Wan fesa di prenspari gi yu

DI Yesus Krestes ben de na grontapu, a ben seti wan fesa di e gi Gado grani. Disi ben de a wan-enkri kerki seremonia di Yesus srefi ben taigi den bakaman fu en fu hori. A ben de na Avondmaal fu Masra.

Prakseri now taki yu de drape e luku san e pasa leti bifo a Memrefesa, sondro taki sma e si yu. Yesus nanga den apostel fu en kon makandra na ini wan sodrokamra na ini Yerusalem fu hori a Paskafesa. Den kaba nyan a Paska nyanyan; dati ben de wan losi pikin skapu, bita gruntu, brede sondro srudeki, èn den dringi redi win. Yesus e taigi Yudas Iskariot, na apostel di no de getrow, fu opo gowe èn heri esi Yudas o tori en Masra (Mateyus 26:17-25; Yohanes 13:21, 26-30). Yesus de soso nanga den 11 apostel fu en. Mateyus na wan fu den.

Soleki fa Mateyus ben si nanga en eigi ai, dan Yesus ben seti na Avondmaal fu Masra so: „Yesus teki wan brede [sondro srudeki] èn baka di a blesi a brede, a broko en, dan a gi den disipel. A taki: ’Un teki a brede, nyan. A brede disi na mi skin.’ A teki wan kan [nanga win] tu, èn baka di a taki Gado tangi, a gi den disipel. A taki: ’Un alamala musu dringi en; bika disi na mi „brudu fu a frubontu”, di o kanti trowe gi furu sma, so taki den kan kisi pardon fu sondu.’”—Mateyus 26:26-28.

Fu san ede Yesus ben seti na Avondmaal fu Masra? Èn di a ben e du dati, dan fu san ede a gebroiki brede sondro srudeki nanga redi win? A de so taki ala den bakaman fu Krestes ben musu nyan fu a brede èn dringi fu a win? Omeni leisi den ben musu hori a fesa disi? Èn a fesa disi prenspari gi yu trutru?