Den sani di Gado meki, e gi en glori!
Den sani di Gado meki, e gi en glori!
„Den hemel e meki a glori fu Gado bekènti; èn a loktu e fruteri fu a wroko fu en anu.”—PSALM 19:1.
1, 2. (a) Fu san ede libisma no man si a glori fu Gado nanga den eigi ai? (b) Fa den 24 owru man e gi Gado glori?
„YU NO kan si mi fesi, bika nowan libisma kan si mi èn toku tan na libi” (Exodus 33:20). Na so Yehovah ben warskow Moses. Fu di libisma abi wan skin fu meti nanga brudu, meki den no man tan na libi te den e si a glori fu Gado nanga den eigi ai. Ma na ini wan fisyun, na apostel Yohanes ben man si a tumusi moi glori fu Yehovah di e sidon na tapu En kownusturu.—Openbaring 4:1-3.
2 Tra fasi leki libisma, den loyaal yeye di Yehovah meki man si en fesi. Na ini a fisyun fu hemel, Yohanes ben si na mindri den yeye „tutenti na fo owru man” di e sori go na den 144.000 salfuwan (Openbaring 4:4; 14:1-3). San den e taki te den e si a glori fu Gado? Soleki fa Openbaring 4:11 e sori, dan den e taki: „Yu, Yehovah, iya wi Gado, warti fu kisi a glori nanga a grani nanga a makti, bika yu ben meki ala sani, èn fu yu wani ede den ben de èn fu yu wani ede yu ben meki den.”
Fu san ede den ’no man taki dati den no abi buweisi’
3, 4. (a) Fu san ede libisma no kan taki dati Gado no de, soso fu di den no man si èn ondrosuku en? (b) San e meki taki son leisi sma e weigri fu bribi taki Gado de?
3 Yu e firi fu gi Gado glori? Furu sma no e firi fu du disi, èn son sma e taki srefi dati Gado no de. Fu eksempre, wan astronomiaman ben skrifi: „A de so taki na Gado meki hemel nanga grontapu na so wan moi fasi taki sani kan waka bun gi wi? . . . Dati na wan moi prakseri. Toku, mi e bribi taki na soso wan anansitori. . . . Mi no man bribi kwetikweti taki na Gado du den sani disi.”
4 Den ondrosuku fu sabiman skotu, bika den man ondrosuku soso den sani di den man si. Ma fu tra sani di den no man si, den alamala abi den eigi denki. Fu di „Gado na wan Yeye”, meki den no man si en èn den no man ondrosuku en tu (Yohanes 4:24). Sobun, fu di den no man ondrosuku Gado, meki den e taki dati Gado no de, èn disi e sori taki den e denki tumusi furu fu densrefi. A sabiman Vincent Wigglesworth fu Cambridge University e taki dati te yu e luku en bun, dan sabidensi na „wan fasi fu bribi” tu. Fa so? „Sabidensi abi fu du nanga a tranga bribi di sabiman abi, taki ala sani di e pasa, de akruderi a wet fu den naturu.” Sobun, awinsi wan sma e bribi na ini sabidensi wawan èn a e weigri fu bribi taki Gado de, toku a e bribi wan sani, a no so? Son leisi sma no e bribi taki Gado de, fu di den e weigri fu espresi fu bribi san tru. A psalm skrifiman ben skrifi: „Na heimemre e meki taki na ogriwan no e ondrosuku sani; ala den prakseri fu en na: ’Gado no de.’”—Psalm 10:4.
5. Fu san ede sma di no e bribi na ini Gado, no man taki dati den no abi buweisi taki Gado de?
5 Ma wan sma no e bribi na ini Gado sondro taki a abi buweisi. Bun furu buweisi de taki Gado de trutru (Hebrewsma 11:1). Na astronomiaman Allan Sandage taki: „Mi no man bribi taki den sani [na hemel nanga grontapu] di seti na so wan bun fasi, kan komoto fu wan sani di bruya srefisrefi. Wan sani noso wan sma ben musu fu de di seti den sani disi. Gado na wan kibritori gi mi, ma toku en na a wan-enkri fasi fa mi kan fruklari fa sani du kon na so wan wondru fasi, aladi noti ben de fosi.” Na apostel Paulus ben taigi den Kresten na ini Rome taki ’sensi di Gado meki grontapu, sma man frustan krin san na Gado en eigifasi di sma no man si nanga ai, fu di den sani di Gado meki, e sori sma den eigifasi fu en; iya, den kan si taki a abi a têgo krakti èn taki en na Gado, èn fu dati ede den [sma di no e bribi] no man taki dati den no abi buweisi’ taki Gado no de (Romesma 1:20). Sensi di „Gado meki grontapu”, buweisi de taki wan Mekiman de di makti srefisrefi. Disi ben de krin fu si spesrutu di a meki koni libisma, di man frustan taki Gado de trutru èn taki a warti fu sma dini en. Fu dati ede, te wan sma no wani gi Gado glori, dan na fu espresi a e weigri fu du dati; a no man taki dati a no abi buweisi. Ma san den sani di Gado meki, e buweisi?
Hemel nanga grontapu e meki a glori fu Gado bekènti
6, 7. (a) Fa den hemel e meki a glori fu Gado bekènti? (b) Fu san ede wi kan taki dati den hemel poti ’markitiki’?
6 Psalm 19:1 e gi wi a piki te a e taki: „Den hemel e meki a glori fu Gado bekènti; èn a loktu e fruteri fu a wroko fu en anu.” David ben e frustan taki den stari nanga planeiti di ben e skèin na „loktu”, na krin buweisi taki wan Gado de di abi bigi glori. A e go moro fara: „A wan dei baka a trawan e meki sma taki, èn a wan neti baka a trawan e tyari sabi kon na krin” (Psalm 19:2). Ibri dei nanga ibri neti, den hemel e sori a koni nanga a krakti di Gado abi fu meki sani. A de neleki yu kan yere den hemel e ’opo taki’ fu prèise Gado.
7 Ma wan sma musu abi a koni fu man yere fa den e gi Gado glori. „Nowan taki no de, èn nowan wortu no de; nowan sten fu den de fu yere.” Toku, sondro fu taki, den hemel e gi kotoigi èn den e gi wi krin buweisi taki Gado de. „A markitiki fu den doro na ala sei fu grontapu, èn den wortu fu den, te na den moro farawe presi fu grontapu” (Psalm 19:3, 4). A de neleki hemel poti ’markitiki’ fu sori krin na ala sei fu grontapu, taki Gado de trutru.
8, 9. San na wan tu aparti sani di wi sabi fu a son?
8 Now, David e taki fu wan tra wondru sani di Yehovah meki: „A seti wan tenti na ini den [hemel] gi a son. A [son] de leki wan trowmasra di e komoto fu en trow-kamra; a breiti srefisrefi neleki wan tranga man di breiti fu lon na tapu wan pasi. A e komoto fu a wan sei fu hemel, èn a e drai lontu go na a tra sei te fu kaba; nowan sani kibri gi a faya fu en.”—Psalm 19:4-6.
9 Te yu e luku den tra stari, dan yu o si taki wan lo fu den bigi moro a son. Ma toku a son de wan aparti stari di bigi omeni tron moro den tra planeiti lontu en. Wan ondrosuku sori taki a son hebi leki 99.9 procent fu a heri stari sistema fu wi! A krakti di a son abi fu hari sani kon na en, e meki taki grontapu e tan drai 150 milyun kilometer fara fu en sondro taki a e go moro fara fu a son, noso e kon moro krosibei na a son. Te a son e skèin, dan na soso wan pikin-noti pisi fu a leti e doro grontapu, ma dati nofo kaba fu meki libi de na grontapu.
10. (a) Fa a son e go èn e komoto na ini en „tenti”? (b) Fa a son e lon leki „wan tranga man”?
10 A psalm skrifiman e taki dati a son de leki „wan tranga man” di e lon deiten fu a wan sei fu grontapu go na a tra sei, èn te neti a e go rostu na ini „wan tenti”. Te a bun bigi stari disi e go na ondro, dan na grontapu a e gersi leki a e go na ini „wan tenti” fu go rostu. Mamanten yuru a gersi leki a e komoto fu en tenti wantronso, èn en fesi e brenki „leki wan trowmasra di e komoto fu en trow-kamra”. Di David ben de skapuman, dan a ben kon sabi o kowru a kan de na netiyuru (Genesis 31:40). A ben kan memre fa a son ben e waran en skin nanga a heri presi lontu en, te a ben bigin skèin na mamanten. Iya, a son no ben kon weri fu a dei bifo di a ben „teki waka” fu na owstusei fu grontapu te go miti a westsei, ma a ben de leki „wan tranga man” di de klariklari fu teki a srefi waka baka.
Den kefalek stari nanga stari sistema
11, 12. (a) San de so aparti na a fasi fa Bijbel e agersi den stari nanga den ai-santi na sekanti? (b) O bigi hemel de, soleki fa sma e denki?
11 Te David ben e luku go na hemel, dan a ben man si soso wan tu dusun stari nomo. Ma soleki fa wan ondrosuku sori no so langa pasa, dan sma si sowan 70.000 milyardmilyard stari nanga wan sortu wrokosani fu luku stari na hemel! Yehovah ben sori kaba taki bun furu stari de, bika a ben taki dati den stari de leki „den ai-santi di de na sekanti”.—Genesis 22:17.
12 Someni yari langa kaba, astronomiaman luku wan tu „pikin sani [na hemel] di e gi leti, aladi den no de krin fu si”. Sabiman ben e denki taki den ’sani disi di e drai lontu’, na pisi fu a stari sistema fu wi di den e kari a Merki Pasi. Ma na ini 1924, sabiman kon si taki Andromeda, wan fu den pikin sani disi di de moro krosibei leki den trawan, ben de wan stari sistema èn a e teki sowan tu milyun leti-yari fu doro drape! Sabiman e denki now taki moro leki wan hondro milyard stari sistema de, èn ibriwan fu den abi dusundusun, noso milyardmilyard stari na ini. Toku, Yehovah „e teri omeni stari de; a e kari den alamala na den nen”.—Psalm 147:4.
13. (a) San de so aparti na den starigrupu? (b) Fu san ede wi kan taki dati sabiman no sabi „den wet fu hemel”?
13 Yehovah ben aksi Yob: „Yu kan tai den banti fu a starigrupu Kima, noso yu kan lusu den titei srefi fu a starigrupu Kesil?” (Yob 38:31) Wan starigrupu na wan grupu fu stari; te yu e luku den, dan a gersi leki den seti na wan spesrutu fasi. Aladi a kan de so taki den stari de bun fara fu makandra, toku komoto fu grontapu, ala ten wi e si den na a srefi presi nomo. Fu di den stari e tan na a srefi presi ala ten, meki den e ’yepi wi fu sabi pe fu grontapu wi de, den e yepi sabiman fu sabi pe den de te den e go na munkenki, èn den e yepi wi fu kon sabi den tra stari’ (The Encyclopedia Americana). Toku, nowan sma man sabi krin san na „den banti” di e hori den starigrupu makandra. Iya, te now ete sabiman no man piki na aksi di skrifi na ini Yob 38:33: „Yu kon sabi den wet fu hemel?”
14. Fu san ede wi kan taki dati a fasi fa leti e prati ensrefi, na wan kibritori te now ete?
14 Sabiman no man piki wan tra aksi di Gado ben poti gi Yob: „Pe a pasi de pe leti e prati ensrefi?” (Yob 38:24) Wan skrifiman ben kari na aksi disi fu leti, „wan tumusi dangra sabidensi aksi gi a nyun-modo ten disi”. Sonwan fu den Griki filosofiaman ben e denki tra fasi, fu di den ben e bribi taki leti ben e komoto fu sma ai. Bakaten, sabiman ben e bribi taki leti ben meki fu someni pikinpikin pisi. Trawan ben e bribi taki leti ben e waka leki skwala fu se. Now, sabiman kon si taki leti e waka leki skwala, èn a meki fu pikinpikin pisi sosrefi. Toku, sma no sabi san leti de trutru, èn a fasi fa a e „prati ensrefi” na wan kibritori te now ete.
15. Fa wi e firi leki David te wi e denki dipi fu sani di de na hemel?
15 Te wan sma e denki dipi fu ala den sani disi, dan a e kisi a srefi firi fu a psalm skrifiman David di ben taki: „Te mi e si yu hemel, den wroko fu yu finga, a mun nanga den stari di yu sreka, dan san na a libisma di man dede, taki yu hori en na prakseri, èn libisma manpikin, taki yu e sorgu gi en?”—Psalm 8:3, 4.
Grontapu nanga den sani di e libi na tapu, e gi Yehovah glori
16, 17. Fa den meti na ini den „dipi watra” e prèise Yehovah?
16 Psalm 148 e kari tra fasi fa den sani di Gado meki, e gi en glori. Na ini vers 7 wi e leisi: „Prèise Yehovah komoto fu grontapu, un bun bigi meti fu se èn ala un dipi watra.” Iya, den „dipi watra” lai nanga wondru sani di e tyari a koni nanga a krakti fu Gado kon na krin. A blauwe vinvis e wegi sowan 120 ton, dati wani taki dati a hebi leki 30 asaw makandra! En ati wawan e wegi moro leki 450 kilo èn na ati e pompu sowan 6400 kilo brudu na ini en heri skin! Fu di a de so wan bigi meti, dan kande yu e denki taki a no man swen so esi. Ma disi no de so kwetikweti. Wan organisâsi di e luku taki sma no e kiri den sortu meti disi somarso, e sori taki a blauwe vinvis e „swen heri esi na ini den se”. Wan ondrosuku sori taki „wan fu den meti disi ben swen moro leki 16.000 kilometer na ini 10 mun”.
17 Na ini se yu abi wan sortu dolfijn, noso profosu, di gwenti fu swen sowan 45 meter dipi, ma wan ondrosuku sori taki a meti disi man swen 547 meter dipi srefi! Fa a meti disi man swen so dipi? We, te a e go na ondro, dan en ati e bigin naki moro safri, èn a brudu fu en e go soso na en ati, en fokofoko, nanga en edetonton. Na ini den tetei fu en skin a man hori zuurstof tu, so taki a man hari blo. Tra meti soleki den zeeolifant (wan bigi sedagu) nanga den potvis (wan bigi sortu fisi) kan swen go moro dipi srefi. „Na presi taki den e feti teige a druk fu a watra”, na so a tijdschrift Discover e taki, „dan den e meki a watra druk a fokofoko fu den tapu dorodoro.” Furu fu a zuurstof di den abi fanowdu fu hari blo, den e hori na ini den tetei fu den skin. A de krin fu si taki den meti disi na libilibi buweisi taki Gado abi bigi koni èn a abi makti pasa marki!
18. Fa a sewatra e sori a koni fu Yehovah?
18 A sewatra srefi e sori a koni fu Yehovah. A tijdschrift Scientific American e taki: „Na ini ibri dropu sewatra di de na tapusei te go miti 100 meter dipi, dusundusun pikinpikin sortu prani e drifi, aladi yu no man si den nanga ai; den e kari den fytoplankton.” Den pikinpikin sortu prani disi de leki wan bigi „busi di yu no man si nanga yu ai”. A „busi” disi e krin a loktu fu di a e puru milyardmilyard ton kooldioxide, a loktu di wi e blo puru. Fytoplankton e meki moro leki afu fu ala zuurstof di wi e gebroiki fu hari blo.
19. Fa faya nanga snew e du a wani fu Yehovah?
19 Psalm 148:8 e taki: „Un faya nanga pisipisi ijs di e fadon komoto fu hemel, snew nanga deki smoko, un bun bigi winti di e du san a taki.” Iya, Yehovah e gebroiki sosrefi den krakti fu a naturu di no abi libi, fu du a wani fu en. Prakseri fu faya. Na ini den someni tenti yari di pasa, sma ben e si den faya di e bron bigi busi, soso leki wan sani di e pori grontapu. Ma now, ondrosukuman kon si taki faya na wan prenspari sani fu meki a heri sistema na grontapu waka bun. Faya e bron owru bon, noso bon di e dede kaba, so taki nyun siri kan gro; a e meki a gron kon fatu baka èn te pikinpikin faya e bron a busi doronomo, dan nofo tron yu no abi bigi faya di e pori wan heri pisi kontren. Snew de wan prenspari sani tu, fu di a e nati a gron, a e meki a gron kon fatu, a e gi watra na den liba, èn a e sorgu taki bon nanga meti no e dede fu di a kowru tumusi.
20. Fa bergi nanga bon de wan yepi gi libisma?
20 „Un bergi nanga ala un pikin bergi, un froktubon nanga ala un sedrebon”, na so Psalm 148:9 e taki. Den bun bigi bergi e sori a bigi makti fu Yehovah (Psalm 65:6). Ma den no ben meki fu soso. Wan organisâsi na ini Switserland di e ondrosuku fa grontapu meki, e taki: „Ala den prenspari liba fu grontapu e bigin na ini bergi. Moro leki afu fu ala libisma na grontapu e gebroiki a watra di e komoto fu bergi . . . Den ’watra-toren’ disi, [soleki fa sma e kari den bergi], de tumusi prenspari fu meki libisma tan na libi.” Srefi wan bon di yu e si ala dei, e gi glori na en Mekiman. Na organisâsi United Nations Environment Programme e taki dati bon „de prenspari fu meki sani waka bun gi libisma na ini ala kondre fu grontapu . . . Furu bon de tumusi prenspari gi na ekonomia fu di sma e gebroiki na udu, den froktu, den noto, a tara, nanga a balata fu den. Na heri grontapu, 2 milyard sma e gebroiki udu fu meki faya so taki den kan bori èn kisi waran”.
21. Fruteri fa wan blad fu wan bon di yu e si ala dei, e sori taki wan Mekiman de.
21 A fasi fa wan bon meki, e sori taki na wan bun koni sma meki en. Luku wan blad nomo. Na tapu a blad yu abi wan sortu sani leki kandrafatu di e meki taki a blad no e drei. Leti na ondro a sortu kandrafatu disi, wan lo cel de di abi wan sani na ini di den e kari chloroplast. Na ini den cel disi wan sortu sani de di e teki krakti fu a leti di son e skèin. Den blad abi wan sortu sistema di e wroko leki wan „fabriki di e meki nyanyan”. Den rutu fu a bon e hari watra fu a gron, èn nanga yepi fu sani di gersi finifini peipi di yu no man si nanga yu ai, a watra e doro den blad te fu kaba. Na ondrosei fu den blad abi dusundusun pikinpikin olo di man opo èn di man tapu sosrefi. Den olo disi e meki a gas di den e kari kooldioxide, pasa go na ini den blad. A leti fu a son e gi a blad krakti fu moksi a watra nanga a kooldioxide, so taki a e kon tron koolhydraat, wan sani di a bon e gebroiki leki nyanyan. Na so a bon kan gebroiki nyanyan di ensrefi meki. Toku, a ’fabriki disi di e meki nyanyan’ no e meki babari srefisrefi te a e wroko, èn a de wan moi sani fu si. Tra fasi leki den fabriki fu libisma, bon no e pori a loktu na grontapu; na presi fu dati, den e meki a zuurstof di wi abi fanowdu fu hari blo!
22, 23. (a) Sortu moi fasi de fu si na son fowru nanga meti di e waka na tapu gron? (b) Sortu tra aksi wi musu luku ete?
22 „Un werdri meti nanga ala un osometi, un sani di e kroipi nanga fowru di e frei”, na so Psalm 148:10 e taki. Furu meti di e waka na tapu gron èn di e frei, abi ala sortu moi fasi. A Laysanalbatros, wan fowru di e libi na ini a birti fu se, kan frei bun fara (wan leisi, wan fu den ben frei 40.000 kilometer na ini 90 dei nomo). Wan tra fowru di den e kari sparrezanger, e frei fu Noord-Amerika go na Zuid-Amerika, èn a e tan na loktu moro leki 80 yuru sondro fu saka kon na gron. A kameili e hori watra na ini en skin. Ma a no de soleki fa furu sma e denki taki a kameili e hori watra na ini a kundu di a abi na tapu en baka. Na presi fu dati, a e hori a watra na ini den presi pe a nyanyan fu en e go, èn na so fasi a kan tan bun langa sondro fu dringi watra. Fu dati ede a no e fruwondru wi taki koni libisma di e bow sani, e luku bun fa den meti meki èn fa den e libi, so taki den kan gebroiki dati leki eksempre fu meki nyun masyin noso tra nyun sani. „Efu yu wani meki wan sani di e wroko bun . . . èn di no e pori grontapu, dan nofo tron yu o feni wan eksempre fu dati na ini a naturu”, na so Gail Cleere, wan uma di e skrifi buku, e taki.
23 Iya, den sani di Gado meki, e gi en glori fu tru! Ala den stari na hemel, ala den bon nanga meti, iya, ibriwan fu den e prèise en Mekiman na en eigi fasi. Ma fa a de nanga wi libisma? Fa wi kan prèise Gado makandra nanga den tra sani di A meki?
Yu e memre disi ete?
• Fu san ede sma di e taki dati Gado no de, no man taki dati den no abi buweisi?
• Fa den stari nanga den planeiti e gi Gado glori?
• Fa den meti na ini a se èn den meti di e waka na tapu gron e sori taki wan lobi-ati Mekiman de trutru?
• Fa den krakti fu a naturu di no abi libi, e du a wani fu Yehovah?
[Aksi fu a tori disi]
[Prenki na tapu bladzijde 10]
Ondrosukuman e taki dati sowan 70.000 milyardmilyard stari de fu si nanga wan wrokosani fu luku stari na hemel
[Sma di abi a reti fu a prenki]
Frank Zullo
[Prenki na tapu bladzijde 12]
Wan profosu
[Prenki na tapu bladzijde 13]
Wan pisi snew
[Sma di abi a reti fu a prenki]
snowcrystals.net
[Prenki na tapu bladzijde 13]
Wan yongu Laysanalbatros