Fa wi e sori taki wi lobi Gado

WAN sma no kan kisi moro lobi gi Gado te a leri sabi sani fu en. Soleki fa den futuboi fu Gado na heri grontapu e taki, dan trutru lobi gi Gado e kon moro tranga te wan sma e kon leri sabi den fasi fu Gado. Wan sma e kon kisi moro lobi gi Gado srefi, te a sabi san Gado lobi, san a no lobi, san a wani, èn san a e aksi fu wi.

Na wan lobi-ati fasi Yehovah gi wi en Wortu, Bijbel, pe a e sori wi suma na en. Drape wi e leri san Yehovah ben du na ini difrenti situwâsi. Neleki fa wan brifi fu wan lobiwan e gi wi furu prisiri, na so Bijbel e gi wi prisiri te wi e leri sabi nyun sani fu den fasi fu Yehovah.

Ma soleki fa wi si son tron na ini a preikiwroko fu wi, dan a no de so ala ten taki wan sma e kon kisi lobi gi Gado te a e leri sabi sani fu en. Yesus ben taigi wan tu Dyu di no ben sori warderi na ini a ten dati: „Unu e ondrosuku den Buku fu Bijbel, fu di unu e denki taki nanga yepi fu den unu sa kisi têgo libi; . . . ma mi sabi heri bun taki unu no abi lobi gi Gado” (Yohanes 5:39, 42). Son sma e leri yari langa fa Yehovah e du sani na wan lobi-ati fasi, ma toku den abi pikinso lobi gi en. Fu san ede? Den no e prakseri dipi fu den tru tori di den e leri. Kontrari fu dati, dan furu milyunmilyun reti-ati sma nanga suma wi e studeri Bijbel, e si taki den e tan kisi moro lobi gi Gado. Fu san ede? Fu di den sma disi waka baka na eksempre fu Asaf, soleki fa wi ben du dati tu. Na sortu fasi den du dati?

Denki dipi nanga tangi na ati

Asaf ben teki a bosroiti fu kon kisi moro lobi gi Yehovah na ini en ati. A ben skrifi: „Nanga mi ati mi sa sori taki mi e broko mi ede . . . mi sa memre den wroko fu Yah; bika mi sa memre den tumusi moi wroko di yu du sensi owruten. Fu tru, mi sa denki dipi fu ala yu wroko, mi sa  prakseri furu fu den sani du yu e du” (Psalm 77:6, 11, 12). Lobi gi Gado sa kon moro tranga na ini wan sma en ati, te a e denki dipi fu den sani di Yehovah du, soleki fa a psalm skrifiman ben du.

Boiti dati, te wi e memre den sani wi di ondrofeni na ini a diniwroko di wi e du gi Yehovah, dan dati e tranga a banti di wi abi nanga en. Na apostel Paulus ben taki dati wi e „wroko makandra” nanga Gado, èn a matifasi di kan gro na mindri wrokoman na wan spesrutu matifasi (1 Korentesma 3:9). Te wi e sori nanga den sani di wi e taki èn nanga den sani di wi e du, taki wi lobi Yehovah, dan a e warderi disi èn dati e prisiri en ati (Odo 27:11). Dan, te wi e aksi Yehovah fu yepi wi èn te a e yepi wi fu lusu wan problema di wi abi, dan wi sabi taki a de nanga wi, èn a lobi di wi abi gi en e kon moro tranga.

A matifasi na mindri tu sma e kon moro tranga te den e sori san den e firi gi makandra. Na so a de tu nanga a matifasi di wi abi nanga Yehovah. Te wi e taigi Yehovah fu san ede wi gi wisrefi abra na en, dan dati e meki wi kisi moro lobi gi en. Dati o meki wi prakseri den wortu fu Yesus: „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan èn nanga ala yu krakti” (Markus 12:30). San wi kan du so taki wi kan tan lobi Yehovah nanga wi heri ati, nanga wi heri sili, nanga wi heri frustan, èn nanga ala wi krakti?

Lobi Yehovah nanga wi heri ati

Te den Buku fu Bijbel e taki fu na agersi ati fu wi, dan dati e sori go na a fasi fa wi de; dati wani taki den sani di wi wani, a fasi fa wi e tyari wisrefi, èn a fasi fa wi e denki. Sobun, fu lobi Yehovah nanga wi heri ati wani taki dati a moro prenspari sani di wi wani du na fu plisi Gado (Psalm 86:11). Wi e sori taki wi abi a sortu lobi disi gi en te wi e tyari wisrefi na wan fasi di a feni bun. Wi e meki muiti fu waka baka Gado fu di wi e ’tegu gi san ogri èn e hori fasti na san bun’.—Romesma 12:9.

A lobi di wi abi gi Gado abi krakti tapu a fasi fa wi e denki fu ala sani. Leki eksempre, kande wi e feni taki a wroko fu wi no makriki fu du noso taki a e teki furu fu wi prakseri. Ma disi na a moro prenspari sani gi wi? Nôno. Fu di wi lobi Yehovah nanga wi heri ati, meki a moro prenspari sani di wi e du na taki wi e du diniwroko gi Gado. Sosrefi wi wani plisi wi papa nanga mama, wi trowpatna, èn wi wrokobasi. Ma wi e sori taki wi lobi Yehovah nanga wi heri ati te wi e suku fu plisi en na a fosi presi. Te yu e luku en bun, dan na en abi a reti fu kon na a fosi presi na ini wi libi.—Mateyus 6:24; 10:37.

Lobi Yehovah nanga wi heri sili

Na ini den Buku fu Bijbel a wortu „sili” furu tron e sori go na wi leki sma, noso na a libi di wi abi. Sobun, fu lobi Yehovah nanga  wi heri sili wani taki dati wi e gebroiki wi libi fu prèise en èn fu sori taki wi lobi en trutru.

A no de fu taki dati kande wi wani du tra sani na ini wi libi, soleki fu leri du wan wroko, fu drai wi eigi bisnis, noso fu sorgu wi osofamiri. Ma aladi wi e du den sani dati, dan wi e sori taki wi lobi Yehovah nanga wi heri sili te wi e du sani na a fasi fa en wani, èn te e wi hori tra sani na a yoisti presi na ini wi libi. Na so fasi wi e „tan suku a kownukondre nanga en regtfardikifasi fosi” (Mateyus 6:33). Te wi e anbegi Yehovah nanga wi heri sili dan dati wani taki dati wi de fayafaya tu. Wi e sori Yehovah taki wi lobi en te wi e preiki a Kownukondre boskopu fayafaya, te wi e gi piki na den konmakandra di e gi trawan deki-ati, noso te wi e yepi wi Kresten brada nanga sisa. Na ini ala san wi e du, wi e tan ’du a wani fu Gado nanga wi heri sili’.—Efeisesma 6:6.

Yesus ben sori taki a lobi Gado nanga en heri sili fu di a no ben teri ensrefi moro. A ben poti a wani fu Gado na a fosi presi na ini en libi, èn den sani di a ben abi fanowdu ben de na a di fu tu presi. Yesus gi wi a kari fu waka baka na eksempre fu en. A ben taki: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn tan waka na mi baka” (Mateyus 16:24, 25). Fu no teri wisrefi moro wani taki dati wi e gi wisrefi abra na Gado. A wani taki dati a lobi di wi abi gi Gado de so tranga taki wi gi wisrefi na en so taki a tron wi eiginari. Na so a ben de tu nanga wan Israelsma na ini Bijbel ten. A sma ben lobi a masra fu en so te taki a ben si en leki wan plekti fu wroko leki wan srafu gi a masra fu ala ten (Deuteronomium 15:16, 17). Te wi gi wi libi abra na Yehovah, dan dati na wan buweisi di e sori krin taki wi lobi en.

Lobi Yehovah nanga wi heri frustan

Fu lobi Yehovah nanga wi heri frustan wani taki dati wi e meki furu muiti fu kon frustan den fasi fu Yehovah, den sani di a abi na prakseri fu du, nanga den sani di a e aksi fu wi (Yohanes 17:3; Tori fu den Apostel 17:11). Wi e sori lobi gi Yehovah, te wi e du ala san wi man fu gebroiki a koni fu wi fu yepi trawan so taki den kan kon lobi Yehovah tu. Boiti dati, te wi e meki muiti fu gi moro bun leri, dan wi e sori lobi gi Yehovah tu. Na apostel Petrus ben gi a deki-ati: „Un frustan musu de srekasreka” (1 Petrus 1:13). Boiti dati, wi e meki muiti fu sori taki wi e broko wi ede nanga trawan, spesrutu nanga wi tra brada nanga sisa di e dini Gado tu. Wi sabi na ini sortu situwâsi den de èn wi e si o ten a fiti fu prèise den, noso o ten a de fanowdu fu trowstu den.

Wi e sori taki wi lobi Yehovah nanga wi heri frustan te wi e pruberi fu si sani na a fasi fa en e si den. Te wi e teki wan bosroiti, dan wi e hori na prakseri fa Yehovah e denki fu a tori èn wi e frutrow taki a fasi fa en e du sani na a moro bun fasi (Odo 3:5, 6; Yesaya 55:9; Filipisma 2:3-7). Ma aladi wi e tan sori lobi gi Gado, dan na sortu fasi wi kan gebroiki wi krakti?

Lobi Yehovah nanga ala wi krakti

Furu yonguwan na ini a Kresten gemeente e gebroiki a krakti fu den fu prèise Yehovah (Odo 20:29; Preikiman 12:1). Wan fasi fa furu Kresten yonguwan e sori taki den lobi Yehovah nanga ala den krakti, na fu di den e teki prati na a pionierwroko, noso a furuten diniwroko. Furu mama e teki prati na a diniwroko te den pikin fu den de na skoro. Getrow owruman e go luku den skapu, ma boiti dati den e sorgu gi a tanbun fu den eigi osofamiri tu. Na so fasi den e sori taki den lobi Yehovah nanga ala den krakti (2 Korentesma 12:15). Yehovah e gi krakti na den wan di e howpu tapu en. Disi e meki taki den kan sori lobi gi en fu di den e prèise en nanga a krakti di den abi.—Yesaya 40:29; Hebrewsma 6:11, 12.

Te wi e meki muiti, dan a lobi di wi abi gi Gado sa gro. Fu dati ede wi e tan teki ten fu denki dipi. Wi e memre san Yehovah du gi wi èn fu san ede wi musu gi wisrefi fu dini en. Leki sondu bakapikin fu Adam, wi noiti no kan de warti fu kisi „den sani di Gado sreka gi den wan di lobi en”, ma wi kan sori Yehovah taki wi lobi en nanga wi heri sili. Meki wi tan du disi!—1 Korentesma 2:9.

[Prenki na tapu bladzijde 20]

Wi e sori taki wi lobi Gado nanga den sani di wi e du