Yu kan meki Gado firi prisiri

A DE so trutru taki wi kan abi krakti tapu a fasi fa Gado e firi? Gado man firi prisiri? Son sma e taki dati Gado na wan krakti nomo. Ma wi kan fruwakti taki wan krakti kan firi prisiri? Kwetikweti. Ma luku san Bijbel e taki fu Gado.

„Gado na wan Yeye”, na so Yesus Krestes ben taki (Yohanes 4:24). Wan yeye na wan libisani di de tra fasi leki libisma. Aladi libisma no man si wan yeye, toku a abi wan skin, „wan yeye skin” (1 Korentesma 15:44; Yohanes 1:18). Bijbel e taki fu Gado neleki a abi wan libisma skin, fu di a e taki dati Gado abi ai, yesi, anu, nanga tra sani. * Gado abi wan nen tu, namku Yehovah (Psalm 83:18). Sobun, a Gado fu Bijbel na wan yeye sma (Hebrewsma 9:24). „En na a libi Gado èn a Kownu fu ten di no skotu.”—Yeremia 10:10.

Fu di Yehovah na wan trutru sma di de na libi, meki a man denki èn a man du sani. A e sori den fasi nanga den firi fu en, a e sori san a lobi èn san a no lobi. Fu taki en leti, na ini Bijbel wan lo sani skrifi di e sori san e plisi en èn san no e plisi en. A tru taki den gado nanga den popki di libisma srefi meki, e sori den fasi nanga den maniri fu den mekiman fu den, ma na almakti Gado, Yehovah, na a Mekiman fu den firi di a poti na ini libisma.—Genesis 1:27; Yesaya 44:7-11.

A no de fu taki dati Yehovah na „a koloku Gado” (1 Timoteyus 1:11). Boiti taki A e prisiri nanga den moi sani di a meki, a e prisiri sosrefi fu du san a abi na prakseri. Nanga yepi fu a profeiti Yesaya, Yehovah e taki: ’Mi sa du ala san e gi mi prisiri . . . Na so mi taki, èn na so a sa pasa tu. Na mi seti en, èn na mi sa du en sosrefi’ (Yesaya 46:9-11). A psalm skrifiman ben singi: „Yehovah sa prisiri nanga den sani di a du” (Psalm 104:31). Ma ete wan tra sani de di e gi Gado prisiri. Gado e taki: „Sori taki yu koni, mi manpikin, èn prisiri mi ati” (Odo 27:11). Prakseri san disi wani taki: Wi kan meki Gado firi prisiri!

Fa wi kan prisiri na ati fu Gado

Luku fa a famiri-edeman Noa ben prisiri na ati fu Yehovah. Noa „ben feni bun na ini Yehovah ai” fu di „a ben sori fu de sondro fowtu na mindri den sma fu en ten”. Heri tra fasi leki den ogrisma fu a ten dati, Noa ben e bribi èn a ben e gi yesi na Gado. Disi ben e plisi Gado so te, taki Bijbel e taki dati „Noa ben waka nanga a tru Gado” (Genesis 6:6, 8, 9, 22). „Nanga bribi Noa . . . ben sori taki a ben abi frede gi Gado èn a ben bow wan ark fu kibri na osofamiri fu en”  (Hebrewsma 11:7). Yehovah ben prisiri nanga Noa èn a blesi en nanga en osofamiri fu di A hori den na libi na ini a muilek pisi ten dati fu libisma historia.

A famiri-edeman Abraham sosrefi ben sabi heri bun fa Yehovah e firi. Wan sani di e sori krin taki a ben sabi fa Gado e denki, na di Yehovah taigi en taki a ben o pori Sodom nanga Gomora fu di den sma drape ben e libi wan doti libi. Abraham ben sabi Yehovah so bun, taki a ben sabi seiker taki Gado noiti no ben o pori a regtfardikiwan makandra nanga na ogriwan (Genesis 18:17-33). Furu yari baka dati, Abraham du san Gado ben taigi en, èn „pikinmoro a gi Isak leki ofrandi”, bika „a ben sabi taki Gado ben man gi en wan opobaka” (Hebrewsma 11:17-19; Genesis 22:1-18). Abraham ben sabi heri bun fa Gado e firi, èn a ben sori taki a ben abi wan tranga bribi èn taki a ben e gi yesi na Gado. Fu dati ede, „den ben e kari en ’Yehovah mati’”.—Yakobus 2:23.

Wan tra man di ben e meki muiti fu prisiri na ati fu Gado, na Kownu David fu owruten Israel. Yehovah ben taki fu en: „Mi e prisiri nanga David, a manpikin fu Isai, èn a sa du ala san mi wani” (Tori fu den Apostel 13:22). Fosi David ben go feti nanga a bigi-skin man Goliat, a poti ala en frutrow tapu Gado, èn a taigi Kownu Saul fu Israel: „Yehovah, di frulusu mi fu na anu fu a lew èn fu na anu fu a beer, na en sa frulusu mi fu na anu fu a Filistiaman disi.” Fu di David ben frutrow tapu Yehovah, meki Yehovah blesi en èn a meki David kiri Goliat (1 Samuel 17:37, 45-54). David no ben wani nomo taki den sani di a ben du ben musu de wan prisiri gi Yehovah, a ben wani sosrefi taki Yehovah prisiri nanga ’den wortu fu en mofo nanga den dipi prakseri fu en ati’.—Psalm 19:14.

Fa a de nanga wi? Fa wi kan plisi Yehovah? O moro wi e kon sabi fa Gado e firi, o moro wi o kon sabi san wi kan du fu prisiri na ati fu Gado. Fu dati ede, te wi e leisi Bijbel, a de prenspari taki wi e meki muiti fu kon sabi fa Gado e firi, so taki wi ’sa kon furu nanga a soifri sabi fu a wani fu en ini ala koni nanga frustan fu sani di abi fu du nanga Gado, so taki wi kan waka na wan fasi di warti gi Yehovah, fu plisi en dorodoro’ (Kolosesma 1:9, 10). Te wi kisi sabi, dan dati sa yepi wi fu kisi moro bribi. Disi de tumusi prenspari bika „sondro bribi wan sma no man plisi [Gado] na wan bun fasi” (Hebrewsma 11:6). Iya, te wi e meki muiti fu kon abi wan tranga bribi èn fu libi soleki fa Yehovah wani, dan wi kan prisiri en ati. Na a srefi ten wi musu luku bun fu no meki Yehovah ati firi sari.

No meki Gado firi sari

A tori fu a ten fu Noa e sori taki libisma kan meki Yehovah firi sari. Na a ten dati, „grontapu ben kon furu nanga ogridu. Sobun, Gado ben si a grontapu èn luku! a ben pori, bika ala skin ben pori den libi na grontapu”. Fa Gado ben e firi di a ben e luku fa libisma ben e pori den libi èn fa den ben e du ogri? „Yehovah ben firi sari taki a ben meki libisma na grontapu”, na so Bijbel e taki, „èn disi ben broko en ati” (Genesis 6:5, 6, 11, 12). Gado ben e firi sari fu di den sma di ben e libi bifo a Frudu, ben e tyari densrefi na so wan ogri fasi, taki A no ben e prisiri moro nanga libisma. Fu di a no ben lobi na ogridu fu den srefisrefi, meki Gado, a Mekiman fu libisma, ben tron a Sma di ben tyari wan kaba kon na libisma.

Yehovah ben e firi sari tu di en eigi pipel, na owruten nâsi Israel, no ben e broko den ede kwetikweti nanga a fasi fa A ben e firi èn nanga a lobi-ati fasi fa a ben e tiri den. A psalm skrifiman ben kragi: „Someni leisi den  ben opo densrefi teige en na ini a gran sabana, den ben meki a firi sari na ini a sabana! Èn ibri tron baka den ben e tesi Gado, èn den ben e du hati sani nanga a Santa Sma fu Israel srefi.” Toku, „[Yehovah] ben abi sari-ati; a ben tapu a fowtu ibri tron baka èn a no ben tyari pori kon. Èn furu tron a ben hori ensrefi fu no puru atibron na den tapu, èn a no ben meki ala en faya-atibron opo kon” (Psalm 78:38-41). Aladi den trangayesi Israelsma ben e pina fu di den ben du sondu, toku Bijbel e taigi wi taki ’na ini ala den banawtu fu den, [Gado] ben de na ini banawtu sosrefi’.—Yesaya 63:9.

Aladi den ben abi so furu buweisi taki Gado ben lobi den trutru, toku a pipel fu Israel „ben e dreigi den boskopuman fu a tru Gado doronomo, den ben e afrontu den wortu fu en, èn den ben e spotu den profeiti fu en, teleki na atibron fu Yehovah kon tapu a pipel fu en, teleki den no ben man kon betre moro” (2 Kroniki 36:16). Den ben e tan opo densrefi teige en, èn dati „ben meki taki en santa yeye firi sari” so te, taki te fu kaba Yehovah drai baka gi den (Yesaya 63:10). San ben de a bakapisi? Gado ben abi leti fu no kibri den moro, èn rampu miti den di den Babilonsma teki Yuda abra èn pori Yerusalem (2 Kroniki 36:17-21). Fu tru, a de wan sari te sma e bosroiti fu libi wan sondu libi di a Mekiman fu den no feni bun, èn di e meki a firi sari!

Bijbel e sori wi krin taki Gado e sari trutru te wi e tyari wisrefi na wan fasi di no fiti srefisrefi (Psalm 78:41). Den sani disi, di Gado no feni bun, èn di e tegu Gado srefi, na sani soleki heimemre, lei, kiri, towfruwroko, lukuman-wroko, na anbegi di sma e anbegi den afo fu den, yayolibi, homo-sekslibi, sutadu, a abi di sma abi seks nanga famiriman, èn a kwinsi di sma e kwinsi pôtisma.—Lefitikus 18:9-29; 19:29; Deuteronomium 18:9-12; Odo 6:16-19; Yeremia 7:5-7; Maleaki 2:14-16.

Fa Yehovah e si afkodrei? Exodus 20:4, 5 e taki: „Yu no musu meki wan popki gi yusrefi di yu temre, noso wan skin di gersi iniwan sani di de na hemel na tapu, noso di de na grontapu na ondro, noso di de na ini den watra na ondro grontapu. Yu no musu boigi gi den, noso meki sma kori yu fu dini den.” Fu san ede? Fu di wan popki di sma e anbegi na „wan tegu sani gi Yehovah” (Deuteronomium 7:25, 26). Na apostel Yohanes ben warskow: „Un pikin, luku bun nanga kruktugado” (1 Yohanes 5:21). Èn na apostel Paulus ben skrifi: „Mi lobiwan, no abi noti fu du nanga na anbegi fu kruktugado.”—1 Korentesma 10:14.

Du muiti so taki Gado feni yu bun

Gado „e hori bun kompe nanga den opregtiwan”. Den sma „di e waka sondro fowtu, na wan prisiri gi en” (Odo 3:32; 11:20). Na a tra sei, den wan di e tan afrontu Gado fu di den e tan weigri fu poti prakseri na den opregti firi fu en, noso fu di den e tan hati den firi fu en, sa kisi takru bakapisi heri esi, fu di a no feni den bun (2 Tesalonikasma 1:6-10). Iya, heri esi a sa tyari wan kaba kon na ala ogridu di lai na ini a ten disi.—Psalm 37:9-11; Sefanya 2:2, 3.

Ma Bijbel e sori krinkrin tu taki Yehovah „no wani taki wan sma e kisi pori, ma a wani taki ala sma musu abi berow” (2 Petrus 3:9). A e gi en moro prisiri fu sori lobi gi regtfardikisma di lobi en, leki fu puru atibron tapu den wan di weigri fu drai den libi. Yehovah ’no e prisiri te na ogriwan dede, ma a e prisiri te  wan ogri sma e kenki a libi fu en èn te a tan na libi trutru’.—Esekièl 33:11.

Sobun, nowan sma abi fu ondrofeni na atibron fu Yehovah. ’Yehovah lobi sma trutru èn a abi sari-ati nanga den’ (Yakobus 5:11). Te yu sabi fa Gado e firi èn te yu e frutrow tapu en dorodoro, dan yu kan ’trowe ala yu hebi na en tapu, bika a e broko en ede nanga yu’ (1 Petrus 5:7). Yu kan abi a dyaranti taki den sma di e prisiri Gado ati, abi a tumusi moi fruwakti taki Gado sa feni den bun, èn taki a sa de wan mati fu den. Fu dati ede, now a de moro prenspari leki iniwan ten bifo fu „tan ondrosuku fu kon sabi san e plisi Masra”.—Efeisesma 5:10.

A de wan tumusi moi sani trutru taki Gado sori lobi bun-ati gi wi fu di a meki wi kon sabi den moi fasi nanga den opregti firi fu en! Èn trutru, yu man prisiri Gado ati. Efu yu wani du dati trutru, dan wi e gi yu a deki-ati fu go na den Yehovah Kotoigi na ini yu birti. Den sa prisiri fu sori yu fa fu libi na wan fasi di e plisi Gado.

[Futuwortu]

[Faki na tapu bladzijde 7]

Fu san ede Bijbel e taki fu Gado neleki a de wan libisma?

Fu di „Gado na wan Yeye”, meki wi no man si en nanga wi trutru ai (Yohanes 4:24). Fu dati ede, Bijbel e gebroiki difrenti agersitori noso wortu fu yepi wi fu frustan o bigi a makti fu Gado de, o hei a de, èn sortu bigi sani a e du. Sobun, awinsi wi no sabi fa a yeye skin fu Gado de, toku Bijbel e taki dati Gado abi ai, yesi, anu, finga, futu, nanga wan ati.—Genesis 8:21; Exodus 3:20; 31:18; Yob 40:9; Psalm 18:9; 34:15.

Ma aladi Bijbel e taki dati Gado abi den sani disi, toku dati no wani taki dati a yeye skin fu Gado na a srefi leki a skin fu libisma. Bijbel e gebroiki den sortu wortu dati fu yepi libisma fu frustan moro bun fa Gado de. Sondro den wortu dati, a ben o muilek gi libisma fu frustan fa Gado de; kande den no ben o man sabi srefi suma na Gado. Ma disi no wani taki dati na libisma srefi meki wan tori fu a fasi fa Yehovah Gado de. Bijbel e taki krin taki Gado ben meki libisma akruderi a prenki fu En, èn a no de so taki na libisma ben meki Gado akruderi a prenki fu den (Genesis 1:27). Fu di „na Gado ben meki sma skrifi” Bijbel, meki a fasi fa Bijbel skrifiman skrifi fu Gado e sori taki na so Gado de trutru. Gado ben poti den srefi fasi fu en na ini libisma, aladi son sma e sori den fasi dati moro leki tra sma (2 Timoteyus 3:16, 17). Sobun, a no de so kwetikweti taki na Gado abi den fasi fu libisma, ma na libisma abi den fasi fu Gado.

[Prenki na tapu bladzijde 4]

Noa ben feni bun na ini Gado ai

[Prenki na tapu bladzijde 5]

Abraham ben sabi fa Gado e firi

[Prenki na tapu bladzijde 6]

David ben e frutrow tapu Yehovah nanga en heri ati

[Prenki na tapu bladzijde 7]

Te yu e leisi Bijbel, dan yu kan kon sabi fa fu meki Gado firi prisiri

[Sma di abi a reti fu a prenki na tapu bladzijde 4]

Courtesy of Anglo-Australian Observatory, photograph by David Malin