Wondru​—Den pasa trutru?

A SANI di ben skrifi na bakasei fu wan wagi di ben e rèi pasa, hari a prakseri fu a man wantewante. Na tapu a wagi ben skrifi: „Wondru e pasa trutru. Aksi den engel.” Aladi a man disi ben e bribi na ini wan gado, toku a no ben sabi seiker san den wortu disi ben wani taki. Kande den wortu ben wani taki, dati a sma di ben e rèi na oto ben e bribi na ini wondru. Noso kande den wortu ben e sori taki a sma disi ben e spotu pikinso nanga a tori disi, fu di a no ben e bribi trutru na ini wondru nanga engel.

Kande yu e feni en wan moi sani fu si san Manfred Barthel, wan skrifiman fu Doisrikondre ben taki: „A wortu wondru e meki wantewante taki den leisiman prati na ini tu difrenti grupu, fu di den e denki tra fasi fu a wortu disi.” Den sma di e bribi na ini wondru, de seiker taki wondru e pasa trutru èn taki den e pasa furu leisi kande. * Fu eksempre, soleki fa sma e fruteri dan na ini den yari di pasa, bribiman na ini Grikikondre taki dati wondru e pasa wán tron wan mun. Na fu dati ede meki wan kerki fesiman fu a Griki Orthodox Kerki ben warskow sma: „Na so wan fasi, a bribiman wani meki Gado, Maria nanga den santawan, kon tron leki libisma. Bribiman no musu suku sani di no de.”

Na son kondre, wan tu sma nomo e bribi na ini wondru. Na ini 2002, wan organisâsi na ini Doisrikondre ben ondrosuku a tori disi, èn den kon si taki 71 procent fu den sma di e libi drape, e si wondru leki sani di no pasa trutru. Ma a di fu dri pisi fu den sma na ini a kondre e bribi na ini wondru, èn dri fu den na uma di e taki dati den kisi wan boskopu fu a Nyunwenke Maria. Soleki fa den e fruteri, dan Maria kon na den, makandra nanga engel èn nanga wan doifi, èn wan tu mun baka dati a Doisri koranti Westfalenpost ben taki: „Teleki now, sowan 50.000 sma di abi a gwenti fu go na santa presi fu anbegi, sosrefi sma di e suku wan fasi fu kon betre, nanga sma di wani kon sabi moro fu a tori, de fayafaya fu si fa sani o waka nanga den fisyun di den uma si.” Sma ben e fruwakti taki ete 10.000 sma ben o kon na ini a dorpu fu si Maria te a ben o kon drape ete wan leisi. Sma e taki dati a Nyunwenke Maria ben de fu si tu na ini a yari 1858 na Lourdes, na Fransikondre, èn na ini 1917 na Fátima, Potogisikondre.

Fa a de nanga den sma di no abi a Kresten bribi?

Na ini pikinmoro ala kerki yu abi sma di e bribi na ini wondru. The Encyclopedia of Religion e taki dati den sma di seti a Buda-bribi, a Kresten bribi, nanga na Islam, ben abi difrenti fasi fa den ben e prakseri fu wondru. Ma a buku disi e taki tu: „A heri historia fu den bribi disi e sori krin taki wondru nanga tori di sma ben e fruteri fu wondru di den si, ben de wan prenspari pisi fu a bribi fu libisma.” A buku disi e taki tu dati „Buda srefi ben e du wondru son leisi”. Bakaten, di „a Buda-bribi doro na China, dan den zendeling fu a kerki disi ben e du wondru furu tron”.

Baka di a buku taki fu wan tu fu den sokari wondru disi, a e taki moro fara: „Skrifiman di abi a wroko fu skrifi sani fu a libi fu tra sma èn di abi dipi lespeki gi a gado fu den, skrifi fu wondru di  sma du, èn kande wan sma no wani bribi ala den tori disi, ma tweifri no de taki den skrifiman disi ben de opregti di den skrifi den tori disi fu gi glori na Buda, di ben gi den fayafaya futuboi fu en a krakti fu du den wondru disi.” A srefi buku disi e taki fu na Islam: „Moro furu Islam-sma noiti tapu fu bribi taki den ben o si wondru. Na ini den tori (hadīths) di den e fruteri, den e taki dati Mohammed du furu wondru gi sma. . . . Srefi te santa sma dede kaba, sma e bribi taki den kan du wondru ete gi wan bribiman aladi den de na ini den grebi fu den, èn dati meki den bribiman disi e aksi den fayafaya fu yepi den.”

Fa a de nanga den wondru di a Kresten bribi e taki fu den?

Furu sma di teki a Kresten bribi no e prakseri a srefi fu a tori disi. Son sma e bribi na ini den tori fu Bijbel di e taki fu den wondru di Yesus Krestes, noso den futuboi fu Gado du bifo a ten fu den Kresten. Ma furu sma e agri nanga Maarten Luther, wan Anitri di ben opo ensrefi teige a Lomsu Kerki. The Encyclopedia of Religion e taki fu en: „Luther nanga Calvijn skrifi taki a ten fu den wondru ben kon na wan kaba èn taki sma no musu fruwakti taki den ben o pasa baka.” Lomsu Kerki ben tan bribi na ini wondru, „ma den no ben pruberi fu fruklari fa den wondru disi ben e pasa”, na so a buku disi e taki. Ma „den Anitri di ben kisi hei skoroleri ben kon bribi taki Kresten ben musu libi wan bun Kresten libi nomo, èn taki Gado, noso den yeye no ben e taki nanga libisma, èn den no ben abi nowan enkri krakti tapu a fasi fa den ben e libi”.

Tra sma di e kari densrefi Kresten, sosrefi wan tu kerki fesiman, e tweifri efu den wondru di skrifi na ini Bijbel pasa trutru. Fu eksempre, teki a tori fu a makabusi di ben e bron, soleki fa a skrifi na ini Bijbel na Exodus 3:1-5. A buku What the Bible Really Says e tyari kon na krin taki furu Doisri sabiman fu kerkitori no e denki taki a tori disi e taki fu wan wondru di pasa trutru. Na presi fu dati, den e si en leki wan „sani di e sori taki Moses ben e feti  nanga ensrefi na agersi fasi, èn dati meki en konsensi ben e fon en neleki a pen di wan sma e kisi te maka e sutu en, noso te faya e bron en”. A buku e taki moro fara: „A faya kan agersi bromki tu di opo wantronso di a son skèin na den tapu fu di Gado ben kon drape.”

Kande yu no breiti nanga a fasi fa sma tyari sani kon na krin. We, san yu musu bribi dan? Wi musu bribi taki wan ten ben de taki wondru ben e pasa trutru? San wi musu taki fu wondru di e pasa na ini a ten disi? Fu di wi no man aksi den engel den sani disi, dan suma wi kan aksi?

San Bijbel e taki fu a tori

Nowan sma no man taki dati Bijbel no e fruteri wi taki na ini owruten Gado ben bumui nanga libisma afersi son leisi, fu di a ben e du sani di libisma no man du. Na ini Bijbel wi e leisi fu Gado: „Yu puru yu pipel Israel na ini a kondre Egepte fu di yu du bigi marki nanga wondru, èn fu di yu gebroiki a tranga anu fu yu di yu langa go na fesi èn fu di yu du dati na wan fasi di meki sma ben kon frede” (Yeremia 32:21). Prakseri nomo, a kondre nanga a moro bigi makti na ini a ten dati ben kisi syen di Gado tyari tin plaag kon na en tapu; wan fu den plaag disi ben de taki den fosi manpikin fu a kondre disi kon dede. Den sani disi ben de bigi wondru trutru!​—Exodus, kapitel 7 te go miti 14.

Moro leki 1500 yari baka dati, den fo Evangelie skrifiman ben taki fu sowan 35 wondru di Yesus du. Fu taki en leti, densrefi ben taki dati a du moro wondru leki den wan di den skrifi. Den tori disi pasa trutru? *​—Mateyus 9:35; Lukas 9:11.

Efu Bijbel na Gado Wortu di e taki fu waarheid, dan yu kan bribi den wondru tu di skrifi na ini en. Bijbel e fruteri krin taki wondru pasa na ini owruten; a e fruteri taki sma ben kon betre nanga yepi fu wondru, taki dedesma ben kon na libi baka, èn a e taki fu ete wan tu fu den sortu wondru disi. Ma a e sori krin tu taki den sortu wondru disi no e pasa moro. (Luku a faki di nen „Fu san ede son wondru no e pasa moro na ini a ten disi?”, na tapu bladzijde 4.) Sobun, a de so taki srefi den sma di e bribi na ini Bijbel, no e bribi na ini den wondru di e pasa na ini a ten disi? Fu feni a piki, kon meki wi go luku na artikel di e kon now.

[Futuwortu]

[Faki na tapu bladzijde 4]

FU SAN EDE SON WONDRU NO E PASA MORO NA INI A TEN DISI?

Bijbel e taki fu difrenti sortu wondru (Exodus 7:19-21; 1 Kownu 17:1-7; 18:22-38; 2 Kownu 5:1-14; Mateyus 8:24-27; Lukas 17:11-19; Yohanes 2:1-11; 9:1-7). Furu fu den wondru disi ben pasa fu yepi sma kon si taki Yesus ben de a Mesias, èn den ben buweisi taki Gado ben e horibaka gi en. Den bakaman fu Yesus di ben e libi na ini a fosi yarihondro, ben kisi a krakti fu du wondru, soleki a taki di den ben man taki na ini difrenti tongo èn a fruklari di den ben man fruklari sani di sma ben e fruteri nanga yepi fu Gado yeye (Tori fu den Apostel 2:5-12; 1 Korentesma 12:28-31). A krakti disi di sma ben kisi fu man du wondru, ben de prenspari gi a Kresten gemeente di no ben seti so langa ete. Fa so?

We, wan tu sma nomo ben abi wan kopi fu den Buku fu Bijbel. Nofo tron, na soso den gudusma ben abi bukulolo noso buku. Na ini den kondre pe sma no ben abi a Kresten bribi, den no ben sabi Bijbel èn den no ben sabi Yehovah, a Skrifiman fu Bijbel. Sma ben musu fruteri den a Kresten bribi. A krakti di sma ben kisi fu du wondru, ben e sori taki Gado ben e gebroiki a Kresten gemeente.

Ma Paulus ben tyari kon na krin taki sma no ben o man du den wondru disi te den no ben de fanowdu moro. „Awinsi sma kisi a presenti fu man taki profeititori, a o kon na wan kaba; awinsi sma kisi a presenti fu man taki na ini tra tongo, a o kon na wan kaba; èn awinsi sma kisi a presenti fu abi sabi, a o kon na wan kaba. Bika wi no sabi ala sani di de fu sabi èn wi no e taki ala profeititori ete. Ma te a sani di de volmaakti e kon, dan a presenti fu man sabi ala sani èn a presenti fu man taki ala profeititori o kon na wan kaba.”​—1 Korentesma 13:8-10.

Na ini a ten disi, sma man feni wan Bijbel makriki, èn den man feni buku tu di e yepi den fu ondrosuku Bijbel wortu moro fini, noso den kan feni encyclopedie di e tyari spesrutu tori fu Bijbel kon na krin. Moro leki siksi milyun Kresten di kisi bun leri, e yepi tra sma fu kon sabi moro fu Gado, soleki fa Bijbel e taki fu disi. Sobun, wondru no de fanowdu moro fu buweisi taki Yesus Krestes na a Frulusuman di Gado poti, èn den no de fanowdu tu fu buweisi taki Yehovah e horibaka gi den futuboi fu en.