afkati, dan wán nomo taki dati noiti wan sma di teki en na wroko, ben lei gi en.” Fu san ede? „No so langa pasa, na afkati disi bigin wroko gi wan bedrijf, èn a no ben kisi klanti ete.” Na ondrofenitori disi e sori wan sari sani di tru, namku taki lei nanga bedrigifasi na aladei sani na ini a disiten grontapu.

² Sma e bedrigi makandra na ala sortu fasi, èn na ini a nyun-modo ten disi bedrigifasi de fu si na ini ala pisi fu a libimakandra. A nyunsu lai nanga eksempre fu disi. Wan tu eksempre na taki politiek tiriman e lei fu den sani di den e du, èn sma di e du monitori gi wan wrokope, nanga afkati sosrefi, e lei fu a moni di den e meki. Te sma e meki reclame fu wan sani na telefisi noso radio, dan den e meki a sani gersi moro bun leki fa a de trutru. Trawan e meki wan lo lei soso fu tyari den verzekering bedrijf go na krutu, so taki den kan kisi furu moni. Dan yu abi bedrigifasi na ini kerki. Den kerki fesiman e kori ipi-ipi sma fu di den e gi falsi leri, soleki a leri fu a sili di no man dede, a helfaya, nanga a Dri-wánfasi.—2 Timoteyus 4:3, 4.

³ Wi musu fruwondru taki someni bedrigifasi de? Nôno, a no musu fruwondru wi. Bijbel ben warskow wi fu „den lasti dei”, taki:  „Ogrisma nanga bedrigisma sa kon moro ogri, aladi den e kori sma èn trawan e kori den” (2 Timoteyus 3:1, 13). Leki Kresten, wi musu luku bun nanga den falsi leri disi di kan meki wi drai baka gi a waarheid. Ma den tu aksi di e opo kon now na: Fu san ede someni bedrigifasi de na ini a ten disi, èn san wi kan du so taki sma no kori wi?

Fu san ede someni bedrigifasi de na ini a ten disi?

4. Fa Bijbel e sori fu san ede someni bedrigifasi de na grontapu?

⁴ Bijbel e sori krin fu san ede someni bedrigifasi de na ini a grontapu disi. Na apostel Yohanes ben skrifi taki „heri grontapu de na ini a makti fu na ogriwan” (1 Yohanes 5:19). Na „ogriwan” dati, na Satan Didibri. Yesus ben taki fu en, taki: „A no ben tan na ini a waarheid, bika waarheid no de na en ini. Te a e fruteri wan lei, a e fruteri soleki fa ensrefi de, bika a de wan leiman èn a tata fu lei.” Wi musu fruwondru dan, taki sma na ini a grontapu disi abi a srefi denki leki a tiriman fu grontapu, taki sma e si sani na a srefi fasi leki en, èn taki den abi den srefi bedrigifasi leki en?—Yohanes 8:44; 14:30; Efeisesma 2:1-3.

5. Na sortu fasi Satan meki moro muiti fu kori sma na ini a ten disi fu a kaba, èn sortu sma spesrutu a e suku fu kori?

⁵ Na ini a ten disi fu a kaba, Satan e meki moro muiti fu bedrigi sma. Den yagi en komoto na hemel. A sabi taki a ten fu en kon syatu, èn a de nanga „bigi atibron”. Fu di a abi a fasti bosroiti fu pori someni libisma leki a man, meki a ’e kori sma na heri grontapu’ (Openbaring 12:9, 12). A no wanwan leisi nomo Satan e kori sma. Na presi fu dati, a e tan meki muiti doronomo fu kori libisma. * A e gebroiki ala sortu bedrigifasi di a sabi; a e kisi sma nanga triki èn nanga ogri-ati lei. A e du disi fu breni a frustan fu sma di no de na bribi, so taki den tan farawe fu Gado (2 Korentesma 4:4). Wan sani di a bigi bedrigiman disi lobi trutru, na fu pori den wan di e dini Gado „nanga yeye èn nanga waarheid” (Yohanes 4:24; 1 Petrus 5:8). No frigiti dati noiti, bika te yu e luku en bun, dan Satan taki: ’Mi kan meki iniwan sma drai baka gi Gado’ (Yob 1:9-12). Meki wi go luku wan tu fu den „bedrigi fasi” di Satan e gebroiki, èn san wi kan du fu no meki a kori wi.—Efeisesma 6:11.

Luku bun nanga a bedrigifasi fu sma di no de na bribi

6, 7. (a) Sortu sani den sma di fadon komoto na bribi e taki kande? (b) Fa den Buku fu Bijbel e sori krin san den sma di fadon komoto na bribi wani?

⁶ Langa ten kaba, Satan gebroiki sma di fadon komoto na bribi, fu kori den futuboi fu Gado (Mateyus 13:36-39). Sma di fadon komoto na bribi kan taki dati den e dini Yehovah èn dati den e bribi na ini Bijbel, ma den e weigri fu horibaka gi na organisâsi fu en di sma kan si. Sonwan fu den teki den falsi leri baka di e gi Gado porinen, leri fu „Babilon a Bigiwan”, a grontapu makti fu falsi bribi (Openbaring 17:5; 2 Petrus 2:19-22). Gado ben meki Bijbel skrifiman gebroiki krakti wortu fu sori san den sma di fadon komoto na bribi wani du, èn sortu triki den e gebroiki.

⁷ San den sma di fadon komoto na bribi wani du? Gi furu fu den a no sari fu gowe libi a bribi nomo di den ben teki leki a tru bribi fosi. Furu tron den wani taki trawan e gowe libi a bribi makandra nanga den. Na presi taki den e go meki den eigi disipel, dan furu fu den e suku fu „hari den disipel [dati wani taki, den disipel fu Krestes] kon na den baka” (Tori fu den Apostel 20:29, 30). Na apostel Paulus ben warskow spesrutu gi den falsi leriman disi. A ben taki: „Luku bun! Kande wan sma de, di sa kisi unu fu tyari unu gowe” (Kolosesma 2:8). A no dati na san furu fu den sma di fadon komoto na bribi, e suku fu du? Neleki fa wan ogriman e korikori wan sma fu man fufuru en tyari gowe fu en osofamiri, na so den sma di fadon komoto na bribi e du tu. Den e du sani fu meki trawan na ini a gemeente frutrow den, so taki te fu kaba den man hari den gowe fu na ipi.

8. Sortu triki den sma di fadon komoto na bribi e gebroiki fu doro a marki fu den?

 ⁸ Sortu triki den sma di fadon komoto na bribi e gebroiki? Furu tron den e moksi tru tori nanga lei tori, den e drai wan tori so taki a e gersi leki na wan tru tori, noso den e taki krinkrin lei. Yesus ben sabi taki den bakaman fu en ben o fadon na ini den trapu fu den wan di ben o „taki ala sortu leitori agensi” den (Mateyus 5:11, Da Bijbel na ini Sranantongo). Den sortu ogri-ati gensman disi ben o taki sani di no tru, fu man kori trawan. Na apostel Petrus ben warskow taki sma di fadon komoto na bribi, ben o gebroiki „leitori”; den ben o panya „bedrigi leri”, èn den ben o ’drai den sani di skrifi na ini den Buku fu Bijbel’ fu du san den wani (2 Petrus 2:3, 13; 3:16). A de wan sari sani taki den sma di fadon komoto na bribi, man „pori a bribi fu son sma”.—2 Timoteyus 2:18.

9, 10. (a) San wi musu du fu no meki den sma di fadon komoto na bribi kori wi? (b) Fu san ede a no e bruya wi te wi musu kenki a fasi fa wi e denki fu den sani di Gado abi na prakseri fu du?

⁹ San wi musu du fu no meki den sma disi kori wi? Wi musu poti prakseri na a rai fu Gado Wortu, di e taki: „Luku bun nanga den sma di e suku fu prati unu èn di e kon nanga sani di unu no ben leri, soso fu di den wani meki trawan fadon; tan farawe fu den” (Romesma 16:17). Wi ’no e suku a pasi fu den’ fu di wi e weigri fu luku, noso arki iniwan sani di den e taki noso skrifi na tapu papira, noso tapu Internet. Fu san ede wi musu weigri fu du disi? We, a fosi reide na fu di Gado Wortu e taigi wi fu du so, èn wi abi ala frutrow taki ala ten Yehovah wani taki sani waka bun gi wi.—Yesaya 48:17, 18.

¹⁰ A di fu tu reide, na taki wi lobi na organisâsi di leri wi den tumusi moi tru tori di e meki taki wi de aparti fu Babilon a Bigiwan. Na a srefi ten, wi e frustan taki wi no sabi soifri san na ala den sani di Gado abi na prakseri fu du; wan tu fasi fa wi ben e si sani, kenki na ini den yari di pasa. Getrow Kresten e wakti nanga pasensi tapu Yehovah fu tyari kenki kon (Odo 4:18). Aladi wi e wakti, dan wi no e gowe libi na organisâsi di Gado e gebroiki, bika wi e si krin taki a e blesi na organisâsi disi.—Tori fu den Apostel 6:7; 1 Korentesma 3:6.

Luku bun taki yu no kori yusrefi

11. Fu san ede sondu libisma lobi fu kori densrefi?

¹¹ Sondu libisma abi wan gwenti di Satan e gebroiki furu tron namku, den lobi fu kori densrefi. „Na ati e kori sma moro leki iniwan tra sani èn a pori srefisrefi”, na so Yeremia 17:9 e taki. Èn Yakobus ben skrifi: „Ibri sma e kisi tesi fu di en eigi lostu e hari  èn e kori en” (Yakobus 1:14). Wi ati kan kori wi, fu di a o bigin sori wi taki sondu na wan bun sani di no kan du wi ogri. So wan denki kan kori wi, bika te wan sma e gi ensrefi abra na sondu, dan te fu kaba a e pori en libi.—Romesma 8:6.

12. Na sortu fasi wi kan kori wisrefi?

¹² A de wan makriki sani fu kori wisrefi. Kande wi ati di e kori wi, e gi wi a denki taki a no fowtu te wi abi wan fasi noso gwenti di no bun srefisrefi, noso kande a e gi wi a denki taki wan seryusu sondu no de so wan ogri sani (1 Samuel 15:13-15, 20, 21). Te wi ati de na bruya, dan a kan suku fasi tu fu sori wi taki a no fowtu fu tyari wisrefi na wan fasi di no fiti. Luku fu eksempre a fasi fa sma abi prisiri. Son fasi fu abi prisiri, no fowtu. Ma furu tron, den prisiri sani fu a grontapu disi soleki felem, telefisi programa, nanga Internet, e sori morsu sani di abi fu du nanga hurudu. A makriki fu kori wisrefi taki wi kan luku den morsu sani disi sondro fu kisi takru bakapisi. Son sma e denki srefi: „A sani disi no e trobi mi konsensi, sobun fa a kan du mi ogri?” Ma den sortu sma disi e ’kori densrefi nanga prakseri di no tru’.—Yakobus 1:22.

13, 14. (a) Sortu eksempre fu Bijbel e sori taki a no ala ten wi musu frutrow wi konsensi? (b) San wi kan du fu no kori wisrefi?

 ¹³ San wi kan du fu no kori wisrefi? A fosi sani, na fu hori na prakseri taki a no ala ten a libisma konsensi de fu frutrow. Luku na eksempre fu na apostel Paulus. Bifo a tron wan Kresten, a ben e frufolgu den bakaman fu Krestes (Tori fu den Apostel 9:1, 2). Kande na a ten dati en konsensi no ben e trobi en. Ma a de krin fu si taki en konsensi no ben kisi bun leri. „Mi no ben sabi san mi ben e du èn mi no ben abi bribi”, na so Paulus ben taki (1 Timoteyus 1:13). Sobun, efu wi konsensi no e trobi wi te wi abi prisiri na wan fasi di no fiti, dan dati no wani taki dati na bun sani wi e du. Soso wan bun èn krin konsensi di kisi leri fu Gado Wortu, kan yepi wi ini a tori disi.

¹⁴ Efu wi no wani kori wisrefi, dan wi musu hori wan tu rai na prakseri di kan yepi wi. Begi, èn ondrosuku a fasi fa yu de (Psalm 26:2; 2 Korentesma 13:5). Te yu ondrosuku yusrefi bun, dan kande yu o kon si taki yu musu kenki wan tu fasi fa yu e si sani, noso wan tu gwenti di yu abi. Arki trawan (Yakobus 1:19). Nofo tron te yu e ondrosuku yusrefi, dan yu e si yusrefi leki fa yu wani. Dati meki a de wan koni sani fu go na lepi Kresten brada noso sisa di abi furu ondrofeni, èn aksi den fu fruteri yu krin fa yu de trutru. Efu yu kon si taki tra brada nanga sisa di e si sani na wan yoisti fasi e feni taki yu e teki bosroiti di no bun, noso taki yu e handri na wan fasi di no fiti, dan kande yu kan aksi yusrefi: ’A kan de so taki mi konsensi no kisi bun leri, noso taki mi ati e kori mi?’ Studeri Bijbel nanga Bijbel publikâsi doronomo (Psalm 1:2). Te yu e du so, dan dati sa yepi yu fu tan denki, firi, èn tyari yusrefi soleki fa Gado wani.

Kibri yusrefi gi den lei fu Satan

15, 16. (a) Sortu lei Satan e gebroiki te a e suku fu kori wi? (b) San wi kan du so taki den sortu lei dati no e kori wi?

¹⁵ Satan e gebroiki difrenti lei te a e suku fu kori wi. A e pruberi fu overtoigi wi taki gudu e tyari koloku kon èn a e meki wi firi bun, ma furu tron wi e si taki disi no de so kwetikweti (Preikiman 5:10-12). A wani taki wi musu bribi taki na ogri grontapu disi sa tan fu têgo, aladi krin buweisi de taki wi e libi na ini „den lasti dei” (2 Timoteyus 3:1-5). Satan e meki furu sma denki taki nowan ogri no o pasa te den e libi wan yayolibi, aladi furu tron den sma disi, di abi soso prisiri na den ede, e kisi takru bakapisi fu a fasi fa den e libi (Galasiasma 6:7). San wi kan du so taki den lei disi no e kori wi?

¹⁶ Kisi wini fu Bijbel eksempre. Bijbel abi eksempre fu sma di Satan kori nanga den lei fu en; den musu de leki warskow gi wi. Den sma ben lobi gudu, den no ben hori na prakseri na ini sortu ten den ben e libi, noso den ben brokokindi gi hurudu. Den alamala ben kisi takru bakapisi fu san den du (Mateyus 19:16-22; 24:36-42; Lukas 16:14; 1 Korentesma 10:8-11). Leri fu eksempre na ini a ten disi. A de wan sari sani taki ten na ten son Kresten e frigiti na ini sortu ten den e libi, èn den e kisi a denki taki den e lasi wan bun sani te den e dini Gado. Kande den e gowe libi a waarheid fu go libi wan sokari prisiri libi, soleki fa den e si en. Ma den sortu sma dati de „na tapu grati gron”, bika awinsi fa no fa, te fu kaba den e kisi fu du nanga den takru bakapisi fu na ogri fasi fa den e libi (Psalm 73:18, 19). A de wan koni sani fu leri fu den fowtu di trawan meki.—Odo 22:3.

17. Fu san ede Satan wani sma fu bribi a lei taki Yehovah no lobi wi èn taki a e si wi leki sma di no warti noti?

¹⁷ Satan e gebroiki wan tra lei nanga san a kori furu sma kaba, namku taki Yehovah no lobi wi èn taki a e si wi leki sma di no warti noti. Dusundusun yari langa, Satan kisi okasi fu ondrosuku fa sondu libisma de. A sabi heri bun taki lasi-ati kan meki wi kon swaki na yeye fasi (Odo 24:10). Fu dati ede, a e meki sma bribi a lei taki Gado e si wi leki sma di no warti noti. Efu wan sani „trowe wi na gron” èn wi kon kisi a denki taki Yehovah no e broko en ede nanga wi, dan wi kan lasi-ati (2 Korentesma 4:9). Èn dati na soifri san a bigi Bedrigiman wani! Ma san wi kan du dan, so taki a lei disi fu Satan no e kori wi?

18. Fa Bijbel e gi wi a dyaranti taki Yehovah lobi wi?

 ¹⁸ Denki dipi fu san Bijbel e taki fu a lobi di Gado abi gi wi. Gado Wortu e gebroiki heri moi agersitori di e gi wi a dyaranti taki Yehovah e luku wi èn taki a lobi ibriwan fu wi aparti. A e poti den watra-ai fu yu na ini en „godo fu meti-buba”. Disi wani taki dati a e si èn a e memre den watra-ai di yu trowe aladi yu e feti fu tan getrow (Psalm 56:8). Yehovah sabi te yu „lasi-ati” èn a de krosibei fu yu na den ten dati (Psalm 34:18). A sabi ibri pisi fu yu; a sabi sosrefi omeni ’wiwiri de na yu ede’ (Mateyus 10:29-31). Wan moro moi sani, na taki Gado „ben gi en wan-enkri gebore Manpikin” so taki yu kan kisi wini (Yohanes 3:16; Galasiasma 2:20). Kande ten na ten yu e feni en muilek fu bribi taki den bijbeltekst disi abi fu du nanga yu sosrefi. Ma wi musu bribi Yehovah te a e taki wan sani. A wani taki wi e bribi taki a lobi wi alamala leki grupu, ma sosrefi ibriwan fu wi aparti.

19, 20. (a) Fu san ede a de prenspari fu kon sabi taki Satan e lei taki Yehovah no lobi wi, èn fu no bribi a lei dati kwetikweti? (b) Fa wan opziener di e reis yepi den wan di lasi-ati?

¹⁹ Kon sabi san na a lei èn no bribi en kwetikweti. Efu yu sabi taki wan sma e lei, dan yu kan sorgu taki a no e kori yu. Sobun, a kan de wan bigi yepi tu, te yu sabi taki Satan wani taki yu musu bribi a lei taki Yehovah no lobi yu. Di wan Kresten leisi wan Waktitoren-artikel di ben e warskow gi den triki fu Satan, dan a taki: „Noiti mi no ben denki taki Satan e pruberi fu gebroiki den firi fu mi, fu meki mi lasi-ati. Fu di mi sabi dati now, meki mi kisi moro deki-ati fu feti nanga den firi disi.”

²⁰ Luku wan ondrofenitori fu wan opziener di e reis na ini wan kondre fu Zuid-Amerika. Te a e go luku den brada nanga sisa di lasi-ati, dan furu tron a e aksi den: ’Yu e bribi na ini a Dri-wánfasi?’ Nofo tron a sma di lasi-ati, e taki: ’Nôno, kwetikweti’, fu di a sabi taki disi na wan fu den lei fu Satan. Dan na opziener e aksi: ’Yu e bribi na ini helfaya?’ A sma e piki baka: ’Nôno, kwetikweti!’ Ne na opziener e taigi den taki Satan e gebroiki wan tra lei, ma nofo tron den no e si disi leki wan fasi fa a e kori sma. Dan a e meki den leisi san skrifi na tapu bladzijde 249, paragraaf 21, fu a buku Nader dicht tot Yehovah (Kon krosibei na Yehovah). * A pisi dati e sori krin taki a no tru dati Yehovah no lobi ibriwan fu wi. Na opziener di e reis e taki dati furu tron a abi bun bakapisi te a e yepi den wan di lasi-ati fu kon sabi san na a lei disi fu Satan, èn fu no bribi a lei disi kwetikweti.

Kibri yusrefi gi sani di kan kori yu

21, 22. Fa wi du sabi san na den triki fu Satan, èn sortu fasti bosroiti wi musu abi?

²¹ Na ini a lasti pisi fu den lasti dei disi, wi kan fruwakti taki Satan sa tan seti wan lo lei nanga triki gi wi. Ma wi kan de nanga tangi na ati taki Yehovah e tyari den lei disi kon na krin gi wi èn taki a e sori wi fa Satan e pruberi fu kori wi. A Bijbel nanga den Bijbel publikâsi fu „a getrow èn koni srafu”, e sori wi krin san na den triki fu Didibri (Mateyus 24:45). Now di wi kisi warskow na fesi kaba, meki wi kan sreka wisrefi fu kakafutu gi den tesi fu Satan.—2 Korentesma 2:11.

²² Fu dati ede, meki wi tan na ai fu luku taki wi no e arki den leri fu sma di fadon komoto na bribi. Meki wi abi a fasti bosroiti fu no fadon na ini a trapu fu kori wisrefi. Wi musu kon si krin tu san na den lei fu Satan èn wi no musu bribi den kwetikweti. Te wi e du disi, dan wi sa tan abi wan bun banti nanga „a Gado fu waarheid” di e tegu gi bedrigifasi.—Psalm 31:5; Odo 3:32.

[Futuwortu]

Yu e memre disi ete?

• Fu san ede someni bedrigifasi de na grontapu na ini a ten disi?

• San wi kan du fu no meki sma di fadon komoto na bribi kori wi?

• San wi kan du so taki wi no e kori wisrefi na nowan fasi?

• San wi kan du so taki den lei fu Satan no e kori wi?

[Aksi fu a tori disi]

[Prenki na tapu bladzijde 17]

No kori yusrefi nanga a fasi fa yu abi prisiri

[Prenki na tapu bladzijde 18]

Efu yu no wani kori yusrefi, dan yu musu begi èn ondrosuku yusrefi, arki trawan, èn studeri Gado Wortu doronomo