Aksi fu leisiman

Fu san ede mansma fu Israel ben kisi primisi fu trow nanga trakondre uma di ben de na ini katibo na ini Israel, aladi a Wet fu Moses ben taki dati Israelsma no ben mag trow nanga son sma fu tra kondre?—Deuteronomium 7:1-3; 21:10, 11.

A reide fu san ede Yehovah ben gi den mansma fu Israel pasi fu du disi, ben abi fu du nanga spesrutu situwâsi. Yehovah ben komanderi den Israelsma fu pori den foto fu seibi kondre na ini Kanan, èn den ben musu kiri ala den sma di ben libi na ini den foto dati (Deuteronomium 20:15-18). Na ini a tori fu tra kondre, dan a kan taki den bigisma di ben tan na libi, ben de soso den nyunwenke di den Israelsma ben teki na ini katibo (Numeri 31:17, 18; Deuteronomium 20:14). Wan man fu Israel ben kan trow nanga so wan uma, ma soso te na uma ben du wan tu spesrutu sani.

Bijbel e taki fu den sani di so wan uma ben musu du: „Now a musu piri en ede èn a musu sorgu en nangra, èn a musu puru a dyakti fu a katibo fu en èn a musu tan na ini yu oso, èn a musu krei gi en papa nanga en mama, wan heri mun langa; èn baka dati yu musu didon nanga en èn yu musu teki en leki yu trowmisi, èn a musu tron yu wefi.”—Deuteronomium 21:12, 13.

Te wan man fu Israel ben wani trow nanga wan nyunwenke di ben de na ini katibo na ini Israel, dan na uma dati ben musu piri en ede. Wan sma di ben koti ala en ede wiwiri puru, ben sori taki a ben e sari, noso taki a ben e firi brokosaka (Yesaya 3:24). Teki leki eksempre, di a famiri-edeman Yob ben lasi ala en pikin nanga en gudu, dan a koti en ede wiwiri puru fu sori taki a e sari (Yob 1:20). A trakondre uma ben musu sorgu en nangra tu, kande a ben musu „koti hem nangra”, so taki srefi te a ben o ferfi den nangra fu en, en anu no ben o moi fu luku den (Deuteronomium 21:12, Da Bijbel na ini Sranantongo). San ben de „a dyakti fu en katibo” di na uma di ben de na ini katibo ben musu puru? Na ini heiden foto a ben de wan gwenti fu den uma fu weri den moro moi krosi te sma ben o teki a foto abra. Den ben du disi fu di den ben howpu fu kisi a bun-ati fu den sma di ben o teki a foto abra. Wan umasma di ben de na ini katibo èn di ben e row, ben musu puru den krosi disi èn a no ben musu weri den moro.

Wan umasma di ben de na ini katibo èn di ben o tron a wefi fu wan man fu Israel, ben musu row wan heri mun langa gi den lobiwan fu en di lasi den libi. Den foto di ben lasi a feti ben musu pori dorodoro, so taki den famiri nanga mati fu na uma no ben o de moro. Fu di den srudati fu Israel ben pori den falsi gado fu en, meki den popki di a ben e anbegi no ben o de moro tu. A mun na ini san na uma ben musu row ben de wan pisi ten tu fu kon krin na yeye fasi; a ben musu tapu nanga ala sani di ben abi fu du nanga a bribi di a ben abi fosi.

Ma furu tron sani ben de tra fasi gi a moro bigi pisi fu den trakondre uma. Ini a tori disi Yehovah ben komanderi: „Yu no musu trow nanga den. Yu no musu gi yu uma-pikin na en manpikin, èn yu no musu teki na uma-pikin fu en gi yu manpikin” (Deuteronomium 7:3). Fu san ede den no ben mag du disi? Deuteronomium 7:4 e taki: „Bika a sa meki yu manpikin drai en baka gi mi èn den sa dini tra gado fu tru.” Nanga a sani disi Yehovah ben wani kibri den Israelsma so taki a bribi fu den ben kan tan krin. Ma wan trakondre uma di ben de na ini a situwâsi soleki fa a skrifi na Deuteronomium 21:10-13, no ben o meki wan Israelsma drai baka gi Yehovah. Ala den famiriman fu en ben dede, èn ala den popki di ben prenki den falsi gado fu en, ben pori. A no ben abi wan banti moro nanga sma di ben anbegi falsi gado. Wan man fu Israel ben abi primisi fu trow nanga so wan trakondre uma.