San a sakafasi fu Yehovah wani taki gi wi

DAVID ben de wan man di ben ondrofeni furu problema nanga tesi. Kownu Saul, a dyarusu papa fu a wefi fu en, ben e handri na wan ogri-ati fasi nanga en. Dri tron Saul ben pruberi fu kiri David nanga wan lansri èn omeni yari langa a ben e suku fu kisi en. Disi ben meki taki David ben musu libi leki wan loweman (1 Samuel 18:11; 19:10; 26:20). Ma toku Yehovah ben de nanga David. Yehovah no ben frulusu en fu Saul wawan, ma a ben frulusu en fu tra feanti tu. Fu dati ede wi kan frustan fa David ben e firi di a singi: „Yehovah na mi klepston di e tanapu leti-opo, èn mi fortresi èn a Sma di e sorgu taki mi feni kibri. . . . Yu [Yehovah] sa gi mi yu skelt fu frulusu, èn a sakafasi fu yu e meki mi kon bigi” (2 Samuel 22:2, 36). David ben kisi barinen na ini Israel. Ma san a sakafasi fu Yehovah abi fu du nanga dati?

Te den Buku fu Bijbel e taki dati Yehovah e saka ensrefi, dan dati no wani taki dati wan tu sani de di a no man du, noso taki a e saka ensrefi na tra sma. Na presi fu dati, a moi fasi disi e sori taki Gado e firi trutru gi libisma di e meki opregti muiti fu plisi en, èn taki a de wan Gado di e sori sari-ati gi den. Na ini Psalm 113:6, 7 wi e leisi: „[Yehovah] e saka ensrefi fu luku hemel nanga grontapu, èn A e opo a mofinawan puru na ini a doti srefi.” Taki Yehovah e „saka ensrefi”, wani taki dati „a e bukundu fu si” (Today’s English Version). Sobun, Yehovah ’ben bukundu’ komoto fu hemel, noso a ben saka ensrefi so taki a ben kan poti prakseri na David, di ben de wan sondu libisma, ma di ben abi sakafasi èn di ben wani dini Gado. Fu dati ede, David e gi wi a dyaranti: „Yehovah hei, èn toku a e si a sakafasiwan” (Psalm 138:6). A fasi fa Yehovah ben sori bun-ati gi David, a pasensi di a ben abi nanga en, èn a sari-ati di a sori David, musu de wan deki-ati gi ala sma di e meki muiti fu du a wani fu Gado.

Aladi Yehovah na a Moro Heiwan fu hemel nanga grontapu, toku a wani fu poti prakseri na ibriwan fu wi. Disi e gi wi a dyaranti taki Yehovah sa yepi wi ala ten, srefi na ini den moro muilek situwâsi. Wi no abi fu frede taki a sa frigiti wi. A fasi fa Yehovah handri nanga  en pipel Israel fu owruten, e sori taki nanga reti den ben e kari en a sma „di ben memre [den] na ini [den] nowtu, bika a lobi bun-ati fu en e tan te ten di no skotu”.—Psalm 136:23.

Na ini a ten disi, wi leki dinari fu Yehovah kan kisi furu problema nanga tesi neleki David. A kan taki sma di no sabi Gado e spotu wi, noso kande wi gosontu no de so bun, noso a kan taki wi lasi wan lobiwan na ini dede. Efu wi de opregti, dan wi kan begi Yehovah awinsi sortu problema wi abi, èn wi kan aksi en fu abi sari-ati nanga wi. Yehovah sa ’bukundu’ fu poti prakseri na wi èn a sa arki den begi fu wi. Nanga yepi fu santa yeye, a psalm skrifiman ben skrifi: „Den ai fu Yehovah de na tapu den regtfardikisma, èn den yesi fu en e yere te den e bari fu kisi yepi” (Psalm 34:15). A no e naki yu ati te yu e prakseri fu a moi fasi fa Yehovah e sori sakafasi?

[Prenki na tapu bladzijde 30]

Neleki fa Yehovah ben arki den begi fu David, na so a wani arki den begi fu wi na ini a ten disi tu