A Wi Tata Begi​—San a wani taki gi yu

A WI Tata Begi, di Yesus Krestes ben leri sma di a hori a Bergitaki, de fu feni na ini Bijbel na Mateyus kapitel 6, vers 9 te go miti 13. Leti bifo Yesus leri sma a begi disi, a taki: „Te yu e begi, no taki den srefi sani ibri leisi baka leki fa den grontapusma e du, bika den e prakseri taki Gado sa arki den efu den e taki furu sani.”—Mateyus 6:7.

Sobun, a de krin fu si taki Yesus no ben abi na prakseri taki sma musu taki den srefi wortu fu a Wi Tata Begi ibri tron baka. A tru taki a ben taki a begi disi ete wan leisi na wan tra okasi, so taki tra sma ben kan kisi wini fu dati (Lukas 11:2-4). Ma den wortu di skrifi na ini na Evangelietori fu Lukas e difrenti pikinso fu den di fu Mateyus. Boiti dati, Yesus nanga den disipel fu en no ben gebroiki den srefi wortu fu a Wi Tata Begi te den ben e begi na tra okasi.

Fu san ede a Wi Tata Begi skrifi na ini Bijbel? Nanga yepi fu na eksempre disi, Yesus e leri wi fa wi kan begi na wan fasi di Gado feni bun. Na ini a begi disi, wi e kisi piki sosrefi tapu wan tu prenspari aksi fu a libi. Fu dati ede, meki wi poti prakseri na ibri pisi fu a Wi Tata Begi.

San na a nen fu Gado?

„Wi Tata na hemel, yu nen musu kon santa” (Mateyus 6:9). Den fosi wortu disi fu a Wi Tata Begi e yepi wi fu kon krosibei na Gado, fu di wi e kari en „wi Tata”. Neleki wan pikin di no frede fu kon krosibei na wan lobi-ati papa noso mama, na so wi kan begi wi hemel Tata tu nanga a frutrow taki a wani arki wi. Kownu David ben singi: „O Yereman fu begi, na yu sma fu ala sortu skin sa kon srefi.”—Psalm 65:2.

Yesus ben leri wi fu begi taki a nen fu Gado musu kon santa. Ma san na a nen fu Gado? Bijbel e piki nanga den wortu disi: „Yu, di nen na Yehovah, yu wawan na a Moro Heiwan na heri grontapu” (Psalm 83:18). Oiti yu leisi a nen Yehovah na ini Bijbel?

Fu taki en leti, a nen fu Gado, Yehovah, skrifi  pikinmoro 7000 tron na ini den kopi fu den Buku fu Bijbel di sma ben skrifi na ini owruten. Ma son sma di poti a Bijbel abra na ini tra tongo, puru a nen disi na ini a Bijbel fu den. Fu dati ede, nanga reti wi e begi wi Mekiman fu santa a nen fu en (Esekièl 36:23). Wán fasi fa wi kan handri akruderi a begi fu wi, na fu gebroiki a nen Yehovah te wi e begi Gado.

Wan uma di nen Patricia, ben kweki leki wan Lomsusma èn a ben sabi a Wi Tata Begi heri bun. San a du di wan Kotoigi fu Yehovah sori en a nen fu Gado na ini Bijbel? A taki: „Mi no ben man bribi! Dati meki mi go luku na ini mi eigi Bijbel èn drape a nen ben skrifi tu. Baka dati, a Kotoigi sori mi Mateyus 6:9, 10 èn a fruteri mi taki a Wi Tata Begi e sori go na a nen fu Gado. Mi ben breiti trutru èn mi aksi en fu studeri Bijbel nanga mi.”

A wani fu Gado musu pasa na grontapu

„Meki yu kownukondre kon. Meki yu wani pasa na grontapu leki fa a e pasa na hemel” (Mateyus 6:10). Fa a pisi disi fu a begi di Yesus ben leri sma, sa kon tru? Furu sma e prakseri fu hemel leki wan presi pe vrede de. Den Buku fu Bijbel e taki dati hemel na Yehovah en ’hei tanpresi fu santafasi nanga moifasi’ (Yesaya 63:15). Dati meki wi e begi taki a wani fu Gado musu pasa na grontapu „leki fa a e pasa na hemel”! Ma oiti a sani disi o pasa?

Danièl, a profeiti fu Yehovah, ben taki na fesi: „A Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu” (Danièl 2:44). A hemel Kownukondre, noso a hemel tirimakti disi, sa tyari vrede kon na heri grontapu fu di a sa tiri na wan regtfardiki fasi.—2 Petrus 3:13.

Te wi e begi taki a Kownukondre fu Gado musu kon èn taki a wani fu en musu pasa na grontapu, dan wi e sori taki wi abi bribi, èn wi kan abi a frutrow taki den sani disi o pasa trutru. A Kresten apostel Yohanes ben skrifi: „Mi ben yere wan tranga sten di komoto na a kownusturu, e taki: ’Luku! A tenti fu Gado de na libisma, èn a sa tan nanga den, èn den sa de en pipel. Èn Gado srefi sa de nanga den. Èn a sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba.’” Baka dati Yohanes taki moro fara: „Èn a Sma di ben sidon na tapu a kownusturu, ben taki: . . .  ’Skrifi, bika den wortu disi de getrow èn tru.’”—Openbaring 21:3-5.

San begi abi fu du nanga den sani di wi abi fanowdu na skin sei

Yesus ben sori nanga den sani di a ben taki na ini a Wi Tata Begi, taki den moro prenspari sani na ini den begi fu wi musu abi fu du nanga a nen fu Gado èn nanga a wani fu en. Ma a Wi Tata Begi e taki moro fara fu sani di wisrefi abi fanowdu èn di wi kan aksi Yehovah na wan fasi di fiti.

A fosiwan fu den sani disi na: „Gi wi tide a brede di wi abi fanowdu gi a dei disi” (Mateyus 6:11). Disi no abi fu du nanga gudu. Yesus gi wi a deki-ati fu begi gi ’wi brede fu a dei soleki fa a de fanowdu gi a dei dati’ (Lukas 11:3). Soleki fa a Wi Tata Begi e sori, dan wi kan begi Gado fu den sani di wi abi fanowdu ibri dei. Te wi lobi Gado èn te wi e gi yesi na en, dan wi kan abi a frutrow taki a sa gi wi den sani dati trutru.

Te wi e broko wi ede pasa marki nanga ekonomia problema, dan dati kan meki taki wi no poti prakseri moro na san wi abi fanowdu na yeye sei, èn na so fasi wi e misi fu du san Gado e aksi fu wi. Ma efu wi e poti na anbegi fu Gado na a fosi presi na ini a libi, dan wi kan abi a dyaranti taki Gado sa arki wi te wi e begi fu sani di wi abi fanowdu, soleki nyanyan nanga krosi. Yesus ben taki: „Tan suku a kownukondre nanga [Gado] En regtfardikifasi fosi èn unu sa kisi ala den tra sani tu” (Mateyus 6:26-33). A no makriki fu suku a regtfardikifasi fu Gado, fu di wi alamala na sondusma èn fu di a de fanowdu taki wi kisi pardon fu sondu (Romesma 5:12). A Wi Tata Begi e taki fu a tori dati tu.

San begi abi fu du nanga a pardon di Gado e gi

„Gi wi pardon fu den sondu fu wi leki fa wi e gi pardon na sma di du wan sondu teige wi” (Mateyus 6:12; Lukas 11:4). Yehovah Gado sa gi wi pardon fu wi sondu trutru?

Kownu David fu Israel fu owruten ben du seryusu sondu, ma a ben abi berow èn a ben begi nanga overtoigi: „Yu, o Yehovah na wan sma di bun èn di de klariklari fu gi pardon; èn a lobi bun-ati di yu e sori gi ala den wan di e kari yu, de furu pasa marki” (Psalm 86:5). Den wortu disi e gi wi trowstu trutru! Wi hemel Tata de „klariklari fu gi pardon” na den wan di e begi en na wan fasi di e sori taki den abi berow. Yehovah Gado kan gi wi pardon fu wi sondu krinkrin.

Ma Yesus ben taki fu wan sani di wi musu du efu wi wani kisi pardon: Efu wi wani taki Gado gi wi pardon, dan wi musu gi trawan pardon tu (Mateyus 6:14, 15). Aladi den dri kompe fu Yob no ben handri bun nanga en, toku a gi den pardon èn a begi gi den srefi (Yob 42:10). Efu wi e gi pardon na den wan di du wan sondu teige wi, dan wi sa plisi Gado èn a sa abi sari-ati nanga wi.

Gado de klariklari fu arki den begi fu wi, èn dati musu pusu wi fu tyari wisrefi na wan fasi di a e feni bun. Èn wi kan tyari wisrefi trutru na wan fasi di e plisi Gado, aladi wi no de volmaakti (Mateyus 26:41). Yehovah kan yepi wi nanga dati sosrefi. Yesus ben sori disi na a kaba fu a Wi Tata Begi di a ben aksi wan tumusi prenspari sani.

Begi Gado fu yepi yu fu handri na wan regtfardiki fasi

„No meki wi kisi tesi, ma frulusu wi fu na ogriwan” (Mateyus 6:13). Yehovah no e libi wi sondro fu yepi wi te wi e kisi tesi, èn a no e meki tu taki wi e fadon na ini sondu. A Wortu fu en e taki: „Nowan sma kan tesi Gado nanga ogri sani, èn Gado srefi no e tesi sma tu nanga ogri sani” (Yakobus 1:13). A tru taki Gado e gi pasi taki tesi e miti wi, ma a kan frulusu wi fu a moro bigi Feanti di e tesi sma, „na ogriwan” di wi sabi leki Satan Didibri.

Na apostel Petrus ben gi tra Kresten a deki-ati: „Hori unsrefi, de na ai. Un gensman, Didibri, e waka lontu leki wan krasi lew, di e suku fu nyan wan sma” (1 Petrus 5:8). We, Satan ben tesi a volmaakti man Yesus Krestes srefi! San Didibri ben wani du? A ben wani hari Yesus  gowe fu a soifri anbegi fu Yehovah Gado (Mateyus 4:1-11). Efu yu e meki muiti fu dini Gado, dan Satan sa wani hari yu gowe tu fu a soifri anbegi!

Didibri kan gebroiki a grontapu di de na ini a makti fu en, fu tesi wi èn fu meki wi du sani di Gado no feni bun (1 Yohanes 5:19). Fu dati ede, a de tumusi prenspari taki wi e begi Gado doronomo fu yepi wi, spesrutu te wi abi fu du nanga a srefi tesi ibri tron baka. Èn efu wi e anbegi Yehovah soleki fa en Wortu, Bijbel, e taki, dan a sa frulusu wi fu di a o yepi wi fu kakafutu gi Didibri. Bijbel e taigi wi: „Gado de getrow, èn a no sa gi pasi dati unu kisi tesi pasa a sani di unu man tyari.”—1 Korentesma 10:13.

A de tumusi prenspari fu bribi na ini Gado

A e prisiri wi ati srefisrefi fu sabi taki wi hemel Tata e poti prakseri na ibriwan fu wi! A meki srefi taki en Manpikin, Yesus Krestes, leri wi fa fu begi. Fu tru, disi e meki taki wi wani plisi Yehovah Gado. Fa wi kan du dati?

Bijbel e taki: „Sondro bribi wan sma no man plisi [Gado] na wan bun fasi, bika a sma di e kon na Gado, musu bribi taki a de èn taki a e tron a sma di e pai den wan di e suku en seryusu” (Hebrewsma 11:6). Fa wi kan kisi so wan bribi? Bijbel e taki: „Bribi e kon baka te sma yere sani” (Romesma 10:17). Yehovah Kotoigi e prisiri fu taki fu Bijbel tori nanga ala den wan di e angri fu dini Gado leki sma di abi trutru bribi.

Wi e howpu taki den sani di tyari kon na fesi, meki taki yu kon frustan a Wi Tata Begi moro bun. Te yu e teki moro sabi fu Yehovah, èn te yu e kon sabi moro fu den wini di dati e tyari kon gi „den wan di e suku en seryusu”, dan na a fasi disi yu kan tranga yu bribi na ini Gado. Grantangi, suku fu sabi moro fu en èn sosrefi fu den sani di a sa du, so taki yu kan abi wan krosibei banti nanga yu hemel Tata fu têgo.—Yohanes 17:3.

[Prenspari pisi na tapu bladzijde 5]

„Wi Tata na hemel, yu nen musu kon santa. Meki yu kownukondre kon. Meki yu wani pasa na grontapu leki fa a e pasa na hemel. Gi wi tide a brede di wi abi fanowdu gi a dei disi; gi wi pardon fu den sondu fu wi leki fa wi e gi pardon na sma di du wan sondu teige wi. No meki wi kisi tesi, ma frulusu wi fu na ogriwan.”​—Mateyus 6:9-13

[Prenki na tapu bladzijde 7]

Yehovah e gi den wan di lobi en, san den abi fanowdu

[Prenki na tapu bladzijde 7]

Gado e yepi wi tu fu kakafutu gi Didibri

[Prenki na tapu bladzijde 7]

Efu wi de neleki Yob, fu di wi e gi pardon na den wan di du wan sondu teige wi, dan Gado sa abi sari-ati nanga wi