O warti a libi fu yu de?

ALADI furu sma ben e lasi den libi na ini Europa na a ten fu a Fosi Grontapufeti, tra sma ben e meki bigi muiti fu kibri a libi fu trawan na ini Antarctica. Wan ondrosukuman fu Ingrisikondre, Ernest Shackleton, nanga wan grupu fu 27 man ben kon de na ini bigi problema di a sipi fu den di nen Endurance (Horidoro), naki broko èn sungu di a tuka nanga wan bigi ijsbergi di ben de na ini a watra. Na a wan noso tra fasi, Shackleton ben man tyari den man disi go na tapu Elephant Èilanti na ini a Zuid Atlantisch Se, pe den ben howpu taki sani ben o waka moro bun nanga den. Ma toku den ben de na ini bigi kefar ete.

Shackleton kon si taki a wan-enkri fasi fa den ben o man tan na libi, na te den ben o seni wan sma fu go suku yepi na wan station pe sma ben e fanga walvis, èn a station dati ben de na tapu na èilanti South Georgia. Dati ben de 1100 kilometer moro fara, èn Shackleton ben abi soso wán boto fu 6,7 meter, di a ben man teki fu a sipi Endurance. A no ben gersi leki sani ben o waka bun nanga den.

Ma tapu 10 mei 1916, baka di den ben de na  ini banawtu 17 dei langa, Shackleton nanga feifi man doro na South Georgia, ma a se ben krasi so te taki den ben musu go na syoro na a tra sei fu na èilanti. Fu man doro pe den ben wani go, den ben abi fu waka 30 kilometer pasa wan kontren di den no ben abi na tapu karta, èn a kontren disi ben abi bergi di ben lai nanga snew. A ben gersi leki sani no ben o waka bun gi Shackleton nanga den mati fu en, bika a ben kowru srefisrefi èn den no ben abi wrokosani di den ben kan gebroiki fu kren a bergi. Ma aladi so furu problema ben miti den, toku den doro pe den ben wani go, èn te fu kaba Shackleton go teki ala den man puru na Elephant Èilanti. Fu san ede Shackleton ben meki so furu muiti fu yepi den man? Roland Huntford, wan man di e skrifi fu a libi fu sma, ben taki: „A wan-enkri sani di a ben wani du, na fu tyari ala den man komoto libilibi na ini a situwâsi dati.”

„Nowan fu den no e mankeri”

Den man fu Shackleton ben e sidon krosibei na makandra fu suku waran na tapu „wan pisi gron di ben lai nanga ston èn nanga ijs; a ben langa sowan 30 kilometer, èn nowan sma ben man doro drape”. Ma fa a du kon taki den no lasi-ati, aladi den ben e wakti fu kisi yepi? Dati na fu di den ben frutrow taki a fesiman fu den ben o frulusu den, soleki fa a ben pramisi.

Na ini a ten disi, libisma de na ini pikinmoro a srefi situwâsi leki den man dati di ben fasi na tapu Elephant Èilanti. Furu sma e libi na ini bun takru situwâsi en den e du furu muiti soso fu feni den sani di den abi fanowdu fu man tan na libi. Toku den sma disi kan abi a fasti frutrow taki Gado sa „frulusu a wan di e pina”, so taki a no e kisi kwinsi moro èn so taki a no e sari moro (Yob 36:15). Yu kan abi na overtoigi taki ibri sma en libi warti na ini Gado ai. „Kari mi tapu a dei fu banawtu”, na so Yehovah Gado, a Mekiman e taki, èn „mi sa frulusu yu.”​—Psalm 50:15.

Yu abi muiti fu bribi taki yu, leki wán nomo fu den someni milyard sma na grontapu, warti na ini na ai fu a Mekiman? Dan luku san a profeiti Yesaya ben skrifi fu den someni milyard stari na ini den someni milyard stari sistema na ini a bigi universum na wi lontu. Wi e leisi: „Opo un ai go na loktu èn luku. Suma meki den sani disi? Na a Sma di e tyari a legre fu den go na doro, sosrefi a nomru fu den, a Sma di e kari den alamala srefi na den nen. Fu di a abi bigi krakti pasa marki, èn fu di a tranga srefisrefi tu, meki nowan fu den no e mankeri.”​—Yesaya 40:26.

Yu e frustan san dati wani taki? A Merki Pasi stari sistema fu wi abi pikinmoro 100 milyard stari, èn a son fu wi, a grontapu, nanga den tra planeiti de wan pisi nomo fu a stari sistema disi. Èn omeni tra stari sistema de? Nowan sma sabi dati seiker, ma son sma e denki taki na sowan 125 milyard. Dati musu de wan bun bigi nomru fu stari trutru! Toku Bijbel e fruteri wi taki a Mekiman fu hemel nanga grontapu sabi a nen fu ibriwan fu den stari.

„Srefi den wiwiri na un ede teri”

’Ma’, na so wan sma ben kan taki, ’te wan sma sabi den nen fu milyardmilyard stari, noso fu milyardmilyard sma, dan dati no wani taki dati a e broko en ede nanga ibriwan fu den sma disi.’ A tru taki wan computer kan abi a nen fu milyardmilyard sma na ini. Nowan sma no ben o feni taki a computer e broko en ede nanga iniwan fu den sma disi. Ma toku Bijbel e sori taki Yehovah Gado no sabi den nen nomo fu milyardmilyard sma, ma taki a e broko en ede tu nanga ibriwan fu den sma disi. Na apostel Petrus ben skrifi: „Trowe ala un sorgu na en tapu, bika a e broko en ede nanga unu.”​—1 Petrus 5:7.

Yesus Krestes ben taki: „A no tu pikin fowru den e seri gi wan pisi moni di no warti furu? Ma toku nowan fu den sa fadon na gron sondro taki un Tata sabi. Ma srefi den wiwiri na un ede teri. Fu dati ede unu no musu frede: un warti moro  leki furu pikin fowru” (Mateyus 10:29-31). Luku tu taki Yesus no ben taki dati Gado ben o sabi wawan san ben pasa nanga pikin fowru èn nanga libisma. Yesus ben taki: „Un warti moro leki furu pikin fowru.” Fu san ede yu warti moro den? Fu di yu meki akruderi „a prenki fu Gado”. Disi e meki taki yu man leri fa fu tyari yusrefi na wan fasi di fiti, fa fu denki, èn fa fu sori yeye fasi. Den sani disi e sori taki yu abi den tumusi hei fasi fu Gado.​—Genesis 1:26, 27.

„Wan sani di meki nanga koni”

No meki sma kori yu fu di den e taki dati wan Mekiman no de. Den sma disi feni taki krakti fu a naturu meki yu. Den e taki dati yu no meki „akruderi a prenki fu Gado” kwetikweti, ma taki yu de a srefi leki ala den tra meti na tapu a planeiti disi, iya, den e taki dati yu de a srefi leki den pikin fowru.

Yu e bribi trutru taki libi kon fu ensrefi, noso taki a kon de nanga yepi fu krakti fu a naturu? Soleki fa biologiaman Michael J. Behe e taki, dan „ala den kefalek frekti kenki di e pasa na ini libisani”, e sori taki a sani dati no kan de so kwetikweti. Soleki fa a e taki, dan den kenki di e pasa na ini libisani, e meki sma kon si krin taki „ibriwan sani di e libi na grontapu . . . meki nanga koni”.​—Darwin’s Black Box—The Biochemical Challenge to Evolution.

Bijbel e fruteri wi sosrefi taki ala libisani na grontapu meki nanga koni. Èn a e fruteri wi taki a Sma di meki den sani disi nanga koni, na Yehovah Gado, a Mekiman fu hemel nanga grontapu.​—Psalm 36:9; Openbaring 4:11.

A tru taki wi musu tan na ini wan grontapu di lai nanga sari èn nanga pina. Ma toku yu no musu gi pasi taki a sani disi e tapu yu fu bribi taki grontapu nanga ala libi na en tapu abi wan Mekiman, èn taki wan Sma ben de di ben denki fa fu seti en. Hori tu prenspari sani na prakseri. Wán fu den, na taki Gado no meki na onvolmaaktifasi di de fu si na ala sei. A tra sani, na taki wi Mekiman abi bun reide fu gi pasi taki na onvolmaaktifasi disi de na grontapu fu wan pisi ten. Soleki fa a tijdschrift disi ben tyari kon na fesi furu tron, dan Yehovah Gado gi pasi taki ogri de gi wan syatu pisi ten nomo. A du dati, so taki fu ala ten a kan piki ala den aksi di ben opo kon na a ten di libisma opo densrefi teige en fu a fosi leisi. *​—Genesis 3:1-7; Deuteronomium 32:4, 5; Preikiman 7:29; 2 Petrus 3:8, 9.

„A sa frulusu a pôtiwan di e bari fu kisi yepi”

A no de fu taki, dati aladi furu sma e libi na ini bun takru situwâsi na ini a ten disi, toku a libi na wan tumusi moi presenti. Èn wi e du ala san wi man fu no pori en. A libi di Gado e pramisi wi na ini a ten di e kon, no de wan strei fu tan na libi nomo na ini muilek situwâsi, neleki fa dati ben pasa nanga den man fu Shackleton na tapu Elephant Èilanti. San Gado abi na prakseri, na fu frulusu wi fu a pen èn fu a soso libi di wi abi now, so taki wi kan „grabu a trutru libi, hori en bun steifi”, soleki fa a ben wani dati gi den libisma di a ben meki na ini a bigin.​—1 Timoteyus 6:19.

Gado sa du ala den sani disi fu di ibriwan fu wi warti na ini en ai. A seti sani so taki a Manpikin fu en, Yesus Krestes, ben kan tyari a lusu-paiman di de fanowdu fu frulusu wi fu sondu, onvolmaaktifasi, nanga dede di wi kisi fu wi fosi papa nanga mama, Adam nanga Eva (Mateyus  20:28). „Gado ben lobi grontapu so te”, na so Yesus Krestes ben taki, „taki a ben gi en wan-enkri gebore Manpikin, so taki ibriwan sma di e sori bribi na ini en ben sa . . . abi têgo libi.”​—Yohanes 3:16.

San Gado sa du gi den wan di e ondrofeni sari nanga kwinsi now? A Wortu fu Gado di skrifi nanga yepi fu santa yeye, e fruteri: „A sa frulusu a pôtiwan di e bari fu kisi yepi, sosrefi a sma di e kisi kwinsi, èn ibri sma di no abi yepiman. A sa firi sari gi a mofinawan èn gi a pôtiwan, èn a sa frulusu den sili fu den pôtiwan. Fu kwinsi èn fu ogri di e du nanga tranga a sa frulusu a sili fu den.” Fu san ede Gado sa du disi? Fu di „a brudu fu den [noso, a libi fu den] sa de warti na ini en ai”.​—Psalm 72:12-14.

Hondrohondro yari langa libisma e pina fu sondu nanga onvolmaaktifasi, èn a de neleki den „e geme” fu di den e ondrofeni furu sari nanga pina. A wan-enkri reide fu san ede Gado ben gi pasi taki dati pasa, na fu di a ben sabi taki a ben man puru iniwan pori di ben o kon leki bakapisi fu dati (Romesma 8:18-22). Heri esi now a sa ’meki ala sani kon bun baka’ nanga yepi fu en Kownukondre tirimakti di de ondro a tiri fu en Manpikin, Yesus Krestes.​—Tori fu den Apostel 3:21; Mateyus 6:9, 10.

Dati wani taki sosrefi taki libisma di pina èn di dede na ini a ten di pasa, o kisi wan opobaka. Gado no frigiti den (Yohanes 5:28, 29; Tori fu den Apostel 24:15). Heri esi den sa kisi libi „pasa marki”, iya, têgo libi na ini volmaaktifasi na tapu wan paradijs grontapu pe sma no e sari èn no e pina (Yohanes 10:10; Openbaring 21:3-5). Ala sma di de na libi sa man nyan bun fu a libi, èn den sa man kweki den tumusi moi fasi, èn den sa man du sani di e sori taki den na sma di meki „akruderi a prenki fu Gado”.

Yu sa de na libi fu nyan bun fu a libi di Yehovah pramisi libisma? A de na yu. Wi e gi yu deki-ati fu kisi wini fu den sani di Gado seti so taki libisma kan kisi den blesi dati. Den sma di tyari a tijdschrift disi kon na doro sa breiti fu yepi yu fu du dati.

[Futuwortu]

[Prenki na tapu bladzijde 4, 5]

Den man fu Shackleton di ben fasi na tapu na èilanti ben frutrow na tapu taki a ben o frulusu den, soleki fa a ben pramisi

[Sma di abi a reti fu a prenki]

© CORBIS

[Prenki na tapu bladzijde 6]

„Yu warti moro leki furu pikin fowru”