Yu musu de fu wan kerki?

’MI NO abi fu de wan memre fu wán spesrutu kerki èn mi no abi fu go na kerki ibri tron baka, fu kan bribi na ini Gado!’ Na so furu sma e prakseri fu a de di den musu de wan memre fu wan kerki, noso fu iniwan kerki organisâsi. Te yu luku en bun, dan sonwan fu den e taki dati te den de na dorosei na mindri bon, meti, nanga tra sani, dan den e firi taki den de moro krosibei na Gado, leki te den ben o de na wan konmakandra na ini wan kerki. Furu sma na ini a ten disi e taki dati a no de fanowdu trutru fu de wan memre fu wan kerki, noso fu wan kerki organisâsi, fu bribi na ini Gado.

Toku, son sma de di no e agri nanga a tori disi kwetikweti. Den e taki dati a de fanowdu èn taki a de prenspari srefi fu de wan memre fu wan kerki èn fu go na kerki, efu wan sma wani taki Gado feni en bun. Sobun, na aksi efu a de fanowdu trutru fu abi demakandra nanga wan kerkigrupu, na wan sani di prenspari gi ala sma, a no prenspari nomo gi sabiman di e ondrosuku kerkitori. Awinsi fa a no fa, a matifasi fu wi nanga Gado de ini a tori. Yu no denki taki a ben o bun dan fu kon sabi fa Gado e prakseri fu a tori disi? We, san Bijbel, a Wortu fu en, e leri wi fu a tori disi?

A fasi fa Gado handri nanga sma na ini owruten

Sowan 4400 yari pasa, wan bigi frudu pori ala sani na heri grontapu. Sma no ben o man frigiti so wan sani so makriki, èn difrenti pipel na heri grontapu e fruteri tori di e taki dati so wan sani feni presi langa ten pasa. Aladi a no ala pisi fu den tori fu den de a srefi, toku difrenti pisi fu den tori disi gersi makandra. Wan fu den pisi fu den tori disi di de a srefi, na taki soso wan tu libisma nanga wan tu meti pasa a frudu dati libilibi.

Wan tu sma ben pasa a Frudu libilibi. A ben de so dan taki na koloku den ben abi taki den tan na libi? Bijbel e sori taki dati no ben de so. Wan prenspari sani di e kon na krin na taki Gado no ben warskow ibriwan sma aparti taki a Frudu ben e kon. Na presi fu dati a ben fruteri Noa a tori èn Noa ben go fruteri den sma na ini a ten dati taki a  Frudu ben e kon.—Genesis 6:13-16; 2 Petrus 2:5.

Efu sma ben wani tan na libi, dan den ben musu de na ini a grupu disi; wan grupu fu sma di ben e horibaka gi makandra èn di ben de klariklari fu gi yesi na san Gado ben taigi den nanga yepi fu Noa. Srefi den meti di ben de na ini na ark ben man pasa a Frudu libilibi, fu di den ben de makandra nanga a grupu sma disi. Gado ben taigi Noa krin san a ben musu du fu kibri a libi fu den meti.—Genesis 6:17–7:8.

Someni hondro yari baka dati, dan den bakapikin fu Noa di ben gebore fu en manpikin Sem, ben kon tron srafu na ini Egepte. Ma Gado ben wani meki den kon fri èn a ben wani tyari den go na a kondre di a ben pramisi Abraham, a fositen tata fu den. Agen, Gado no ben taki nanga ibriwan sma aparti fu a pisi tori disi, ma a ben taki nanga den wan di a ben poti leki fesiman fu den, namku Moses nanga en brada Aron (Exodus 3:7-10; 4:27-31). A grupu sma disi ben de srafu fosi, ma baka di Gado fri den fu katibo na ini Egepte, dan a gi den a Wet fu en na a Sinaibergi, èn a meki den kon tron a pipel fu Israel.—Exodus 19:1-6.

Ibriwan fu den Israelsma ben kan kisi frulusu, soso fu di den ben de wan pisi fu a grupu disi di Gado ben seti èn fu di den ben e du san den wan di Gado ben poti leki fesiman fu a grupu disi ben e taigi den fu du. Sani ben seti srefi gi sma fu Egepte fu abi demakandra nanga a grupu disi di Gado ben feni bun. Di den Israelsma komoto na ini Egepte, dan wan tu sma fu Egepte ben go nanga den tu, èn na a fasi disi den ben kan kisi blesi fu Gado.—Exodus 12:37, 38.

Bakaten, na ini a fosi yarihondro, Yesus bigin nanga a preikiwroko fu en, èn a ben e tyari sma kon na wán fu de disipel fu en. A ben e wroko nanga den leki grupu, aladi na wan lobi-ati fasi a ben e poti prakseri na ibriwan fu den tu, fu kan yepi den te dati ben de fanowdu. Yesus ben taigi den 11 getrow apostel fu en: „Unu na den wan di tan nanga mi di mi kisi tesi; èn mi e meki wan frubontu nanga unu, soleki fa mi Tata meki wan frubontu nanga mi, fu wan kownukondre” (Lukas 22:28, 29). Bakaten, a santa yeye fu Gado ben kon tapu den disipel, di den ben de makandra leki grupu.—Tori fu den Apostel 2:1-4.

Den eksempre disi e sori krin taki na ini owruten Gado wroko ala ten nanga a pipel fu en leki wan grupu di orga bun. Te yu luku en bun, dan den sma nanga suma Gado ben taki langalanga, namku Noa, Moses, Yesus, èn wan tu tra sma sosrefi, na sma di A ben gebroiki fu taki nanga trawan di ben e wroko makandra nanga den leki grupu. Wi no abi fu prakseri taki Gado e handri tra fasi nanga den futuboi fu en na ini a ten disi. A no de fu taki dati disi e meki wan tra aksi opo kon: A de nofo fu abi demakandra nanga iniwan kerki nomo? Wi sa taki fu a tumusi prenspari aksi disi na ini na artikel di e kon.

[Prenki na tapu bladzijde 4]

Someni langa kaba Gado e wroko nanga a pipel fu en leki wan grupu di orga bun