O langa libisma man libi?

TAPU 3 maart 1513, a Spanyoro ondrosukuman Juan Ponce de León ben go suku wan prenspari presi. A ben teki boto seiri komoto fu Porto Riko èn a ben howpu fu doro na a èilanti Bimini. Fositen tori e taki dati a ben e suku wan wondru fonten, namku a Fonten di e meki sma kon yongu. Ma na presi fu doro drape, a ben doro na a presi di sma e kari Florida now, na Amerkankondre. A no de fu taki dati noiti a no feni a fonten disi, fu di a no de wan trutru sani.

Na ini a ten disi, furu libisma no e libi moro langa leki 70 noso 80 yari. Aladi Bijbel e taki fu sma di ben libi moro langa, toku a buku 2002 Guinness Book of World Records e taki dati a moro owru sma di ben libi oiti, ben abi 122 yari nanga 164 dei (Genesis 5:3-32). Ma na ondrosukuman John Harris di e luku sortu nyun dresi sma kan kisi, ben taki: „Sani di sma ondrosuku no so langa pasa, e sori taki kande den man seti wan libimakandra pe libisma no abi fu kon owru èn pe den no abi fu dede srefi.” Wan tu ondrosukuman fu a di fu 21 yarihondro e taki dati „libisma no sa abi fu dede moro”; „na a ten fu 2099 wan kaba no sa kon na a libi fu libisma”; „den nyun cel na ini a libisma skin, sa man tan kon na ini a presi fu den owru cel”, èn den e taki wan tu tra sani leki disi.

Mark Benecke skrifi a buku The Dream of Eternal Life (A dren di sma e dren fu libi fu têgo). Na ini a buku dati a e taki: „Pikinmoro ala den cel fu wi skin e kon nyun baka èn a sani dati e pasa wan tu leisi na ini a pisi ten di wan sma de na libi. . . . Baka sowan seibi yari, yu kan taki dati wi de wan nyun sma fu di wi abi wan nyun skin.” Ma a skin fu wi no e kon nyun ibri tron baka, fu di a seti na so wan fasi taki baka wan tu leisi, nyun cel no e kon moro na ini a presi fu owru cel. Benecke e taki dati efu dati no ben seti na so wan fasi, dan „ibri tron a libisma skin ben o man kon nyun baka, èn dati ben kan go doro gi wan langa pisi ten, iya, fu têgo srefi”.

Poti prakseri sosrefi, omeni na edetonton fu libisma man du. Na ini a syatu pisi ten di wi de na libi wi e gebroiki wan pikin pisi nomo fu wi  edetonton, di man du bun furu sani. Soleki fa na Encyclopædia Britannica e taki, dan a libisma edetonton „man du moro leki san wan sma e gebroiki na ini a pisi ten di a de na libi” (a di fu 1976, Pisi 12, bladzijde 998). A buku How the Brain Learns (A fasi fa na edetonton e leri sani), di David A. Sousa skrifi, e taki: „Te yu luku en bun, dan na edetonton man teki so furu sani, taki wi no man sabi srefi o furu a man teki.”—Bladzijde 78, a di fu tu pisi, a druk na ini 2001.

San meki taki ondrosukuman no man fruklari fu san ede wi e dede te den e luku a fasi fa a libisma skin meki? Fu san ede a libisma edetonton man du so furu sani? A kan taki wi meki na so wan fasi fu tan leri sani fu têgo? Fu san ede wi man prakseri srefi taki wi man libi fu têgo?

Bijbel e taki: „Srefi ten di no skotu [Gado] poti na ini den ati, so taki libisma noiti no sa kon sabi a wroko finifini di a tru Gado meki fu sensi a bigin te na a kaba” (Preikiman 3:11). Den wortu disi e sori taki Gado poti na ini wi prakseri taki wi man libi fu têgo. Fu dati ede, ala ten wi ben sa man leri wan sani fu Gado nanga den wroko fu en. Efu wi ben sa libi milyunmilyun yari, iya, efu wi ben sa libi fu têgo, dan ala ten wi ben sa man leri moro fu a fruwondru fasi fa Gado meki sani.

Den wortu fu Yesus Krestes e sori sosrefi taki libisma man libi fu têgo. A ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Fa a de nanga yu? Yu wani libi fu têgo?

[Prenki na tapu bladzijde 3]

Juan Ponce de León ben suku wan fonten di e meki sma kon yongu

[Sma di abi a reti fu a prenki]

Ponce de León: Harper’s Encyclopædia of United States History