Yu e tan poti prakseri na a paiman?

GLAUCOOM na wan siki di meki taki bun furu sma kon breni. A siki disi e gro safrisafri na ini wan sma ai. Na a bigin, a e meki taki a sma no man si sani nanga en sei-ai moro. Efu datra no e dresi a siki, dan a siki kan gro teleki a sma no man si srefi san de na fesi en. Te fu kaba, a sma kan kon breni.

Neleki fa wi kan kon breni safrisafri sondro fu sabi, na so wi kan kon breni tu na wan moro takru fasi; wi kan kon breni na yeye fasi. Fu dati ede, a de tumusi prenspari fu tan si yeye afersi leki a moro prenspari sani na ini wi libi.

Tan poti prakseri na a paiman

Wan fu „den sani di wi no kan si” nanga wi trutru ai, na a tumusi moi paiman fu têgo libi di Yehovah pramisi den loyaalwan fu en (2 Korentesma 4:18). A no de fu taki dati a moro prenspari reide fu san ede Kresten e dini Gado, na fu di den lobi en (Mateyus 22:37). Ma toku, Yehovah wani taki wi musu fruwakti a paiman disi fayafaya. A wani taki wi musu si en leki wan Papa di lobi fu gi sani èn „di e pai den wan di e suku en seryusu” (Hebrewsma 11:6). Fu dati ede, den wan di sabi Gado trutru èn di lobi en, abi trutru warderi gi den blesi di a pramisi, èn den e angri fu si fa den blesi sa kon tru.—Romesma 8:19, 24, 25.

Furu sma di e leisi a tijdschrift disi nanga a tijdschrift Ontwaakt!, lobi fu luku den prenki di e sori fa a Paradijs grontapu sa de. A no de fu taki dati wi no sabi soifri fa a libi o de na ini a Paradijs grontapu, èn den prenki na ini den buku na soso fu sori pikinso san skrifi na ini bijbeltekst soleki Yesaya 11:6-9. Toku, wan Kresten uma taki: „Te mi e si den prenki na ini A Waktitoren nanga Ontwaakt! di e sori fa a Paradijs o de, dan mi e luku den finifini, neleki te wan sma e luku fowtow fu moi presi pe yu kan go nanga fakansi. Mi e meki muiti fu si misrefi kaba na ini a Paradijs, fu di mi e howpu trutru fu de drape na a ten di Gado wani.”

Na apostel Paulus ben abi a srefi sortu denki di a kisi ’a kari fu go na hemel’. A no ben e du leki a ben kisi a paiman kaba, bika a ben abi fu tan getrow te na a kaba. Ma a ben tan ’langa ensrefi go na fesi fu kisi den sani di ben de na en fesi’ (Filipisma 3:13, 14). Na a srefi fasi, Yesus horidoro te na dede na wan pina-udu „fu a prisiri ede di ben poti na en fesi”.—Hebrewsma 12:2.

Oiti yu prakseri taki kande yu no o go na ini a nyun grontapu? A de wan bun sani te wi no frutrow tumusi tapu wisrefi, bika wi sa kisi a paiman fu libi soso te wi e tan getrow te na a kaba (Mateyus 24:13). Ma efu wi e du ala muiti fu doro den markitiki fu Gado, dan wi kan abi a frutrow taki wi sa kisi a paiman. Memre taki Yehovah „no wani taki wan sma e kisi pori, ma a wani taki ala sma musu abi berow” (2 Petrus 3:9). Efu wi e frutrow tapu Yehovah, dan a sa yepi wi fu doro a marki di wi poti na wi fesi. Iya,  Yehovah a no wan Gado di e suku fowtu na den sma di e du muiti fu plisi en, soso fu meki taki den no go na ini a paradijs.—Psalm 103:8-11; 130:3, 4; Esekièl 18:32.

Now di wi sabi fa Yehovah e denki fu en pipel, dan dati e gi wi howpu, wan sani di de nèt so prenspari leki bribi (1 Korentesma 13:13). A Griki wortu di vertaal nanga „howpu” na ini Bijbel abi fu du nanga ’a tan di wan sma e tan fruwakti fayafaya taki wan bun o pasa’. Na apostel Paulus ben abi so wan howpu na prakseri di a taki: „Wi wani taki ibriwan fu unu musu sori a srefi faya fu wroko, fu kan de seiker fu a howpu te na a kaba, so taki unu no e kon lesi, ma tron sma di e waka na baka den wan di nanga bribi èn nanga pasensi e kisi den pramisi” (Hebrewsma 6:11, 12). Luku taki efu wi e tan dini Yehovah getrow, dan wi kan de seiker taki a howpu fu wi sa kon tru. Tra fasi leki den furu sani di sma fu grontapu e howpu na tapu, a howpu fu wi „no e meki wi lasi-ati” (Romesma 5:5). Sobun, fa wi kan tan abi wan tranga howpu? Fa wi kan tan si a howpu disi krin na wi fesi?

Fa wi kan kon si moro krin na yeye fasi

Wi trutru ai no man luku tu sani finifini na a srefi ten. Na so a de tu nanga wi ai na yeye fasi. Te wi e tan poti prakseri na den sani fu a disiten seti fu sani, dan safrisafri wi no o poti so furu prakseri moro na a nyun grontapu di Gado pramisi. Baka wan pisi ten, wi o si en frafra, wi no o feni en wan moi sani moro èn te fu kaba wi no o si en srefisrefi. Dati ben o de wan sari sani! (Lukas 21:34) Fu dati ede, a de prenspari taki wi tan hori wi ai ’krin’ fu di wi e poti ala wi prakseri na Gado Kownukondre èn na a paiman fu têgo libi!—Mateyus 6:22.

A no ala ten a makriki fu tan hori wi ai krin. Wi musu poti prakseri na den aladei problema fu wi, èn tra sani soleki tesi kan de na wi pasi tu. Te wi de na ini den sortu situwâsi disi, dan fa wi kan tan poti prakseri na a Kownukondre èn na a nyun grontapu di Gado pramisi, sondro taki wi e frigiti fu du tra sani di de fanowdu tu? Meki wi luku dri fasi fa wi kan du dati.

Studeri Gado Wortu ibri dei. Te wi e leisi Bijbel doronomo èn te wi e studeri den buku di e yepi wi fu frustan Bijbel, dan disi sa yepi wi fu tan poti prakseri na yeye afersi. A kan taki wi e studeri Gado Wortu furu yari langa kaba, ma toku wi musu tan go doro fu du dati, neleki fa wi musu tan teki trutru nyanyan fu man tan na libi. Wi no e tapu fu nyan soso fu di wi nyan omeni dusundusun leisi kaba. Sobun, awinsi o bun wi sabi Bijbel, toku wi musu tan teki yeye nyanyan fu Bijbel doronomo, so taki a howpu, a bribi, nanga a lobi fu wi kan tan tranga.—Psalm 1:1-3.

Prakseri dipi nanga tangi na ati fu san skrifi na ini Gado Wortu. Fu san ede a de prenspari fu denki dipi fu den sani dati? Tu reide de. A fosiwan, na taki te wi e denki dipi fu den sani di wi leisi, dan disi o yepi wi fu frustan den moro bun èn wi sa kisi moro warderi gi den. A di fu tu reide, na taki te wi e denki dipi, dan dati o yepi wi fu no frigiti Yehovah, den wondruwroko fu en, nanga a howpu di a gi wi. Fu gi yu wan eksempre: Den  Israelsma di ben gowe libi Egepte makandra nanga Moses, ben si nanga den eigi ai taki Yehovah abi tumusi bigi makti. Den ben man si tu fa Yehovah kibri den na wan lobi-ati fasi aladi a ben e tyari den go na a kondre di a ben pramisi den. Ma toku, fa den Israelsma doro na ini a sabana fu go na a Pramisi Kondre, den bigin krutukrutu, èn disi e sori taki den no ben abi bribi (Psalm 78:11-17). Fa dati du kon?

Na presi taki a pipel ben poti prakseri na Yehovah èn na a tumusi moi howpu di a ben gi den, den bigin suku fu abi wan switi libi wantewante èn den ben e broko den ede soso nanga sani na skin fasi. Aladi den Israelsma ben si nanga den eigi ai sortu bigi wondru Yehovah du, toku furu fu den lasi bribi èn den bigin krutukrutu. „Heri esi den frigiti den sani di [Yehovah] du”, na so Psalm 106:13 e taki. Fu di a pipel fu a ten dati ben frigiti fu espresi san Yehovah ben du, meki den no kisi na okasi moro fu go na ini a Pramisi Kondre.

Sobun, te yu e leisi Bijbel, noso buku di e yepi yu fu frustan Bijbel, dan teki ten fu denki dipi fu san yu leisi. Disi de tumusi prenspari fu tan gosontu na yeye fasi èn fu gro na yeye fasi. Fu eksempre, te yu e leisi Psalm 106 di wi kari dyonsrode, dan prakseri dipi fu a fasi fa Yehovah de. Luku omeni pasensi nanga sari-ati a ben abi gi den Israelsma. Prakseri fa a ben du ala san a man fu yepi den fu doro na ini a Pramisi Kondre. Luku sosrefi fa ibri tron baka den ben e opo densrefi teige en. Firi a hebi pen nanga sari fu Yehovah, aladi a ben e du ala muiti fu sori sari-ati nanga pasensi gi wan pipel di no ben hori en na prakseri èn di no ben abi warderi srefisrefi. Boiti dati, te wi e denki dipi fu vers 30 nanga 31, pe wi e leisi fa Pinehas ben abi a deki-ati nanga a fasti bosroiti fu du san regtfardiki, dan wi e kisi a dyaranti taki Yehovah no e frigiti den loyaalwan fu en èn taki a e blesi den pasa marki.

Gebroiki Bijbel gronprakseri na ini yu libi. Te wi e hori wisrefi na Bijbel gronprakseri, dan wisrefi e kon si taki a rai fu Yehovah bun srefisrefi. Odo 3:5, 6 e taki: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.” Prakseri fa a yayolibi di furu sma e libi, meki taki den kisi problema na frustan sei, problema nanga den firi fu den, èn problema na skin fasi sosrefi. Den sortu sma disi e gi densrefi fu abi prisiri fu wan tu momenti nomo, ma baka dati den e kisi fu du nanga den takru bakapisi fu san den du, èn dati kan de furu yari langa, son leisi den heri libi langa srefi. Heri tra fasi leki den sma disi, den wan di e waka ’a smara pasi’ man ondrofeni pikinso kaba fa a libi o de na ini a nyun seti fu sani, èn disi e gi den deki-ati fu tan na tapu a pasi di e go na libi.—Mateyus 7:13, 14; Psalm 34:8.

A kan de wan muilek sani fu libi akruderi Bijbel gronprakseri. Son leisi te wi de na ini wan muilek situwâsi, dan kande wi e denki fu teki wan bosroiti di no e kruderi nanga Bijbel gronprakseri fu di a gersi leki dati o lusu a problema moro esi. Fu eksempre, te wi abi moni problema, dan wi ben kan denki fu poti Kownukondre afersi tapu a di fu tu presi na ini wi libi. Ma  den wan di e handri nanga bribi èn di e tan poti prakseri na yeye afersi, e kisi a dyaranti taki te fu kaba ’sani sa waka bun nanga den sma di e frede a tru Gado’ (Preikiman 8:12). Ten na ten, a kan pasa taki wan Kresten abi fu wroko moro langa leki fa a gwenti, ma noiti a musu tron leki Esau di no ben lobi yeye afersi kwetikweti èn di ben e si den leki sani di no prenspari srefisrefi.—Genesis 25:34; Hebrewsma 12:16.

Yesus ben sori krin sortu frantwortu wi abi leki Kresten. Wi musu ’tan suku a kownukondre nanga Gado en regtfardikifasi fosi’ (Mateyus 6:33). Te wi e du dati, dan Yehovah sa sori taki a lobi wi neleki fa wan papa lobi en pikin, fu di a o sorgu taki wi kisi san wi abi fanowdu na skin fasi. A no wani srefisrefi taki wi broko wi ede nanga den sani dati, bika ensrefi taki dati a sa sorgu fu den. Te wi e broko wi ede fu soso, dan dati kan de leki wi abi a glaucoom-siki na yeye fasi. Efu wi no e suku fu lusu a problema disi, dan safrisafri wi o broko wi ede soso nanga sani na skin fasi, èn te fu kaba wi o kon breni na yeye fasi. Efu wi e tan na ini a situwâsi dati, dan a dei fu Yehovah sa kon na wi tapu „leki wan trapu”. Dati ben o de wan sari sani!—Lukas 21:34-36.

Tan poti prakseri neleki Yosua

Meki wi tan poti prakseri na a tumusi moi Kownukondre howpu, aladi wi e poti den tra frantwortu fu wi na a yoisti presi na ini wi libi. Te wi tan abi a gwenti fu studeri, fu denki dipi fu san wi leisi, èn fu gebroiki Bijbel gronprakseri na ini wi libi, dan wi o tan abi wan tranga howpu neleki Yosua. Di a tyari Israel go na ini a Pramisi Kondre, dan a taki: „Unu sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu. No wán wortu fu den tan sondro fu a kon tru.”—Yosua 23:14.

Meki a Kownukondre howpu gi yu krakti nanga prisiri na ini yu libi, fu di yu e meki a abi krakti tapu den prakseri fu yu, a fasi fa yu e firi, den bosroiti fu yu, èn den sani di yu e du.—Odo 15:15; Romesma 12:12.

[Prenki na tapu bladzijde 21]

Oiti yu prakseri taki kande yu no o go na ini a nyun grontapu?

[Prenki na tapu bladzijde 22]

Te yu e studeri Bijbel, dan a de tumusi prenspari fu denki dipi fu san yu leisi

[Prenki na tapu bladzijde 23]

Tan poti prakseri na Kownukondre afersi