A tru Kresten bribi e tan go na fesi

A DINIWROKO di Yesus Krestes ben e du na grontapu, ben abi bigi krakti tapu sma na ini a fosi yarihondro. A boskopu fu en ben e gi sma deki-ati, a ben meki den kon frustan sani moro krin, èn a ben naki sma ati na so wan fasi taki trawan ben fruwondru fu dati. Den wortu di a ben taki, ben abi krakti tapu furu sma di ben arki en.—Mateyus 7:28, 29.

Sondro fu frede, Yesus ben sori krin taki a no ben wani abi noti fu du nanga a kerki sistema èn nanga a politiek sistema di ben e kwinsi sma na ini a ten dati. Ma a fasi fa a ben e tyari ensrefi ben meki taki ala sortu sma ben lobi fu kon na en (Mateyus 11:25-30). A ben taki krin dati ogri yeye abi bigi krakti tapu sma na heri grontapu, èn a ben sori taki Gado ben gi en a krakti fu kakafutu teige den èn fu puru den na sma tapu (Mateyus 4:2-11, 24; Yohanes 14:30). Na wan koni fasi, Yesus ben tyari kon na krin san pina abi fu du nanga sondu, èn a ben sori na wan lobi-ati fasi taki Gado Kownukondre sa tyari frulusu kon fu ala ten (Markus 2:1-12; Lukas 11:2, 17-23). Wan heri pisi ten kaba, sma ben abi wan fowtu denki fu Gado, ma Yesus ben sori krin suma na en Tata trutru, èn a ben meki Gado nen bekènti na ala sma di ben wani abi wan krosibei banti nanga En.—Yohanes 17:6, 26.

Fu dati ede a no de fu fruwondru, taki awinsi kerki tiriman nanga politiek tiriman ben e frufolgu den, toku den disipel fu Yesus prati a krakti boskopu fu en esi-esi. Na ini sowan 30 yari nomo, Kresten gemeente ben kon de na ini Afrika, Asia, nanga Europa èn den ben e gro moro nanga moro (Kolosesma 1:23). Den tru tori di Yesus ben e fruteri ben de makriki fu frustan, èn na ini a heri Gran Kownukondre Rome den tori disi ben naki na ati fu sma di ben de opregti èn di ben abi sakafasi trutru.—Efeisesma 1:17, 18.

Ala den nyun disipel disi, pôtiwan nanga guduwan, ben abi difrenti kulturu, den ben e taki difrenti tongo, èn den ben komoto fu difrenti bribi. Sobun fa den ben o man kon na wán na ini „wán bribi”, soleki fa na apostel Paulus ben taki? (Efeisesma 4:5) San ben o meki den tan ’taki na ini wánfasi nanga makandra’, so taki pratifasi no ben o de na den mindri? (1 Korentesma 1:10) Fu di pratifasi lai na mindri sma di e kari densrefi Kresten na ini a ten disi, meki a bun fu go luku san Yesus srefi ben e leri sma.

Fa wánfasi kan de na mindri Kresten

Di Yesus ben de na krutu na fesi Pontius Pilatus, dan a ben sori san ben o meki taki wánfasi de na mindri Kresten. A ben taki: „Na fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid. Ibriwan sma di de na a sei fu a waarheid, e arki mi sten” (Yohanes 18:37). Fu dati ede, wan  prenspari sani di e meki taki den trutru disipel fu Krestes abi wánfasi na den mindri, na taki den e teki den leri fu Yesus èn sosrefi ala tra sani na ini Gado Wortu, Bijbel.—1 Korentesma 4:6; 2 Timoteyus 3:16, 17.

A no de fu taki dati den disipel fu Yesus ben o abi seryusu aksi, èn son leisi den no ben o agri nanga makandra. San ben o yepi den na den sortu momenti dati? Yesus ben taki: „Te a wan dati doro, a yeye fu waarheid, dan a sa tiri unu na ini ala waarheid, bika a no sa taki san ensrefi e prakseri, ma den sani di a e yere a sa taki, èn a sa taigi unu den sani di sa kon” (Yohanes 16:12, 13). Sobun, Gado en santa yeye ben o meki den tru disipel fu Yesus frustan a waarheid di Gado ben e tyari kon na krin safrisafri. Sosrefi, a yeye dati ben o meki den disipel sori den froktu fu en, soleki lobi, prisiri, nanga vrede, èn disi ben o yepi den fu tan na ini wánfasi nanga makandra.—Tori fu den Apostel 15:28; Galasiasma 5:22, 23.

Yesus no ben wani taki trobi nanga pratifasi kon na mindri den disipel fu en. A no ben gi den primisi tu fu fruklari den tru tori fu Bijbel soleki fa den feni bun, soso fu meki a fiti nanga a kulturu, noso a bribi fu den sma di den ben o miti. Na presi fu dati, tapu a lasti neti di a ben de nanga den, a begi fayafaya: ’A no gi den disi wawan mi e aksi, ma sosrefi gi den wan di e poti bribi na ini mi nanga yepi fu a wortu fu den, so taki den alamala kan de wán, neleki fa yu, Tata, de na ini wánfasi nanga mi èn mi de na ini wánfasi nanga yu, so taki den kan de sosrefi na ini wánfasi nanga wi, so taki grontapu kan bribi taki yu ben seni mi kon’ (Yohanes 17:20, 21). Sobun, sensi a ten di a Kresten bribi bigin teleki a ten fu wi, trutru wánfasi na ini yeye nanga waarheid ben o de wan marki di e sori krin suma na den disipel fu Krestes (Yohanes 4:23, 24). Toku a de so, taki den kerki na ini a ten disi no de wán, ma den prati. Fu san ede?

Fu san ede kerki prati

Fu taki en leti, a reide fu san ede sma na ini a ten disi di e kari densrefi Kresten, e bribi someni difrenti sani èn e du sani na someni difrenti fasi, na fu di den no hori densrefi na den leri fu Yesus. Wan skrifiman ben taki: „Neleki fa a ben de fositen kaba, na so den nyun Kresten na ini a ten disi e teki soso den leri fu Bijbel di e tyari wini gi den, èn den e weigri fu teki iniwan sani fu Bijbel di de teige den eigi kerki gwenti.” Na disi e pasa now trutru, soifri soleki fa Yesus nanga den apostel fu en ben taki na fesi.

Fu eksempre, Gado ben meki na apostel Paulus skrifi gi Timoteyus, wan tra opziener: „Bika wan pisi ten sa kon pe den no sa frudrage a gosontu leri, ma akruderi den eigi lostu, den sa tyari bun furu leriman kon makandra fu switi den yesi fu den; èn den sa drai den yesi puru fu waarheid èn den sa drai go na tori di no tru.” Den ben o man kori ala Kresten? Nôno. Paulus ben taki moro fara: „Ma hori yu frustan na wán na ini ala sani, nyan pina, du a wroko fu wan evangelie preikiman, du yu diniwroko dorodoro” (2 Timoteyus 4:3-5; Lukas 21:8; Tori fu den Apostel 20:29, 30; 2 Petrus 2:1-3). Timoteyus nanga tra getrow Kresten ben e libi akruderi a rai dati di e komoto fu Gado.

Te now ete, tru Kresten de wán

Neleki Timoteyus, tru Kresten na ini a ten disi e tan na ai fu di den e weigri fu teki den denki fu libisma abra, èn den e bribi soso den leri di skrifi na ini Bijbel (Kolosesma 2:8; 1 Yohanes 4:1). Neleki den fosi yarihondro Kresten, Yehovah Kotoigi e du a diniwroko fu den na ini moro leki 230 kondre. Na heri grontapu den e preiki a srefi boskopu fu Yesus, namku a bun nyunsu fu a Kownukondre. Luku fo prenspari fasi fa den e waka baka Yesus leki wán man, èn fa den e libi akruderi a tru Kresten bribi, awinsi pe den e libi.

Den sani di den e bribi, komoto fu Gado Wortu (Yohanes 17:17). Wan priester fu wan presi na ini Belgia ben skrifi fu den: „Wan sani di wi kan leri fu den [Yehovah Kotoigi] na taki den de klariklari fu arki Gado Wortu èn den abi a deki-ati fu gi kotoigi fu dati.”

Den e bribi taki Gado Kownukondre sa frulusu wi fu ala den problema na grontapu (Lukas 8:1). Na ini Barranquilla, wan foto na ini  Kolombia, wan Kotoigi ben taki nanga Antonio, di ben de wan fayafaya bakaman fu wan politiek partij. A Kotoigi no ben teki a sei fu a politiek partij fu Antonio, èn a no ben e pruberi fu sori en sortu tra politiek partij moro bun. Na presi fu dati, a pristeri Antonio nanga den sisa fu en wan bijbelstudie, sondro taki den ben abi fu pai fu dati. Heri esi, Antonio kon frustan taki Gado Kownukondre na a wan-enkri howpu gi den pôtisma na Kolombia èn na heri grontapu sosrefi.

Den e gi grani na a nen fu Gado (Mateyus 6:9). Maria ben de wan fayafaya Lomsusma di ben e libi na ini Australia, èn a fosi leisi di a miti nanga Yehovah Kotoigi, a gi den primisi fu sori en na ini Bijbel san na a nen fu Gado. Sortu krakti disi ben abi na en tapu? „A fosi leisi di mi si Gado nen na ini Bijbel, mi ai lon watra. A naki mi ati srefisrefi di mi kon frustan taki mi ben kan sabi Gado nen trutru èn taki mi ben kan kari en na en nen.” Maria tan studeri Bijbel, èn fu a fosi leisi na ini en libi a kon sabi suma na Yehovah trutru, èn a ben man kisi wan krosibei banti nanga en.

Lobi e tyari den kon na wán (Yohanes 13:34, 35). Wan koranti fu Kanada ben taki: „Awinsi sortu bribi yu abi, noso awinsi yu no de na ini wan bribi, yu sa musu fu prèise den 4500 Yehovah Kotoigi di ben wroko dei nanga neti na ini a wiki di pasa, fu bow wan kongreshal fu 2300 fokanti meter na ini Cassidy . . . Fu du so wan wroko sondro krutukrutu, sondro trobi, noso sondro fu suku biginen gi densrefi, na wan marki fu tru Kresten bribi” (The Ladysmith-Chemainus Chronicle).

Sobun, prakseri fu den buweisi disi. Den sabiman fu Krestenhèit, den zendeling fu den kerki, nanga den kerkisma e tan feti fu tyari wan kaba kon na a pratifasi na ini den kerki fu den, ma a tru Kresten bribi e tan go na fesi na heri grontapu. Iya, tru Kresten e tan du a wroko di den kisi fu du, namku fu preiki èn leri sma san skrifi na ini Gado Wortu (Mateyus 24:14; 28:19, 20). Efu yu de na mindri den wan di e „soktu èn geme” fu den ogri di e pasa now, èn efu a pratifasi na mindri den kerki fu Krestenhèit e trobi yu, dan wi e gi yu wan kari fu kon makandra nanga Yehovah Kotoigi fu anbegi a wan-enkri tru Gado, Yehovah, na ini Kresten wánfasi.—Esekièl 9:4; Yesaya 2:2-4.