„Du a wroko fu wan preikiman fu a bun nyunsu”
„Du a wroko fu wan preikiman fu a bun nyunsu”
„No meki sani bruya yu, . . . du a wroko fu wan preikiman fu a bun nyunsu.”—2 TIMOTEYUS 4:5.
1. Sortu komando Yesus ben gi den bakaman fu en?
NA HERI grontapu sma e fruteri fu a nen fu Yehovah nanga den prakseri fu en. Disi e pasa fu di a pipel fu Gado di gi densrefi abra na en e du san Yesus Krestes ben taigi den bakaman fu en, di a taki: „Go na ala kondre èn meki sma tron disipel, èn dopu den na ini a nen fu a Tata, fu a Manpikin èn fu a santa yeye. Leri den fu du ala san mi taigi unu.”—Mateyus 28:19, 20.
2. Sortu rai na owruman Timoteyus ben kisi? San na wán fasi fa Kresten owruman kan du den diniwroko dorodoro?
2 Den fosi yarihondro disipel fu Yesus ben si a komando dati leki wan seryusu sani. Leki eksempre, na apostel Paulus ben gi a Kresten owruman Timoteyus a deki-ati: „Du a wroko fu wan preikiman fu a bun nyunsu, du yu diniwroko dorodoro” (2 Timoteyus 4:5). Wan fasi fa wan owruman kan du a diniwroko fu en na ini a ten disi, na te a o preiki fayafaya fu a Kownukondre èn te a abi a gwenti fu du a preikiwroko. Fu eksempre, a gemeente bukustudie-opziener abi a tumusi moi grani fu teki fesi na ini a preikiwroko èn fu leri trawan fu du a wroko dati tu. Paulus ben tyari en frantwortu fu preiki a bun nyunsu èn a leri trawan fa fu du a diniwroko dati.—Tori fu den Apostel 20:20; 1 Korentesma 9:16, 17.
Fayafaya preikiman fu a bun nyunsu na ini owruten
3, 4. San Filipus ondrofeni di a ben e wroko leki wan preikiman fu a bun nyunsu?
3 Sma ben sabi den fosi Kresten leki fayafaya preikiman. Luku na eksempre fu Filipus, di ben de wan preikiman fu a bun nyunsu. En ben de wan fu den ’seibi man di ben abi wan bun nen èn di ben abi santa yeye nanga koni’; den ben teki en fu yepi prati nyanyan ibri dei gi den Kresten uma fu Yerusalem di no ben abi masra moro, namku den wan di ben e taki Grikitongo nanga den wan di ben e taki Hebrewtongo (Tori fu den Apostel 6:1-6). Baka di a spesrutu wroko dati ben kon na wan kaba èn di frufolgu ben meki taki ala den Kresten, boiti den apostel, ben panya go na ala sei, dan Filipus go na Samaria. Drape a meki a bun nyunsu bekènti èn a santa yeye ben gi en a krakti fu puru ogri yeye na sma tapu èn fu dresi den sma di ben lan noso malengri. Furu sma fu Samaria ben teki a Kownukondre boskopu èn den teki dopu. Di den apostel na ini Yerusalem yere disi, dan den seni Petrus nanga Yohanes go na Samaria so taki den bribiman di ben teki dopu no solanga ete, ben kan kisi santa yeye.—Tori fu den Apostel 8:4-17.
4 Baka dati, a yeye fu Gado tyari Filipus fu go miti wan eunuch fu Etiopia di ben de na pasi fu go na Gasa. Baka di Filipus fruklari a profeititori fu Yesaya finifini, dan a ’prenspari man disi fu Etiopia di ben wroko gi Kandase, na umakownu fu den Etiopiasma’, bigin bribi na ini Yesus Krestes èn a teki dopu (Tori fu den Apostel 8:26-38). Baka dati Filipus go na Asdod, dan a go na Sesarea, aladi a „tan preiki a bun nyunsu na ala den foto” di a miti na pasi (Tori fu den Apostel 8:39, 40). Fu tru, a ben gi wan tumusi bun eksempre fu di a ben wroko leki wan preikiman fu a bun nyunsu!
5. Fa sma ben sabi den fo umapikin fu Filipus?
5 Sowan 20 yari baka dati, Filipus ben e du a diniwroko fayafaya ete na ini Sesarea. Di Paulus nanga Lukas ben e tan na en oso, dan a „ben abi fo umapikin, yonguwenke, di ben e taki profeititori” (Tori fu den Apostel 21:8-10). A no de fu taki dati den ben kisi bun leri fu den sani di abi fu du nanga Gado, den ben abi faya gi a diniwroko, èn den ben abi a grani srefi fu taki profeititori. Te papa nanga mama na ini a ten disi abi faya gi a diniwroko, dan dati kan abi krakti tapu den manpikin nanga umapikin fu den. Disi kan meki taki den pikin disi kan poti en leki marki fu tron sma di e du a preikiwroko fayafaya, den heri libi langa.
Fayafaya preikiman fu a bun nyunsu na ini a ten disi
6. Sortu bun bakapisi den fosi yarihondro preikiman fu a bun nyunsu ben abi?
6 Na ini a prenspari profeititori fu Yesus Krestes di ben e sori go na a ten fu wi èn na a ten fu a kaba, a ben taki: „A bun nyunsu musu preiki fosi na ini ala kondre” (Markus 13:10). A kaba ben o kon baka te a bun nyunsu preiki „na heri grontapu” (Mateyus 24:14). Di Paulus nanga tra preikiman fu a fosi yarihondro, preiki a bun nyunsu, dan furu sma tron bribiman, èn den ben e opo nyun gemeente na furu presi na ini a Gran Kownukondre Rome. Owruman di ben e dini na ini den gemeente dati ben e wroko makandra nanga den brada nanga sisa fu den na ini a preikiwroko, èn den ben e sorgu taki a wroko dati ben kan doro na ala sei. A wortu fu Yehovah tan gro èn a ben kon moro furu na ini den dei dati. So a de tu na ini a ten disi pe milyunmilyun Kotoigi fu Yehovah e wroko leki preikiman fu a bun nyunsu (Tori fu den Apostel 19:20). Yu teki yu bosroiti kaba fu de wan fu den koloku sma dati di e prèise Yehovah?
7. San Kownukondre preikiman e du na ini a ten disi?
7 Furu Kownukondre preikiman na ini a ten disi e gebroiki den okasi di den abi fu du moro na ini a preikiwroko. Dusundusun fu den go na ini a zendelingwroko, èn someni hondro dusun fu den de na ini a furuten diniwroko leki gewoon pionier nanga yepipionier. Boiti dati, yu abi man, uma, nanga pikin di e dini leki fayafaya Kownukondre preikiman sosrefi! Fu tru, a heri pipel fu Yehovah e kisi bigi blesi te den e dini en skowru na skowru leki Kresten preikiman fu a bun nyunsu.—Sefanya 3:9.
8. Sortu wroko e du na ini a ten disi fu poti wan marki na tapu sma? Suma e du a wroko dati?
8 Gado gi den salfu bakaman fu Yesus a frantwortu fu preiki a bun nyunsu na heri grontapu. A grupu fu den „tra skapu” fu Krestes di e gro dei fu dei, e wroko makandra nanga den fu du a preikiwroko disi (Yohanes 10:16). Den profeititori e sori taki a wroko disi di kan kibri a libi fu sma, de neleki wi e poti wan marki na tapu na fesi-ede fu den sma di e soktu èn e geme fu den tumusi ogri sani di e pasa nownowde. Heri esi den ogriwan sa kisi pori. Ma fosi a ten dati doro, dan wi abi a tumusi bigi grani fu fruteri den sma fu grontapu a waarheid di kan gi den libi!—Esekièl 9:4-6, 11.
9. Fa nyunwan kan kisi yepi na ini a diniwroko?
9 Efu wi e teki prati na a preikiwroko wan pisi ten kaba, dan a no de fu taki dati wi man yepi nyunwan na ini a gemeente. Ten na ten, wi kan aksi den fu go nanga wi na ini a preikiwroko. Den wan di e dini leki owruman sa wani fu du ala san den man fu yepi den brada nanga sisa fu den fu kon tranga na yeye fasi. A fasi fa owruman di abi sakafasi e span densrefi kan yepi trawan trutru fu tron fayafaya preikiman fu a bun nyunsu di e meki froktu.—2 Petrus 1:5-8.
Preiki oso fu oso
10. Sortu eksempre Krestes nanga den bakaman fu en gi na ini a diniwroko?
10 Yesus Krestes ben de wan tumusi moi eksempre gi den bakaman fu en na ini a fasi fa a du a preikiwroko. Na ini a Wortu fu Gado wi e leisi fu a diniwroko fu Krestes nanga den apostel fu en, taki: „A bigin go na ala den foto nanga den dorpu fu preiki a bun nyunsu fu Gado kownukondre èn fu meki disi bekènti. Den twarfu apostel ben de nanga en tu” (Lukas 8:1). Ma fa fu den apostel srefi dan? Baka di den kisi santa yeye tapu a Pinksterfesa fu 33 G.T., dan „ibri dei den ben tan gi sma leri na ini a tempel èn sosrefi oso fu oso, aladi den ben fruteri sma a bun nyunsu fu Yesus, a Krestes”.—Tori fu den Apostel 5:42.
11. San na apostel Paulus ben e du na ini a diniwroko fu en, soleki fa Tori fu den Apostel 20:20, 21, e sori?
11 Fu di Paulus ben de wan fayafaya preikiman fu a bun nyunsu, meki a ben kan taigi den Kresten owruman fu a gemeente Efeise, taki: „Mi no ben draidrai fu fruteri unu ala san ben bun èn fu leri unu na publiki èn oso fu oso tu.” San Paulus ben du di a ben ’e gi sma leri oso fu oso’? Na suma a ben e go? A ben e go na a oso fu sma di ben e anbegi Yehovah makandra nanga en, fu di a ben e go luku den brada nanga sisa fu gi den deki-ati? Nôno, bika a e fruteri moro fara: „Ma mi fruteri den Dyu nanga Grikisma finifini taki den musu sori Gado taki den abi berow èn mi fruteri den sosrefi taki den musu bribi na ini wi Masra Yesus” (Tori fu den Apostel 20:20, 21). Furu tron a de so taki sma di gi densrefi abra na Yehovah kaba, no abi fu leri moro taki den musu ’abi berow èn taki den musu bribi na ini wi Masra Yesus’. Paulus ben go oso fu oso fu gi leri na sma di no ben de na bribi ete; a leri den fu abi berow èn fu sori taki den abi bribi. Dati ben de na okasi sosrefi di a ben e gebroiki fu gi leri na den Kresten owruman fu Efeise. Na a fasi dati Paulus teki na eksempre fu Yesus; a du sani soleki fa Yesus ben e du sani.
12, 13. San a pipel fu Yehovah du fu kan kisi a reti fu preiki, soleki fa Filipisma 1:7 e taki?
12 A kan de wan tyalensi gi wi fu go preiki oso fu oso. Fu eksempre, son sma e atibron te wi e naki na a doro fu den fu fruteri den wan Bijbel boskopu. Wi no e go na sma fu meki den atibron. Toku, na oso fu oso diniwroko na wan sani di abi fu du nanga Bijbel, èn fu di wi lobi Gado nanga den sma na wi sei, meki wi e gi kotoigi na a fasi disi (Markus 12:28-31). Fu kan kisi a reti fu preiki oso fu oso, wi ’feti gi a bun nyunsu èn wi seti en soleki fa lantiwet taki’. Wi tyari wan lo afersi go na fesi krutu, srefi na fesi a Moro Hei Krutu fu Amerkankondre (Filipisma 1:7). Pikinmoro ala ten a hei krutu dati gi wi leti. Wan fu den bosroiti di den ben teki, na a wan di e kon now:
13 „Someni yari kaba sma abi a gwenti fu prati traktaat fu kerkitori fu panya na evangelie; a gwenti disi bigin sensi di sma bigin meki masyin fu druk buku. Someni yari langa a ben de wan prenspari wrokosani gi difrenti kerkigrupu. Na ini a ten disi, sma e du na evangeliewroko na a fasi disi tu. Difrenti kerkigrupu e tyari na Evangelie go na a oso fu dusundusun sma èn na so fasi den e suku fu meki sma teki a bribi fu den. . . . Wan fu den prenspari pisi fu a Wet fu Amerkankondre e sori taki a sani disi prenspari neleki a reti di sma abi fu anbegi na ini den kerki, nanga a preiki di sma e preiki na ini kerki.”—Murdock v. Pennsylvania, 1943.
Fu san ede wi musu tan preiki?
14. San kan de a moi bakapisi fu a diniwroko fu wi?
14 Furu sani de fu san ede wi musu preiki oso fu oso. Ibri leisi te wi e naki na a doro fu wan ososma, dan wi e pruberi fu prani wan waarheid siri. Te wi e tyari gobaka, dan a de leki wi e go fu nati a siri. A bakapisi fu dati kan moi srefisrefi, fu di Paulus ben skrifi: „Mi ben prani, Apolos ben gi watra, ma Gado ben tan meki sani gro” (1 Korentesma 3:6). Sobun, meki wi tan ’prani èn tan gi watra’ nanga a frutrow taki Yehovah sa ’meki sani gro’.
15, 16. Fu san ede wi e tan naki na sma doro ibri tron baka?
15 Wi e wroko leki preikiman fu a bun nyunsu fu di wi sabi taki furu sma de fu lasi den libi. Te wi e preiki, dan wi kan kibri wi eigi libi èn a libi fu den wan di e arki wi (1 Timoteyus 4:16). Efu wi ben sa sabi taki wan sma kan lasi en libi, dan san wi ben o du? Wi ben o meki pikinso muiti nomo fu yepi en? Nôno, kwetikweti! Sobun, fu di wi sabi taki den ososma kan kisi frulusu efu wi go taki nanga den, meki wi e tan naki na den doro ibri tron baka. A situwâsi fu sma e kenki doronomo. Wan sma di abi tumusi furu fu du, so taki a no man arki yu, kan de klariklari fu arki a Bijbel boskopu na wan tra okasi. A kan taki wan tra memre fu na osofamiri di wi no ben miti ete, kon na a doro, èn dati kan meki taki wi kisi na okasi fu taki nanga en fu Bijbel.
16 Ma a no soso a situwâsi fu den ososma kan kenki. Son leisi a fasi fa den e denki kan kenki tu. Leki eksempre, te wan sma lasi wan lobiwan na dede, dan dati kan naki en ati fu arki a Kownukondre boskopu. Wi e suku fu trowstu a sma, fu meki a kon sabi taki a abi Gado fanowdu, èn wi wani sori en fa a kan doro a marki dati.—Mateyus 5:3, 4.
17. San na a moro prenspari sani di e meki taki wi e du a preikiwroko fu wi?
17 A moro prenspari sani di e meki taki wi e preiki oso fu oso, noso di e meki taki wi e du a Kresten diniwroko na iniwan tra fasi, na a tranga firi di wi abi fu meki a nen fu Yehovah bekènti (Exodus 9:16; Psalm 83:18). A e tyari wini trutru te a preikiwroko fu wi e yepi sma di lobi waarheid nanga regtfardikifasi fu tron sma di e prèise Yehovah! „Un yonkuman nanga un nyunwenke tu, un owru man makandra nanga den boi”, na so a psalm skrifiman ben singi. „Meki den prèise a nen fu Yehovah, bika en nen wawan hei srefisrefi. A wartifasi fu en hei moro grontapu nanga hemel.”—Psalm 148:12, 13.
A preikiwroko abi wini gi ibriwan fu wi
18. Fa wi kan kisi wini te wi e du a preikiwroko?
18 Te wi e du a wroko fu wan preikiman fu a bun nyunsu, dan dati e tyari wini gi wi na difrenti fasi. Te wi e go oso fu oso fu preiki a bun nyunsu, dan dati e yepi wi fu kon abi sakafasi, spesrutu te sma no e gi wi wan switikon. Efu wi wani de sma di e du a preikiwroko na wan yoisti fasi, dan wi musu de neleki Paulus, di ’tron ala sani gi ala sortu sma, so taki a ben kan frulusu wan tu fu den’ (1 Korentesma 9:19-23). Sani di wi e ondrofeni na ini a diniwroko e yepi wi fu sabi fa fu taki nanga sma sondro fu hati den. Te wi e frutrow tapu Yehovah èn te wi e denki bun fosi wi taki wan sani, dan wi e teki a rai fu Paulus di ben taki: „Unu musu taki na wan switi fasi ala ten, iya, neleki nanga sowtu, so taki unu sabi fa unu musu piki ibriwan sma.”—Kolosesma 4:6.
19. Fa a santa yeye e yepi sma di de evangelie preikiman?
19 A preikiwroko e meki sosrefi taki wi e frutrow dorodoro tapu a santa yeye fu Gado (Sakaria 4:6). A bakapisi fu dati na taki den froktu fu a yeye, namku ’lobi, prisiri, vrede, langa pasensi, bun-ati, bunfasi, bribi, safri-ati, nanga dwengi yusrefi’, e kon na krin na ini a diniwroko fu wi (Galasiasma 5:22, 23). A abi krakti tapu a fasi fa wi e handri nanga sma, fu di te wi meki a yeye tiri wi, dan dati e meki taki wi sori lobi, a e meki wi prisiri èn a e meki wi suku vrede. A e meki wi abi langa pasensi nanga switifasi. Wi o sori bunfasi, bribi, nanga safri-ati èn wi o dwengi wisrefi te wi e preiki a bun nyunsu.
20, 21. San na wan tu blesi di wi e kisi te wi e tan wroko fayafaya leki preikiman fu a bun nyunsu?
20 Wan tra blesi di wi e kisi leki preikiman fu a bun nyunsu, na taki wi e leri fu frustan fa tra sma e firi. Te sma e fruteri wi san na den problema fu den, efu na siki, efu den no abi wroko, noso efu den abi problema na oso sei, dan wi no e bigin gi den ala sortu rai, ma wi e sori den tekst na ini Bijbel di kan de wan deki-ati gi den èn di kan trowstu den. Wi e broko wi ede nanga sma di kon breni na yeye fasi, ma di e sori taki den lobi regtfardikifasi (2 Korentesma 4:4). A de wan blesi trutru fu kan yepi sma na yeye fasi te den „abi a yoisti denki fu a têgo libi”!—Tori fu den Apostel 13:48.
21 Te wi e teki prati na a preikiwroko doronomo, dan dati e yepi wi fu poti wi prakseri na afersi fu Gado (Lukas 11:34). Fu tru, dati kan tyari wini gi wi, fu di efu wi no ben sa du dati, dan wi kan meki grontapu kori wi fu go feti baka gudu, soleki fa furu sma abi a gwenti fu du. Na apostel Yohanes ben gi Kresten a deki-ati: „No lobi grontapu nanga den sani fu grontapu. Efu wan sma lobi grontapu, dan a lobi fu a Tata no de na ini en. Bika ala sani di de fu grontapu, a lostu fu a skin nanga a lostu fu den ai nanga a prodo di wan sma e prodo nanga den gudu di a abi, no komoto fu a Tata, ma den sani disi komoto fu grontapu. Boiti dati, grontapu e pasa gowe nanga den lostu fu en, ma a sma di e du a wani fu Gado, e tan fu têgo” (1 Yohanes 2:15-17). Te wi abi furu fu du leki preikiman fu a bun nyunsu na ini a diniwroko fu Masra, dan dati e yepi wi fu no lobi grontapu.—1 Korentesma 15:58.
Kibri yu gudu na ini hemel
22, 23. (a) Sortu gudu den Kresten di e du a wroko fu wan preikiman fu a bun nyunsu, e kibri gi densrefi? (b) Fa na artikel di e kon o yepi wi?
22 Te wi e du a Kownukondre preikiwroko fayafaya, dan dati e tyari wini kon. Dati na san Yesus ben sori di a taki: „No kibri yu gudu moro na grontapu, pe woron nanga frustu kan pori en èn pe fufuruman kan kon fufuru en. Ma kibri yu gudu na ini hemel pe woron nanga frustu no man pori en èn pe fufuruman no man go fufuru en. Bika pe yu gudu de, na drape yu ati sa de tu.”—Mateyus 6:19-21.
23 Meki a de so taki wi tan kibri gudu na ini hemel, fu di wi sabi taki wan moro bigi grani no de, leki fu de Kotoigi fu a Moro Hei Masra Yehovah (Yesaya 43:10-12). Te wi e du a wroko fu wi leki dinari fu Gado, dan a kan taki wi e firi neleki a Kresten uma fu 90 yari di ben fruteri fu den someni yari di a du diniwroko gi Gado: „Mi e taki Yehovah tangi dati a gebroiki mi nanga ala den fowtu fu mi fu du a diniwroko fu en ala den yari disi, èn mi e begi en fayafaya taki a sa de mi lobi-ati Papa fu têgo.” Efu wi e si a matifasi fu wi nanga Gado leki wan warti sani tu, dan a no de fu taki dati wi wani du a wroko fu wan preikiman fu a bun nyunsu na wan fasi di bun dorodoro. Na artikel di e kon sa sori wi fa wi kan du wi diniwroko dorodoro.
San yu ben sa piki?
• Fu san ede wi musu du a wroko fu wan preikiman fu a bun nyunsu?
• San yu kan taki fu a wroko fu den preikiman fu a bun nyunsu fu fositen èn fu den wan na ini a ten disi?
• Fu san ede wi e preiki oso fu oso?
• Sortu wini a abi gi yusrefi te yu e du a wroko fu wan preikiman fu a bun nyunsu?
[Aksi fu a tori disi]
[Prenki na tapu bladzijde 10]
Sma de na ini a ten disi di de preikiman fu a bun nyunsu neleki Filipus nanga den umapikin fu en
[Prenki na tapu bladzijde 14]
Fa yusrefi e kisi wini te yu e prati a bun nyunsu nanga trawan?