Wi no e libi gi wisrefi moro
Wi no e libi gi wisrefi moro
„[Krestes] dede gi ala sma, so taki den wan di e libi, no musu libi gi densrefi moro.”—2 KORENTESMA 5:15.
1, 2. Sortu komando na ini Bijbel ben meki taki den bakaman fu Yesus na ini a fosi yarihondro ben man basi a firi di den ben abi fu prakseri densrefi nomo?
A BEN de a lasti neti fu Yesus na grontapu. Ete wan tu yuru nomo, dan a ben o gi en libi gi a bun fu ala den sma di ben o sori bribi na ini en. A neti dati, Yesus taigi den getrow apostel fu en furu prenspari sani. Wan fu den sani di Yesus taigi den, na wan komando di abi fu du nanga wan eigifasi di den ben musu abi fu buweisi taki den na bakaman fu en. A ben taki: „Mi e gi unu wan nyun komando, fu unu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”—Yohanes 13:34, 35.
2 Tru Kresten musu lobi makandra na wan fasi di e sori taki den de klariklari fu gebroiki ala san den abi gi a bun fu trawan, èn den musu poti a bun fu tra bribiman na fesi a di fu densrefi. Den musu de klariklari srefi fu ’gi den sili abra gi a bun fu den mati fu den’ (Yohanes 15:13). San den fosi Kresten du di den kisi a nyun komando disi? Tertullianus, wan skrifiman fu a di fu tu yarihondro, ben skrifi na ini a pôpi buku fu en di nen Apology, taki tra sma ben taki fu den Kresten: ’Luku fa den lobi makandra; luku fa den de klariklari srefi fu dede gi makandra.’
3, 4. (a) Fu san ede wi musu kakafutu gi a firi di wi abi fu prakseri wisrefi nomo? (b) San wi sa luku na ini na artikel disi?
3 Wi tu musu ’tan tyari den hebi fu makandra, èn na so fasi wi e du san a wet fu Krestes e taki’ (Galasiasma 6:2). Ma a prakseri di sma e prakseri densrefi nomo, na wan fu den moro bigi problema di e tapu sma fu gi yesi na a wet fu Krestes èn fu ’lobi Yehovah wi Gado nanga wi heri ati, wi heri sili, wi heri frustan, èn fu lobi tra sma leki fa wi lobi wisrefi’ (Mateyus 22:37-39). Fu di wi no de volmaakti, meki wi abi a firi fu prakseri wisrefi nomo. Boiti dati, wi e kisi fu du sosrefi nanga den broko-ede fu na aladei libi, a strei di sma na skoro, noso na wrokope e strei nanga makandra, èn sosrefi a feti di wi musu feti fu feni den sani di wi abi fanowdu fu tan na libi; a bakapisi na taki den sani disi e meki taki wi e kisi a firi fu prakseri wisrefi nomo, moro nanga moro. Dei fu dei moro nanga moro sma e sori taki den e prakseri densrefi nomo. Na apostel Paulus ben warskow: „Na ini den lasti dei . . . sma sa lobi densrefi nomo.”—2 Timoteyus 3:1, 2.
4 Na a kaba fu en libi na grontapu, Yesus taigi den disipel fu en san na den dri sani di kan yepi den fu no prakseri densrefi nomo. San na den dri sani disi, èn fa wi kan kisi wini fu den sani di a ben leri den disipel?
Wan dresi di e yepi!
5. San Yesus fruteri den disipel fu en di a ben e preiki na a noordsei fu Galilea, èn fu san ede a sani disi ben meki den firi sari srefisrefi?
5 Yesus ben e preiki krosibei fu Sesarea Filipi, na a noordsei fu Galilea. A kan taki a kontren disi di de wan presi pe sma kan libi na ini vrede èn di moi srefisrefi, ben de wan presi di fiti fu sma bro den ede pikinso, na presi fu de wan kontren pe sma ben o kisi fu yere taki den no musu denki densrefi wawan. Ma di Yesus ben de drape, dan a bigin sori den disipel fu en taki „a musu go na Yerusalem èn taki den owru man nanga den edeman fu den priester nanga den leriman fu Wet ben o meki a pina hebi, èn taki den ben o kiri en, ma taki a ben o opo baka na a di fu dri dei” (Mateyus 16:21). A sani disi di Yesus fruteri den disipel fu en, ben musu meki den firi sari srefisrefi fu di te na a ten dati den ben fruwakti taki a Fesiman fu den ben o seti en Kownukondre na grontapu!—Lukas 19:11; Tori fu den Apostel 1:6.
6. Fu san ede Yesus piri-ai gi Petrus na so wan krakti fasi?
6 Wantewante Petrus „tyari en go na wan sei èn a bigin piri-ai gi Yesus taki: ’Masra, sorgu bun gi yusrefi; a sani disi no o miti yu kwetikweti.’” San Yesus piki en? A „drai en baka gi Petrus èn a taki: ’Komopo na mi fesi, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki.’” Disi ben de tu difrenti fasi fu si sani! Yesus ben de klariklari fu gebroiki en libi gi a wroko di Gado ben gi en fu du, wan wroko di ben o meki taki a ben o dede na wan pina-postu, baka wan tu mun. Petrus ben gi en a rai fu libi wan switi libi. „Sorgu bun gi yusrefi”, a taki. A no de fu taki dati Petrus ben taki disi fu di a ben wani taki sani waka bun nanga Yesus. Ma toku Yesus piri-ai gi en, bika na a momenti dati, Petrus ben meki taki Satan ben abi krakti na en tapu. Petrus no ben ’denki leki fa Gado e denki, ma leki fa libisma e denki’.—Mateyus 16:22, 23.
7. San den bakaman fu Yesus musu du, soleki fa skrifi na ini Mateyus 16:24?
7 A fasi disi fa Petrus ben denki di a ben taigi Yesus a sani disi, na a fasi fa sma na ini a ten disi e denki. Moro furu a de so, taki a grontapu disi e gi sma a deki-ati fu ’sorgu bun gi densrefi’ noso fu ’du san moro makriki gi den’. Ma Yesus gi a rai taki wi musu abi wan heri tra denki. A ben taigi den disipel fu en: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn tan waka na mi baka” (Mateyus 16:24). „Disi a no wan kari gi sma di no tron disipel ete”, na so The New Interpreter’s Bible e taki, „ma na den sma di teki a kari fu Krestes kaba musu go prakseri san a wani taki fu de wan disipel.” Den dri sani di Yesus ben kari na ini a bijbeltekst dati, na sani di bribiman musu du. Meki wi go luku ibriwan fu den sani disi wan fru wan.
8. Fruklari san a wani taki fu no teri yusrefi moro.
8 A fosi sani di wi musu du na taki wi no musu teri wisrefi moro. A Griki wortu di vertaal nanga ’no teri yusrefi moro’, e sori taki a sma de klariklari fu no du den sani di a wani, noso fu no du den sani di kan meki taki a e tyari wini kon gi ensrefi. Te wi no e teri wisrefi moro, dan disi no wani taki dati wanwan leisi wi e weigri fu du sani di e gi wi prisiri; a no wani taki tu dati wi no mag abi prisiri srefisrefi, noso taki wi e du sani di abi takru bakapisi gi wisrefi. Wi no ’de fu wisrefi moro’ te wi de klariklari fu gi wi heri libi èn ala sani di wi abi, na Yehovah (1 Korentesma 6:19, 20). Na presi taki wi e poti prakseri na wisrefi wawan, dan wi e poti prakseri ala ten na Gado. Te wi no e teri wisrefi moro, dan wi abi a fasti bosroiti fu du a wani fu Gado, aladi disi no de san wi leki sondu libisma gwenti du kande. Wi e sori taki wi wani dini Gado wawan, te wi e gi wi libi abra na en èn e teki dopu. Baka dati wi e du ala muiti fu sori na ini wi heri libi taki wi gi wisrefi abra na en.
9. (a) Nanga san wan pina-postu ben abi fu du di Yesus ben de na grontapu? (b) Na sortu fasi wi e teki wi pina-postu?
9 A di fu tu sani di wi musu du na taki wi musu teki wi pina-postu. Na ini a fosi yarihondro, wan pina-postu ben e abi fu du nanga pina, syen, nanga dede. Moro furu a ben de so taki na soso ogriman ben kisi dedestrafu na wan pina-postu, noso taki sma ben e anga a dedeskin fu den ogriman disi na wan postu. Nanga den wortu disi, Yesus ben sori taki wan Kresten musu de klariklari fu teki frufolgu, syen, noso srefi dede, fu di a no de wan pisi fu grontapu (Yohanes 15:18-20). Den markitiki di wi abi leki Kresten, e meki taki wi e difrenti fu grontapu, èn dati meki grontapu e ’taki ogri fu wi’ (1 Petrus 4:4). Disi kan pasa na skoro, na wi wrokopresi, noso srefi na ini wi famiri (Lukas 9:23). Ma toku wi de klariklari fu frudrage a wisiwasi di grontapu e wisiwasi wi, fu di wi no e libi gi wisrefi moro. Yesus ben taki: „Koloku fu unu te sma e gi unu porinen èn te den e frufolgu unu aladi den e lei èn e taki ala sortu ogri fu unu, fu mi ede. Un musu breiti èn prisiri pasa marki, fu di unu o kisi wan bigi pai na hemel” (Mateyus 5:11, 12). Iya, a moro prenspari sani na taki Gado e feni wi bun.
10. San a wani taki fu tan waka na Yesus baka?
10 A di fu dri sani di Yesus Krestes ben taki dati wi musu du, na taki wi musu tan waka na en baka. Soleki fa a buku An Expository Dictionary of New Testament Words fu W. E. Vine e sori, dan a Griki wortu di vertaal nanga ’waka baka’, wani taki dati wan sma musu de wan kompe fu wan trawan, „wan sma di e waka a srefi pasi”. Wán Yohanes 2:6 e taki: „Efu wan sma e taki dati a e tan de wán nanga [Gado], dan ensrefi musu tan waka tu neleki fa Krestes ben waka.” Fa Yesus ben waka? Fu di Yesus ben lobi en hemel Tata èn den disipel fu en, meki a no ben prakseri ensrefi nomo. „Krestes no ben plisi ensrefi”, na so Paulus skrifi (Romesma 15:3). Srefi te a ben weri, noso te angri ben e kiri en, toku Yesus ben feni den sani di trawan ben abi fanowdu, moro prenspari leki den sani di ensrefi ben abi fanowdu (Markus 6:31-34). Yesus ben du tranga muiti tu fu du a Kownukondre preikiwroko èn a leriwroko. A no de so dan, taki wi musu waka na en baka èn de fayafaya fu du a wroko di wi kisi fu ’meki sma fu ala kondre tron disipel, èn fu leri den ala sani di Yesus komanderi wi’? (Mateyus 28:19, 20) Na ini a heri fasi fa Krestes tyari ensrefi, a gi wi wan eksempre, èn wi musu „waka soifri na ini den futumarki fu en”.—1 Petrus 2:21.
11. Fu san ede a de prenspari fu no teri wisrefi moro, fu teki wi pina-postu, èn fu tan waka na Yesus Krestes baka?
11 A de tumusi prenspari taki wi no e teri wisrefi moro, taki wi e teki wi pina-postu, èn taki wi e tan waka na baka na Eksempre fu wi. Te wi e du disi, dan dati sa de leki wan dresi di e yepi wi fu kakafutu gi a firi fu prakseri wisrefi nomo, bika te wan sma e prakseri ensrefi nomo, dan dati e tapu en fu gi ensrefi gi a bun fu trawan. Boiti dati, Yesus ben taki: „A sma di wani kibri en libi, sa lasi en; ma a sma di e lasi en libi fu mi ede, sa feni en. Bika sortu bun a sa du wan sma efu a abi heri grontapu, ma a e lasi en libi? Noso san wan sma sa gi fu kan kisi en libi baka?”—Mateyus 16:25, 26.
Wi no kan dini tu masra
12, 13. (a) San ben de wan problema gi a yongu tiriman di ben aksi Yesus rai? (b) Sortu rai Yesus ben gi a yonguman, èn fu san ede?
12 Wan tu mun baka di Yesus sori taki a de prenspari taki den disipel fu en no musu teri densrefi moro, dan wan yongu gudu tiriman kon na Yesus èn a taigi Yesus: „Leriman, san na a bun di mi musu du fu kisi têgo libi?” Yesus taigi en taki a ben musu „du ala ten san den komando taki” èn dan Yesus kari wan tu fu den komando. A yonguman taki: „Mi du ala den sani disi.” Soleki fa a sori, dan a man ben de opregti èn a ben du ala san a man fu hori ensrefi na den komando fu a Wet. Dati meki a aksi: „Ma san mi no e du bun?” Di Yesus piki a yonguman, dan a gi en wan aparti kari, namku: „Efu yu wani de volmaakti [„de boen dorodoro,” Da Bijbel na ini Sranantongo], dan go seri den sani di yu abi èn gi den pôtiwan a moni dati, dan yu sa kisi wan gudu fu hemel, èn kon waka na mi baka.”—Mateyus 19:16-21.
13 Yesus ben si taki efu a yonguman disi ben wani dini Yehovah nanga en heri ati, dan a ben musu gowe libi a sani di ben sa puru en prakseri trutru, namku a gudu di a ben abi. Wan tru disipel fu Krestes no kan dini tu masra. A „no kan dini Gado èn dini Gudu na a srefi ten” (Mateyus 6:24). A de fanowdu taki a musu si sani nanga wan ’krin ai’, namku taki a musu poti prakseri na yeye afersi (Mateyus 6:22). Te wan sma e teki den gudu fu en èn e gi disi na pôtisma, dan a e sori taki a de klariklari fu gebroiki ala san a abi gi a bun fu trawan. Na presi fu den gudu disi, dan Yesus ben o gi a yongu tiriman disi a bigi grani fu kisi gudu na ini hemel; den gudu disi ben o meki taki a e kisi têgo libi èn te fu kaba a ben o kisi na okasi fu tiri nanga Krestes na ini hemel. A yonguman no ben de klariklari fu no teri ensrefi moro. „A gowe nanga sari, fu di a ben abi furu gudu” (Mateyus 19:22). Ma tra bakaman fu Yesus ben handri na wan tra fasi.
14. San fo fisiman du di Yesus gi den a kari fu waka na en baka?
14 Pikinmoro tu yari na fesi, Yesus ben gi wan srefi sortu kari na fo fisiman, namku Petrus, Andreas, Yakobus, nanga Yohanes. Di Yesus gi den a kari, dan tu fu den ben e fisi na a ten dati, èn den tu trawan ben e meki den fisinèt fu den. Yesus taigi den: „Un kon waka na mi baka, dan mi sa meki unu tron fisiman di e fanga libisma.” Te fu kaba, den ala fo gowe libi a fisiwroko fu den èn den waka baka Yesus den heri libi langa.—Mateyus 4:18-22.
15. Fa wan disiten Kotoigi fu Yehovah ben libi ala san a ben abi fu man waka baka Yesus?
15 Furu Kresten na ini a ten disi waka baka na eksempre fu den fo fisiman disi, na presi fu waka baka na eksempre fu a gudu yongu tiriman. Den gowe libi den gudu fu a grontapu disi nanga na okasi di den ben abi fu kisi biginen, soso fu di den ben wani dini Yehovah. „Di mi ben abi 22 yari, mi ben musu teki wan prenspari bosroiti,” na so Deborah e taki. A e fruteri: „Mi ben studeri Bijbel siksi mun kaba, èn mi ben wani gi mi libi abra na Yehovah, ma mi famiri ben e gens mi srefisrefi. Den ben gudu trutru, èn den ben feni taki mi ben o gi den syen na ini a libimakandra te mi ben o tron wan Kotoigi. Den ben gi mi 24 yuru fu bosroiti san mi wani: wan guduman libi, noso a waarheid. Efu mi ben o tan bumui nanga den Kotoigi, dan mi famiri ben o meki taki mi no kisi nowan pisi fu a famirigudu. Yehovah yepi mi fu teki a yoisti bosroiti èn a gi mi a krakti fu du san mi ben bosroiti. Mi tan 42 yari na ini a furuten diniwroko, èn a no e hati mi kwetikweti. Fu di mi no ben wani libi moro na wan fasi di e sori taki mi ben e prakseri misrefi nomo, noso di e sori taki mi ben e prakseri soso prisiri, meki mi libi abi trutru waarde èn mi de koloku; disi no ben de so nanga den famiriman fu mi. Makandra nanga mi masra, mi yepi moro leki wán hondro sma fu kon leri sabi a waarheid. Gi mi, den yeye pikin disi warti moro leki iniwan tra gudu.” Na so furu milyunmilyun Kotoigi fu Yehovah e si a tori tu. Fa a de nanga yu?
16. Fa wi kan sori taki wi no e libi gi wisrefi moro?
16 Fu di dusundusun Kotoigi fu Yehovah no wani libi gi densrefi moro, meki den go dini leki pionier, noso furuten Kownukondre preikiman. Tra Kotoigi di no abi na okasi fu go na ini a furuten diniwroko, ben kisi faya gi a pionierwroko, èn den e horibaka gi a Kownukondre preikiwroko so furu leki den man. Papa nanga mama e sori a srefi fasi disi te den e libi sani di densrefi ben sa wani du èn te den e gebroiki furu ten fu gi den pikin fu den leri na yeye fasi. Na a wan noso tra fasi, wi alamala kan sori taki wi e poti Kownukondre afersi na a fosi presi na ini wi libi.—Mateyus 6:33.
A lobi fu suma, e pusu wi?
17. San e pusu wi fu libi ala san wi abi gi a bun fu trawan?
17 A no makriki kwetikweti fu gebroiki ala sani di wi abi gi a bun fu trawan, fu di wi lobi den sma disi. Ma luku san na a sani di e pusu wi. Paulus ben skrifi: „A lobi di Krestes abi, e pusu wi, bika disi na san wi krutu, taki wán man dede gi ala sma . . . Èn a dede gi ala sma, so taki den wan di e libi, no musu libi gi densrefi moro, ma gi a sma di dede gi den èn di ben kisi wan opobaka” (2 Korentesma 5:14, 15). Na a lobi fu Krestes e pusu wi fu no libi gi wisrefi moro. Dati na trutru wan tranga sani di e pusu wi! Iya, fu di Krestes dede gi wi, meki wi e firi taki wi de fruplekti fu libi gi en, a no so? Fu tru, fu di wi de nanga tangi gi a fasi fa Gado nanga Krestes sori taki den lobi wi, meki dati pusu wi fu gi wi libi abra na Gado èn fu tron disipel fu Krestes.—Yohanes 3:16; 1 Yohanes 4:10, 11.
18. Fu san ede a abi winimarki te wi e gi ala sani di wi abi gi a bun fu trawan?
18 Wi e kisi winimarki te wi no e libi gi wisrefi moro? Baka di a gudu yongu tiriman no ben teki a kari fu Krestes èn a gowe, dan Petrus taigi Yesus: „Luku! Wi gowe libi ala sani èn wi waka kon na yu baka; san wi o kisi dan?” (Mateyus 19:27) Fu tru, Petrus nanga den tra apostel ben sori taki den no ben teri densrefi moro. Sortu wini den ben o kisi? Yesus ben taki fosi fu a grani di den ben o kisi fu tiri nanga en na ini hemel (Mateyus 19:28). Na a srefi okasi dati, Yesus ben kari den blesi di ibriwan fu den bakaman fu en ben o kisi. A ben taki: „Nowan sma libi oso noso brada noso sisa noso mama noso papa noso pikin noso pranigron fu mi ede èn fu a bun nyunsu ede, di no sa kisi wan hondro tron nownow, na ini a pisi ten disi . . . èn na ini a seti fu sani di e kon, têgo libi” (Markus 10:29, 30). Wi e kisi moro furu leki san wi ben libi na baka. Wi brada nanga sisa di de leki papa, mama, brada, sisa, nanga pikin gi wi, abi moro waarde leki iniwan sani di wi libi na baka gi a bun fu a Kownukondre, a no so? Suma ben abi a moro bun libi? Petrus, noso a gudu yongu tiriman?
19. (a) San e gi trutru koloku? (b) San wi sa luku na ini na artikel di e kon?
19 Nanga den sani di Yesus ben taki èn nanga den sani di a du, a ben sori taki wan sma o de koloku te a e gi sani èn te a e dini trawan, èn no te a e poti prakseri na ensrefi wawan (Mateyus 20:28; Tori fu den Apostel 20:35). Te wi no e libi gi wisrefi moro, ma wi e tan waka baka Krestes, dan wi o feni furu prisiri na ini a libi di wi abi nownowde, èn wi o abi a howpu fu libi fu têgo na ini a ten di e kon. A no de fu taki dati te wi no e teri wisrefi moro, dan wi o tron fu Yehovah. Sobun, wi e tron srafu fu Gado. Fu san ede a e tyari wini kon te wi de srafu fu Gado? Fa disi abi krakti tapu a fasi fa wi e teki bosroiti na ini wi libi? Na artikel di e kon, sa taki fu den aksi disi.
Yu e memre disi ete?
• Fu san ede wi musu feti nanga a firi di wi abi fu prakseri wisrefi nomo?
• San a wani taki dati wi no musu teri wisrefi moro, taki wi musu teki wi pina-postu, èn taki wi musu tan waka baka Yesus?
• San e pusu wi fu no libi gi wisrefi moro?
• Fu san ede a abi winimarki te wi e gebroiki ala san wi abi gi a bun fu trawan?
[Aksi fu a tori disi]
[Prenki na tapu bladzijde 11]
„Masra, sorgu bun gi yusrefi”
[Prenki na tapu bladzijde 13]
San ben tapu a yongu tiriman fu waka baka Yesus?
[Prenki na tapu bladzijde 15]
Na lobi e pusu den Kotoigi fu Yehovah fu dini leki fayafaya Kownukondre preikiman