Te sani o pasa na grontapu soleki fa Gado wani

DI Yesus ben leri den disipel fu en fu begi: ’Meki sani pasa na ini hemel èn na grontapu soleki fa yu wani’, dan a ben taki nanga ondrofeni fu di a ben libi na ini hemel fosi nanga en Tata (Mateyus 6:10; Yohanes 1:18; 3:13; 8:42). Bifo Yesus ben tron wan libisma, a ben sabi a ten di ala sani na ini hemel èn na grontapu ben e pasa soleki fa Gado wani. Dati ben de prisiri ten. Ala sani ben e waka bun.—Odo 8:27-31.

Den fosi libisani di Gado ben meki, na den yeye, „den engel fu en, di tranga srefisrefi, di e du san a e taki”. Teleki now ete den de „dinari fu en, di e du a wani fu en” (Psalm 103:20, 21). A tru taki ibriwan fu den ben de fri fu taki èn fu du san den ben wani? Iya, na ini a bigin di grontapu ben seti, dan „den manpikin [disi] fu Gado ben bigin bari wan prisiri babari” (Yob 38:7). A prisiri babari fu den ben sori taki ibriwan fu den ben lobi san Gado ben abi na prakseri fu du, èn den alamala ben agri nanga san a ben wani.

Baka di Gado seti grontapu, dan a sreka en so taki libisma ben kan libi na tapu, èn te fu kaba a meki a fosi man nanga uma (Genesis, kapitel 1). A ben warti fu meki wan prisiri babari gi a sani disi tu? Bijbel e taki: „Baka dati Gado ben si ala san a ben meki èn, luku! a ben de heri bun”, iya, a ben meki ala sani sondro fowtu.—Genesis 1:31.

San Gado ben wani gi wi fosi papa nanga mama èn sosrefi gi den bakapikin fu den? Soleki fa Genesis 1:28 e taki, dan dati ben de wan heri bun sani tu: „Gado ben blesi den èn Gado ben taigi den: ’Un meki pikin èn un kon furu èn un furu grontapu èn un poti en na un ondro, èn poti na un ondro den fisi fu se nanga den hemel mekisani di e frei, nanga ibri libi mekisani di e buweigi na grontapu.’” Fu man du a tumusi moi wroko dati, dan wi fosi papa nanga mama, èn sosrefi den bakapikin fu den, ben sa musu tan na libi, iya, fu têgo. Noti no ben e sori taki rampu, kruktudu, sari, noso dede ben o miti sma.

Disi ben de a ten di sani ben e pasa na ini hemel èn na grontapu soleki fa Gado wani. Den sma di ben e du a wani fu en ben o kisi bigi prisiri leki bakapisi fu dati. Ma san kon pasa?

Wantronso wan problema opo kon di ben sa kan meki taki sani no ben o pasa soleki fa Gado ben wani. Ma dati no ben wani taki dati Gado no ben o man lusu a problema dati. Toku, a sani dati ben de a bigin fu wan langa pisi ten fu sari di ben o meki taki furu sma no ben o sabi soifri san Gado wani gi libisma. Wi alamala e ondrofeni a sari disi. San ben de a problema?

A wani fu Gado na a ten di sma opo densrefi teige en

Wán fu den yeye „manpikin fu Gado” ben prefuru fu gens san Gado ben abi na prakseri gi libisma, fu di a ben wani kisi wini gi ensrefi. O moro a yeye manpikin disi ben e prakseri fu a sani disi, o moro a ben denki taki a ben o abi bun bakapisi, èn o moro a ben kon lobi a prakseri dati (Yakobus 1:14, 15). Kande a ben denki taki efu a ben o man kisi den fosi tu sma fu arki en na presi fu Gado, dan Gado ben o abi fu gi pasi taki a tiri tu. A kan taki a yeye manpikin  disi ben de nanga a denki taki Gado no ben o kiri Adam nanga Eva, bika efu Gado ben du dati, dan a heri prakseri fu En no ben o kon tru. Na presi fu dati, Yehovah Gado ben o abi fu kenki wan tu sani; a ben o abi fu hori na prakseri taki den libisma di A meki ben o gi yesi now na a yeye manpikin disi. A fiti taki a sma di ben opo ensrefi teige Gado ben kisi a nen Satan bakaten, fu di dati wani taki „Gensman”.—Yob 1:6.

Satan du soleki fa a ben wani, èn a go na a uma. A kisi en so fara fu no arki Gado èn fu du san ensrefi ben wani. Satan taigi na uma: ’Yu no sa dede kwetikweti. . . . Yu sa de leki Gado, fu di yu sa sabi bun nanga ogri’ (Genesis 3:1-5). Na uma ben si a sani disi leki wan okasi fu kon fri, èn a ben bribi taki a ben o abi wan moro bun libi te a ben gi yesi na Satan. Bakaten a kisi en masra so fara fu du a srefi leki en.—Genesis 3:6.

A no disi Gado ben wani gi Adam nanga Eva. Na densrefi ben wani dati. Èn dati ben o tyari bun takru bakapisi kon. Gado ben taigi den kaba taki den ben o dede efu den ben trangayesi en (Genesis 3:3). Efu den no ben teki a tiri fu Gado, dan a libi fu den no ben o waka bun (Yeremia 10:23). Boiti dati, den ben o tron sondu sma, èn now ala den bakapikin fu den ben o kisi sondu èn den ben o dede (Romesma 5:12). Satan no ben man du noti fu sorgu taki den sani disi no pasa nanga den.

A fasi fa sani ben waka now meki taki Gado kenki a prakseri di a ben abi gi libisma nanga grontapu? Nôno (Yesaya 55:9-11). Ma san ben pasa now, na taki den meki aksi opo kon di ben musu kisi wan piki. Disi na wan tu fu den aksi dati: A tru taki libisma kan ’de leki Gado, fu di den sabi bun nanga ogri’, soleki fa Satan ben taki? Fu taki en tra fasi, a de so taki efu wi e kisi nofo ten, dan wisrefi kan bosroiti na tapu ala kontren fu wi libi san bun èn san ogri, san e tyari wini kon èn san e tyari takru bakapisi kon? Wi musu gi yesi na Gado ala ten? A tru taki a tiri fu en na a moro bun wan? A de fanowdu fu du soifri san En wani? San yu ben o piki?

Wán fasi nomo ben de fu gi piki tapu den aksi disi na fesi ala libisani di abi frustan, èn dati ben de: Fu gi den wan di ben wani wan libi sondro Gado, na okasi fu pruberi fu meki den libi waka bun sondro a tiri fu en. Efu Gado ben o kiri den sma disi, dan den aksi di ben opo kon no ben o kisi piki. Den aksi ben o kisi piki efu libisma ben o kisi na okasi fu libi soleki fa densrefi wani, bika te fu kaba a ben o de krin fu si sortu bakapisi so wan fasi fu libi abi. Gado sori taki disi ben de a fasi fa a ben o lusu a problema, èn fu dati ede a taigi na uma taki a ben o kisi pikin. Na so fasi wan libisma famiri ben o kon de. A bun taki Gado teki a bosroiti dati, bika na fu dati meki wi de na libi tide!—Genesis 3:16, 20.

Ma disi no ben wani taki dati Gado ben o gi pasi taki libisma nanga a yeye manpikin di ben opo ensrefi teige en ben kan du soso san densrefi wani. Gado tan hori a reti di a ben abi fu tiri hemel nanga grontapu, èn a no kenki a prakseri di a ben abi gi grontapu (Psalm 83:18). A tyari disi kon na krin di a taki dati a ben o masi a sma di ben meki Adam nanga Eva opo densrefi teige en, èn taki a ben o tyari wan kaba kon na ala den takru sani di pasa leki bakapisi fu dati (Genesis 3:15). Sobun, sensi a bigin a libisma famiri ben kisi a pramisi taki sani ben o kon bun baka.

Na a srefi ten, wi fosi papa nanga mama hari  densrefi èn sosrefi den bakapikin di den ben o kisi, puru na ondro a tiri fu Gado. Efu Gado ben musu kibri den gi den sari bakapisi fu a bosroiti di den ben teki, dan a ben o abi fu dwengi den ibri leisi baka fu du a wani fu en. Dati ben o de a srefi leki te Gado no gi den na okasi fu libi sondro a tiri fu en.

A no de fu taki, dati sma ben kan bosroiti gi densrefi efu den ben o teki Gado leki a tiriman fu den. Den ben kan leri san Gado ben wani fu libisma na ini a pisi ten disi, èn den ben kan du ala muiti fu gi yesi na en (Psalm 143:10). Ma disi no ben wani taki dati problema no ben o miti den, bika dati ben o tan pasa solanga a no ben kon na krin efu libisma kan tiri densrefi sondro Gado.

Na a bigin kaba, a kon na krin san na den bakapisi te sma e teki den eigi bosroiti. Kain, a fosi gebore manpikin fu a libisma famiri, ben kiri en brada Abel fu di „den sani di ensrefi ben du ben ogri, ma den sani di en brada ben du ben de regtfardiki” (1 Yohanes 3:12). Disi no ben de Gado wani, bika Gado ben warskow Kain èn a strafu en bakaten (Genesis 4:3-12). Kain ben bosroiti fu tyari ensrefi soleki fa a ben wani. A du san Satan ben gi en deki-ati fu du, èn na so fasi a „ben komoto fu na ogriwan”. Tra sma ben du a srefi tu.

Na ini den moro leki 1500 yari sensi libisma de na grontapu, dan „grontapu ben kon pori na ini na ai fu a tru Gado, èn grontapu ben kon furu nanga ogridu” (Genesis 6:11). Wan sani ben musu du wantewante so taki a heri grontapu no ben o pori gowe. Gado du san ben de fanowdu fu di a tyari wan frudu kon na heri grontapu èn a kibri a wan-enkri regtfardiki famiri di ben de na libi ete. Dati ben de Noa, en wefi, den manpikin fu en, nanga den wefi fu den (Genesis 7:1). Wi alamala na bakapikin fu den.

Sensi a ten fu Noa, Gado sorgu taki den wan di wani kon sabi trutru san na a wani fu en kan kisi tiri fu en. A gi en santa yeye na getrow man so taki den ben kan skrifi den leri fu en na tapu papira gi libisma di ben wani taki a tiri den. Den leri disi skrifi na ini Bijbel (2 Timoteyus 3:16). Na wan lobi-ati fasi a gi pasi taki getrow libisma e kon kisi wan banti nanga en èn taki den man tron en mati srefi (Yesaya 41:8). Èn a gi libisma a krakti di den ben abi fanowdu fu horidoro te den ben e kisi fu du nanga den muilek tesi di libisma ondrofeni na ini den hondrohondro yari disi di den libi sondro a tiri fu Gado (Psalm 46:1; Filipisma 4:13). Wi kan breiti trutru taki Gado gi wi a yepi disi!

’Meki ala sani pasa soleki fa yu wani’

Ma den sani di Gado du gi libisma teleki now, a no ala san a ben abi na prakseri gi den. A Kresten apostel Petrus ben skrifi: „Ma wi e fruwakti nyun hemel nanga wan nyun grontapu, soleki fa a ben pramisi, èn drape regtfardiki fasi o tan” (2 Petrus 3:13). Den wortu disi abi fu du nanga wan nyun tirimakti di sa tiri libisma èn a abi fu du sosrefi nanga wan nyun libimakandra di sa de na ondro a tirimakti dati.

A profeiti Danièl ben gebroiki wortu di de krin fu frustan, di a skrifi: „Na ini den dei fu den kownu dati, a Gado fu hemel sa opo wan kownukondre di noiti no sa kisi pori. . . . A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu” (Danièl 2:44). A profeititori disi e sori taki wan kaba sa kon na a disiten seti fu sani pe sani no e waka bun, èn taki a Kownukondre, noso tirimakti fu Gado sa teki a presi fu en. Disi na bun nyunsu trutru! Ala den feti di e feti èn a denki di sma e denki densrefi nomo, e meki taki grontapu lai nanga ogridu èn taki a e pori. Ma wan dei, ala den sani disi no sa de moro.

O ten den sani disi o pasa? Den disipel fu Yesus ben aksi: „O ten den sani disi o pasa, èn san o de a marki fu yu denoya èn fu a kaba fu a grontapu sistema disi?” Wan fu den sani di Yesus taki di a piki den, ben de: „A bun nyunsu disi fu a kownukondre o preiki gi ala sma na heri grontapu, so taki sma fu ala kondre kan yere dati, èn dan a kaba o kon.”—Mateyus 24:3, 14.

Ala sma sabi taki a preikiwroko disi e du na heri grontapu. A musu de so taki yu si sma e du a wroko disi na ini a birti fu yu. Professor  Charles S. Braden skrifi na ini a buku fu en: „Den Kotoigi fu Yehovah gi kotoigi na heri grontapu trutru. . . . Nowan enkri tra kerki grupu na grontapu, boiti den Yehovah Kotoigi, de so fayafaya èn abi so wan fasti bosroiti fu pruberi fu panya a bun nyunsu fu a Kownukondre.” Den Kotoigi e meki a bun nyunsu disi bekènti fayafaya na ini moro leki 230 kondre èn na ini sowan 400 tongo. Noiti ete a wroko disi ben e du na heri grontapu. A de wan fu den furu buweisi di e sori taki a ten e doro now taki a Kownukondre musu teki a presi fu libisma tirimakti.

A Kownukondre fu san Yesus ben taki dati sma ben o preiki fu en, na a srefiwan di a leri wi fu begi gi: ’Meki yu kownukondre kon. Meki sani pasa soleki fa yu wani, na ini hemel, èn na grontapu’ (Mateyus 6:10). Iya, na a Kownukondre dati Gado sa gebroiki fu du san a abi na prakseri, noso san a wani, gi libisma nanga grontapu.

San dati wani taki? Meki Openbaring 21:3, 4 piki na aksi dati: „Mi yere wan tranga sten di ben komoto fu a kownusturu, e taki: ’Luku! A tenti fu Gado de na den libisma, èn Gado o de na den mindri, den o de en pipel. Gado srefi o de na den mindri. A o figi ala watra puru na den ai; dede no sa de moro, èn nowan sari noso krei noso pen no sa de moro. Den fositen sani no de moro.’” Na a ten dati, den sani na grontapu èn na ini hemel, iya, ala sani, sa pasa trutru soleki fa Gado wani. * Yu no ben o wani de drape tu?

[Futuwortu]

[Prenki na tapu bladzijde 5]

Rampu kon fu di sma wani libi sondro a tiri fu Gado