A fasi fa Bijbel e si sani

San a wani taki fu abi lobi gi gudu?

LIBISMA gebore nanga a firi fu frustan yeye afersi èn nanga a firi fu anbegi Gado. Toku Gado meki libisma, nanga materia sani. Fu dati ede den abi materia sani fanowdu, èn den kan prisiri fu materia sani. Son Kresten abi bun furu gudu. Ma disi wani taki dati den abi lobi gi gudu èn taki den no e poti prakseri na yeye afersi? Na a tra sei, a de so taki pôtisma no man kisi lobi gi gudu so makriki, èn na pôtisma wawan e denki fu yeye afersi?

A no de fu taki dati yu e frustan taki te wan sma abi furu gudu, dan dati no wani taki ete dati a abi lobi gi gudu. Luku den Bijbel eksempre di e kon now di sa sori san a wani taki trutru fu abi lobi gi gudu èn san wi kan du fu sorgu taki a sani dati no pori a yeyefasi fu wi.

Den ben abi gudu nanga glori

Na ini Bijbel ten, wan tu getrow dinari fu Gado ben abi gudu nanga glori. Fu eksempre, Abraham „ben abi bun furu meti, nanga solfru nanga gowtu” (Genesis 13:2). Sma ben sabi Yob leki „a moro bigi man fu ala den Owstusei Kondre” fu di a ben abi furu meti nanga furu futuboi (Yob 1:3). Son kownu fu Israel, soleki David nanga Salomo ben kisi furu gudu.—1 Kroniki 29:1-5; 2 Kroniki 1:11, 12; Preikiman 2:4-9.

Na ini a gemeente fu a fosi yarihondro yu  ben abi gudu Kresten (1 Timoteyus 6:17). Bijbel e taki dati Lidia ben de ’wan uma di ben e seri lila krosi. A ben de fu a foto Tiatira èn a ben de wan anbegiman fu Gado’ (Tori fu den Apostel 16:14). Lila ferfi nanga den krosi di den ben e ferfi nanga dati, ben de diri sani. Furu tron na gudusma nanga sma di ben abi hei posisi ben e weri den krosi disi. Sobun, a kan taki Lidia ben de wan gudu uma tu.

Na a tra sei, son anbegiman fu Yehovah ini Bijbel ten ben pôti srefisrefi. Rampu, ongoloku, nanga dede meki taki son famiri ben kon pôti (Preikiman 9:11, 12). A ben tranga trutru gi den pôtiwan fu si fa tra sma ben e prisiri nanga den gudu di den ben abi! Ma toku den no ben kan taki dati den gudusma na sma di abi lobi gi gudu, noso taki sma sondro gudu ben e anbegi Gado moro bun. Fu san ede? Luku san a wani taki fu abi lobi gi gudu trutru.

A lobi gi moni

Wan wortubuku e taki dati wan sma di abi lobi gi gudu „na wan sma di e prakseri moro fu materia sani leki fu yeye afersi èn a no e broko en ede fu kisi sabi fu tra sani”. Sobun, a lobi di wan sma abi gi gudu abi fu du nanga den sani di a wani, sani di de prenspari gi en, nanga sani di a e prakseri ala ten. Disi sa de krin fu si te wi sa luku den tu Bijbel eksempre di e kon now.

Yehovah ben piri-ai gi Baruk, di ben e dini leki sekretarsi fu profeiti Yeremia. Baruk ben pôti fu di a situwâsi na ini Yerusalem ben takru èn fu di a ben de wan mati fu Yeremia, wan sma di den Dyu no ben lobi. Ma toku Yehovah ben taki: „Ma fu yu sei, yu e tan suku bigi sani gi yusrefi. No tan suku den.” A kan taki Baruk ben kon kisi lobi gi gudu, èn taki a ben bigin prakseri fa trawan ben abi en bun na materia sei. Yehovah ben memre Baruk taki a ben o frulusu en fu a pori di ben o kon abra Yerusalem, ma a no ben o kibri den sani di a ben abi.—Yeremia 45:4, 5.

Yesus ben gi wan agersitori fu wan man di ben abi a srefi fasi fu denki fu materia sani. A man disi ben e prakseri soso den gudu fu en na presi fu gebroiki den sani di a abi, fu du moro na ini a diniwroko gi Gado. A guduman ben taki: „Mi sa broko den maksin fu mi èn bow moro bigi wan, . . . èn mi sa taigi mi sili: ’Sili, yu lai furu bun sani gi furu yari; no broko yu ede nanga noti, nyan, dringi èn meki prisiri.’ Ne Yesus taki: „Ma Gado ben taigi en: ’Yu di no e denki, a neti disi ete den e aksi yu sili fu yu. Dan suma sa kisi den sani di yu ben tyari kon na wan?’ Na so a e go nanga wan sma di e kibri gudu gi ensrefi, ma di no gudu te a abi fu du nanga Gado.”—Lukas 12:16-21.

San wi kan leri fu den tu eksempre disi? Den e leri wi taki te wan sma abi furu sani, dan dati no wani taki ete dati a sma abi lobi gi gudu. Wan sma abi lobi gi gudu te a e poti ala en prakseri na materia sani. Na apostel Paulus ben taki: „Den sma di abi a fasti bosroiti fu kon gudu, e kon ini wan tesi èn wan trapu èn furu don èn takru lostu, di e meki sma fadon go na ini pori. Bika a lobi gi moni na wan rutu fu ala sortu takru sani, èn fu di sonwan e feti na baka a lobi disi, meki den gowe libi a bribi èn den sutu densrefi na den heri skin nanga furu pen” (1 Timoteyus 6:9, 10). San e tyari problema kon na a fasti bosroiti di wan sma abi fu kon gudu èn a lobi di wan sma abi gi materia sani.

A de fanowdu fu ondrosuku wisrefi

Kresten e luku bun fu no kisi lobi gi gudu, awansi den gudu noso pôti. Furu gudu kan bedrigi wan sma èn a kan meki taki a no e poti prakseri moro na yeye afersi (Mateyus 13:22). Sondro fu wi sabi dan wi kan puru wi prakseri na yeye afersi èn go poti dati na materia sani. Dati kan abi takru bakapisi.—Odo 28:20; Preikiman 5:10.

Fu dati ede a bun taki Kresten e ondrosuku san na den moro prenspari sani na ini den libi èn na san den e poti prakseri moro furu. Awansi wan sma gudu noso pôti, sma di e poti prakseri na yeye afersi e pruberi fu du san Paulus ben taki. Den e pruberi „fu no poti a howpu fu den tapu gudu di no e gi seikerfasi, ma tapu Gado di e gi wi ala sani bogobogo fu prisiri fu den”.—1 Timoteyus 6:17-19.